Acts 17

Shan

← Chapter 16 Jump to: Chapter 18 →

1လိုၼ်းၼၼ်ႉၶဝ်လႄႇၵႂႃႇၵႃႈတီႈ ဝဵင်း ဢမ်ႇၽီႉပေႃးလီႉ တင်းဝဵင်း ဢႃႇပေႃႇလေႃႇၼီႉ လႄႈ ႁွတ်ႈထိုင်ၵႃႈတီႈဝဵင်း ထိတ်ႉသႃႇလေႃးၼိၵ်ႈ ပုၼ်ႉဢေႃႈ။ ၵႃႈတီႈၼၼ်ႈ မီးၸရွပ်ႈႁေႃးတြႃးၵူၼ်း ယူႉတႃႉ ဢေႃႈ။-

2ပေႃးလူႉ ၼၼ်ႉ ၵႃႈၼင်ႇဢၼ်ထုင်းၸၢမ်ႇမၼ်းမီးၼၼ်ႉၸိုင် ၶဝ်ႈၵႃႈၼႂ်းၸရွပ်ႈၼၼ်ႉသေယဝ်ႉ ဢိင်ပိုင်ႈၵျၢမ်းလိၵ်ႈတိူင်ႇပၢင်ႇၵုမ်ၵၼ်တင်းၶဝ်ၼၼ်ႉ ဝၼ်းၵမ်သိၼ်သၢမ်ပၢတ်ႈလႄႈ၊-

3ၽုၺ်ႇဢွၵ်ႇၼႄပျႃး လွင်ႈဢၼ်ၸဝ်ႈၶရိၸ်ႈတၵ်းလႆႈၶၢမ်ႇတၢႆ၊ တၵ်းလႆႈလုၵ်ႉၶိုၼ်းလိပ်း ဢိၵ်ႇတင်းလွင်ႈဢၼ် ယေႇသူႉ ဢၼ်ၵဝ်ႁေႃးလၢတ်ႈတီႈသူၼႆႉယဝ်ႉ၊ ဝႃႈၼင်ႇၼႆၼၼ်ႉပဵၼ်ၸဝ်ႈၶရိၸ်ႈၼၼ်ႉလႅင်းလႅင်းဢေႃႈ။-

4ၵူၼ်းၵမ်ႈၽွင်ႈယုမ်ႇမၢတ်ႈလႄႈ ႁဵတ်းၵေႃႉႁဵတ်းသေႈလူၺ်ႈၵၼ်တင်း ပေႃးလူႉ တင်း သီႇလႃႉ ဢေႃႈ။ ၵူၼ်း ႁေႇလသႃႉ ဢၼ်ၵူဝ်းၵႂၢႆႇၽြႃးပဵၼ်ၸဝ်ႈၼမ်ၼႃႇ ဢိၵ်ႇတင်းမႄႈယိင်းဢၼ်ၸိုဝ်ႈဢွၵ်ႇသဵင်ဢွၵ်ႇၼမ်ၼႃႇၵေႃႈယုမ်ႇမၢတ်ႈဢေႃႈ။

5ၵူၼ်း ယူႉတႃႉ တင်းလၢႆၼၼ်ႉ ပိူဝ်ႈဢၼ်သီႈၵေႉႁေႈတႃၼၼ်ႉလႄႈ ႁွင်ႉဢဝ်ၵူၼ်းၸိူဝ်းဢၼ် ႁၢႆႉမိူၵ်ႈမဝ်မၢင်ၵမ်ႈၽွင်ႈသေယဝ်ႉ၊ ႁႂ်ႈၵူၼ်းၼမ်ၼႃႇၸူႉၵၼ်တုမ်ၵၼ်သေယဝ်ႉ၊ ႁဵတ်းဢူၼ်ဢဵၼ်ၵၼ် ၵႃႈၼႂ်းဝဵင်းၼၼ်ႉဢေႃႈ။ ၶဝ်ဢီးၽၢင်ႈႁိူၼ်း ယႃႇသုၼ်ႇ လႄႈ ႁႃႁႂ်ႈလႆႈတိုတ်ႉၸၼ် ဢဝ်ၶဝ်ဢွၵ်ႇၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။-

