1 John 4

Shan

← Chapter 3 Jump to: Chapter 5 →

1ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ယႃႇပေယုမ်ႇၸႂ်ဝီႉၺိၺ်ႇၵႃႈမီးတင်းသဵင်ႈတင်းလူင်။ ၸၢမ်းတူၺ်းလွင်ႈဢၼ်ၸႂ်ဝီႉၺိၺ်ႇတင်းလၢႆ ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈႁိုဝ်။ ဢမ်ႇၸၢပ်ႈသႅင်ႇၵၼ်ႁိုဝ်ၼၼ်ႉတႃႉ။ လွင်ႈမၼ်းၸမ်ႉ မိၵ်ႉသႃႇပရေႃးၽႅတ်ႈၼမ်ၼႃႇ ၵႂႃႇၸူးၵႃႈတီႈၼႂ်းလေႃးၵႃႉၼႆႉယဝ်ႉ။-

2တၵ်းႁူႉၸၵ်းဝီႉၺိၺ်ႇၽြႃးပဵၼ်ၸဝ်ႈလႆႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ဝီႉၺိၺ်ႇဢၼ်ႁပ်ႉတုင်းဢဝ် ယေႇသူႉၶရိၸ်ႈ ဢၼ်ဢဝ်တင်းၸႃႇတီႉၵူၼ်းမႃးၼၼ်ႉ၊ ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈဢေႃႈ။-

3ဝီႉၺိၺ်ႇဢၼ်ဢမ်ႇႁပ်ႉတုင်းဢဝ် ယေႇသူႉၶရိၸ်ႈ ဢၼ်ဢဝ်တင်းၸႃႇတီႉၵူၼ်းမႃးၼၼ်ႉၸမ်ႉ၊ ဢမ်ႇၸၢပ်ႈသႅင်ႇၵၼ်တင်း ၽြႃးပဵၼ်ၸဝ်ႈ။ ဝီႉၺိၺ်ႇၸိူဝ်ႉၼင်ႇၼၼ်ၼၼ်ႉၸမ်ႉ၊ ပဵၼ်ဝီႉၺိၺ်ႇ ဢၼ်ႇတီႉၶရိၸ်ႈ ဢၼ်သူလႆႈငိၼ်းလွင်ႈဢၼ်တၵ်းမႃးၼၼ်ႉလႄႈ မိူဝ်ႈလဵဝ်ၼႆႉၵေႃႈ မႃးလႄႈမီးယူႇဢေႃႈ။

4လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ သူၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈဢေႃႈ။ ၶဝ်ၼၼ်ႉၵေႃႈသူလႆႈပႄႉလႆႈၼႅင်ႇယဝ်ႉ။လွင်ႈမၼ်းၸမ်ႉ ၵေႃႉဢၼ်မီးၽၢႆႇသူၼၼ်ႉ ယႂ်ႇၼႃႇသေၵေႃႉဢၼ်မီးၽၢႆႇလေႃးၵႃႉဢေႃႈ။-

5ၶဝ်ၼၼ်ႉပိူဝ်ႈဢၼ်ၸၢပ်ႈသႅင်ႇၵၼ်တင်းလေႃးၵႃႉလႄႈ ၸၢင်ႈလၢတ်ႈလွင်ႈတၢင်းလေႃးၵီႇတင်းလၢႆဢေႃႈ။ ၵူၼ်းလေႃးၵီႇတင်းလၢႆၵေႃႈ ၸၢင်ႈထွမ်ႇဢဝ်ၵႂၢမ်းၶဝ်ၼၼ်ႉဢေႃႈ။-

6ႁဝ်းၸမ်ႉ၊ ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈဢေႃႈ။ ၵေႃႉဢၼ်ႁူႉၸၵ်းၽြႃးပဵၼ်ၸဝ်ႈၼၼ်ႉ ၸၢင်ႈထွမ်ႇဢဝ်ၵႂၢမ်းႁဝ်းဢေႃႈ။ ၵေႃႉဢၼ်ဢမ်ႇၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၼၼ်ႉ ဢမ်ႇၸၢင်ႈထွမ်ႇဢဝ်ၵႂၢမ်းႁဝ်း။ ႁဝ်းထွၵ်ႈလူၺ်ႈလွင်ႈတၢင်းၼၼ်ႉလႄႈ လႆႈႁူႉသမ်ႇမႃႇဝီႉၺိၺ်ႇ ဢိၵ်ႇတင်းမိၵ်ႉသႃႇဝီႉၺိၺ်ႇဢေႃႈ။

7ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ႁဝ်းၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်တႃႉႁဝ်း။ လွင်ႈမၼ်းၸမ်ႉ တၢင်းႁၵ်ႉမႅတ်ႈတႃႇ ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈဢေႃႈ။ ၵေႃႉဢၼ်ၸၢင်ႈႁၵ်ႉၼၼ်ႉၸမ်ႉ၊ ပဵၼ်ၵေႃႉဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးဢေႃႈ။ ၵေႃႉဢၼ်ႁူႉၸၵ်းၽြႃးပဵၼ်ၸဝ်ႈၵေႃႈပဵၼ်ဢေႃႈ။-

