1 John 3

Shan

← Chapter 2 Jump to: Chapter 4 →

1တူၺ်းလႄႈၶႆႈၸႂ်လူၺ်ႈလွင်ႈ ဢၼ်ၽြႃးပဵၼ်ၸဝ်ႈ ႁၵ်ႉႁဝ်းထၢၼ်ႇလႂ်ၼၼ်ႉ ထၼ်ႈပေႃးႁႂ်ႈႁဝ်းလႆႈဢၶႂၢင်ႉ ဢၼ်ၶၢမ်ႇဢဝ်တၢင်းဢၼ် ႁွင်ႉႁဵၵ်ႈဝႃႈလုၵ်ႈၽြႃးပဵၼ်ၸဝ်ႈၼၼ်ႉတႃႉ။ ၵွပ်ႈႁွႆးၼႆႉၵူၼ်းလေႃးၵီႇတင်းလၢႆ ဢမ်ႇႁူႉၸၵ်းႁဝ်းၵွပ်ႈပိူဝ်ႈဢၼ်ဢမ်ႇႁူႉၸၵ်း ၽြႃးပဵၼ်ၸဝ်ႈၼၼ်ႉ။-

2ၵေႃႉဢၼ်ႁဝ်းႁၵ်ႉၶဝ်ဢိူၺ်း၊ တေႃႈလဵဝ်ၼႆႉ ႁဝ်းပဵၼ်လုၵ်ႈၽြႃးပဵၼ်ၸဝ်ႈဢေႃႈ။ လွင်ႈဢၼ်ႁဝ်းတၵ်း ပဵၼ်ၸိူဝ်ႉၼင်ႇႁိုဝ် ၵမ်းလိုၼ်းၼၼ်ႉၸိုင် ဢမ်ႇပႆႇတွၼ်ႉထၢင်ႇတွၼ်ႉသႃး။ ၵူၺ်းၵႃႈႁဝ်းႁူႉလွင်ႈဢၼ် ႁဝ်းတၵ်းမိူၼ်ၸိူဝ်ႉၼင်ႇမၼ်းၸဝ်ႈ ၼႂ်းမိူဝ်ႈဢၼ် မၼ်းၸဝ်ႈထၢင်ႇသႃးပေႃႇမႃးၼၼ်ႉယူႇဢေႃႈ။ လွင်ႈမၼ်းၸမ်ႉ ႁဝ်းတၵ်းလႆႈႁၼ်မၼ်းၸဝ်ႈ ၵႃႈၼင်ႇဢၼ်မၼ်းၸဝ်ႈပဵၼ်ၼၼ်ႉဢေႃႈ။-

3ၵေႃႉဢၼ်မုင်ႈထႃႈမွင်းထႃႈ ၸိူဝ်ႉၼင်ႇၼၼ်ၼၼ်ႉၸမ်ႉ၊ ၸၢင်ႈႁႂ်ႈတူဝ်ၸဝ်ႈၵဝ်ႇမူတ်းၸၢင်ႇ မိူၼ်ၸိူဝ်ႉၼင်ႇဢၼ် မၼ်းၸဝ်ႈပဵၼ်ဢၼ်မူတ်းၸၢင်ႇၼၼ်ႉဢေႃႈ။-

4ၵေႃႉဢၼ်ႁဵတ်းတူႉၸရိူၵ်ႈၸမ်ႉ၊ ပူၼ်ႉလိူဝ်ပိင်းၺၢပ်ႈၸဝ်ႈဢေႃႈ။ တူႉၸရိူၵ်ႈၸမ်ႉ၊ ပဵၼ်တၢင်းဢၼ်ပူၼ်ႉလိူဝ် ပိင်းၺၢပ်ႈၸဝ်ႈဢေႃႈ။-

5သူႁူႉလွင်ႈဢၼ်မၼ်းၸဝ်ႈထၢင်ႇသႃးပေႃႇမႃး ႁႂ်ႈလႆႈႁပ်ႉဢဝ်ဢပႅတ်ႈႁဝ်းၵႂႃႇၼၼ်ႉယူႇဢေႃႈ။ ၵႃႈၼႂ်းမၼ်းၸဝ်ႈၼၼ်ႉၵေႃႈဢမ်ႇမီးဢပႅတ်ႈ။-

