Acts 8

Shan

← Chapter 7 Jump to: Chapter 9 →

1မိူဝ်ႈၼၼ်ႉၸိူဝ်းၸဝ်ႈဢၼ်မီး ၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉ လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးၼႃႇလူင်လၢင်လႄႈ လိူဝ်သေတမၢၼ်ႇၸဝ်ႈတင်းလၢႆၼၼ်ႉ ၵူၼ်းၶဝ်ႈၸိူဝ်းၸဝ်ႈတင်းသဵင်ႈတင်းလူင် ၽၢတ်ႇၽႄၵၼ်ၵႂႃႇၵႃႈၼႂ်းမိူင်း ယူႉတႃႉ တင်းမိူင်း သမႃႇရီႉ ၵူႈတီႈၵူႈလႅၼ်ဢေႃႈ။-

2ၶဝ်ၸိူဝ်းဢၼ် ရူဝ်ႇသေႇတြႃးၼၼ်ႉ သၢင်းၵျူဝ်ႇ သထေႇၽၢၼ်ႇ လႄႈ ႁဵတ်းသဵင်ႁႆႈသဵင်ႁွင်ႉဢၼ်ယႂ်ႇၼႃႇ ၵွပ်ႈပိူဝ်ႈမၼ်းဢေႃႈ။-

3သေႃးလူႉ ၼၼ်ႉ ယႃႉပႅတ်ႈၸိူဝ်းၸဝ်ႈဢေႃႈ။ မၼ်းၶဝ်ႈၵႃႈၼႂ်းႁိူၼ်းလင်ၼိုင်ႈယဝ်ႉလင်ၼိုင်ႈလႄႈ တိုတ်ႉၸၼ်ဢဝ်ၽူႈယိင်းၽူႈၸၢႆးသေယဝ်ႉ၊ ၶင်ဝႆႉၵႃႈၼႂ်းထွင်ႇဢေႃႈ။

4ပိူဝ်ႈၼႆလႄႈ ၶဝ်ၸိူဝ်းဢၼ်လႆႈၽၢတ်ႇၽႄၵၼ်ၵႂႃႇ ၵူႈတီႈၵူႈလႅၼ်ၼၼ်ႉၵေႃႈ လႄႇလဵပ်ႈႁေႃးလၢတ်ႈၼုၵ်ႈၵပၢတ်ႈတြႃးသတၢင်းသိူဝ်းပျေႃႇၸဝ်ႈယူႇဢေႃႈ။-

5ၽီႉလိပ်ႉပူႉ ၵေႃႈ လူင်းၵႂႃႇၵႃႈတီႈဝဵင်း သမႃႇရီႉ သေလႄႈ ႁေႃးလၢတ်ႈလွင်ႈၸဝ်ႈၶရိၸ်ႈဢေႃႈ။-

6မိူဝ်ႈဢၼ်ၵူၼ်းဢၼ်ၸူႉဢၼ်တုမ် လႆႈငိၼ်းလႆႈႁၼ်ၼီႉမိၵ်ႈလၢၵ်ႈၶၼႃႇ ဢၼ် ၽီႉလိပ်ႉပူႉ ႁဵတ်းၼၼ်ႉၸိုင် ၶဝ်ၽွမ်ႉၵၼ်ထွမ်ႇဢဝ်ၵႂၢမ်းမၼ်းဢေႃႈ။-

7လွင်ႈမၼ်းၸမ်ႉၽီႁၢႆႉႁဵတ်းတင်းသဵင်ဢၼ်ယႂ်ႇၼႃႇ ႁွင်ႉသႅၼ်ႇသေလႄႈ ဢွၵ်ႇၵႂႃႇၵႃႈၼႂ်းၵူၼ်းဢၼ်ၽီႁၢႆႉၶဝ်ႈ ၼမ်ၼႃႇၼၼ်ႉဢေႃႈ။ ၶဝ်ၸိူဝ်းဢၼ်ဢမ်ႇတူင်ႉတူဝ်ၼိုင်တူဝ်လႆႈဢိၵ်ႇတင်းၶဝ်ၸိူဝ်းဢၼ် တိၼ်ဢမ်ႇလီၼၼ်ႉၵေႃႈ၊ ႁွတ်ႈထိုင်တၢင်းဢၼ်ၶႅၼ်းမႃးဢေႃႈ။-

