Exodus 35

Kinyarwanda 2012 (Bibiliya Ntagatifu)

← Chapter 34 Jump to: Chapter 36 →

1Musa ahamagaza imbaga yose y’Abayisraheli, arababwira ati «Nimwumve ibyo Uhoraho abategetse kujya mukora.

2Mu minsi itandatu muzakore imirimo, naho umunsi wa karindwi uzababere isabato ntagatifu, umunsi w’ikiruhuko weguriwe Uhoraho. Umuntu wese uzakora kuri uwo munsi azicwa.

3Ntimuzacana umuriro mu nzu yanyu n’imwe ku munsi w’isabato.»

4Musa abwira ikoraniro ryose ry’Abayisraheli aya magambo, ati «Nimwumve icyo Uhoraho yategetse.

5Nimugabanye ku bintu byanyu ituro ry’Uhoraho. Umuntu wese w’umutima utagundira azazanira Uhoraho imfashanyo ye: zahabu, na feza, n’umuringa,

6imyenda y’isine, n’iy’umuhemba, n’itukura, hariri inetereye, n’ubwoya bw’ihene,

7impu z’amapfizi y’intama zirabyemo ikigina, n’impu z’ibihura, n’ibiti by’iminyinya,

8n’amavuta y’imizeti yo gucana itara, imibavu igenewe kuvangwa n’amavuta yo gusiga, n’imibavu yo gutwika;

9amabuye y’agaciro, n’amabuye yo gutaka ku musanganyagihimba no ku musesuragituza.

10N’abakozi banyu bose b’abahanga nibaze, maze barangize icyo Uhoraho yategetse.

11Ibyo ni Ingoro n’ihema ryayo, umutwikiro waryo, ibifunga byaryo, imbaho zaryo, imitambiko yaryo, imiganda yaryo, n’ibishyigikizo byaryo;

12ubushyinguro n’imijishi yabwo, urwicurizo n’umubambiko ubikingiye;

13ameza hamwe n’imijishi yayo n’ibikoresho byayo byose, hamwe n’imigati y’umumuriko;

14ikinyarumuri cyo kumurika, hamwe n’ibikoresho byacyo, amatara yacyo n’amavuta y’imizeti akigenewe;

15urutambiro rw’imibavu n’imijishi; amavuta yo gusiga n’imibavu yo gutwika; umubambiko ukinze ku muryango w’Ingoro;

16urutambiro rw’ibitambo bitwikwa n’uruzitiro rwarwo rw’umuringa, imijishi yarwo n’ibikoresho byarwo byose; igikarabiro n’urugata rwacyo;

17imibambiko ikingiye urugo, inkingi zayo, ibishyigikizo byayo, n’umubambiko ukingiye irembo ry’urugo rw’Ingoro;

18imiganda y’Ingoro, imiganda y’inkike z’Ingoro hamwe n’ibiziriko byazo;

19imyambaro y’ibirori igenewe imihango mu Ngoro, imyambaro mitagatifu y’umuherezabitambo Aroni, n’imyambaro abahungu be bazambara batunganya imirimo y’ubuherezabitambo.»

20Nuko ikoraniro ryose ry’Abayisraheli rimaze kuva iruhande rwa Musa,

21ab’umutima ukeye kandi wuzuye ubuntu bose baraza, batanga umusanzu w’Uhoraho mu bwubatsi bw’ihema ry’ibonaniro, n’imirimo yaryo yose, n’imyambaro mitagatifu.

22Haza abagabo kimwe n’abagore; ab’umutima ugira ubuntu bazana amaherena, n’impeta, n’inigi, n’ibintu bya zahabu by’amoko yose, maze buri muntu wabituraga Uhoraho, akabimuhereza nk’uko batura zahabu.

23Bazana n’ibindi bafite imuhira: imyenda y’isine, n’iy’umuhemba n’itukura, hariri inetereye, n’ubwoya bw’ihene, impu z’amapfizi y’intama zirabyemo ikigina, n’impu z’ibihura.

24Abari bateganyije bose ituro rya feza n’umuringa, babizanira Uhoraho. Abari bafite imuhira ibiti by’iminyinya bigenewe imirimo yose y’ubwubatsi, barabizana.

25Abagore bose bari bafite ubuhanga bwo gukaraga ubudodo, barabuboha, barabuzana: ubw’isine, n’ubw’umuhemba n’ubw’umutuku, n’ubwa hariri inetereye.

26Abagore bose bari babifitiye ubuhanga, bakaraga ubwoya bw’ihene.

27Abatware b’imiryango bazana amabuye y’agaciro, n’amabuye yo gutaka ku musanganyagihimba no mu musesuragituza,

28bazana imibavu n’amavuta y’imizeti bigenewe amatara, amavuta yo gusiga n’imibavu yo gutwika.

29Mbese Abayisraheli bose, ari abagabo ari n’abagore, bafite umutima ukeye, bazanira Uhoraho amaturo bigeneye, kugira ngo batunganye imirimo yose Uhoraho yari yabategetse abitumye Musa.

30Nyuma Musa abwira Abayisraheli, ati «Nimurebe, Uhoraho yihamagariye mu izina Besaleli mwene Uri, umwuzukuru wa Huri, wo mu nzu ya Yuda.

31Yamwujujemo umwuka w’Imana, kandi yamuhaye ubuhanga, ubwenge, n’ubumenyi bw’imyuga iyo ari yo yose,

32kugira ngo ahimbe ibikoresho by’agaciro, bicuzwe muri zahabu, feza n’umuringa;

33kugira ngo aconge amabuye y’indobanure, abaze ibiti, anatunganye imirimo iyo ari yo yose.

34Yashyize kandi mu mutima we ingabire yo kubyigisha, nk’uko yayihaye na Oholiyabu mwene Ahisamaki, wo mu nzu ya Dani.

35Bombi yabujujemo ubwenge bwo gukora imirimo yose yo gusharaga, gushushanya, gutaka amabara ku myenda y’isine, y’umuhemba n’itukura, kuri hariri inetereye, no kuboha imyenda; mbese gutunganya amoko yose y’imirimo no guhimba ibikorwa by’ubwenge.

← Chapter 34 Jump to: Chapter 36 →