6ၵေႃႉဢၼ်တႄႇယူႇၼႂ်းမၼ်းၸဝ်ႈၼၼ်ႉၸမ်ႉ၊ ဢမ်ႇၸၢင်ႈႁဵတ်းတူႉၸရိူၵ်ႈ။ ၵေႃႉဢၼ်ၸၢင်ႈႁဵတ်းတူႉၸရိူၵ်ႈၼၼ်ႉၸမ်ႉ၊ ဢမ်ႇပႆႇလႆႈႁူႉလႆႈႁၼ်မၼ်းၸဝ်ႈၼၼ်ႉ။

7လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ယႃႇႁႂ်ႈၽူႈလႂ်လႆႈပႅတ်ႉလႆႈလႅၼ်သူ။ ၵေႃႉဢၼ်ၵမ်ၵျၢင်ႉတြႃး တၢင်းဢၼ်သိုဝ်ႈတေႃႇၼၼ်ႉ မီးတၢင်းဢၼ်သိုဝ်ႈတေႃႇမိူၼ်ၸိူဝ်ႉၼင်ႇဢၼ် မၼ်းၸဝ်ႈပဵၼ်ဢၼ်သိုဝ်ႈတေႃႇၼၼ်ႉဢေႃႈ။-

8ပိူဝ်ႈဢၼ်မႃႇၼၢတ်ႈပဵၼ်ၵေႃႉဢၼ် ႁဵတ်းတူႉၸရိူၵ်ႈၸႃႉၸဵမ်မိူဝ်ႈၵေႃႇၸႃႉ ဢွၼ်ၼႆႉၼၼ်ႉလႄႈ ၵေႃႉဢၼ်ႁဵတ်းတူႉၸရိူၵ်ႈၼၼ်ႉ ၸၢပ်ႈသႅင်ႇၵၼ်တင်းမႃႇၼၢတ်ႈဢေႃႈ။ ၼင်ႇၼႆလႄႈ လုၵ်ႈၽြႃးပဵၼ်ၸဝ်ႈထၢင်ႇသႃးပေႃႇမႃး ႁႂ်ႈလႆႈယႃႉဢမူႉမႃႇၼၢတ်ႈတင်းလၢႆၼၼ်ႉပႅတ်ႈဢေႃႈ။-

9ၵေႃႉဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးၼၼ်ႉ ဢမ်ႇၸၢင်ႈႁဵတ်းတူႉၸရိူၵ်ႈ။ လွင်ႈမၼ်းၸမ်ႉ ၸိူဝ်ႉၽၼ်းၸဝ်ႈ တႄႇယူႇၼႂ်းၵေႃႉၼၼ်ႉဢေႃႈ။ ၵေႃႉၼၼ်ႉပိူဝ်ႈဢၼ်ပဵၼ် ၵေႃႉဢၼ်ၽြႃးပဵၼ်ၸဝ်ႈ ႁႂ်ႈၵိူတ်ႇပဵၼ်မႃးလႄႈ ဢမ်ႇႁဵတ်းတူႉၸရိူၵ်ႈလႆႈ။-

10ၵွပ်ႈပိူဝ်ႈလၢၵ်ႈၶၼႃႇ ၸိူဝ်ႉၼင်ႇၼၼ်ၼၼ်ႉလႄႈ လုၵ်ႈၽြႃးပဵၼ်ၸဝ်ႈ ဢိၵ်ႇတင်းလုၵ်ႈမႃႇၼၢတ်ႈတင်းလၢႆ ထၢင်ႇသႃးယူႇဢေႃႈ။ ၵေႃႉဢၼ်ဢမ်ႇၵမ်ၵျၢင်ႉတြႃးတၢင်းဢၼ်သိုဝ်ႈတေႃႇ။ ၵေႃႉဢၼ်ဢမ်ႇႁၵ်ႉပီႈၼွင်ႉတူဝ်ၸဝ်ႈၵဝ်ႇၼၼ်ႉၸမ်ႉ၊ ဢမ်ႇၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈ။

11ၵႂၢမ်းတြႃးဢၼ်သူလႆႈငိၼ်း ၸႃႉၸဵမ်မိူဝ်ႈၵေႃႇၸႃႉဢွၼ်ၼႆႉၼၼ်ႉၸမ်ႉ၊ ယင်းဢမ်ႇမိူၼ်ၸိူဝ်ႉၼင်ႇ ၵႃႇဢီႉၼႃႉ ဢၼ်ၸၢပ်ႈသႅင်ႇ ၵၼ်တင်းမႃႇၼၢတ်ႈလႄႈ ဢဝ်ၼွင်ႉၸၢႆးမၼ်းတၢႆၼၼ်ႉလႄႈ