6မိူဝ်ႈဢၼ်ၶဝ်ဢမ်ႇထူပ်းဢမ်ႇႁၼ်ၶဝ်ၼၼ်ႉၸိုင် ၶဝ်တိုတ်ႉၸၼ်ဢဝ် ယႃႇသုၼ်ႇ တင်းပီႈၼွင်ႉၵမ်ႈၽွင်ႈၵႂႃႇၵႃႈတီႈၶုၼ်ဝဵင်းလႄႈ ႁွင်ႉသႅၼ်ႇဝႃႈ၊ ၵူၼ်းဢၼ်ၶႂမ်ႈပိၼ်ႈမိူင်းလေႃးၵီႇၸိူဝ်းၼၼ်ႉႁွတ်ႈမႃးၵႃႈတီႈၼႆႈၶႃႈယဝ်ႉ။-

7ယႃႇသုၼ်ႇ ၼႆႉၵေႃႈႁပ်ႉတုင်းဢဝ်ၶဝ်ၼၼ်ႉၶႃႈယဝ်ႉ။ ၶဝ်တင်းသဵင်ႈတင်းလူင် ႁဵတ်းဢမ်ႇထုၵ်ႇၵၼ်တင်းဢမိင်ႉၶုၼ်ႁေႃၶမ်း ၵေႇသႃႇ လႄႈ လၢတ်ႈလႄႈဝႃႈ မီး ယေႇသူႉ ၶုၼ်ႁေႃၶမ်းတၢင်ႇပႃးၸဝ်ႈၼိုင်ႈဢေႃႈ၊ ဝႃႈၼင်ႇၼႆၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

8ယႃႉယူၵ်ႉႁူဝ်ၸႂ်ၶုၼ်တင်းလၢႆဢိၵ်ႇတင်းၵူၼ်းဢၼ်ၸူႉဢၼ်တုမ် ဢၼ်ငိၼ်းၵႂၢမ်းၼႆႉၸိူဝ်းၼၼ်ႉဢေႃႈ။-

9မိူဝ်ႈၼၼ်ႉ ၶဝ်ႁႂ်ႈ ယႃႇသုၼ်ႇ တင်းၵူၼ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉ ပၼ်ဢႃႇမႃႉၶၢမ်ႇယဝ်ႉၸင်ႇပွႆႇသေဢေႃႈ။

10ၶိင်ႇၵၢင်ၶိုၼ်းပီႈၼွင်ႉၸိူဝ်းၼၼ်ႉ ဢဝ် ပေႃးလူႉ တင်း သီႇလႃႉ ပွႆႇၵႂႃႇၵႃႈတီႈ ပေႇရီႉ သေၵမ်းလဵဝ်ဢေႃႈ။ မိူဝ်ႈဢၼ်ႁွတ်ႈထိုင်ၵႃႈတီႈဝဵင်းၼၼ်ႉၸိုင် ၶဝ်သမ်ႉၶဝ်ႈၵႃႈၼႂ်းၸရွပ်ႈႁေႃးတြႃးၵူၼ်း ယူႉတႃႉ ဢေႃႈ။-

11ပိူဝ်ႈဢၼ်ၵူၼ်းဝဵင်းၸိူဝ်းၼၼ်ႉလီၼႃႇသေၵူၼ်းဝဵင်း ထိတ်ႉသႃႇလေႃးၼိၵ်ႈ တင်းလၢႆလႄႈ ၶဝ်ပႃးတင်းၸေႇတၼႃႇဢၼ်လီၼႃႇ ၶၢမ်ႇဢဝ်ၼုၵ်ႈၵပၢတ်ႈတြႃးၸဝ်ႈယူႇသေလႄႈ လူတူၺ်းၵျၢမ်းလိၵ်ႈၵူႈဝၼ်းႁႂ်ႈလႆႈႁူႉလွင်ႈဢၼ် ၸႂ်ႈႁိုဝ်ဢမ်ႇၸႂ်ႈႁိုဝ်ၼၼ်ႉယူႇဢေႃႈ။

