Numbers 2

Romani Sinte 2024 (O Debleskro Lab 2024 (Sinte-Manouche))

← Chapter 1 Jump to: Chapter 3 →

1Oun o baro Devel rakras o Moseha oun o Aroneha oun penas lenge,

2har i Israelitarya hounte čivenn pengre plarhtene khera pre. Oun yob penas: Hakeno hounte čivell peskro kheer pre pash koy pre-čiddo kotar than, hoy sikrella, have menshendar yob hi. I tsele khera venn pre-čiddo troul o Debleskro plarhteno kheer.

3I platsa kol menshenge dran o kheer Youda hi glan o Debleskro kheer ap koy rig, kay o kham pre-djala, pash pengri pre-čiddi plarhta. Pash lende hi ninna lengre lourde, 74.600 (efta-deesh-te-star-zerya-shob-sheel) morsha. Lengro pralstouno hi o Nashon, koleskro dad o Amminadab hi.

5Langs lende hounte čivenn kol menshe pengre plarhtene khera pre, kay venna dran o kheer Issakar, ninna lengre lourde, 54.400 (panč-deesh-te-star-zerya-star-sheel) morsha pengro pralstuneha, o Netanel. Leskro dad hi o Souar.

7Koy pashel venna kol menshe, kay venna dran o kheer Zabulon, ninna lengre lourde, 57.400 (panč-deesh-te-efta-zerya-star-sheel) morsha pengro pralstuneha, o Eliab, koleskro dad o Helon hi.

9Kol tsele lourde, kay dran kal triin bare familye venn, hi halauter khetne 186.400 (sheel-orhta-deesh-te-shob-zerya-star-sheel) morsha. Oun kolla hounte djan glan kol vavarende.

10Oun kote, kay o kham tato hi, hounte čivenn kolla pengre plarhtene khera pre pash pengri pre-čiddi plarhta, kay venna dran o kheer Ruben. Pash lende hi ninna lengre lourde, 46.500 (star-deesh-shob-zerya-panč-sheel) morsha pengro pralstuneha, o Elizour, leskro dad hi o Shedehour.

12Langs lende hounte čivenn kol menshe pengre plarhtene khera pre, kay venna dran o kheer Simeon, ninna lengre lourde, 59.300 (panč-deesh-te-enya-zerya-triin-sheel) morsha. Lengro pralstouno hi o Sheloumiel, leskro dad hi o Sourishadday.

14Koy pashel venna kol menshe, kay venna dran o kheer Gad, ninna lengre lourde, 45.650 (star-deesh-te-panč-zerya-shob-sheel-te-panč-deesh) morsha pengro pralstuneha o Elyasaf, leskro dad hi o Degouel.

16Kol tsele lourde, kay venn dran kal triin bare familye, hi halauter khetne 151.450 (sheel-panč-deesh-te-yek-zerya-star-sheel-te-panč-deesh) morsha. Oun kolla hounte venn kol douyte, kay djan glan kol vavarende.

17Pal lende djan i Levitarya. Yon hounte lenn o Debleskro plarhteno kheer lentsa, kay o Debleskre deesh laba dren hi, oun djan mashkral kol vavar menshende. Oun yaake har yon pengre plarhtene khera pre čivenn, yaake hounte djan yon ninna doureder: hakeno ap koy platsa, kay lengre pre-čiddi plarhta hi.

18Ap koy rig, kay o kham tele djala, hounte čivenn kolla pengre plarhtene khera pre pash pengri pre-čiddi plarhta, kay venna dran o kheer Efrayim. Pash lende hi ninna lengre lourde 40.500 (star-deesh-zerya-panč-sheel) morsha. Lengro pralstouno hi o Elishama, leskro dad hi o Ammihoud.

20Langs lende hounte čivenn kol menshe pengre plarhtene khera pre, kay venna dran o kheer Manasse, ninna lengre lourde, 32.200 (triyanda-te-douy zerya-douy-sheel) morsha. Lengro pralstouno hi o Gamaliel, leskro dad hi o Pedazur.

22Koy pashel venna kol menshe, kay venna dran o kheer Benyamin, ninna lengre lourde, 35.400 (triyanda-te-panč-zerya-star-sheel) morsha. Lengro pralstouno hi o Abidan, leskro dad hi o Gidoni.

24Kol tsele lourde, kay venn dran kal triin bare familye, hi halauter khetne 108.100 (sheel-te-orhta-zerya-yek-sheel) morsha. Oun kolla hounte venn kol triinte, kay djan glan kol vavarende.

25Ap koy rig, kay o kham gar vella, hounte čivenn kolla pengre plarhtene khera pre pash pengri pre-čiddi plarhta, kay venna dran o kheer Dan. Pash lende hi lengre lourde 62.700 (shob-deesh-te-douy-zerya-efta-sheel) morsha. Lengro pralstouno hi o Ahiyeser, leskro dad hi o Ammishadday.

27Langs lende hounte čivenn kol menshe pengre plarhtene khera pre, kay venna dran kheer Asser, pengre lourdentsa, 41.500 (star-deesh-te-yek-zerya-panč-sheel) morsha. Lengro pralstouno hi o Pagiel, koleskro dad o Okran hi.

29Koy pashel venna kol menshe, kay venna dran o kheer Naftali, pengre lourdentsa, 53.400 (panč-deesh-te-triin-zerya-star-sheel) morsha. Lengro pralstouno hi o Ahira, koleskro dad o Enan hi.

31Kol tsele lourde, kay dran kal triin bare familye venn, hi halauter khetne: 157.600 (sheel-panč-deesh-te-efta-zerya-shob-sheel) morsha. Yon djan pal kol vavarende.

32Har i tsele morsha, kay nay venn lourde, dran haki familya an lila dre-činlo his, his le khetne 603.550 (shob-sheel-triin-zerya-panč-sheel-panč-deesh) morsha.

33Kokres i Levitarya van gar pre-činlo. Yaake penas kova o baro Devel ap o Moseste.

34Oun i Israelitarya kran halauter yaake, har o baro Devel kova o Moseske penas. Yon čivan pengre plarhtene khera pre, hakeno pash koy pre-čiddi plarhta, hoy sikras, have menshendar yob hi. Oun yaake djan le ninna doureder, hakeno peskre menshentsa oun peskri familyah.

← Chapter 1 Jump to: Chapter 3 →