8ၵေႃႉဢၼ်ဢမ်ႇမီးတၢင်းႁၵ်ႉၼၼ်ႉ ဢမ်ႇႁူႉၸၵ်းၽြႃးပဵၼ်ၸဝ်ႈ။ လွင်ႈမၼ်းၸမ်ႉ ၽြႃးပဵၼ်ၸဝ်ႈပဵၼ်တၢင်းႁၵ်ႉမႅတ်ႈတႃႇဢေႃႈ။-

9မႅတ်ႈတႃႇဢၼ်ၽြႃးပဵၼ်ၸဝ်ႈႁၵ်ႉၼၼ်ႉ ထၢင်ႇသႃးၵႃႈၼႂ်းႁဝ်းၼႂ်းလွင်ႈဢၼ်မၼ်းၸဝ်ႈ ပွႆႇၸႂ်ႉလုၵ်ႈမၼ်းၸဝ်ႈပႃးလဵဝ်ၵူၺ်း မႃးၼႂ်းလေႃးၵႃႉၼႆႉႁႂ်ႈႁဝ်းလႆႈမီးဢသၢၵ်ႈ ၵွပ်ႈပိူဝ်ႈလုၵ်ႈမၼ်းၸဝ်ႈၼၼ်ႉယူႇဢေႃႈ။-

10တၢင်းႁၵ်ႉမႅတ်ႈတႃႇ မီးၼႂ်းတၢင်းဢၼ်ႁဝ်းႁၵ်ႉၽြႃးပဵၼ်ၸဝ်ႈၼၼ်ႉ ဢမ်ႇၸႂ်ႈ၊ မီးၼႂ်းတၢင်းဢၼ်ၽြႃးပဵၼ်ၸဝ်ႈ ႁၵ်ႉႁဝ်းလႄႈ ပွႆႇၸႂ်ႉလုၵ်ႈၸဝ်ႈမႃး ႁႂ်ႈလႆႈပဵၼ်လွင်ႈဢၼ်တၵ်းၽေႇဢပႅတ်ႈႁဝ်းၼၼ်ႉဢေႃႈ။-

11ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ပေႃးၽြႃးပဵၼ်ၸဝ်ႈႁၵ်ႉႁဝ်း ထၢၼ်ႇၼႆႉဢမၢၼ်ႇၶၼ်ပဵၼ်ၸိုင်၊ ႁဝ်းၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်တၵ်းလႆႈႁၵ်ႉၵၼ်ဢေႃႈ။-

12ၽူႈလႂ်ဢမ်ႇတွၼ်ႉလႆႈႁၼ်ၽြႃးပဵၼ်ၸဝ်ႈ။ ၼႂ်းဝႃႈၼၼ်သေၵေႃႈ ပေႃးႁၵ်ႉၵၼ်ယူႇၸိုင် ၽြႃးပဵၼ်ၸဝ်ႈတႄႇယူႇၼႂ်းႁဝ်းလႄႈ ႁဝ်းပျေႉၸုမ်ႇတင်း တၢင်းႁၵ်ႉမႅတ်ႈတႃႇၸဝ်ႈယူႇဢေႃႈ။-

13ႁဝ်းႁူႉလွင်ႈဢၼ်ႁဝ်းတႄႇယူႇ ၼႂ်းၽြႃးပဵၼ်ၸဝ်ႈ ဢိၵ်ႇတင်းလွင်ႈဢၼ်မၼ်းၸဝ်ႈ တႄႇယူႇၼႂ်းႁဝ်းၵွပ်ႈပိူဝ်ႈဢၼ်မၼ်းၸဝ်ႈပၼ်ၵျေးၸူးဝီႉၺိၺ်ႇၸဝ်ႈ တီႈႁဝ်းၼၼ်ႉဢေႃႈ။-

14ႁဝ်းႁူႉႁၼ်လွင်ႈဢၼ် ပေႃႈၸဝ်ႈပွႆႇၸႂ်ႉလုၵ်ႈၸဝ်ႈမႃး ႁႂ်ႈလႆႈပဵၼ်ၸဝ်ႈဢၼ်ၵႄႇၶျွတ်ႈဢဝ် ၵူၼ်းလေႃးၵီႇတင်းလၢႆၼၼ်ႉလႄႈ ၶၢမ်ႇသၢၵ်ႈသေႇဢေႃႈ။

15ၵေႃႉဢၼ်ႁပ်ႉတုင်းဢဝ်လႄႈဝႃႈ ယေႇသူႉ ပဵၼ်လုၵ်ႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆၼၼ်ႉၸမ်ႉ၊ တႄႇယူႇၼႂ်းၽြႃးပဵၼ်ၸဝ်ႈဢေႃႈ။ ၽြႃးပဵၼ်ၸဝ်ႈၵေႃႈ တႄႇယူႇၼႂ်းၵေႃႉၼၼ်ႉဢေႃႈ။-