12ပိူဝ်ႈၼႆလႄႈ ၵူၼ်း ယူႉတႃႉ ၼမ်ၼႃႇယုမ်ႇမၢတ်ႈဢေႃႈ။ ၵူၼ်း ႁေႇလသႃႉ ၸဵမ်ယိင်းၸဵမ်ၸၢႆးဢၼ်မီးသရေႇၼမ်ၼႃႇၸိူဝ်းၼၼ်ႉၵေႃႈယုမ်ႇမၢတ်ႈဢေႃႈ။-

13မိူဝ်ႈဢၼ်ၵူၼ်း ယူႉတႃႉ ဢၼ်ပဵၼ် ၵူၼ်းဝဵင်း ထိတ်ႉသႃႇလေႃးၼိၵ်ႈ ၸိူဝ်းၼၼ်ႉ လႆႈငိၼ်းလွင်ႈဢၼ် ပေႃးလူႉ ႁေႃးလၢတ်ႈ ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈယူႇ ၵႃႈၼႂ်းဝဵင်း ပေႇရီႉ ၼၼ်ႉၸိုင်၊ ၶဝ်သမ်ႉမႃးၵႃႈတီႈဝဵင်းၼၼ်ႉလႄႈ တိုၵ်းယူင်းၸူဝ်းဢဝ်ၵူၼ်းတင်းလၢႆဢေႃႈ။-

14မိူဝ်ႈၼၼ်ႉပီႈၼွင်ႉၸိူဝ်းၼၼ်ႉ သမ်ႉဢဝ် ပေႃးလူႉ ပွႆႇၵႂႃႇႁဵတ်းၸိူဝ်ႉၼင်ႇႁၢင်ႈတၵ်းႁႂ်ႈၵႂႃႇတၢင်းပၢင်ႇလၢႆႇၼၼ်ႉဢေႃႈ။ သီႇလႃႉ တင်း တီႉမေႃးသေႇ ၵိုတ်းသဝ်းယူႇၵႃႈတီႈၼၼ်ႈဢေႃႈ။-

15ၶဝ်ၸိူဝ်းဢၼ်ဢဝ် ပေႃးလူႉ ၵႂႃႇသူင်ႇၼၼ်ႉၵႂႃႇသူင်ႇၵႃႈတီႈဝဵင်း ဢႃႇထိၼ်ႇ သေယဝ်ႉ ၶၢမ်ႇဢဝ်ဢမိင်ႉ ပုၼ်ႈ သီႇလႃႉ တင်း တီႉမေႃးသေႇ ဢၼ်ႁႂ်ႈၶဝ်ၸဵဝ်းမႃးၵႃႈတီႈမၼ်းၼၼ်ႉသေလႄႈ ၶိုၼ်းမိူဝ်းၵႂႃႇဢေႃႈ။

16ပေႃးလူႉ ၼၼ်ႉ ၼႂ်းမိူဝ်ႈဢၼ် ပႂ်ႉထႃႈ သီႇလႃႉ တင်း တီႉမေႃးသေႇ လႄႈ ယူႇၵႃႈၼႂ်းဝဵင်း ဢႃႇထိၼ်ႇ ၼၼ်ႉယူႇၼၼ်ႉၸိုင် ႁၼ်ဝဵင်းၼၼ်ႉတဵမ်ဝႆႉတင်းရုၵ်ႈထူႉလႄႈ မီးတၢင်းဢၼ်မႆႈၸႂ်ၶီၸႂ်ဢေႃႈ။-