8ၼႂ်းဝဵင်းၼၼ်ႉ မီးတၢင်းဢၼ်သိူဝ်းၸူမ်းၼႃႇလူင်လၢင်ဢေႃႈ။

9ၵူၼ်းၵေႃႉၼိုင်ႈ ဢၼ်လႆႈၸိုဝ်ႈ သီႉမုၼ်ႇ ၼၼ်ႉ မီးယူႇၵႃႈၼႂ်းဝဵင်းၼၼ်ႉဢွၼ်တၢင်းလႄႈ ႁဵတ်းတင်းဢတၢတ်ႈၽီမေႃလႄႈ လၢတ်ႈဝႃႈ၊ ၵဝ်ၼႆႉပဵၼ်ၵေႃႉဢၼ်လၢၵ်ႇလၢႆးဢေႃႈ၊ ဝႃႈၼင်ႇၼႆလႄႈ ႁႂ်ႈၵူၼ်းမဵဝ်း သမႃႇရီႉ ၸိူဝ်းၼၼ်ႉၵႂင်ၸႂ်ယုင်ႈၸႂ်ယူႇဢေႃႈ။-

10မၼ်းၼၼ်ႉၸိုင် ၵူၼ်းၸဵမ်လဵၵ်ႉၸဵမ်ယႂ်ႇၵႃႈမီးၼၼ်ႉၵေႃႈ ထွမ်ႇဢဝ်ၸွမ်းဢဝ်လႄႈဝႃႈ၊ မၼ်းၼႆႉပဵၼ်မႁႃႇတၼ်းၶူဝ်းၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။-

11လွင်ႈဢၼ်ၶဝ်ထွမ်ႇဢဝ်ၸွမ်းဢဝ်မၼ်းၼၼ်ႉၸမ်ႉ မၼ်းၼၼ်ႉႁဵတ်းတင်းဢတၢတ်ႈၽီမေႃႁိုင်ၼႃႇလႄႈ ႁႂ်ႈၶဝ်ၼၼ်ႉၵႂင်ၸႂ်ယုင်ႈၸႂ်ဢေႃႈ။-

12မိူဝ်ႈဢၼ်ၶဝ်ၼၼ်ႉယုမ်ႇမၢတ်ႈ ၽီႉလိပ်ႉပူႉ ဢၼ်ႁေႃးတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်း မိူင်းၽြႃးပဵၼ်ၸဝ်ႈ ဢိၵ်ႇတင်းၼႃႇမႃႉၸိုဝ်ႈသဵင် ၸဝ်ႈ ယေႇသူႉၶရိၸ်ႈ ၼၼ်ႉၸိုင် ၸဵမ်ယိင်းၸဵမ်ၸၢႆးၶၢမ်ႇ ပပ်ႉတီႉၸမ်ႇ ဢေႃႈ။-

13သီႉမုၼ်ႇ ၼၼ်ႉၵေႃႈ တူဝ်ၸဝ်ႈၵဝ်ႇယုမ်ႇမၢတ်ႈလႄႈၶၢမ်ႇ ပပ်ႉတီႉၸမ်ႇ ယဝ်ႉၸင်ႇ ယူႇလူၺ်ႈၵၼ်တင်း ၽီႉလိပ်ႉပူႉ သေလႄႈ ႁၼ်တၼ်းၶူဝ်းဢၼ်လၢၵ်ႇလၢႆး ဢိၵ်ႇတင်းၼီႉမိၵ်ႈလၢၵ်ႈၶၼႃႇဢၼ်ယႂ်ႇၼႃႇ ဢၼ်မၼ်းႁဵတ်းတင်းလၢႆၼၼ်ႉလႄႈ ၵႂင်ၸႂ်ၼႃႇလူင်လၢင်ဢေႃႈ။

14မိူဝ်ႈဢၼ်တမၢၼ်ႇၸဝ်ႈ ဢၼ်မီးၵႃႈၼႂ်းဝဵင်း ယေႇရူႉသလႅမ်ႇ တင်းလၢႆၼၼ်ႉ လႆႈငိၼ်းသတၢင်းသဵင်ၶၢဝ်ႇ လွင်ႈဢၼ်ၵူၼ်းဝဵင်း သမႃႇရီႉ ၸိူဝ်းၼၼ်ႉ လႆႈၶၢမ်ႇဢဝ်ၼုၵ်ႈၵပၢတ်ႈတြႃးၸဝ်ႈယဝ်ႉၼၼ်ႉၸိုင် ၶဝ်ပွႆႇၸႂ်ႉ ပေႇတရူႉ တင်း ယူဝ်းႁၢၼ်ႇ ၵႂႃႇဢေႃႈ။-

