Acts 20

Shan

← Chapter 19 Jump to: Chapter 21 →

1မိူဝ်ႈဢၼ် တၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးၼၼ်ႉ ထၢတ်ႇယဵၼ်ယဝ်ႉၼၼ်ႉၸိုင် ပေႃးလူႉ ႁွင်ႉဢဝ်တပႄးၸဝ်ႈတင်းလၢႆမႃးလႄႈ တိုၵ်းယူင်းၸူဝ်းဢဝ် တၵ်ႉလၢတ်ႈယဝ်ႉၸင်ႇ ၵႂႃႇၵႃႈတီႈမိူင်း မႃႇၵေႇတေႃးၼီႉ ပုၼ်ႉသေဢေႃႈ။-

2မၼ်းလႄႇလဵပ်ႈၵႂႃႇၵႃႈၼႂ်းတီႈၼၼ်ႈၸိူဝ်းၼၼ်ႉလႄႈ ဢဝ်တင်းၵႂၢမ်းၼမ်ၼႃႇသင်ႇသွၼ်သုင်းမႃႉပၼ်ၶဝ်ယဝ်ႉၸင်ႇ ႁွတ်ႈထိုင်ၵႃႈတီႈမိူင်း ႁေႇလသႃႉ ဢေႃႈ။-

3မၼ်းယူႇၵႃႈတီႈၼၼ်ႈသၢမ်လိူၼ်သေယဝ်ႉ၊ မိူဝ်ႈဢၼ်ဢၢင်ႈတၵ်းၶၢမ်ႈပၢင်ႇလၢႆႇလႄႈ ၵႂႃႇၵႃႈတီႈမိူင်း သူႉရီႉ ၼၼ်ႉၸိုင်၊ ပိူဝ်ႈဢၼ်ၵူၼ်း ယူႉတႃႉ တင်းလၢႆ ၵျၢမ်ႇပွင်လွင်ႈတၢင်းဢၼ်ဢမ်ႇလီတီႈမၼ်းလႄႈ မၼ်းသမ်ႉမီးတၢင်းၵျၢမ်ႇတၢင်းပွင် တၵ်းၶိုၼ်းမိူဝ်းၵႂႃႇၸွမ်းသဵၼ်ႈတၢင်းမိူင်း မႃႇၵေႇတေႃးၼီႉ ဢေႃႈ။-

4ၶဝ်ၸိူဝ်းဢၼ် ၸွမ်းလူၺ်ႈၵၼ်တင်း ပေႃးလူႉ ၵႂႃႇၵႃႈတီႈမိူင်း ဢႃႇသီႉ ၸိူဝ်းၼၼ်ႉၸမ်ႉ၊ ပဵၼ် သေႃးပႃႉတရူႉ လုၵ်ႈၸၢႆး ပူႉရူႉ ဢၼ်ပဵၼ် ၵူၼ်းဝဵင်း ပေႇရီႉ၊ ဢႃႇရိတ်ႉတႃႇၶူႉ တင်း သေးၶုၼ်ႇတူႉ ၵူၼ်းဝဵင်း ထိတ်ႉသႃႇလေႃးၼိၵ်ႈ၊ ၵႃႇယူႉ ၵူၼ်းဝဵင်း တေႇရပေႇ၊ တီႉမေႃးသေႇ၊ တူႉၶိတ်ႈ တင်း တရေႃးၽိမ်း ၵူၼ်းမိူင်း ဢႃႇသီႉ တင်းလၢႆၼၼ်ႉဢေႃႈ။-

5ၶဝ်ၼၼ်ႉလႆႈၵႂႃႇဢွၼ်တၢင်းႁဝ်းလႄႈ ပႂ်ႉထႃႈယူႇၵႃႈၼႂ်းဝဵင်း တရေႃး ဢေႃႈ။-

6ပူၼ်ႉသေဝၼ်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉယဝ်ႉ၊ ႁဝ်းၸင်ႇဢွၵ်ႇသေၵႃႈတီႈဝဵင်း ၽီႉလိပ်ႉပီႉ ၶီႇႁိူဝ်းသၢင်းၽေႃးၵႂႃႇလႄႈ ၼႂ်းႁႃႈဝၼ်းႁွတ်ႈထိုင် ၵႃႈတီႈဢၼ်ၶဝ်မီးၵႃႈၼႂ်းဝဵင်း တရေႃး ၼၼ်ႉလႄႈယူႇၸဵတ်းဝၼ်းဢေႃႈ။