17ပိူဝ်ႈၼႆလႄႈ မၼ်းႁဵတ်းတၢင်းဢၼ်တိူင်ႇပၢင်ႇလၢတ်ႈၸႃၵၼ်တင်း ၵူၼ်း ယူႉတႃႉ တင်းၵူၼ်းဢၼ်ၵူဝ်းၵႂၢႆႇၽြႃးပဵၼ်ၸဝ်ႈတင်းလၢႆ ၵႃႈတီႈၼႂ်းၸရွပ်ႈႁေႃးတြႃး ဢိၵ်ႇတင်းၶဝ်ၸိူဝ်းဢၼ် မၼ်းထူပ်းႁၼ်ၵူႈဝၼ်း ၵႃႈတီႈၼႂ်းၵၢတ်ႇၸိူဝ်းၼၼ်ႉဢေႃႈ။-

18မိူဝ်ႈၼၼ်ႉ တပႄး ဢေးပီႉၵူႉရူႉ ဢိၵ်ႇတင်း သတေႃးဢိၵ်ႉ ပိင်ႇၺႃႇသီႉၵမ်ႈၽွင်ႈ လၢတ်ႈၶဵင်ႇၵၼ်တင်း ပေႃးလူႉ ဢေႃႈ။ ၵမ်ႈၽွင်ႈဝႃႈ ၵူၼ်းဢၼ်ဢမ်ႇလႆႈလွင်ႈၼႆႉတၵ်းၶႂ်ႈဝႃႈၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ ၵေႃႉၼႆႉမိူၼ်ၸိူဝ်ႉၼင်ႇႁၢင်ႈပဵၼ် ၵေႃႉဢၼ်ႁေႃးလၢတ်ႈလွင်ႈၸဝ်ႈၽြႃးတၢင်ႇဝၢၼ်ႈတၢင်ႇမိူင်းဢေႃႈ၊ ဝႃႈၼင်ႇၼႆဢေႃႈ။ လွင်ႈဢၼ်ဝႃႈၼင်ႇၼႆၼၼ်ႉၸမ်ႉ၊ ပေႃးလူႉ ၼၼ်ႉ ႁေႃးလၢတ်ႈတြႃးသတၢင်းသိူဝ်းပျေႃႇလွင်ႈ ယေႇသူႉ ဢိၵ်ႇတင်းလွင်ႈတြႃးတၢင်းဢၼ်လုၵ်ႉၶိုၼ်းလိပ်းၼၼ်ႉယူႇဢေႃႈ။-

19မိူဝ်ႈၼၼ်ႉၶဝ်ၼၼ်ႉ ႁွင်ႉဢဝ် ပေႃးလူႉ လႄႈ ၵႂႃႇၵႃႈၼိူဝ်လွႆ ဢႃႇရေႇ သေယဝ်ႉလၢတ်ႈလႄႈဝႃႈ၊ လွင်ႈဢၼ်ဢယူႇဝႃႇတႃႉဢၼ်မႂ်ႇဢၼ်မႂ်းႁေႃးလၢတ်ႈၼၼ်ႉ ပဵၼ်ၸိူဝ်ႉၼင်ႇႁိုဝ်ၼၼ်ႉၸိုင်ႁဝ်းဢမ်ႇထုၵ်ႇလီႁူႉႁိုဝ်။-

20မႂ်းလၢတ်ႈလွင်ႈတၢင်းဢၼ်ႁဝ်းဢမ်ႇတွၼ်ႉႁူႉဢမ်ႇတွၼ်ႉငိၼ်းၼၼ်ႉဢေႃႈ။ လွင်ႈတၢင်းၸိူဝ်းၼၼ်ႉၸမ်ႉ၊ ဝႃႈၸိူဝ်ႉၼင်ႇႁိုဝ်ဝႃႈၼႆႁဝ်းၶႂ်ႈႁူႉဢေႃႈ၊ ဝႃႈၼင်ႇၼႆဢေႃႈ။-

