1 John 2

Shan

← Chapter 1 Jump to: Chapter 3 →

1လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ၼင်ႇႁိုဝ်သူတၵ်းဢမ်ႇႁဵတ်းတူႉၸရိူၵ်ႈၸိုင် ၵဝ်တႅမ်ႈလွင်ႈတၢင်းၸိူဝ်းၼႆႉသေလႄႈ ပၼ်ငိၼ်းၵႂႃႇတီႈသူဢေႃႈ။ ပေႃးသေၵေႃႉသေၵူၼ်းႁဵတ်းတူႉၸရိူၵ်ႈဢပႅတ်ႈမႅၼ်ႈၸိုင် ၸဝ်ႈဢမူႉသွင်ႇႁဝ်း ဢၼ်ဝႃႈ ယေႇသူႉၶရိၸ်ႈ ၸဝ်ႈဢၼ်သိုဝ်ႈတေႃႇၼၼ်ႉ မီးယူႇၵႃႈတီႈပေႃႈၸဝ်ႈဢေႃႈ။-

2ၸဝ်ႈၼၼ်ႉပဵၼ်လွင်ႈဢၼ် တၵ်းၽေႇဢပႅတ်ႈႁဝ်းၵူၺ်းဢမ်ႇၵႃး၊ ပဵၼ်လွင်ႈဢၼ်တၵ်းၽေႇဢပႅတ်ႈၵူၼ်းလေႃးၵီႇ တင်းသဵင်ႈတင်းလူင်ဢေႃႈ။

3ႁဝ်းတၵ်းလႆႈႁူႉလွင်ႈဢၼ်တူဝ်ၸဝ်ႈၵဝ်ႇ ႁူႉၸၵ်းၸဝ်ႈၼၼ်ႉၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ပေႃးႁဝ်းၵမ်ၵျၢင်ႉပိင်းၺၢပ်ႈၸဝ်ႈ တင်းလၢႆၸိုင် ႁဝ်းလႆႈႁူႉဢေႃႈ။-

4ၵေႃႉဢၼ်ဝႃႈ၊ ၵဝ်ႁူႉၸဝ်ႈၼၼ်ႉယူႇဢေႃႈ၊ ဝႃႈၼင်ႇၼႆလႄႈ ဢမ်ႇၵမ်ဢမ်ႇၵျၢင်ႉပိင်းၺၢပ်ႈမၼ်းၸဝ်ႈတင်းလၢႆၼၼ်ႉၸိုင် ပဵၼ်ၵေႃႉဢၼ် လၢတ်ႈမူႉသႃႇလႄႈသဵတ်ႈၸႃႇဢမ်ႇမီးၵႃႈၼႂ်းမၼ်း။-

5ၵေႃႉဢၼ်ထွမ်ႇဢဝ်ၵႂၢမ်းၸဝ်ႈၼၼ်ႉၸမ်ႉ၊ ပျေႉၸုမ်ႇတင်း တၢင်းႁၵ်ႉမႅတ်ႈတႃႇၽြႃးပဵၼ်ၸဝ်ႈ ဢမၢၼ်ႇၶၼ်ပဵၼ်ဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈ ႁဝ်းလႆႈႁူႉလွင်ႈဢၼ် ႁဝ်းမီးၼႂ်းၸဝ်ႈၼၼ်ႉဢေႃႈ။-

6ၵေႃႉဢၼ်ဝႃႈ၊ ၵဝ်တႄႇယူႇၼႂ်းၸဝ်ႈၼၼ်ႉဢေႃႈ၊ ဝႃႈၼင်ႇၼႆၼၼ်ႉတၵ်းလႆႈၵမ်ၵျၢင်ႉ ၸိူဝ်ႉၼင်ႇဢၼ်ၸဝ်ႈၼၼ်ႉ ၵမ်ၵျၢင်ႉၼၼ်ႉဢေႃႈ။

7ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ပိင်းၺၢပ်ႈဢၼ်ၵဝ်တႅမ်ႈဝႆႉတီႈသူၼၼ်ႉ ပဵၼ်ပိင်းၺၢပ်ႈဢၼ်မႂ်ႇဢမ်ႇၸႂ်ႈ။ ပဵၼ်ပိင်းၺၢပ်ႈဢၼ်ၵဝ်ႇဢၼ်မီးတီႈသူၸႃႉၸဵမ်မိူဝ်ႈဢွၼ်ၼႆႉၼၼ်ႉဢေႃႈ။ ပိင်းၺၢပ်ႈဢၼ်ၵဝ်ႇၸမ်ႉ၊ ပဵၼ်တေႇသၼႃႇဢၼ်သူလႆႈငိၼ်း ၸႃႉၸဵမ်မိူဝ်ႈဢွၼ်ၼႆႉၼၼ်ႉဢေႃႈ။-

