bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Romani
/
Romani Sinte 2024 (O Debleskro Lab 2024 (Sinte-Manouche))
/
Numbers 20
Numbers 20
Romani Sinte 2024 (O Debleskro Lab 2024 (Sinte-Manouche))
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 21 →
1
Oun kol tsele Israelitarya van an o moulo tato them Tsin, an o ersto čon. Oun i menshe čivan pengre plarhtene khera pre pash o foro Kadesh. Oun i Miryam meras koy oun vas paskedo.
2
Oun i tsele menshen his kek pani, oun van khetne pash o Moseste oun o Aroneste.
3
Oun yon čingran ap o Mose oun penan: “Ah, te merams mer an ko tsiro, har mare menshe meran glan o baro Debleste!
4
Hoske anan t'mer o baro Debleskre menshen an kava moulo tato them, te meras mer kate mare firhentsa?
5
Oun hoske anan men dran o them Egiptia ap koy čilači platsa, kay nay čivah či an i phoub, hoy vell baro, kay kek fayge, kek drake, oun kek phabya hi, oun vitar kek pani pipaske koy hi?”
6
Koy djas o Mose oun o Aron i tsele menshendar krik, pash o voudar glan o Debleskro kheer, oun yon vitsran pen ap pengro mouy. Oun o Debleskro raylepen moukas pes lendar te dikell.
7
Oun o baro Devel rakras o Moseha oun penas:
8
“Le ko lengsto kasht oun le i tsele menshen khetne, tou oun tiro phraal, o Aron, oun rakrenn ap ko baro bar glan lengre yaka! Kova dell t'men pani. Yaake aness tou lenge pani dran ko baro bar, oun dess i tsele menshende te piyell oun lengre firhen ninna.”
9
Koy las o Mose ko lengsto kasht, kay glan o baro Debleste čiddo his, yaake har yob kova leske penas.
10
Oun o Mose oun o Aron lan kol tsele menshen khetne glan ko baro bar. Oun o Mose penas ap lende: “Shounenn, t'mer kay djan hako tsiro pal t'maro shero! Nay lah mer t'menge pani dran kava baro bar?”
11
Oun o Mose hadas peskro vast, oun das ko lengsto kashteha douy kope ap ko baro bar. Koy vas yaake boud pani dran vin, kay piyan i tsele menshe oun lengre firhe.
12
O baro Devel penas ap o Moseste oun ap o Aroneste: “T'mer patsan gar, hoy penom, oun sharan man gar glan kol Israelitarya. Doleske anenn t'mer gar kol menshen an ko them, hoy me len dau.”
13
Kava pani kharan le Meriba. Kate čingran i Israelitarya ap o baro Debleste. Oun kate sikras lo lende, kay yob čačepah o baro oun zorelo Devel hi.
14
Har hi le an o foro Kadesh, bičras o Mose yekes pash o baro rayeste pral kol Edomarya, oun moukas leske te penell: “Kova moukell touke tiro phraal Israel te penell: Tou djineh, havo pharo tsiro ap mende vas,
15
kay mare phoure an o them Egiptia djan, oun mer i rah tsiro an o them Egiptia djivam, oun kay kol Egiptarya menge oun mare phourenge o djipen phares kran.
16
Oun mer dam pal o baro Debleste gole. Kova shounas men oun bičras i bolepaskres. Oun yob anas men dran o them Egiptia vin. Kanna ham an Kadesh, i foro gar dour tiro themestar.
17
Mouk men mank tiro them te djal ap i vavar rig! Mer kamah ap o drom te ačell oun gar ap i harhetikri phoub oun an i drakengre themma te djal. Kamah vitar gar pani dran i brounne te piyell. Na-a, mer djah gar čačes, vitar gar serves, bis te vam ap i vavar rig.”
18
O baro ray pral o Edom penas ap lende: “Tou djas gar mank miro them! Te veh, vau me pash toute o rhareha.”
19
I Israelitarya penan ap leste: “Mer kamah ap ko shoukar drom te djal. Oun te piyah mer tiro pani, mer oun mare firhe, kamah mer kova playsrell. Mer kamah či har te djas mare heryentsa koy vergel.”
20
O baro ray penas: “Tou djas gar koy vergel.” Oun kol Edomarya djan vin ap ko drom pash lende boud zorele lourdentsa.
21
Yaake kran kol Edomarya, te djan kol Israelitarya gar mank lengro them. Oun o Israel djas i vavar drom.
22
Oun i tsele Israelitarya djan dran o foro Kadesh doureder, oun van pash koy berga Hor.
23
Oun o baro Devel rakras o Moseha oun o Aroneha pash koy berga Hor, hoy gar dour o themestar Edom hi, oun penas:
24
“O Aroneskro tsiro nashas tele, oun yob vell gar an ko them, kay dom i Israelitaryen. T'mer shounan gar ap kova, hoy penom pash o pani Meriba.
25
Le o Arones oun leskro čaves Elazar, oun an len ap koy berga Hor,
26
oun rib o Aroneske peskre rashayeskre koola vin, oun rib len leskro čaveste Elazar an! Oun o Aron merella kote.”
27
Koy kras o Mose yaake har o baro Devel leske penas. Oun yon djan ap koy berga Hor glan kol tsele menshende Israel.
28
Oun o Mose rivas o Aroneske i rashayeskre koola vin, oun rivas len leskro čaveste Elazar an. Oun o Aron meras koy, pre ap i berga. Oun o Mose oun o Elazar djan i berga tele.
29
Oun har kol tsele menshe dikan, kay o Aron moulo hi, rovas o tselo kheer Israel pral leste 30 (triyanda) divessa.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36