15ၶဝ်ၼၼ်ႉႁွတ်ႈထိုင်သေယဝ်ႉ လွင်ႈၼင်ႇႁိုဝ်ၵူၼ်းဝဵင်းၸိူဝ်းၼၼ်ႉ တၵ်းလႆႈၶၢမ်ႇဝီႉၺိၺ်ႇဢၼ်မူတ်းၸၢင်ႇၸဝ်ႈၸိုင်၊ သူးတွင်းပုၼ်ႈၶဝ်ဢေႃႈ။-

16လွင်ႈမၼ်းၸမ်ႉ မၼ်းၸဝ်ႈၼၼ်ႉဢမ်ႇပႆႇလူင်းမႃးၵႃႈၼိူဝ်သေၵေႃႉသေၵူၼ်းလႄႈ ၶဝ်ၼၼ်ႉလႆႈၶၢမ်ႇ ပပ်ႉတီႉၸမ်ႇ ၼႂ်းၼႃႇမႃႉၸိုဝ်ႈသဵင်ၸဝ်ႈ ယေႇသူႉ ၵူၺ်းဢေႃႈ။-

17မိူဝ်ႈၼၼ်ႉၶဝ်ဢဝ်မိုဝ်းတၢင်ႇၵႃႈၼိူဝ်ၶဝ်ၼၼ်ႉလႄႈ ၶဝ်ၼၼ်ႉလႆႈၶၢမ်ႇဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။

18မိူဝ်ႈဢၼ် သီႉမုၼ်ႇ လႆႈႁၼ်လွင်ႈဢၼ် ဝီႉၺိၺ်ႇဢၼ်မူတ်းၸၢင်ႇၸဝ်ႈလူင်းမႃးၵွပ်ႈပိူဝ်ႈဢၼ် တမၢၼ်ႇၸဝ်ႈၸိူဝ်းၼၼ်ႉဢဝ်မိုဝ်းတၢင်ႇၸိူဝ်ႉၼင်ႇၼၼ်ၼၼ်ႉၸိုင် မၼ်းဢဝ်ငိုၼ်းမႃးသေလႄႈယွၼ်းဝႃႈ၊-

19ၼင်ႇႁိုဝ်ၵေႃႉဢၼ်လႆႈၶၢမ်ႇတၢင်းဢၼ် ၵဝ်ၶႃႈဢဝ်မိုဝ်းတၢင်ႇၼၼ်ႉ တၵ်းလႆႈၶၢမ်ႇဝီႉၺိၺ်ႇဢၼ်မူတ်းၸၢင်ႇၸဝ်ႈၸိုင် ပၼ်ဢၶႂၢင်ႉတီႈၵဝ်ၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။-

20ပေႇတရူႉ ၵေႃႈလၢတ်ႈတီႈမၼ်းလႄႈဝႃႈ၊ ပိူဝ်ႈဢၼ်မႂ်းထၢင်ႇမႂ်းတၵ်းဢဝ်တင်းငိုၼ်းသိုဝ်ႉဢဝ်ၵျေးၸူးၽြႃးပဵၼ်ၸဝ်ႈလႆႈယူႇလႄႈ၊ ႁႂ်ႈငိုၼ်းမႂ်းႁွတ်ႈထိုင်တၢင်းလူႉတၢင်းလႅဝ်လူၺ်ႈၵၼ်တင်းမႂ်းတႃႉ။-

21မႂ်းၼႆႉပဵၼ်ၵေႃႉဢၼ်ဢမ်ႇသိူၵ်ႈသမ်ႇၵၼ်တင်း လွင်ႈတီႈႁဵင်းၼႆႉဢေႃႈ။ လွင်ႈမၼ်းၸမ်ႉ ႁူဝ်ၸႂ်မႂ်း ဢမ်ႇမီးတၢင်းဢၼ်သိုဝ်ႈဢၼ်တေႃႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈ။-

22ပိူဝ်ႈၼႆလႄႈ ၶုၵ်းၸႂ်လႆႈမႆႈၸႂ်လူၺ်ႈလွင်ႈတၢင်းဢၼ် ႁၢႆႉမိူၵ်ႈတီႈမႂ်းတေႃႈလဵဝ်ၼႆႉၼၼ်ႉတႃႉ။ မၼ်းၸဝ်ႈၸၢင်ႈၶႄး တၵ်းပွႆႇလွတ်ႈဢပႅတ်ႈ တၢင်းဢၼ်ၵျၢမ်ႇပွင်ယူႇ ၵႃႈၼႂ်းႁူဝ်ၸႂ်မႂ်းၼၼ်ႉလႄႈ တွင်းပၢၼ်ႇထႃႇဝရႃႉၽြႃးတႃႉ။-