8ၼႄးၼိုင်ႈၸမ်ႉ၊ ၵဝ်တႅမ်ႈပိင်းၺၢပ်ႈဢၼ်မႂ်ႇဝႆႉတီႈသူဢေႃႈ။ ပဵၼ်ဢၼ်မႂ်ႇၼႂ်းၸဝ်ႈၼၼ်ႉ ဢိၵ်ႇတင်းၼႂ်းသူဢမၢၼ်ႇၶၼ်ပဵၼ်ဢေႃႈ။ လွင်ႈမၼ်းၸမ်ႉ ဢၼ်လပ်းသိင်ႇႁၢႆလၢႆၵႂႃႇယူႇလႄႈ ဢၼ်လႅင်းဢၼ်မၢၼ်ႇဢၼ်မႅၼ်ႈၼၼ်ႉ ႁိူဝ်ႈလႅင်းမႃးယူႇဢေႃႈ။-

9ၵေႃႉဢၼ်ဝႃႈ၊ ၵဝ်မီးၼႂ်းဢၼ်လႅင်းဢေႃႈ၊ ဝႃႈၼင်ႇၼႆလႄႈ ၸင်းပီႈၼွင်ႉတူဝ်ၸဝ်ႈၵဝ်ႇယူႇၼၼ်ႉ ယင်းမီးယူႇၼႂ်းဢၼ်လပ်းသိင်ႇတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။-

10ၵေႃႉဢၼ်ႁၵ်ႉပီႈၼွင်ႉတူဝ်ၸဝ်ႈၵဝ်ႇၼၼ်ႉ တႄႇယူႇၼႂ်းဢၼ်လႅင်းဢေႃႈ။ လွင်ႈဢၼ်တၵ်းတိူဝ်ႉမႅၼ်ႈလႄႈလူမ်ႉ ဢမ်ႇမီးၵႃႈတီႈၵေႃႉၼၼ်ႉ။-

11ၵေႃႉဢၼ်ၸင်းပီႈၼွင်ႉတူဝ်ၸဝ်ႈၵဝ်ႇၼၼ်ႉ မီးယူႇၼႂ်းဢၼ်လပ်းသိင်ႇလႄႈ ၵႂႃႇမႃးၼႂ်းဢၼ်လပ်းသိင်ႇယူႇဢေႃႈ။ မၼ်းၼၼ်ႉ ဢမ်ႇႁူႉလွင်ႈဢၼ်တူဝ်ၸဝ်ႈၵဝ်ႇၵႂႃႇၵႃႈတီႈလႂ်ၼၼ်ႉ ၵွပ်ႈပိူဝ်ႈဢၼ်လပ်းသိင်ႇၼၼ်ႉ ႁႂ်ႈမၢၵ်ႇတႃမၼ်းဢမ်ႇႁၼ်လႆႈၼၼ်ႉ။-

12လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ပိူဝ်ႈဢၼ်သူၵၢင်းလွတ်ႈတင်းဢပႅတ်ႈတင်းလၢႆ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၸဝ်ႈၼၼ်ႉလႄႈ ၵဝ်တႅမ်ႈပၼ်ၵႂႃႇတီႈသူဢေႃႈ။-

13ပေႃႈၶဝ်ဢိူၺ်း၊ ပိူဝ်ႈဢၼ်သူႁူႉၸဝ်ႈဢၼ်မီးယူႇၸႃႉၸဵမ်မိူဝ်ႈၵေႃႇၸႃႉဢွၼ်ၼႆႉၼၼ်ႉလႄႈ ၵဝ်တႅမ်ႈပၼ်ၵႂႃႇတီႈသူဢေႃႈ။ ၽူႈမၢဝ်ႇၶဝ်ဢိူၺ်း၊ ပိူဝ်ႈဢၼ်သူပႄႉၼႅင်ႇမႃႇၼၢတ်ႈလႄႈ ၵဝ်တႅမ်ႈပၼ်ၵႂႃႇတီႈသူဢေႃႈ။ လုၵ်ႈလၢင်းၶဝ်ဢိူၺ်း၊ ပိူဝ်ႈဢၼ်သူႁူႉပေႃႈၸဝ်ႈလႄႈ ၵဝ်တႅမ်ႈပၼ်ၵႂႃႇတီႈသူဢေႃႈ။-