7ၼႂ်းၸဵတ်းဝၼ်းဝၼ်းပထမႃႉၼၼ်ႉ၊ မိူဝ်ႈဢၼ်ႁဝ်းၸူႉၵၼ်တုမ်ၵၼ် ႁႂ်ႈလႆႈဝိတ်းၶဝ်ႈမုၼ်းၼၼ်ႉၸိုင် ပေႃးလူႉ ၼၼ်ႉ ပိူဝ်ႈဢၼ်တၵ်းဢွၵ်ႇၵႂႃႇဝၼ်းမိူဝ်ႈၽုၵ်ႈလႄႈ ႁေႃးလၢတ်ႈတေႃႇထိုင်ႁွတ်ႈတဵင်ႈၶိုၼ်းယူႇဢေႃႈ။-

8ၵႃႈတီႈဢၼ်ႁဝ်းၸူႉၵၼ်တုမ်ၵၼ်ၼႂ်းလုၵ်းႁၢၼ်ႉၼိူဝ်ၼၼ်ႉ မီးဝၢၼ်ႇၽႆးတဵၼ်းၼမ်ၼႃႇဢေႃႈ။-

9ၵူၼ်းဢွၼ်ႇဢၼ်လႆႈၸိုဝ်ႈ ဢူႉတူႉၶူႉ ၼၼ်ႉၵေႃႉၼိုင်ႈ ၼင်ႈယူႇၵႃႈတီႈႁူးလၢင်းတဵၼ်လႄႈ ၼွၼ်းလပ်းၼႃႇလူင်လၢင်ယူႇဢေႃႈ။ ၼႂ်းမိူဝ်ႈဢၼ် ပေႃးလူႉ ယင်းတိုၵ်ႉႁေႃးလၢတ်ႈယူႇႁိုင်ၼႃႇၼၼ်ႉၸိုင်ၵေႃႉၼၼ်ႉၼွၼ်းလပ်းပူၼ်ႉၵႂႃႇသေယဝ်ႉ၊ တူၵ်းသေၵႃႈၼိူဝ်ႁိူၼ်းသၢမ်ႁၢၼ်ႉၼၼ်ႉလႄႈ ၶဝ်ဢွၼ်ၵၼ်ႁွပ်ႇယွင်ႈဢဝ်မၼ်း ဢၼ်တၢႆၵႂႃႇၼၼ်ႉဢေႃႈ။-

10ပေႃးလူႉ ၵေႃႈ လူင်းၵႂႃႇၵႃႈတႂ်ႈလႄႈ ဢဝ်တူဝ်ၸဝ်ႈၵဝ်ႇလူမ်ႉဢိင်ၵႃႈၼိူဝ်မၼ်း ၵွတ်ႇႁွပ်ႇဢဝ်မၼ်းသေယဝ်ႉ၊ လၢတ်ႈလႄႈဝႃႈ၊ ယႃႇပေဢူၼ်ဢဵၼ်ႁူၼ်ႈမေႃးၵၼ်၊ ၸႂ်မၼ်းယင်းမီးယူႇၼႂ်းမၼ်းဢေႃႈ၊ ဝႃႈၼင်ႇၼႆဢေႃႈ။-

11မၼ်းသမ်ႉၶိုၼ်းၶိုၼ်ႈၵႂႃႇဝိတ်းၶဝ်ႈမုၼ်းၵိၼ်လႄႈ လၢတ်ႈၵႂၢမ်းယူႇႁိုင်ၼႃႇလူင်လၢင်တေႃႇထိုင်ႁွတ်ႈမိူင်းလႅင်းသေယဝ်ႉ၊ ဢွၵ်ႇၵႂႃႇသေဢေႃႈ။-

12ၶဝ်ၸင်ႇဢဝ်ၵူၼ်းဢွၼ်ႇဢၼ်ဢသၢၵ်ႈလိပ်းယူႇၼၼ်ႉမႃးလႄႈ မီးတၢင်းဢၼ်သၢၵ်ႈသႃႇမႃးၼႃႇလူင်လၢင်ဢေႃႈ။