21ၵူၼ်းဝဵင်း ဢႃႇထိၼ်ႇ တင်းသဵင်ႈတင်းလူင် ဢိၵ်ႇတင်းၶႅၵ်ႇဢၼ်ယူႇၼႂ်းဝဵင်းၼၼ်ႉၸိူဝ်းၼၼ်ႉ လိူဝ်သေတၢင်းဢၼ်မွၵ်ႇလၢတ်ႈသတၢင်းသဵင်ၶၢဝ်ႇ ဢိၵ်ႇတင်းတၢင်းဢၼ်ထွမ်ႇဢၼ်ငိၼ်းၼၼ်ႉၵူၺ်း ယင်းဢမ်ႇႁဵတ်းလွင်ႈတၢင်းတၢင်ႇတီႈတၢင်ႇဢၼ်လႄႈ ၸင်ႇႁႂ်ႈပူၼ်ႉၶိင်ႇပူၼ်ႉၶႃႇဢေႃႈ။

22မိူဝ်ႈၼၼ်ႉ ပေႃးလူႉ လုၵ်ႉၸုၵ်းၵႃႈၼိူဝ်လွႆ ဢႃႇရေႇ သေယဝ်ႉႁေႃးလၢတ်ႈလႄႈဝႃႈ ၵူၼ်းဝဵင်း ဢႃႇထိၼ်ႇ ၶဝ်ဢိူၺ်း၊ ၵဝ်ႁၼ်လွင်ႈဢၼ် သူၸၢင်ႈရူဝ်ႇသေႇၵူဝ်ယမ် ၽြႃးတင်းလၢႆၼႃႇလူင်လၢင် ၵႃႈၼႂ်းလွင်ႈတၢင်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။-

23လွင်ႈမၼ်းၸမ်ႉၼႂ်းမိူဝ်ႈဢၼ်ၵဝ်ပႆၸွမ်းတၢင်းလႄႈ လွမ်တူၺ်းၽြႃးသူၸိူဝ်းၼၼ်ႉယူႇၼၼ်ႉၸိုင်ၵဝ်ထူပ်းႁၼ်ယိတ်ႈပလၢင်ႇဢၼ်ၼိုင်ႈ၊ ဢၼ်တၢင်ႇသႂ်ႇတူဝ်လိၵ်ႈဢႅၵ်ႉၶရႃႇလႄႈဝႃႈ၊ ပုၼ်ႈၽြႃးပဵၼ်ၸဝ်ႈဢၼ်ႁဝ်းဢမ်ႇႁူႉၼၼ်ႉဢေႃႈ၊ ဝႃႈၼင်ႇၼႆဢေႃႈ။ ၵဝ်ႁေႃးလၢတ်ႈလွင်ႈမၼ်းၸဝ်ႈ ဢၼ်သူယင်းဢမ်ႇႁူႉလႄႈ ၵူဝ်းၵႂၢႆႇၼၼ်ႉတီႈသူဢေႃႈ။-

24ၽြႃးပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၸႃႉၸဵမ်လေႃးၵႃႉထၢတ်ႈ တင်းၵႃႈဢၼ်မီးၼႂ်းမၼ်းၼႆႉၼၼ်ႉ ပဵၼ်ၸဝ်ႈဢၼ်ဢုပ်ႉပိူင်ႇၵၢင်ႁၢဝ်တင်းလိၼ်မိူင်းလႄႈ ဢမ်ႇၵိင်းဝၢပ်ႈယူႇၵႃႈၼႂ်းပိၵ်ႈမၢၼ်ႇဢၼ်မိုဝ်းၵူၼ်းႁဵတ်း။-

25မၼ်းၸဝ်ႈၼၼ်ႉဢမ်ႇၶၢမ်ႇဢဝ်တၢင်းဢၼ်မိုဝ်းၵူၼ်းႁဵတ်းလဵင်ႉႁဵတ်းလူ ၸိူဝ်ႉၼင်ႇဢၼ်မၼ်းၸဝ်ႈမီးဢလူဝ်ႇၶႂ်ႈလႆႈသေၸိူဝ်ႉသေပိူင်ၼၼ်ႉလႄႈ ပဵၼ်ၸဝ်ႈဢၼ်ပၼ်ၸႃႉၸဵမ်ၸီႇဝႃႉဢသၢၵ်ႈလႄႈ တၢင်းဢၼ်ထူၺ်ႈၸႂ်ၶဝ်ႈထူၺ်ႈၸႂ်ဢွၵ်ႇ ဢိၵ်ႇတင်းၵႃႈမီးၵူႈၸိူဝ်ႉၵူႈပိူင် တီႈၵူၼ်းတင်းသဵင်ႈတင်းလူင်ဢေႃႈ။-

