Acts 13

Sadri

1अंताकिया शहर केर कलीसिया में परमेश्‍वर केर संदेश के बताएक वाला आउर उपदेस देवेक वाला ढेइर आदमीमन रहैं, उमन में बरनाबास, सिमोन, जेकर दूसरा नाँव नीगर रहे आउर कुरेन शहर केर रहेक वाला लूकियुस, आउर मनाहेम जे चौथाई देस केर राजा हेरोदेस केर संगे-संगे बाइढ़ रहे आउर शाऊल।

2जब इमन उपास काइर के प्रभु केर भक्ति करत रहैं, तो पवितर आत्मा उमन से कहलक, “मोर उ काम लगिन बरनाबास आउर शाऊल के अलग करा, जेकर लगिन मोंय उमन के बोलाय हों।”

3तब उमन उपास प्रार्थना काइर के बरनाबास आउर शाऊल केर उपरे हाँथ रखलैं आउर उमन के परमेश्‍वर केर काम करेक लगिन भेजलैं।

4इ लेखे बरनाबास आउर शाऊल पवितर आत्मा केर चलाएक से अन्ताकिया शहर से सिलूकिया टापू केर नगर तक चाइल गेलैं आउर हूवाँ से जहाज उपरे चाइढ़ के साइप्रस टापू गेलैं।

5आउर सलमीस नगर में पोंहइच के परमेश्‍वर केर बचन के यहूदी मनक प्रार्थना घरमन में सुनालैं। यूहन्ना जेकर दूसरा नाँव मरकुस रहे, उमन केर संगे रइह के उ मनक मदइत करत रहे।

6इकर पाछे उमन गोटा टापू में एक नगर से दूसरा नगर होते पाफुस नगर तक पोहोंचलैं, हूवाँ बार-यीशु नाँव केर एगो यहूदी ओझा आउर परमेश्‍वर केर झूठा संदेश के बताएक वाला मिललक।

7उ राजपाल सिरिगयुस पौलुस केर संगे रहत रहे। राजपाल सिरिगयुस बुद्धिमान आदमी रहे। उ बरनाबास आउर पौलुस के अपन ठिना बोलाय के परमेश्‍वर केर बचन सुनेक चाहत रहे।

8मगर बार-यीशु जेकर दूसरा नाँव इलिमास रहे जेकर अर्थ ओझा हेके, उमन केर बिरोध करलक आउर राजपाल के यीशु केर उपरे बिसवास करेक से रोकेक चाहलक।

9तब शाऊल जेके पौलुस नाँव से हों जानल जात रहे, पवितर आत्मा से भाइर के उके टकटकी लगाय के देखलक आउर कहलक,

10“हे सोउब कपटी आउर सोउब चतुराई से भरल शैतान केर संतान! तोंय हरेक भला गोइठमन केर दुश्मन हेकिस, का तोंय प्रभु केर सोझ डहरमन के टेढ़ा करेक नी छोड़बे?

11अब देख, प्रभु तोके सजा देवेक वाला अहे, आउर तोंय थोरेक समय तक अंधरा रहबे आउर बेइर केर इंजोत के नी देखेक पारबे।” ओहे बेरा उकर आँइख केर सामने धुंधरा आउर अंधार होई गेलक आउर उ हिने-हुने छुवेक लगलक, जेकर से केऊ उकर हाँथ धाइर के लेई चलोक।

12इ घटना के देइख के राजपाल यीशु केर उपरे बिसवास करलक आउर उ प्रभु केर उपदेस से ताजुब रहे।

13पौलुस आउर उकर संगमन पाफुस नगर से समुदरी जहाज चाइढ़ के पंफूलिया परदेस केर पिरगा नगर में पोहोंचलैं। यूहन्ना जे मरकुस कहायला उमन के हुवाँय छोइड़ के यरुशलेम शहर घूइर गेलक।

14आउर पिरगा नगर से होई के उमन पिसिदिया परदेस केर अंताकिया शहर में पोहोंचलैं आउर उमन आराम केर दिन यहूदी मनक प्रार्थना घर में जाय के बाइठ गेलैं।

15मूसा केर नियम आउर परमेश्‍वर केर संदेश के बताएक वालामन केर किताब के पइढ़ सिराएक केर पाछे यहूदी मनक प्रार्थना घर केर सरदारमन उमन ठिना इ कइह भेजलैं, “हे भाईमन, अगर आदमीमन के उपदेस देवेक लगिन तोहर मन में कोनों आउर बचन अहे तो तोहरे हिंयाँ सुनावा।”

16तब पौलुस ठड़ाय के आउर उमन के शांत करेक लगिन हाँथ से इशारा काइर के कहलक, “हे इसराइली भाईमन आउर परमेश्‍वर से डराएक वाला परजाइत आदमीमन, सुना।

