1 John 5

Shan

← Chapter 4 Jump to:

1ၵေႃႉဢၼ်ယုမ်ႇမၢတ်ႈလႄႈဝႃႈ၊ ယေႇသူႉ ပဵၼ်ၸဝ်ႈၶရိၸ်ႈဢေႃႈ၊ ဝႃႈၼင်ႇၼႆၼၼ်ႉၸမ်ႉ၊ ပဵၼ်ၵေႃႉဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးဢေႃႈ။ ၵေႃႉဢၼ်ၸၢင်ႈႁၵ်ႉမၼ်းၸဝ်ႈ ဢၼ်ႁႂ်ႈၵိူတ်ႇပဵၼ်မႃးၼၼ်ႉ ၸၢင်ႈႁၵ်ႉၵေႃႉဢၼ်မၼ်းၸဝ်ႈ ႁႂ်ႈၵိူတ်ႇပဵၼ်မႃး ၼၼ်ႉဢေႃႈ။-

2ပေႃးႁဝ်းႁၵ်ႉၽြႃးပဵၼ်ၸဝ်ႈလႄႈ ပႂ်ႉၵမ်ပႂ်ႉၸွမ်းပိင်းၺၢပ်ႈမၼ်းၸဝ်ႈ တင်းလၢႆယူႇၸိုင် ႁဝ်းႁူႉလွင်ႈဢၼ်ႁဝ်းႁၵ်ႉ လုၵ်ႈၽြႃးပဵၼ်ၸဝ်ႈ တင်းလၢႆၼၼ်ႉယူႇဢေႃႈ။-

3တၢင်းဢၼ်ပႂ်ႉၵမ်ပႂ်ႉၸွမ်း ပိင်းၺၢပ်ႈၸဝ်ႈၸိူဝ်းၼၼ်ႉ ႁွတ်ႈထိုင်တၢင်းဢၼ် ႁၵ်ႉၽြႃးပဵၼ်ၸဝ်ႈဢေႃႈ။ ပိင်းၺၢပ်ႈမၼ်းၸဝ်ႈၸိူဝ်းၼၼ်ႉၸိုင် ၵမ်ယၢပ်ႇၸွမ်းယၢပ်ႇဢမ်ႇၸႂ်ႈ။-

4ၵေႃႉဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးၼၼ်ႉၸမ်ႉ၊ ၸၢင်ႈပႄႉၼႅင်ႇလေႃးၵႃႉၼႆႉဢေႃႈ။ လွင်ႈတၢင်းဢၼ်ပႄႉၼႅင်ႇ လေႃးၵႃႉၼႆႉၸမ်ႉ၊ ပဵၼ်တၢင်းဢၼ် ႁဝ်းယုမ်ႇမၢတ်ႈဢေႃႈ။-

5လိူဝ်သေၵေႃႉဢၼ်ယုမ်ႇမၢတ်ႈလွင်ႈဢၼ် ယေႇသူႉ ပဵၼ်လုၵ်ႈၽြႃးပဵၼ်ၸဝ်ႈၼၼ်ႉ ၽူႈလႂ်တၵ်းပႄႉၼႅင်ႇလေႃးၵႃႉၼႆႉလႆႈ။

6ၸဝ်ႈၼၼ်ႉၸမ်ႉ၊ ပဵၼ်ၵေႃႉဢၼ်မႃး လူၺ်ႈၼမ်ႉလူၺ်ႈလိူတ်ႈ ဢၼ်ဝႃႈ ယေႇသူႉၶရိၸ်ႈ ၼၼ်ႉဢေႃႈ။ မႃးလူၺ်ႈၼမ်ႉၵူၺ်းဢမ်ႇၸႂ်ႈ။ မႃးလူၺ်ႈၼမ်ႉဢိၵ်ႇတင်းလူၺ်ႈလိူတ်ႈဢေႃႈ။ ဝီႉၺိၺ်ႇၸဝ်ႈၵေႃႈၶၢမ်ႇသၢၵ်ႈသေႇ ၵွပ်ႈပိူဝ်ႈဢၼ်ဝီႉၺိၺ်ႇၸဝ်ႈ ပဵၼ်သမ်ႇမႃႇတြႃးဢေႃႈ။-

7မီးဢၼ်ၶၢမ်ႇသၢၵ်ႈသေႇသၢမ်ပႃးဢၼ်ဝႃႈ ဝီႉၺိၺ်ႇၸဝ်ႈပႃးၼိုင်ႈ၊ ၼမ်ႉပႃးၼိုင်ႈ၊ လိူတ်ႈပႃးၼိုင်ႈလႄႈ၊-