26မၼ်းၸဝ်ႈၼၼ်ႉ ဢဝ်တင်းလိူတ်ႈဢၼ်လဵဝ်ၽၢၼ်ႇသၢင်းႁဵတ်းပဵၼ်ၵူၼ်းၵူႈၸိူဝ်ႉၵူႈၶိူဝ်း ႁႂ်ႈလႆႈယူႇၵႃႈၼိူဝ်လိၼ်မိူင်းတင်းသဵင်ႈတင်းမူတ်းလႄႈ ၶိင်ႇၵႃႇလႃႉဢၼ်မႅင်ႇၽႄမႄးဝႆႉလႄႈသင်၊ တီႈယူႇတီႈသဝ်းၶဝ်ဢၼ်ၶၼ်ႈဝႆႉၶႅၼ်ႈဝႆႉလႄႈသင်၊ မၼ်းၸဝ်ႈမၢတ်ႈမၢႆဝႆႉတီႈၶဝ်ဢေႃႈ။-

27လွင်ႈမၼ်းၸမ်ႉ ၵူၼ်းႁဝ်းၼႆႉထုၵ်ႇလီၸၢမ်းႁႃၽြႃးပဵၼ်ၸဝ်ႈလႄႈ မီးလွင်ႈဢၼ်ၸၢင်ႈၶႄးတၵ်းထူပ်းဢေႃႈ။ ၼႂ်းဝႃႈၼၼ်သေၵေႃႈ ၼႂ်းႁဝ်းၼႆႉၽြႃးပဵၼ်ၸဝ်ႈမီးၵႆၵၼ်တင်းၽူႈလႂ်ဢမ်ႇၸႂ်ႈ။-

28ႁဵတ်းႁိုဝ်လႄႈ၊ ဝႃႈၼင်ႇၼႆၸမ်ႉ ႁဝ်းၼႆႉၵွပ်ႈပိူဝ်ႈမၼ်းၸဝ်ႈၼၼ်ႉလႄႈ ဢသၢၵ်ႈလိပ်းယူႇ၊ တူင်ႉၼိုင်ယူႇ၊ ပဵၼ်ယူႇဢေႃႈ။ ၼင်ႇၼၼ်လႄႈ ၼႂ်းသူၼႆႉ သြႃႇလၢင်ႇၵႃႇ ၵမ်ႈၽွင်ႈၸၢပ်ႈလႄႈဝႃႈ၊ ႁဝ်းၸမ်ႉပဵၼ်ၸိူဝ်ႉၶိူဝ်းၽြႃးဢေႃႈ၊ ဝႃႈၼင်ႇၼႆဢေႃႈ။-

29ပိူဝ်ႈဢၼ်ႁဝ်းၼႆႉ ပဵၼ်ၸိူဝ်ႉၶိူဝ်းၽြႃးပဵၼ်ၸဝ်ႈလႄႈ ႁဝ်းဢမ်ႇလီထၢင်ႇၽြႃးပဵၼ်ၸဝ်ႈမိူၼ်ၵၼ်တင်းရုၵ်ႈထူႉၶမ်း၊ ရုၵ်ႈထူႉငိုၼ်း၊ ရုၵ်ႈထူႉမၢၵ်ႇႁိၼ် ဢၼ်ၵူၼ်းႁဝ်းဢဝ်တင်းပိင်ႇၺႃႇၶႆႈၸႂ်လႄႈတွင်ႈႁဵတ်းဝႆႉၼၼ်ႉ။-