14ပေႃႈၶဝ်ဢိူၺ်း၊ ပိူဝ်ႈဢၼ်သူႁူႉၸဝ်ႈဢၼ်မီးယူႇ ၸႃႉၸဵမ်မိူဝ်ႈၵေႃႇၸႃႉဢွၼ်ၼႆႉၼၼ်ႉလႄႈ ၵဝ်တႅမ်ႈပၼ်ၵႂႃႇတီႈသူယဝ်ႉ။ ၽူႈမၢဝ်ႇ ၶဝ်ဢိူၺ်း၊ ပိူဝ်ႈဢၼ်သူမီးဢဵၼ်မီးႁႅင်း၊ သူဢိင်ပိုင်ႈၼုၵ်ႈၵပၢတ်ႈၽြႃးပဵၼ်ၸဝ်ႈ၊ သူပႄႉၼႅင်ႇမႃႇၼၢတ်ႈလႄႈ ၵဝ်တႅမ်ႈပၼ်ၵႂႃႇတီႈသူယဝ်ႉ။

15ယႃႇပေႁၵ်ႉပေပႅင်းလေႃးၵႃႉၼႆႉ ဢိၵ်ႇတင်းၶိူင်ႈပိူင်ဢၼ်မီးၼႂ်းလေႃးၵႃႉၼႆႉ။ ၵေႃႉဢၼ်ႁၵ်ႉလေႃးၵႃႉၼႆႉၼၼ်ႉၸမ်ႉ၊ တၢင်းဢၼ်ႁၵ်ႉပေႃႈၸဝ်ႈဢမ်ႇမီးၵႃႈၼႂ်းမၼ်း။-

16လွင်ႈတၢင်းၵႃႈဢၼ်မီးၼႂ်းလေႃးၵႃႉၼႆႉ ဢၼ်ဝႃႈတၢင်းဢၼ်တူဝ်ၵႃႇယႃႉၸွႆးၸပ်း၊ တၢင်းဢၼ်မၢၵ်ႇတႃၸွႆးၸပ်း၊ တၢင်းဢၼ်ဢုပ်ႇဝၢဝ်းၼႂ်းၸေးၸိမ်ႇလေႃးၵီႇၸိူဝ်းၼႆႉၸိုင် ဢမ်ႇၸၢပ်ႈသႅင်ႇၵၼ်တင်းပေႃႈၸဝ်ႈ၊ ၸၢပ်ႈသႅင်ႇၵၼ်တင်းလေႃးၵႃႉၼႆႉၵူၺ်းဢေႃႈ။-

17လေႃးၵႃႉၼႆႉဢိၵ်ႇတင်း တၢင်းဢၼ်ၸွႆးၸပ်းလေႃးၵႃႉၼႆႉ ၸၢင်ႈသုတ်းႁၢႆဝၢႆးၵႂႃႇဢေႃႈ။ ၵေႃႉဢၼ်ၵမ်ၵျၢင်ႉ ၸွမ်းၼင်ႇဢလူဝ်ႇၽြႃးပဵၼ်ၸဝ်ႈၸမ်ႉ၊ တႄႇယူႇၼိၵ်ႈၸႃႉထႃႇဝရႃႉဢေႃႈ။

18လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ၶိင်ႇၵႃႇလႃႉမိူဝ်ႈလဵဝ်ၼႆႉ ပဵၼ်ၶိင်ႇၵႃႇလႃႉ လိုၼ်းလင်သုတ်းဢေႃႈ။ ၵႃႈၼင်ႇဢၼ်သူလႆႈငိၼ်း လွင်ႈဢၼ် ဢၼ်ႇတီႉၶရိၸ်ႈ ဢၼ်ဝႃႈရၢၼ်ႇသူႇၸဝ်ႈၶရိၸ်ႈၼၼ်ႉ တၵ်းပေႃႇမႃးၼၼ်ႉ၊ တေႃႈလဵဝ်ၼႆႉၵေႃႈ ဢၼ်ႇတီႉၶရိၸ်ႈ မီးယူႇၼမ်ၼႃႇဢေႃႈ။ ၵွပ်ႈႁွႆးၼႆႉလႄႈ ႁဝ်းလႆႈႁူႉလွင်ႈဢၼ်ၶိင်ႇၵႃႇလႃႉ မိူဝ်ႈလဵဝ်ၼႆႉ ပဵၼ်ၶိင်ႇၵႃႇလႃႉလိုၼ်းလင်သုတ်းၼၼ်ႉဢေႃႈ။-