12ႁဝ်းၵေႃႉၼိုင်ႈလႄႈၵေႃႉၼိုင်ႈ တၵ်းလႆႈႁၵ်ႉၵၼ်ပႅင်းၵၼ်ဢေႃႈ၊ မီးမႃးၼင်ႇၼႆဢေႃႈ။ ၵႃႇဢီႉၼႃႉ ၼၼ်ႉ ဢဝ်ၼွင်ႉၸၢႆးမၼ်းတၢႆ ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ တၢင်းၵမ်တၢင်းၵျၢင်ႉမၼ်းႁၢႆႉမိူၵ်ႈလႄႈ တၢင်းၵမ်တၢင်းၵျၢင်ႉၼွင်ႉၸၢႆးမၼ်း သိုဝ်ႈတေႃႇဢေႃႈ။-

13ပီႈၼွင်ႉၶဝ်ဢိူၺ်း၊ ပေႃးၵူၼ်းလေႃးၵီႇတင်းလၢႆၸင်းသူၸိုင် ယႃႇပေလီဢၢမ်း။

14ႁဝ်းႁူႉလွင်ႈဢၼ် ႁဝ်းလုၵ်ႉသေၵႃႈတီႈတၢင်းတၢႆ ၶၢမ်ႈၵႂႃႇၸူးၵႃႈတီႈတၢင်းဢၼ်ဢသၢၵ်ႈလိပ်းၼၼ်ႉ ၵွပ်ႈပိူဝ်ႈဢၼ်ႁဝ်းႁၵ်ႉပီႈႁၵ်ႉၼွင်ႉၼၼ်ႉယူႇဢေႃႈ။ ၵေႃႉဢၼ်ဢမ်ႇႁၵ်ႉပီႈႁၵ်ႉၼွင်ႉတူဝ်ၸဝ်ႈၵဝ်ႇၼၼ်ႉ တႄႇယူႇၼႂ်းတၢင်းတၢႆဢေႃႈ။-

15ၵေႃႉဢၼ်ၸင်းပီႈၼွင်ႉ တူဝ်ၸဝ်ႈၵဝ်ႇၼၼ်ႉၸမ်ႉ၊ ပဵၼ်ၵေႃႉဢၼ်ဢဝ်ဢသၢၵ်ႈၵူၼ်းတၢႆဢေႃႈ။ သူႁူႉလွင်ႈဢၼ် ထႃႇဝရႃႉၽြႃးဢသၢၵ်ႈဢမ်ႇတႄႇယူႇ ၼႂ်းၵေႃႉဢၼ် ဢဝ်ဢသၢၵ်ႈၵူၼ်းတၢႆၼၼ်ႉ သေၵေႃႉသေၵူၼ်းၼၼ်ႉယူႇဢေႃႈ။-

16ႁဝ်းထွၵ်ႈတူၺ်းလွင်ႈဢၼ်ၸဝ်ႈၶရိၸ်ႈ ၸုၼ်ႉဢသၢၵ်ႈမၼ်းၸဝ်ႈ ပုၼ်ႈႁဝ်းၼၼ်ႉလႄႈ လႆႈႁူႉမႅတ်ႈတႃႇမၼ်းၸဝ်ႈယဝ်ႉ။ ႁဝ်းၵေႃႈတၵ်းလႆႈၸုၼ်ႉဢသၢၵ်ႈ ပုၼ်ႈပီႈပုၼ်ႈၼွင်ႉဢေႃႈ။-

17ၽူႈလႂ်သေဢမ်ႇဝႃႈ၊ ၵေႃႉဢၼ်မီးဢုၵ်ႉၸႃႇၸေးၸိမ်ႇလေႃးၵီႇယူႇလႄႈ ႁၼ်ပီႈၼွင်ႉတူဝ်ၸဝ်ႈၵဝ်ႇ ယၢၵ်ႈၽၢၼ်လႄႈ ၶျုၵ်ႈဝႆႉၸႂ်ၵရူႉၼႃႇတၢင်းဢဵတ်းလူၼၼ်ႉၸိုင်၊ မႅတ်ႈတႃႇၽြႃးပဵၼ်ၸဝ်ႈ တၵ်းတႄႇယူႇၼႂ်းၵေႃႉၼၼ်ႉၸိူဝ်ႉၼင်ႇႁိုဝ်။

18လုၵ်ႈလၢင်းဢၼ်ၵဝ်ႁၵ်ႉၶဝ်ဢိူၺ်း၊ ႁဝ်းယင်းဢမ်ႇဢဝ်တင်းသူပ်းတင်းၵႂၢမ်းၵူၺ်းႁၵ်ႉလႄႈ ဢွၼ်ၵၼ်ပႃးတင်းတူဝ်တင်းၸႂ်သေလႄႈ ႁၵ်ႉဢမၢၼ်ႇၶၼ်ပဵၼ်တႃႉႁဝ်း။