13ႁဝ်းဢွၵ်ႇၵႂႃႇဢွၼ်တၢင်း ၸူးၵႃႈတီႈႁိူဝ်းသၢင်းၽေႃးသေယဝ်ႉ၊ ၶီႇၵႂႃႇၸူးၵႃႈတီႈဝဵင်း ဢတ်ႉသူႉ လႄႈမီးတၢင်းၵျၢမ်ႇတၢင်းပွင် တၵ်းႁႄႉႁပ်ႉဢဝ် ပေႃးလူႉ ၵႃႈတီႈၼၼ်ႈဢေႃႈ။ လွင်ႈမၼ်းၸမ်ႉ ပေႃးလူႉ မီးတၢင်းၵျၢမ်ႇတၢင်းပွင် တၵ်းပႆတိၼ်ၵႂႃႇတၢင်းလွႆၸူးၵႃႈတီႈဝဵင်းၼၼ်ႉလႄႈ ၸီႇယၢင်ႇဝႆႉၸိူဝ်ႉၼင်ႇၼၼ်ဢေႃႈ။-

14မိူဝ်ႈဢၼ်မၼ်းထူပ်းၵၼ်တင်းႁဝ်းၵႃႈၼႂ်းဝဵင်း ဢတ်ႉသူႉ ၼၼ်ႉၸိုင် ႁဝ်းႁပ်ႉဢဝ်မၼ်းလႄႈ ၵႂႃႇၵႃႈတီႈဝဵင်း မီႉတူႉလိၼ်ႇ ဢေႃႈ။-

15ႁဝ်းၸင်ႇၶီႇႁိူဝ်းသၢင်းၽေႃးဢွၵ်ႇသေၵႃႈတီႈဝဵင်းၼၼ်ႉလႄႈ ဝၼ်းမိူဝ်ႈၽုၵ်ႈလဵပ်ႈၵႂႃႇႁိမ်းၵုၼ် ၶီးဢူႉ သေယဝ်ႉ၊ လိုၼ်းၼၼ်ႉဝၼ်းၼိုင်ႈႁွတ်ႈထိုင်ၵႃႈတီႈၵုၼ် သမူႉ လႄႈ ၵိုတ်းသဝ်းယူႇၵႃႈႁိမ်းၸဵင်ႇလႅမ်ၵုၼ် ထရေႃႇၵူႉၸီႉ ၼၼ်ႉဢေႃႈ။ လိုၼ်းၼၼ်ႉဝၼ်းၼိုင်ႈၵေႃႈ၊ႁွတ်ႈထိုင်ၵႃႈတီႈ ဝဵင်း မီးလိတ်ႉ ဢေႃႈ။-

16ပေႃးလူႉ ၼၼ်ႉ ၼင်ႇႁိုဝ်တၵ်းဢမ်ႇလႆႈၵိုတ်းသဝ်းယူႇၵႃႈၼႂ်းမိူင်း ဢႃႇသီႉ ႁိုင်ၼႃႇၸိုင် မီးၸႂ်ဢၼ်ဢမ်ႇၶႂ်ႈၵႂႃႇဝႄႉၵႃႈတီႈဝဵင်း ဢေးၽႅတ်ႈ လႄႈ တၵ်းၶီႇႁိူဝ်းသၢင်းၽေႃးပူၼ်ႉၵႂႃႇသေဢေႃႈ။ လွင်ႈမၼ်းၸမ်ႉ ပေႃးလူႉ ၼၼ်ႉပေႃးႁွတ်ႈထိုင်လႆႈၸိုင်၊ ၵျူဝ်းၸႃးႁႂ်ႈလႆႈ မီးၼႂ်းဝဵင်း ယေႇရူႉသလႅမ်ႇ ဝၼ်းပွႆးပဵၼ်ႇတေႇၵုၵ်ႉတေႇၼၼ်ႉယူႇဢေႃႈ။

17မၼ်းၸင်ႇပွႆႇၸႂ်ႉၵူၼ်းလုၵ်ႉသေၵႃႈတီႈဝဵင်း မီးလိတ်ႉ ၵႂႃႇၵႃႈတီႈဝဵင်း ဢေးၽႅတ်ႈ ပုၼ်ႉလႄႈ ႁွင်ႉဢဝ်ၵူၼ်းဢုပ်ႉၸိူဝ်းၸဝ်ႈတင်းလၢႆမႃးဢေႃႈ။-