8သၢမ်ပႃးၼႆႉပဵၼ်ဢၼ်လဵဝ်ၵၼ်ဢေႃႈ။-

9ပေႃးႁဝ်းယုမ်ႇသၢၵ်ႈသေႇၵူၼ်းလႆႈၸိုင် သၢၵ်ႈသေႇၽြႃးပဵၼ်ၸဝ်ႈၼၼ်ႉပဵၼ်လွင်ႈတၢင်းဢၼ်ယဵင်ႈၶႅၼ်းလီယုမ်ႇၼႃႇဢေႃႈ။ သၢၵ်ႈသေႇဢၼ်ဝႃႈမႃးယဝ်ႉတေႃႈလဵဝ်ၼႆႉၸမ်ႉ၊ ပဵၼ်လွင်ႈဢၼ်ၽြႃးပဵၼ်ၸဝ်ႈၶၢမ်ႇသၢၵ်ႈသေႇလူၺ်ႈလွင်ႈလုၵ်ႈမၼ်းၸဝ်ႈဢေႃႈ။-

10ၵေႃႉဢၼ်ယုမ်ႇမၢတ်ႈ လုၵ်ႈၽြႃးပဵၼ်ၸဝ်ႈၼၼ်ႉ လႆႈသၢၵ်ႈသေႇၵႃႈၼႂ်းတူဝ်ၸဝ်ႈၵဝ်ႇဢေႃႈ။ ၵေႃႉဢၼ်ဢမ်ႇယုမ်ႇမၢတ်ႈၽြႃးပဵၼ်ၸဝ်ႈၸမ်ႉ၊ တၢင်ႇဢပႅတ်ႈမူႉသႃႇ ၵႃႈၼိူဝ်ၽြႃးပဵၼ်ၸဝ်ႈယူႇဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵေႃႉၼၼ်ႉဢမ်ႇယုမ်ႇၵႂၢမ်း ဢၼ်ၽြႃးပဵၼ်ၸဝ်ႈၶၢမ်ႇသၢၵ်ႈသေႇ လူၺ်ႈလွင်ႈလုၵ်ႈမၼ်းၸဝ်ႈၼၼ်ႉလႄႈယူႇဢေႃႈ။-

11ဢၼ်ၶၢမ်ႇသၢၵ်ႈသေႇၼၼ်ႉၸမ်ႉ၊ ၽြႃးပဵၼ်ၸဝ်ႈပဵၼ် ထႃႇဝရႃႉဢသၢၵ်ႈတီႈႁဝ်းလႄႈ ဢသၢၵ်ႈၼၼ်ႉၵေႃႈ ပႃးၼႂ်းလုၵ်ႈမၼ်းၸဝ်ႈၼၼ်ႉဢေႃႈ။-

12ၵေႃႉဢၼ်လႆႈလုၵ်ႈၸဝ်ႈၼၼ်ႉ လႆႈဢသၢၵ်ႈဢေႃႈ။ ၵေႃႉဢၼ် ဢမ်ႇလႆႈလုၵ်ႈၽြႃးပဵၼ်ၸဝ်ႈ ၼၼ်ႉၸမ်ႉ၊ ဢမ်ႇလႆႈဢသၢၵ်ႈ။

13ၵဝ်တႅမ်ႈလွင်ႈတၢင်းၸိူဝ်းၼႆႉသေလႄႈ ပၼ်ၵႂႃႇတီႈသူၸိူဝ်းဢၼ် ယုမ်ႇမၢတ်ႈလုၵ်ႈၽြႃးပဵၼ်ၸဝ်ႈၼၼ်ႉ ႁႂ်ႈသူလႆႈႁူႉလွင်ႈဢၼ် တူဝ်ၸဝ်ႈၵဝ်ႇလႆႈထႃႇဝရႃႉဢသၢၵ်ႈၼၼ်ႉဢေႃႈ။

14လွင်ႈတၢင်းဢၼ်ႁဝ်းႁတ်းႁၢၼ် ၵႃႈတီႈၽြႃးပဵၼ်ၸဝ်ႈၸမ်ႉ၊ ပေႃးႁဝ်းယွၼ်းသူႉ သေၸိူဝ်ႉသေပိူင် မႅၼ်ႈၼင်ႇဢလူဝ်ႇမၼ်းၸဝ်ႈၸိုင် မၼ်းၸဝ်ႈထွမ်ႇဢဝ်ဢေႃႈ။-

15ပေႃးႁဝ်းႁူႉလွင်ႈဢၼ်မၼ်းၸဝ်ႈ ထွမ်ႇဢဝ်ၵႂၢမ်းၵႃႈဢၼ်ႁဝ်း သူးတွင်းၼၼ်ႉၸိုင်၊ ႁဝ်းႁူႉလွင်ႈဢၼ်ႁဝ်း တၵ်းလႆႈသူႉ ဢၼ်ႁဝ်းယွၼ်းၵႃႈတီႈမၼ်းၸဝ်ႈၼၼ်ႉယူႇဢေႃႈ။