17इसराइली आदमीमन केर परमेश्‍वर हमर बाप दादामन के चुनलक। आउर जब उमन मिसर देस में परदेसी होई के रहत रहैं, तो उमन के ढेइर बढ़ालक आउर अपन बलवान हाँथ से उमन के मिसर देस केर गुलामी से निकलाय लानलक।

18उमन घरी-घरी उकर आगया के तोरलैं मगर परमेश्‍वर चालीस बरिस तक सुनसान ठाँव में उमन केर ब्यवहार के सहते रहलक।

19इकर पाछे परमेश्‍वर कनान देस में सात जाइतमन के नाश काइर के उ मनक देस के इमन केर अधिकार में देई देलक।

20इ सोउब होवेक में लगभग चाइर सौ पचास बरिस लगलक। इकर पाछे परमेश्‍वर अपन संदेश के बताएक वाला शमूएल केर आवेक तक उमन लगिन न्याय करेक वाला आदमीमन के ठहराते रहलक।

21शमूएल केर अगुवा रहते हें उमन अपन लगिन एगो राजा केर माँग करलैं आउर परमेश्‍वर उमन लगिन बिन्यामीन केर बंश से कीश केर बेटा शाऊल के राजा ठहरालक। उ चालीस बरिस तक उ मनक उपरे राइज करलक।

22फिन परमेश्‍वर शाऊल के राजा केर पद से हटाय के दाऊद के उ मनक राजा बनालक आउर उकर बारे में इ गवाही देलक, ‘मोके मोर मन केर मोताबिक एगो आदमी यिशै केर बेटा दाऊद मिल जाय हे, ओहे मोर सोउब इच्छा के पूरा करी।’

23परमेश्‍वर अपन करार केर मोताबिक एहे राजा दाऊद केर बंश में इसराइल केर आदमीमन लगिन एगो छुटकारा देवाइया यीशु के भेजलक।

24जेकर आवेक से पहिले यूहन्ना इसराइल देस केर सोउब आदमीमन के बतात रहे, ‘पाप करेक छोइड़ देवा आउर बपतिस्मा जल संस्कार लेवा, तब परमेश्‍वर तोहर पापमन के क्षमा करी।’

25जब यूहन्ना अपन ठहराल सेवा केर काम के पूरा करेक वाला रहे, तो उ कहलक, ‘तोहरे मोके जे बुझाथा, उ मोंय ना लगों। मगर देखा, जे मोर पाछे आवेक वाला अहे, उ मोर से महान अहे, मोंय तो उकर गोड़ केर जूता के खोलेक केर लाएक हों नखों।’

26हे मोर इसराइली भाईमन, तोहरे जे अब्राहम केर संतान हेका आउर परमेश्‍वर केर डार मानाला, परमेश्‍वर तोहर ठिना यीशु केर बारे में इ छुटकारा केर संदेश भेइज हे।

27यरुशलेम शहर केर रहेक वाला आदमीमन आउर उ मनक सरदारमन मसीह यीशु के नी चिन्हलैं, आउर उमन परमेश्‍वर केर संदेश के बताएक वालामन केर गोइठमन के हों नी बुझलैं, जेके उमन यहूदी मनक आराम केर दिन पढ़ैना। से लगिन उमन मसीह यीशु के दोषी ठहरालैं। इ लेखे उमन परमेश्‍वर केर संदेश के बताएक वालामन केर गोइठ के पूरा करलैं।

28उमन उके मौत केर सजा देवेक केर लायक उकर में कोनों दोष नी पालैं, फिन भी उमन राजपाल पिलातुस से उके मौत केर सजा देवेक केर माँग करलैं।

29आउर जब उमन उकर बारे में पवितर किताब में लिखल सोउब गोइठमन के पूरा करलैं, तो उके क्रूस से उतराय के कबर में रखलैं।

30मगर परमेश्‍वर उके तीसरा दिन मोरलमन में से फिन जियालक।

31आउर यीशु मसीह ढेइर दिन तक अपन उ चेलामन के देखाई देते रहलक, जेमन उकर संगे गलील परदेस से यरुशलेम शहर आय रहैं। अब ओहेमन आदमीमन केर सामने उकर गवाह हेकैं।

32हमरे तोहरे के उ शुभ समाचार के सुनाइला, जेकर बारे में परमेश्‍वर हमर बाप दादामन से करार काइर रहे।

33ओहे करार के परमेश्‍वर यीशु के मोरलमन में से फिन जियाय के उ मनक संतानमन लगिन मतलब हमर लगिन पूरा करलक। जइसन कि दूसरा भजन संहिता में परमेश्‍वर मसीह केर बारे में कइह हे, ‘तोंय मोर बेटा हेकिस, आइज मोंय तोके जनमाय हों।’

34परमेश्‍वर इ लेखे यीशु मसीह के मोरलमन में से फिन जियाएक केर बारे में कि उ कहियो नी सड़ी, इ गोइठ केर सबूत में परमेश्‍वर इ कइह रहे, ‘मोंय तोके पवितर आउर अटल आशीष देमूँ, जेकर करार मोंय राजा दाऊद से काइर रहों।’