18မိူဝ်ႈဢၼ်ၶဝ်ၼၼ်ႉႁွတ်ႈမႃးတီႈမၼ်းၼၼ်ႉၸိုင် မၼ်းလၢတ်ႈလႄႈဝႃႈ၊ သူႁူႉလွင်ႈဢၼ်ၵဝ်ၼႆႉၸႃႉၸဵမ်မိုဝ်ႉဝၼ်းဢၼ်တိၼ်ၵဝ်မႃးယဵပ်ႇလိၼ်မိူင်း ဢႃႇသီႉ ၼႆႉၼၼ်ႉ ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉ မီးယူႇလူၺ်ႈၵၼ်တင်းသူၸိူဝ်ႉၼင်ႇႁိုဝ်လႄႈ၊-

19မီးတင်းၸႂ်ဢၼ်ၶျႃးတႅမ်ႇၼႃႇယူႇ၊ ၼမ်ႉတႃတူၵ်းယူႇ၊ ၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉ ၵွပ်ႈပိူဝ်ႈတၢင်းၵျၢမ်ႇတၢင်းပွင် ဢၼ်ဢမ်ႇလီၵူၼ်း ယူႉတႃႉ ၸိူဝ်းၼၼ်ႉယူႇသေလႄႈ ပွင်ႁဵတ်းဢမူႉၽြႃးပဵၼ်ၸဝ်ႈယူႇ၊-

20ဢိၵ်ႇတင်းလွင်ႈဢၼ်ၵဝ်ယင်းဢမ်ႇဝႄႈပႅတ်ႈလႄႈ ႁေႃးလၢတ်ႈလွင်ႈတၢင်းဢၼ်တၵ်းပွင်ဢၵျူဝ်းသူသေၸိူဝ်ႉသေပိူင်လႄႈ သင်ႇသွၼ်သုင်းမႃႉသူၵႃႈၼႂ်းတီႈဢၼ်ၵူၼ်းၸူႉၵူၼ်းတုမ်ဢိၵ်ႇတင်းၵႃႈၼႂ်းႁိူၼ်းၼိုင်ႈယဝ်ႉႁိူၼ်းၼိုင်ႈယူႇသေလႄႈ၊-

21ၶၢမ်ႇသၢၵ်ႈသေႇလွင်ႈတြႃးတၢင်းဢၼ် ၶုၵ်းၸႂ်လႆႈမႆႈၸႂ်ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ဢိၵ်ႇတင်းတြႃးတၢင်းဢၼ်ယုမ်ႇမၢတ်ႈၸဝ်ႈႁဝ်း ယေႇသူႉၶရိၸ်ႈ ၼၼ်ႉ ၵႃႈတီႈၵူၼ်း ယူႉတႃႉ တင်းၵူၼ်း ႁေႇလသႃႉ တင်းလၢႆၼၼ်ႉယူႇဢေႃႈ။

22တေႃႈလဵဝ်ၼႆႉ ဝီႉၺိၺ်ႇၵဝ်ၶၢမ်ႇတၢင်းဢၼ်မတ်ႉၽုၵ်ႇယူႇသေလႄႈၵဝ်ၵႂႃႇၵႃႈတီႈဝဵင်း ယေႇရူႉသလႅမ်ႇ ဢေႃႈ။ ၵဝ်ဢမ်ႇႁူႉလွင်ႈဢၼ်ဢမူႉဢၼ်လႂ်တၵ်းႁွတ်ႈထိုင်ၵႃႈၼိူဝ်ၵဝ်ၵႃႈၼႂ်းဝဵင်းၼၼ်ႉ။-

23ၼႂ်းဝႃႈၼၼ်သေၵေႃႈ ဝီႉၺိၺ်ႇဢၼ်မူတ်းၸၢင်ႇၸဝ်ႈ ၶၢမ်ႇသၢၵ်ႈသေႇတီႈၵဝ် ၵႃႈၼႂ်းဝဵင်းတင်းသဵင်ႈတင်းလူင်လူၺ်ႈလွင်ႈဢၼ် တၢင်းဢၼ်မတ်ႉၽုၵ်ႇဢိၵ်ႇတင်း တၢင်းဢၼ်ၼိၵ်ႈၸၢၵ်ႈငႅၼ်းသႄး ပႂ်ႉထႃႈၵဝ်ယူႇဢေႃႈ။-