19ၶဝ်ၼၼ်ႉဢွၵ်ႇသေၵႃႈၼႂ်းႁဝ်းၵႂႃႇဢေႃႈ။ ၼႂ်းဝႃႈၼၼ်သေၵေႃႈ ၸႃႉၸဵမ်မိူဝ်ႈဢွၼ်ၼႆႉၼၼ်ႉလႄႈ ၶဝ်ဢမ်ႇၸၢပ်ႈသႅင်ႇၵၼ်တင်းႁဝ်း။ ပေႃးၶဝ်ၸၢပ်ႈသႅင်ႇၵၼ်တင်းႁဝ်းၸိုင် ၶဝ်တၵ်းယူႇလူၺ်ႈၵၼ်တင်းႁဝ်းဢေႃႈ။ ၶဝ်ဢွၵ်ႇသေၵႃႈၼႂ်းႁဝ်းၵႂႃႇႁႂ်ႈလွင်ႈဢၼ်ၶဝ် ဢမ်ႇၸၢပ်ႈသႅင်ႇၵၼ်တင်းႁဝ်းၼၼ်ႉ လႆႈထၢင်ႇသႃးဢေႃႈ။

20သူလႆႈၶၢမ်ႇဢဝ်ၽိၵ်ႈသိၵ်ႈ ၵျေးၸူးၸဝ်ႈ ၵႃႈၼႂ်းမိုဝ်းၸဝ်ႈဢၼ်မူတ်းၸၢင်ႇလႄႈ သူႁူႉလွင်ႈတၢင်းၵူႈၸိူဝ်ႉၵူႈပိူင်ဢေႃႈ။-

21ၵွပ်ႈပိူဝ်ႈဢၼ်သူ ဢမ်ႇႁူႉသမ်ႇမႃႇတြႃးလႄႈ ၵဝ်တႅမ်ႈပၼ်ၵႂႃႇတီႈသူဢမ်ႇၸႂ်ႈ။ ၵွပ်ႈပိူဝ်ႈဢၼ်သူႁူႉသမ်ႇမႃႇတြႃး ဢိၵ်ႇတင်းလွင်ႈဢၼ် မူႉသႃႇၵႃႈမီး ဢမ်ႇၸၢပ်ႈသႅင်ႇၵၼ်တင်းသမ်ႇမႃႇတြႃးၼၼ်ႉလႄႈ ၵဝ်တႅမ်ႈပၼ်ၵႂႃႇတီႈသူဢေႃႈ။-

22ၵေႃႉဢၼ်သုင်းမူႉသႃႇၸမ်ႉ၊ ပဵၼ်ၽူႈလႂ်။ ပဵၼ်ၵေႃႉဢၼ်ထဵင်ပႅတ်ႈလႄႈဝႃႈ ယေႇသူႉ ဢမ်ႇၸႂ်ႈၸဝ်ႈၶရိၸ်ႈ၊ ဝႃႈၼင်ႇၼႆၼၼ်ႉဢေႃႈ။ ၵေႃႉဢၼ်ထဵင်ပႅတ်ႈပေႃႈၸဝ်ႈ ဢိၵ်ႇတင်းလုၵ်ႈၸဝ်ႈၼၼ်ႉ ပဵၼ် ဢၼ်ႇတီႉၶရိၸ်ႈ ဢေႃႈ။-

23ၵေႃႉဢၼ်ထဵင်ပႅတ်ႈလုၵ်ႈၸဝ်ႈၸမ်ႉ၊ ဢမ်ႇႁူႉပေႃႈၸဝ်ႈ။ ၵေႃႉဢၼ်ႁပ်ႉတုင်းဢဝ်လုၵ်ႈၸဝ်ႈၸမ်ႉ၊ ႁူႉပေႃႈၸဝ်ႈဢေႃႈ။