23ၵဝ်ႁူႉလွင်ႈဢၼ် မႂ်းမီးၼႂ်းလီဢၼ်ၶူမ်ၼႃႇလႄႈလႆႈ ၶၢမ်ႇတၢင်းဢၼ်တူႉၸရိူၵ်ႈဢပႅတ်ႈမတ်ႉၽုၵ်ႇဝႆႉၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။

24သီႉမုၼ်ႇ ၵေႃႈၶိုၼ်းလၢတ်ႈလႄႈဝႃႈ ၼင်ႇႁိုဝ်လွင်ႈတၢင်းဢၼ်ၸဝ်ႈဝႃႈၼႆႉ တၵ်းဢမ်ႇႁွတ်ႈထိုင်ၵႃႈၼိူဝ်ၵဝ်ၶႃႈသေၸိူဝ်ႉသေပိူင်ၸိုင်၊ သူးတွင်းထႃႇဝရႃႉၽြႃးပုၼ်ႈၵဝ်ၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။

25တမၢၼ်ႇၸဝ်ႈၼၼ်ႉ ၶၢမ်ႇသၢၵ်ႈသေႇလႄႈ ႁေႃးလၢတ်ႈၼုၵ်ႈၵပၢတ်ႈၸဝ်ႈၽြႃးသေယဝ်ႉ၊ ၼႂ်းမိူဝ်ႈဢၼ် ၶိုၼ်းမိူဝ်းၵႂႃႇၵႃႈတီႈဝဵင်း ယေႇရူႉသလႅမ်ႇ ယူႇၼၼ်ႉၸိုင် ႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈ ၼႂ်းဝၢၼ်ႈ သမႃႇရီႉ ၼမ်ၼႃႇၼၼ်ႉဢေႃႈ။

26ၵမ်းၼၼ်ႉ တမၢၼ်ႇၵၢင်ႁၢဝ် ထႃႇဝရႃႉၽြႃးလၢတ်ႈတီႈ ၽီႉလိပ်ႉပူႉ လႄႈဝႃႈ မႂ်းလုၵ်ႉလႄႈၵႂႃႇၼႃႈတၢင်းၸၢၼ်း ၸူးၵႃႈတီႈသဵၼ်ႈတၢင်းဢၼ်လုၵ်ႉသေၵႃႈတီႈဝဵင်း ယေႇရူႉသလႅမ်ႇ လူင်းၵႂႃႇၵႃႈတီႈဝဵင်း ၵႃႇၸႃႉ ပုၼ်ႉတႃႉ၊ ဝႃႈၼင်ႇၼႆဢေႃႈ။ သဵၼ်ႈတၢင်းၼၼ်ႉၸမ်ႉ ပဵၼ်ၼႂ်းထိူၼ်ႇဢေႃႈ။

27မိူဝ်ႈၼၼ်ႉမၼ်းလုၵ်ႉၵႂႃႇၸိူဝ်ႉၼင်ႇၼၼ်လႄႈ ၵူၼ်းမိူင်း ဢီႉသႃႇယေႃးပီႉ ဢၼ်ပဵၼ်ၵူၼ်းတွၼ်လႄႈ ပဵၼ်ဢမၢတ်ႈၵႃႈတီႈ ၼၢင်းႁေႃၶမ်း ၵၼ်ႇတေႇၵီႉ ဢၼ်ဢုပ်ႉပိူင်ႇမိူင်း ဢီႉသႃႇယေႃးပီႉ ၊ ဢၼ်ပႂ်ႉၽၼ်ႇတႃႇမၼ်းၸဝ်ႈ တင်းသဵင်ႈတင်းလူင်၊ ဢၼ်လႆႈၵႂႃႇၵႃႈတီႈ ဝဵင်း ယေႇရူႉသလႅမ်ႇ ႁႂ်ႈလႆႈၵူဝ်းၵႂၢႆႇၼၼ်ႉၵေႃႉၼိုင်ႈ၊-

28ၶိုၼ်းမိူဝ်းၵႂႃႇလႄႈ ၼင်ႈၵႃႈၼိူဝ်လေႃႉရထႃးတူဝ်ၸဝ်ႈၵဝ်ႇလႄႈ ၽတ်းၵျၢမ်းလိၵ်ႈပရေႃးၽႅတ်ႈ ဢီႉသႃႇယႃႉ ယူႇဢေႃႈ။-