35से लगिन राजा दाऊद एगो आउर भजन में इ कइह हे, ‘तोंय अपन पवितर आदमी के कबर में सड़ेक नी देबे।’

36काले कि राजा दाऊद तो परमेश्‍वर केर इच्छा केर मोताबिक अपन समय में उकर सेवा पूरा काइर के मोइर गेलक आउर अपन बाप दादामन में मिल गेलक आउर उकर काया सइड़ हों गेलक। इकर से हमरे जानिला कि दाऊद इ भजन में अपन बारे में नी गोठियाथे।

37मगर परमेश्‍वर यीशु मसीह केर बारे में गोठियाथे, जेके उ मोरलमन में से फिन जियालक, तो उ नी सड़लक।

38से लगिन, हे भाईमन, तोहरे इ जाइन लेवा कि एहे यीशु मसीह बटले तोहरे के इ पापमन केर क्षमा केर सुसमाचार देवल जायला।

39आउर जे गोइठमन से तोहरे मूसा केर नियम से निरदोष बनेक नी पारला, ओहे सोउब गोइठ में हरेक बिसवास करेक वाला आदमी यीशु मसीह बटले निरदोष बनेला।

40से लगिन सावधान रहा, कहीं एइसन ना होवोक कि परमेश्‍वर केर संदेश के बताएक वालामन केर इ गोइठ तोहर उपरे लागू ना होई जाओक,

41‘हे निंदा करेक वाला आदमीमन, देखा आउर ताजुब होवा, आउर मोइर मिट जावा, काले कि मोंय तोहर सामने इ काम करेक वाला अहों, जेकर बारे में अगर केऊ हों तोहरे के बतातक, तो तोहरे उकर उपरे कहियो बिसवास नी करता।’ ”

42जब पौलुस आउर बरनाबास प्रार्थना घर से बाहरे निकलत रहैं, तो आदमीमन उमन से बिनती करलैं कि अगला यहूदी मनक आराम केर दिन इकरे बारे में आगे आउर बताल जाओक।

43जब सभा उइठ गेलक तो यहूदी आदमीमन आउर यहूदी मत में आवल भक्तमन में से ढेइर आदमीमन पौलुस आउर बरनाबास केर पिछे होई गेलैं, आउर पौलुस आउर बरनाबास उमन के समझालैं कि परमेश्‍वर केर किरपा में बनल रहा।

44अगला आराम केर दिन नगर केर करीब-करीब सोउब आदमीमन परमेश्‍वर केर बचन सुनेक लगिन जमा होलैं।

45मगर यहूदी अगुवामन भीड़ के देइख के हिसिंगा से भाइर गेलैं आउर निंदा करते पौलुस केर गोइठमन केर बिरोध में कहेक लगलैं।

46तब पौलुस आउर बरनाबास निडर होई के कहलैं, “जरुरी रहे कि परमेश्‍वर केर बचन पहिले तोहरे के सुनाल जातक: मगर तोहरे सुनेक नी चाहाला आउर खुद के जुग-जुग केर जिंदगी के पावेक लाएक नी बनाथा। से लगिन हमरे परजाइत आदमीमन केर बटे जाथी।

47काले कि प्रभु हमरे के इ आगया देई हे, ‘मोंय तोहरे के परजाइत आदमीमन लगिन इंजोत बनाय हों, तोहरे के दुनिया केर हर ठाँव में आदमीमन ठिना जाय के उमन के बताएक अहे कि परमेश्‍वर उमन के कइसन छुटकारा देवेक चाहाथे।’ ”

48इ सुइन के परजाइत आदमीमन खुश होलैं, आउर परमेश्‍वर केर बचन केर बड़ाई करेक लगलैं। जेतना आदमीमन के जुग-जुग केर जिंदगी लगिन ठहराल जाय रहे, उमन बिसवास करलैं।

49आउर प्रभु केर बचन पूरा परदेस में फैलेक लगलक।

50मगर यहूदी अगुवामन इज्जतदार आउर भक्त जनानामन के आउर नगर केर ऊँचा ओहदा में बइठल आदमीमन के उसकालैं आउर पौलुस आउर बरनाबास केर बिरोध में हुड़दंग करुवाय के उमन के अपन सिमान से बाहरे निकलाय देलैं।

51तब पौलुस आउर बरनाबास उ मनक सामने अपन तरवा केर धूर के झाइर देलैं, उमन के इ देखाएक लगिन कि परमेश्‍वर से मिलेक वाला सजा लगिन उमन खुद जिम्मेदार हेकैं। इकर पाछे उमन इकुनियुम शहर चाइल गेलैं।

52आउर अन्ताकिया शहर में चेलामन खुशी आउर पवितर आत्मा से भरते गेलैं।

← Chapter 12 Jump to: Chapter 14 →