24ႁႂ်ႈတေႇသၼႃႇ ဢၼ်သူလႆႈငိၼ်းၸႃႉၸဵမ်မိူဝ်ႈၵေႃႇၸႃႉ ဢွၼ်ၼႆႉၼၼ်ႉ တႄႇယူႇၼႂ်းသူတႃႉ။ ပေႃးတေႇသၼႃႇၼၼ်ႉ တႄႇယူႇၼႂ်းသူၸိုင် သူတၵ်းလႆႈတႄႇယူႇၼႂ်းလုၵ်ႈၸဝ်ႈ ဢိၵ်ႇတင်းၼႂ်းပေႃႈၸဝ်ႈဢေႃႈ။-

25ၵတီႉၸဝ်ႈဢၼ်မၼ်းၸဝ်ႈပၼ်တီႈႁဝ်းၸမ်ႉ၊ ပဵၼ်ၵတီႉၸဝ်ႈဢၼ်မၼ်းၸဝ်ႈ ႁပ်ႉတုင်းဢဝ်ဢသၢၵ်ႈထႃႇဝရႃႉဢေႃႈ။

26ၵဝ်တႅမ်ႈလွင်ႈၶဝ်ၸိူဝ်းဢၼ် ပႅတ်ႉလႅၼ်သူၼၼ်ႉ ပၼ်ၵႂႃႇတီႈသူၸိူဝ်ႉၼင်ႇၼႆဢေႃႈ။-

27ၵူၺ်းၵႃႈၽိၵ်ႈသိၵ်ႈၵျေးၸူးၸဝ်ႈ ဢၼ်သူလႆႈၶၢမ်ႇဢဝ်ၵႃႈၼႂ်းမိုဝ်းၸဝ်ႈဢၼ်မူတ်းၸၢင်ႇၼၼ်ႉ တႄႇယူႇၼႂ်းသူလႄႈ သူဢမ်ႇမီးလွင်ႈဢၼ် ၽူႈလႂ်တၵ်းလႆႈသင်ႇသွၼ်သုင်းမႃႉပၼ်တီႈသူ။ ၵႃႈၼင်ႇဢၼ် ၽိၵ်ႈသိၵ်ႈၵျေးၸူးၸဝ်ႈၼၼ်ႉသင်ႇသွၼ်ပၼ် လွင်ႈတၢင်းၵႃႈမီးတင်းသဵင်ႈတင်းလူင်တီႈသူလႄႈ ႁဵတ်းၸိူဝ်ႉၼင်ႇႁၢင်ႈပဵၼ်ၵူၺ်းဢမ်ႇၸႂ်ႈ၊ ပဵၼ်တႄႉတႄႉဝႃႈဝႃႈၼၼ်ႉ၊ သူဢွၼ်ၵၼ်တႄႇယူႇၼႂ်းလုၵ်ႈၸဝ်ႈတႃႉ။-

28တေႃႈလဵဝ်ၼႆႉ လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ဢွၼ်ၵၼ်တႄႇယူႇၼႂ်းလုၵ်ႈၸဝ်ႈ လွင်ႈၼင်ႇႁိုဝ် ပေႃးမၼ်းၸဝ်ႈထၢင်ႇသႃးပေႃႇမႃးၸိုင် တၵ်းမီးဢၶႂၢင်ႉဢၼ်ႁတ်းႁၢၼ်လႄႈ ၵၢင်းလွတ်ႈတင်းတၢင်းဢၼ်ဢူၵ်းဢၼ်ဢၢႆ ၵႃႈတီႈၽၢႆႇၼႃႈမၼ်းၸဝ်ႈ ၼႂ်းမိူဝ်ႈဢၼ်မၼ်းၸဝ်ႈပေႃႇမႃးၼၼ်ႉတႃႉ။-

29ပေႃးသူႁူႉလွင်ႈဢၼ်ၽြႃးပဵၼ်ၸဝ်ႈ ပဵၼ်ဢၼ်သိုဝ်ႈတေႃႇၼၼ်ႉၸိုင် သူဢွၼ်ၵၼ်ႁူႉလွင်ႈဢၼ် ၵေႃႉဢၼ်ၵမ်ၵျၢင်ႉတြႃးတၢင်းဢၼ်သိုဝ်ႈတေႃႇၼၼ်ႉ ပဵၼ်ၵေႃႉဢၼ်ၽြႃးပဵၼ်ၸဝ်ႈႁႂ်ႈၵိူတ်ႇပဵၼ်မႃးၼၼ်ႉဢေႃႈ။

← Chapter 1 Jump to: Chapter 3 →