29ဝီႉၺိၺ်ႇၸဝ်ႈၵေႃႈ ပၼ်ပျႃႇတိၵ်ႈတီႈ ၽီႉလိပ်ႉပူႉ လႄႈဝႃႈ၊ သုတ်ႉၸမ်လႄႈၸပ်းၵႃႈတီႈလေႃႉရထႃးၼၼ်ႉၵႂႃႇတႃႉ ဝႃႈၼႆ ၵႃႈၼင်ႇဢၼ်ဝႃႈၼၼ်ႉ၊-

30ၽီႉလိပ်ႉပူႉ လႅၼ်ႈၵႂႃႇၸူး ၵႃႈတီႈလေႃႉရထႃးၼၼ်ႉလႄႈ လႆႈငိၼ်းမၼ်းၼၼ်ႉၽတ်းၵျၢမ်းလိၵ်ႈပရေႃးၽႅတ်ႈ ဢီႉသႃႇယႃႉ ယူႇၼၼ်ႉသေယဝ်ႉ လဝ်ႊထၢမ်လႄႈဝႃႈ၊ ၸဝ်ႈႁူႉလွင်ႈဢၼ်ၽတ်းၼႆႉၶႃႈႁိုဝ်။ ဝႃႈၼင်ႇၼႆဢေႃႈ။-

31မၼ်းၼၼ်ႉၵေႃႈလၢတ်ႈလႄႈဝႃႈ ပေႃးၵေႃႉဢၼ်လၢတ်ႈပၼ်သွၼ်ပၼ်ဢမ်ႇမီးၸိုင်၊ တၵ်းႁူႉလႆႈၸိူဝ်ႉၼင်ႇႁိုဝ်။ ဝႃႈၼင်ႇၼႆယဝ်ႉ၊ ၸင်ႇႁွင်ႉဢဝ် ၽီႉလိပ်ႉပူႉ၊ ၶိုၼ်ႈၼင်ႈလူၺ်ႈၵၼ်တင်းမၼ်းဢေႃႈ။

32ၼႂ်းၵျၢမ်းလိၵ်ႈ တီႈဢၼ်မၼ်းၽတ်းၼၼ်ႉဝႃႈၸမ်ႉ၊ မၼ်းၶၢမ်ႇတၢင်းဢၼ်ဢဝ်ၵႂႃႇ ၸိူဝ်ႉၼင်ႇသူဝ်းဢၼ်ဢဝ်ၵႂႃႇႁႂ်ႈလႆႈဢဝ်တၢႆၼၼ်ႉလႄႈ ၸိူဝ်ႉၼင်ႇဢၼ်သူဝ်းဢွၼ်ႇ ယင်းဢမ်ႇႁွင်ႉၵႃႈတီႈၽၢႆႇၼႃႈၵေႃႉဢၼ်ႁႆးၶူၼ်မၼ်းယူႇၼၼ်ႉ မၼ်းယင်းဢမ်ႇပိုတ်ႇပၢၵ်ႇလႄႈယူႇဢေႃႈ။-

33ၼႂ်းမိူဝ်ႈဢၼ် မၼ်းယင်းတိုၵ်ႉၶၢမ်ႇတၢင်းဢၼ်ၶျႃးတႅမ်ႇယူႇၼၼ်ႉၸိုင် ပိူၼ်ႈႁိမ်ဢဝ်တၢင်းဢၼ်ၸီႇယၢင်ႇၸွမ်းၼင်ႇတြႃးတီႈမၼ်းၼၼ်ႉၵႂႃႇဢေႃႈ။ ပိူဝ်ႈဢၼ်သိမ်းဢဝ်ဢသၢၵ်ႈမၼ်း ၵႃႈတီႈလိၼ်မိူင်းၼႆႉသေလႄႈ ၽူႈလႂ်တၵ်းၸီႉမွၵ်ႇၼႄပျႃးမဵဝ်းၸိူဝ်ႉၶိူဝ်းမၼ်းၼၼ်ႉ ဝႃႈၼင်ႇၼႆဢေႃႈ။