16ႁဝ်းႁူႉမႅတ်ႈတႃႇတၢင်းဢၼ်ၽြႃးပဵၼ်ၸဝ်ႈႁၵ်ႉႁဝ်းၼၼ်ႉလႄႈယုမ်ႇမၢတ်ႈဢေႃႈ။ ၽြႃးပဵၼ်ၸဝ်ႈပဵၼ်တၢင်းႁၵ်ႉမႅတ်ႈတႃႇဢေႃႈ။ ၵေႃႉဢၼ်တႄႇယူႇၼႂ်း တၢင်းႁၵ်ႉမႅတ်ႈတႃႇၼၼ်ႉ တႄႇယူႇၼႂ်းၽြႃးပဵၼ်ၸဝ်ႈဢေႃႈ။ ၽြႃးပဵၼ်ၸဝ်ႈၵေႃႈ တႄႇယူႇၼႂ်းၵေႃႉၼၼ်ႉဢေႃႈ။

17ၼင်ႇၼၼ်လႄႈ ပိူဝ်ႈဢၼ်ႁဝ်းပျေႉၸုမ်ႇတင်း တၢင်းႁၵ်ႉမႅတ်ႈတႃႇလႄႈ ႁဝ်းတၵ်းမီးဢၶႂၢင်ႉဢၼ်လႆႈ ႁတ်းႁၢၼ်ၼႂ်းဝၼ်းဢၼ်တၵ်းၸီႇယၢင်ႇတြႃးၼၼ်ႉဢေႃႈ။ လွင်ႈမၼ်းၸမ်ႉ ႁဝ်းပဵၼ်ၼႂ်းလေႃးၵႃႉၼႆႉ မိူၼ်ၸိူဝ်ႉၼင်ႇမၼ်းၸဝ်ႈၼၼ်ႉဢေႃႈ။-

18တၢင်းႁၵ်ႉမႅတ်ႈတႃႇဢမ်ႇႁူမ်ႈဢမ်ႇပွင်းၵၼ်တင်းသၢင်ႇဝူၺ်ႇၵႃႉ တၢင်းဢၼ်ၵူဝ်ဢၼ်ႁႄၼၼ်ႉလႆႈ။ မႅတ်ႈတႃႇဢၼ်ပျေႉၸုမ်ႇၼၼ်ႉ ၸၢင်ႈပႄႇပႅတ်ႈသၢင်ႇဝူၺ်ႇၵႃႉ ၵွပ်ႈပိူဝ်ႈဢၼ်သၢင်ႇဝူၺ်ႇၵႃႉၼၼ်ႉ ၸၢင်ႈႁႂ်ႈပဵၼ်ဝူၺ်ႇတၼႃႇတၢင်းဢၼ်မႆႈၸႂ်ၶီၸႂ်ဢေႃႈ။ ၵေႃႉဢၼ်မီးသၢင်ႇဝူၺ်ႇၵႃႉၼၼ်ႉ ဢမ်ႇပႆႇပျေႉၸုမ်ႇတင်းမႅတ်ႈတႃႇ။-

19ႁဝ်းႁၵ်ႉၽြႃးပဵၼ်ၸဝ်ႈၵွပ်ႈပိူဝ်ႈဢၼ် မၼ်းၸဝ်ႈႁၵ်ႉႁဝ်းဢွၼ်တၢင်းၼၼ်ႉဢေႃႈ။-

20ပိၵ်ႉသမ်ႉသေၵေႃႉသေၵူၼ်းလၢတ်ႈလႄႈဝႃႈ၊ ၵဝ်ႁၵ်ႉၽြႃးပဵၼ်ၸဝ်ႈ၊ ဝႃႈၼင်ႇၼႆသေၵေႃႈ ပေႃးမၼ်းၸင်းပီႈၼွင်ႉမၼ်းယူႇၸိုင်၊ ၵေႃႉၼၼ်ႉပဵၼ်ၵေႃႉဢၼ်လၢတ်ႈမူႉသႃႇဢေႃႈ။ ပေႃးဢမ်ႇႁၵ်ႉပီႈၼွင်ႉမၼ်းဢၼ်မၼ်းလႆႈႁၼ်ယူႇၼၼ်ႉၸိုင် မၼ်းတၵ်းႁၵ်ႉၽြႃးပဵၼ်ၸဝ်ႈ ဢၼ်မၼ်းဢမ်ႇတွၼ်ႉႁၼ်သေပွၵ်ႈၼၼ်ႉလႆႈ ၸိူဝ်ႉၼင်ႇႁိုဝ်။-

21ပိင်းၺၢပ်ႈဢၼ်ဝႃႈ၊ ၵေႃႉဢၼ်ႁၵ်ႉၽြႃးပဵၼ်ၸဝ်ႈၼၼ်ႉ တၵ်းလႆႈႁၵ်ႉပီႈၼွင်ႉမၼ်းဢေႃႈ၊ ဝႃႈၼင်ႇၼႆၼၼ်ႉၸိုင်၊ ႁဝ်းလႆႈ ၶၢမ်ႇဢဝ်ၵႃႈၼႂ်းၸဝ်ႈၶရိၸ်ႈယဝ်ႉ။

← Chapter 3 Jump to: Chapter 5 →