19ပေႃးႁၵ်ႉၸိူဝ်ႉၼင်ႇၼၼ်ၸိုင်၊ ႁဝ်းတၵ်းလႆႈႁူႉလွင်ႈဢၼ် တူဝ်ၸဝ်ႈၵဝ်ႇၸၢပ်ႈသႅင်ႇၵၼ်တင်းသမ်ႇမႃႇတြႃးလႄႈ တၵ်းႁႂ်ႈႁူဝ်ၸႂ်တူဝ်ၸဝ်ႈၵဝ်ႇ သၢၵ်ႈသႃႇၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-

20လွင်ႈမၼ်းၸမ်ႉ ပေႃးႁူဝ်ၸႂ်တူဝ်ၸဝ်ႈၵဝ်ႇ တၢင်ႇဢပႅတ်ႈၵႃႈၼိူဝ်တူဝ်ၸဝ်ႈၵဝ်ႇယူႇၸိုင်၊ ႁဝ်းႁူႉလွင်ႈဢၼ်ၽြႃးပဵၼ်ၸဝ်ႈယႂ်ႇမျၢတ်ႈသေႁူဝ်ၸႂ်ႁဝ်းလႄႈ ႁူႉၸႅင်ႈတင်းသဵင်ႈတင်းလူင်ၼၼ်ႉယူႇဢေႃႈ။-

21ၵေႃႉဢၼ်ၵဝ်ႁၵ်ႉၶဝ်ဢိူၺ်း၊ ပေႃးႁူဝ်ၸႂ်ႁဝ်း ဢမ်ႇတၢင်ႇဢပႅတ်ႈၼိူဝ် တူဝ်ၸဝ်ႈၵဝ်ႇယူႇၸိုင်၊ ႁဝ်းလႆႈဢၶႂၢင်ႉ ဢၼ်လႆႈႁတ်းႁၢၼ် ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-

22ၵႃႈဢၼ်ႁဝ်းသူးတွင်းၼၼ်ႉၸိုင် ႁဝ်းလႆႈၵႃႈတီႈၽြႃးပဵၼ်ၸဝ်ႈ ၵွပ်ႈပိူဝ်ႈဢၼ်ႁဝ်းပႂ်ႉၵမ်ပိင်းၺၢပ်ႈမၼ်းၸဝ်ႈတင်းလၢႆသေလႄႈ ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ထုၵ်ႇၸႂ်မၼ်းၸဝ်ႈၼၼ်ႉဢေႃႈ။-

23ပိင်းၺၢပ်ႈၽြႃးပဵၼ်ၸဝ်ႈၸမ်ႉ၊ ပဵၼ်ပိင်းၺၢပ်ႈၸဝ်ႈဢၼ်ဝႃႈ တၵ်းလႆႈယုမ်ႇမၢတ်ႈၼႃႇမႃႉၸိုဝ်ႈသဵင်လုၵ်ႈမၼ်းၸဝ်ႈ ယေႇသူႉၶရိၸ်ႈ ၼၼ်ႉဢေႃႈ။ ၼင်ႇၵၼ်ၵၼ် တၵ်းလႆႈႁၵ်ႉၵၼ်မႅၼ်ႈၸွမ်းၼင်ႇဢၼ်လုၵ်ႈၸဝ်ႈပိင်းၺၢပ်ႈဝႆႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

24ၵေႃႉဢၼ်ပႂ်ႉၵမ်ပႂ်ႉၸွမ်း ပိင်းၺၢပ်ႈမၼ်းၸဝ်ႈတင်းလၢႆၼၼ်ႉ တႄႇယူႇၼႂ်းၽြႃးပဵၼ်ၸဝ်ႈဢေႃႈ။ ၼႂ်းၵေႃႉၼၼ်ႉၵေႃႈ ၽြႃးပဵၼ်ၸဝ်ႈတႄႇယူႇဢေႃႈ။ ႁဝ်းဢိင်ပိုင်ႈဝီႉၺိၺ်ႇၸဝ်ႈ ဢၼ်မၼ်းၸဝ်ႈပၼ်တီႈႁဝ်းၼၼ်ႉသေလႄႈ လႆႈႁူႉလွင်ႈဢၼ်ၽြႃးပဵၼ်ၸဝ်ႈ တႄႇယူႇၼႂ်းႁဝ်းၼၼ်ႉဢေႃႈ။

← Chapter 2 Jump to: Chapter 4 →