34ဢမၢတ်ႈၼၼ်ႉၵေႃႈ တွင်ႈထၢမ်တီႈ ၽီႉလိပ်ႉပူႉ လႄႈဝႃႈ၊ ပရေႃးၽႅတ်ႈၼႆႉလၢတ်ႈၸိူဝ်ႉၼင်ႇၼႆ လွင်ႈၽူႈလႂ်။ လၢတ်ႈလွင်ႈတူဝ်ၸဝ်ႈၵဝ်ႇႁိုဝ်။ ဢမ်ႇၼၼ်လႄႈလၢတ်ႈလွင်ႈပိူၼ်ႈတၢင်ႇၵေႃႉႁိုဝ်။ ဝႃႈၼင်ႇၼႆသေယဝ်ႉ၊-

35ၽီႉလိပ်ႉပူႉ ၼၼ်ႉ ပိုတ်ႇပၢၵ်ႇတူဝ်ၸဝ်ႈၵဝ်ႇသေလႄႈ ဢဝ်ၸႃႉၸဵမ်တီႈႁဵင်းၼႂ်းၵျၢမ်းလိၵ်ႈၼၼ်ႉ ႁေႃးလၢတ်ႈတြႃးသတၢင်းသိူဝ်းပျေႃႇ လွင်ႈ ယေႇသူႉ တီႈမၼ်းဢေႃႈ။-

36ၼႂ်းမိူဝ်ႈဢၼ်ၶဝ်ယင်းတိုၵ်ႉၸွမ်းတၢင်းၵႂႃႇယူႇ ၸိူဝ်ႉၼင်ႇၼၼ်ၼၼ်ႉၸိုင်၊ ၶဝ်ႁွတ်ႈထိုင်ၵႃႈတီႈဢၼ်ၼမ်ႉမီးလႄႈ ဢမၢတ်ႈၼၼ်ႉၵေႃႈလၢတ်ႈလႄႈဝႃႈ တူၺ်းလူး၊ တီႈၼႆႈမီးၼမ်ႉၶႃႈဢေႃႈ။ ၼင်ႇႁိုဝ်ၵဝ်ၶႃႈတၵ်းဢမ်ႇလႆႈၶၢမ်ႇပပ်ႉတီႉၸမ်ႇၸိုင်၊ ၵႃႈသင်ႁၢမ်ႈတၢပ်ႈႁႄႉၶႅၼ်ၶႃႈ၊ ဝႃႈၼင်ႇၼႆသေလႄႈ၊-

38မီးဢမိင်ႉ ႁႂ်ႈလေႃႉရထႃးၵိုတ်းသဝ်းယူႇသေယဝ်ႉ၊ ၽီႉလိပ်ႉပူႉ ဢိၵ်ႇတင်းဢမၢတ်ႈၼၼ်ႉ လူင်းၵႃႈၼႂ်းၼမ်ႉလူၺ်ႈၵၼ်လႄႈ မၼ်းပၼ် ပပ်ႉတီႉၸမ်ႇ တီႈမၼ်းၼၼ်ႉဢေႃႈ။-

39မိူဝ်ႈဢၼ် ၶဝ်လုၵ်ႉသေၵႃႈၼႂ်းၼမ်ႉဢွၵ်ႇမႃးယဝ်ႉၼၼ်ႉၸိုင် ဝီႉၺိၺ်ႇထႃႇဝရႃႉၽြႃး ဢဝ် ၽီႉလိပ်ႉပူႉ ၵႂႃႇသေလႄႈ ၵမ်းလိုၼ်းဢမၢတ်ႈၼၼ်ႉ ဢမ်ႇလႆႈထူပ်းလႆႈႁၼ်မၼ်း။ လွင်ႈမၼ်းၸမ်ႉ မၼ်းမီးတင်းၸႂ်ဢၼ်သိူဝ်းသႂၢင်ႇလႄႈ ၵႂႃႇၸွမ်းသဵၼ်ႈတၢင်းဢၼ် မၼ်းတၵ်းလႆႈၵႂႃႇၼၼ်ႉဢေႃႈ။-

40ၵူၺ်းၵႃႈ ၽီႉလိပ်ႉပူႉ ၼၼ်ႉ ပေႃႇမႃးၵႃႈၼႂ်းဝဵင်း ဢႃႇၸုတ်ႉ လႄႈ ၸွမ်းတၢင်းၵႂႃႇယူႇသေလႄႈ ႁေႃးလၢတ်ႈတြႃးသတၢင်းသိူဝ်းပျေႃႇ ၼႂ်းဝဵင်းတင်းသဵင်ႈတင်းလူင် တေႃႇထိုင်ႁွတ်ႈမၼ်းၽႅဝ်ၵႃႈတီႈ ဝဵင်း ၵေႇသရီႉ ၼၼ်ႉဢေႃႈ။

← Chapter 7 Jump to: Chapter 9 →