30ပိူဝ်ႈၼႆလႄႈ ပိၵ်ႉသမ်ႉၽြႃးပဵၼ်ၸဝ်ႈဢမ်ႇဝႆႉဢမူႉၶိင်ႇၵႃႇလႃႉ ဢၼ်မိူၵ်ႈလပ်းသိင်ႇၼၼ်ႉသေၵေႃႈ၊ တေႃႈလဵဝ်ၼႆႉမၼ်းၸဝ်ႈပိင်းၺၢပ်ႈဝႆႉ တီႈၵူၼ်းၸိူဝ်းဢၼ်မီးၵူႈတီႈၵူႈလႅၼ်တင်းသဵင်ႈတင်းလူင်လႄႈဝႃႈ ႁၼ်ဢပႅတ်ႈတူဝ်ၸဝ်ႈၵဝ်ႇလႄႈ ၶုၵ်းၸႂ်လႆႈမႆႈၸႂ်တႃႉ၊ ဝႃႈၼင်ႇၼႆဢေႃႈ။-

31လွင်ႈမၼ်းၸမ်ႉ မၼ်းၸဝ်ႈမၵ်းၶၢၼ်းဝၼ်းဢၼ်တၵ်းဢဝ်ၵေႃႉဢၼ်မၼ်းၸဝ်ႈၶၢၼ်းဝႆႉၼၼ်ႉ ၸီႇယၢင်ႇၵူၼ်းလေႃးၵီႇတင်းလၢႆၸွမ်းၼင်ႇတြႃးတၢင်းဢၼ်သိုဝ်ႈတေႃႇၼၼ်ႉဝႆႉယဝ်ႉ။ ပိူဝ်ႈဢၼ်မၼ်းၸဝ်ႈႁႂ်ႈၵေႃႉၼၼ်ႉ လုၵ်ႉၵႃႈတၢင်းတၢႆၶိုၼ်းလိပ်းလႄႈ မၼ်းၸဝ်ႈၼႄပျႃးသၢၵ်ႈသေႇဢၼ်လီယုမ်ႇ တီႈၵူၼ်းတင်းသဵင်ႈတင်းလူင်ယဝ်ႉဝႃႈၼႆ၊ ပေႃးလူႉ ႁေႃးလၢတ်ႈဝႃႈၼင်ႇၼႆဢေႃႈ။

32မိူဝ်ႈဢၼ်ၶဝ်ငိၼ်းလွင်ႈတၢင်းဢၼ် ၵူၼ်းတၢႆတင်းလၢႆလုၵ်ႉၶိုၼ်းလိပ်းၼၼ်ႉၸိုင် ၵမ်ႈၽွင်ႈၶူဝ်သေဢေႃႈ။ ၵမ်ႈၽွင်ႈၵေႃႈဝႃႈ ႁဝ်းတၵ်းထွမ်ႇလွင်ႈတီႈႁဵင်းၼႆႉထႅင်ႈလူးၵွၼ်ႇ၊ ဝႃႈၼင်ႇၼႆဢေႃႈ။-

33ၵူၺ်းၵႃႈမိူဝ်ႈဢၼ်ၶဝ်ဝႃႈၸိူဝ်ႉၼင်ႇၼႆၼၼ်ႉၸိုင် ပေႃးလူႉ ဢွၵ်ႇၵႃႈၼႂ်းၶဝ်ၼၼ်ႉၵႂႃႇသေဢေႃႈ။

34ၵူၼ်းၵမ်ႈၽွင်ႈၸပ်းယူႇၵႃႈတီႈ ပေႃးလူႉ လႄႈ ႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။ ဢၼ်ပႃးၼႂ်းၶဝ်ၼၼ်ႉ မီးၸႃႉၸဵမ် တယေႃႇၼူႉသီႉ ၶုၼ်လွႆ ဢႃႇရေႇ ၵေႃႉၼိုင်ႈလႄႈ မႄႈယိင်းဢၼ်လႆႈၸိုဝ်ႈ တမႃႇရီႉ ၵေႃႉၼိုင်ႈ ဢိၵ်ႇတင်းၵူၼ်းတၢင်ႇၵေႃႉဢေႃႈ။

← Chapter 16 Jump to: Chapter 18 →