16ပေႃးသေၵေႃႉသေၵူၼ်း ႁၼ်ပီႈၼွင်ႉႁဵတ်းတူႉၸရိူၵ်ႈ ဢၼ်ဢမ်ႇထိူၵ်ႈၶၢမ်ႇဢပႅတ်ႈတၢင်းတၢႆမႅၼ်ႈၸိုင် ၵေႃႉၼၼ်ႉတၵ်းလႆႈသူးတွင်းဢေႃႈ။ ၽြႃးပဵၼ်ၸဝ်ႈတၵ်းပၼ်ဢသၢၵ်ႈတီႈၵေႃႉၼၼ်ႉ ပုၼ်ႈၶဝ်ၸိူဝ်းဢၼ် ဢမ်ႇႁဵတ်းဢပႅတ်ႈတၢင်းတၢႆၼၼ်ႉဢေႃႈ။ မီးတူႉၸရိူၵ်ႈဢၼ် ထိူၵ်ႈၶၢမ်ႇဢပႅတ်ႈတၢင်းတၢႆဢေႃႈ။ ပုၼ်ႈလွင်ႈၼင်ႇႁိုဝ် တၵ်းၵၢင်းလွတ်ႈတင်း တူႉၸရိူၵ်ႈဢပႅတ်ႈၼၼ်ႉၸိုင် တၵ်းလႆႈသူးတွင်းဝႃႈၼႆ ၵဝ်ဢမ်ႇဝႃႈ။

17လွင်ႈတၢင်းဢၼ်ဢမ်ႇတြႃးၼၼ်ႉၸမ်ႉ၊ ပဵၼ်တူႉၸရိူၵ်ႈဢေႃႈ။ ၼႂ်းဝႃႈၼၼ်သေၵေႃႈ တူႉၸရိူၵ်ႈဢၼ် ဢမ်ႇထိူၵ်ႈၶၢမ်ႇဢပႅတ်ႈတၢင်းတၢႆၵေႃႈမီးဢေႃႈ။

18ႁဝ်းႁူႉလွင်ႈဢၼ် ၶဝ်ၸိူဝ်းဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးၼၼ်ႉ ဢမ်ႇၸၢင်ႈႁဵတ်းတူႉၸရိူၵ်ႈၼၼ်ႉယူႇဢေႃႈ။ ၵေႃႉဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးၼၼ်ႉ ပိူဝ်ႈဢၼ်တူဝ်ၸဝ်ႈၵဝ်ႇ ပႂ်ႉတူဝ်ၸဝ်ႈၵဝ်ႇယူႇလႄႈ မႃႇၼၢတ်ႈဢမ်ႇတိူဝ်ႉဢမ်ႇယိပ်းလႆႈ။

19ႁဝ်းႁူႉလွင်ႈဢၼ်ႁဝ်း ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈ ဢိၵ်ႇတင်း လွင်ႈဢၼ်ၵူၼ်းလေႃးၵီႇတင်းသဵင်ႈတင်းလူင် မီးၼႂ်းမိုဝ်းမႃႇၼၢတ်ႈၼၼ်ႉယူႇဢေႃႈ။-

20ႁဝ်းႁူႉလွင်ႈဢၼ် လုၵ်ႈၽြႃးပဵၼ်ၸဝ်ႈ လႆႈမႃးလႄႈပၼ်ၺၢၼ်ႇ ဢၼ်ႁူႉၸၵ်းၽြႃးပဵၼ်ၸဝ်ႈ ဢၼ်ၸိုဝ်ႈဢၼ်ၸႂ်ႈ တီႈႁဝ်းၼၼ်ႉယူႇဢေႃႈ။ ႁဝ်းတႄႇယူႇၼႂ်းၸဝ်ႈဢၼ်ၸိုဝ်ႈဢၼ်ၸႂ်ႈၼၼ်ႉ ဢိၵ်ႇတင်းၼႂ်းလုၵ်ႈမၼ်းၸဝ်ႈ ယေႇသူႉၶရိၸ်ႈ ၼၼ်ႉဢေႃႈ။ ၸဝ်ႈၼၼ်ႉပဵၼ်ၽြႃးပဵၼ်ၸဝ်ႈ ဢၼ်ၸိုဝ်ႈဢၼ်ၸႂ်ႈဢေႃႈ။ ထႃႇဝရႃႉဢသၢၵ်ႈၵေႃႈပဵၼ်ဢေႃႈ။

21လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ဝႄႈပႅတ်ႈသေရုၵ်ႈထူႉသၢင်းထူႉတင်းလၢႆတႃႉ။ လိၵ်ႈဢေႃးဝႃႇတႃႉယူဝ်းႁၢၼ်ႇၽိုၼ်ပထမႃႉယဝ်ႉယဝ်ႉဢေႃႈ။

← Chapter 4 Jump to: