Acts 17

Sadri

← Chapter 16 Jump to: Chapter 18 →

1पौलुस आउर सीलास फिन अम्फिपुलिस आउर अपुल्लोनिया नगर से होई के थिस्सलुनीके शहर में आलैं, जहाँ यहूदी मनक प्रार्थना घर रहे।

2पौलुस अपन रीति केर मोताबिक हूवाँ उमन ठिना गेलक, आउर तीन हफ्ता तक हरेक आराम केर दिन पवितर किताब से उमन केर संगे बहस करलक।

3आउर सबूत केर साथ समझात रहे कि मसीह के दुःख उठाएक आउर मोरलमन में से फिन जी उठेक जरुरी रहे। पौलुस एहो कहलक, “एहे यीशु जेकर बारे में मोंय तोहरे के सुनावना, मसीह हेके।”

4उमन में से थोरेक यहूदी आदमीमन पौलुस आउर सीलास केर इ गोइठ से राजी होलैं, इमन केर अलावा परमेश्‍वर केर डार-भय मानेक वाला ढेइर यूनानी आदमीमन आउर ढेइर इज्जतदार जनानामन हों बिसवास करलैं।

5मगर यहूदी आदमीमन हिसिंगा करेक लगलैं आउर उमन थोरेक बजारु गुंडामन केर मदइत से भीड़ लगाय के नगर में दंगा करेक लगलैं। उमन पौलुस आउर सीलास के आदमीमन केर सामने लानेक केर बिचार से यासोन केर घर में हमला करलैं।

6जब उमन पौलुस आउर सीलास के नी पालैं तो यासोन आउर थोरेक बिसवासी भाईमन के नगर केर अधिकारीमन ठिना खींच लानलैं आउर चिल्लाय-चिल्लाय के कहेक लगलैं, “इ आदमीमन दुनिया केर हर ठाँव में परेशान काइर देई हैं, अब हिंयाँ हों आय जाय हैं।

7आउर यासोन इमन के अपन घर में रहेक लगिन ठाँव देई हे। इ सोउब आदमीमन महाराजा केर कानून केर बिरोध करैना आउर इ कहैना कि यीशु राजा हेके।”

8इ सुइन के भीड़ केर आदमीमन आउर नगर केर अधिकारीमन घबराय गेलैं।

9उमन यासोन आउर चेलामन के घूस लेई के छोइड़ देलैं।

10बिसवासी भाईमन तुरते राइत के पौलुस आउर सीलास के बिरीया नगर में भेइज देलैं। हूवाँ पोंहइच के उमन यहूदी मनक प्रार्थना घर गेलैं।

11इ नगर केर यहूदी आदमीमन थिस्सलुनीके शहर केर यहूदी आदमीमन से भला रहैं। उमन बड़का लालसा से प्रभु केर बचन के सुनत रहैं आउर रोज दिन पवितर किताब के पइढ़ के खोजत रहैं कि इ बचन सच में पवितर किताब में अहे कि निहीं।

12इकर चलते इ होलक कि ढेइर आदमीमन बिसवासी बाइन गेलैं। इमन केर अलावा प्रसिद्ध यूनानी जनानामन आउर ढेइर मरदानामन हों बिसवास करलैं।

13मगर जब थिस्सलुनीके शहर केर यहूदीमन जाइन गेलैं कि पौलुस बिरीया नगर में हों परमेश्‍वर केर बचन परचार कराथे, तो उमन हूवाँ हों आय के दंगा करेक आउर आदमीमन के भड़काएक शुरु करलैं।

14तब बिसवासी भाईमन तुरते पौलुस के समुदर केर किनारे भेइज देलैं, मगर सीलास आउर तीमुथियुस हुवाँय रइह गेलैं।

15पौलुस के पोंहचाएक वालामन उके एथेंस शहर पोंहचाय देलैं आउर पौलुस केर इ हुकूम पाय के बिरीया नगर घुरलैं कि सीलास आउर तीमुथियुस जेतना जल्दी होई सके मोर ठिना आय जाबैं।

16जब पौलुस एथेंस शहर में सीलास आउर तीमुथियुस केर आवेक केर आसरा देखत रहे, तो उ शहर में देवी-देवतामन केर मूर्तिमन के देइख के आत्मा में ढेइर दुःखी होलक।

17से लगिन उ यहूदी मनक प्रार्थना घर में यहूदी आदमीमन से आउर परमेश्‍वर केर डार-भय मानेक वाला यूनानी आदमीमन से आउर रोज दिन चौराहा में आवेक-जाएक वाला आदमीमन से बहस करत रहे।

18हूवाँ थोरेक इपिकूरी आउर स्तोईकी से जानल जाएक वाला सिखाएक वालामन से उकर भेंट होलक आउर उमन से बहस करेक लगलक। उमन में से थोरेक सिखाएक वालामन कहलैं, “इ बकवास करेक वाला आदमी हमरे से का कहेक चाहाथे?” मगर दोसर आदमीमन कहलैं, “इ बिदेसी देवतामन केर परचार मालूम होवेला।” काले कि पौलुस यीशु केर आउर उकर फिन से जी उठेक केर शुभ समाचार सुनात रहे।

19तब उमन पौलुस के अपन संगे अरियुपगुस नाँव केर सभा में लेई गेलैं आउर उकर से पूछलैं, “का हमरे जानेक पारिला कि तोंय इ कोन नवाँ शिक्षा देवाथिस?

20काले कि तोंय ताजुब गोइठमन के हमरे के सुनाइसला, से लगिन हमरे जानेक चाहिला कि इकर मतलब का हेके।”

21काले कि एथेंस शहर केर रहेक वाला आदमीमन आउर हूवाँ रहेक वाला परदेसी आदमीमन नवाँ-नवाँ गोइठमन के सुनाएक आउर सुनेक केर सिवाय आउर कोनों काम में समय नी बितात रहैं।

22तब पौलुस अरियुपगुस सभा केर माझे में ठड़ाय के इ कहेक लगलक, “हे एथेंस शहर केर रहेक वाला भला आदमीमन! तोहर बारे में मोंय मानोना कि तोहरे हर गोइठ में देवतामन केर बड़का मानेक वाला हेका।

23काले कि जब मोंय घुमत रहों तो तोहर पूजा करेक केर चीजमन में से एगो एइसन बेदी हों देखलों, जेकर में लिखल रहे, ‘अनजान ईश्‍वर केर लगिन।’ तोहरे जेके बेगर जानले पूजा कराला, मोंय तोहरे के उकरे समाचार के सुनावना।

24जे परमेश्‍वर दुनिया आउर उकर में जे कुछ अहे, उ सोउब चीजमन के बनालक। उ आकाश आउर धरती केर मालिक हेके, उ हाँथ केर बनाल मंदिरमन में नी रहेला।

25उके कोनों चीज केर जरुरत नखे आउर ना केऊ आदमी केर सेवा केर जरुरत अहे, काले कि ओहे सोउब के जिंदगी, साँस आउर जरुरत केर सोउब चीजमन के देवेक वाला हेके।

26उ एके गो पुरूष से सोउब आदमी जाइत के दुनिया में रहेक लगिन बनाय हे, आउर उमन केर ठहराल समय आउर रहेक केर सीमानमन के बाइंध हे।

27परमेश्‍वर एइसन इ लगिन करलक ताकि आदमीमन परमेश्‍वर के खोजोक आउर खोजते-खोजते उके पाय जाओक, फिन भी उ हमर में से केकरो से दूर नखे।

28काले कि उकरे में हमरे जिंदा रहिला, आउर चलिला फिरिला आउर स्थिर रहिला। जइसन तोहरे केर थोरेक दोहा लिखेक वालामन हों कइह हैं, ‘हमरे हों उकरे बंश हेकी।’

29से लगिन परमेश्‍वर केर संतान होई के हमरे के इ समझेक नी चाही कि ईश्‍वर, सोना या रुपा या पखना केर नियर अहे, जे आदमी केर कारीगरी आउर सोच से बनाल जाय हे।

30अब तक तो परमेश्‍वर आदमीमन केर नी जानेक केर चलते इके अनदेखा करते आय हे, मगर अब उकर आगया इ हेके कि हर ठाँव केर सोउब आदमीमन पाप करेक छोइड़ देवोक।

31काले कि परमेश्‍वर एक दिन ठहराय हे, जेकर में उ अपन ठहराल आदमी से दुनिया केर आदमी मनक न्याय करी। आउर परमेश्‍वर उ ठहराल आदमी के मोरलमन में से फिन जियाय के इ गोइठ केर सबूत देई दे हे।”

32मोरलमन केर फिन से जी उठेक केर गोइठ सुइन के थोरेक आदमीमन तो मजाक करेक लगलैं, मगर थोरेक आदमीमन कहलैं, “इ गोइठ केर बारे में हमरे तोर से फिन कहियो सुनब।”

33उ बेरा पौलुस उमन केर माझे से निकइल के चाइल गेलक।

34फिन भी थोरेक आदमीमन उकर संगे मिल गेलैं, आउर प्रभु यीशु केर उपरे बिसवास करलैं। जेमन में दियुनुसियुस जे अरियुपगुस सभा केर सदस्य रहे, आउर दमरिस नाँव केर एगो जनाना रहे आउर उमन केर संगे आउर हें आदमीमन रहैं।

← Chapter 16 Jump to: Chapter 18 →