24ၵူၺ်းၵႃႈ လွင်ႈၼင်ႇႁိုဝ် ၵဝ်တၵ်းမီးတၢင်းဢၼ်သိူဝ်းပျေႃႇလႄႈ ႁႂ်ႈတၢင်းႁဵတ်းဢၼ်ၵဝ်ႁဵတ်းၼႆႉ ဢိၵ်ႇတင်းၵၢၼ်ထမ်ႇမႃႉသြႃႇ ဢၼ်ၵဝ်လႆႈၶၢမ်ႇဢဝ်ၵႃႈတီႈၸဝ်ႈ ယေႇသူႉ ႁႂ်ႈလႆႈၶၢမ်ႇသၢၵ်ႈသေႇတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တင်းၵျေးၸူးၽြႃးပဵၼ်ၸဝ်ႈၸိူဝ်းၼၼ်ႉယဝ်ႉတူဝ်ႈၸိုင် ၵဝ်ဢမ်ႇပေႃးမၢတ်ႈတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉ သေၸိူဝ်ႉသေပိူင်ပဵၼ်ၵႃႈသင်။ ဢသၢၵ်ႈၵဝ်ၵေႃႈၵဝ်ဢမ်ႇသေလၢႆ။

25တေႃႈလဵဝ်ၼႆႉၸမ်ႉ၊ ၵဝ်ႁူႉလွင်ႈဢၼ်သူတင်းသဵင်ႈတင်းလူင် ဢၼ်ပဵၼ်တီႈဢၼ်ၵဝ်လႄႇႁေႃးလၢတ်ႈ လွင်ႈမိူင်းၽြႃးပဵၼ်ၸဝ်ႈၼၼ်ႉၸိူဝ်းၼႆႉ ၵမ်းလိုၼ်းတၵ်းဢမ်ႇလႆႈႁၼ်ၵဝ်ၼၼ်ႉယူႇဢေႃႈ။-

26ပိူဝ်ႈၼႆလႄႈ ဝၼ်းမိူဝ်ႈၼႆႉၵဝ်ၶၢမ်ႇသၢၵ်ႈသေႇလွင်ႈဢၼ်ၵဝ်ၵၢင်းလွတ်ႈတင်းလိူတ်ႈၵူၼ်းတင်းသဵင်ႈတင်းလူင်ယဝ်ႉၼၼ်ႉတီႈသူဢေႃႈ။-

27လွင်ႈမၼ်းၸမ်ႉၵဝ်ယင်းဢမ်ႇပႄႇပႅတ်ႈလႄႈ ႁေႃးလၢတ်ႈဢလူဝ်ႇၽြႃးပဵၼ်ၸဝ်ႈတင်းသဵင်ႈတင်းမူတ်းၵႃႈတီႈသူၼႆႉမႃးယဝ်ႉ။-

28ပိူဝ်ႈၼႆလႄႈ သူႁဵတ်းတင်းသတီႉလႄႈ လူတူၺ်းတူဝ်ၸဝ်ႈၵဝ်ႇ ဢိၵ်ႇတင်းၽုင်သူဝ်းတင်းၽုင် ဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ ၶၢၼ်းသူဝႆႉႁႂ်ႈသူပဵၼ်ၵေႃႉဢၼ်ဢုပ်ႉဢၼ်ထိင်း ႁႂ်ႈလႆႈႁဵတ်းလဵင်ႉႁဵတ်းလူၸိူဝ်းၸဝ်ႈၽြႃးပဵၼ်ၸဝ်ႈ ဢၼ်မၼ်းၸဝ်ႈဢဝ်တင်းလိူတ်ႈတူဝ်ၸဝ်ႈၵဝ်ႇသိုဝ်ႉဢဝ်ၼၼ်ႉတႃႉ။-

29လွင်ႈမၼ်းၸမ်ႉ ၵဝ်ႁူႉလွင်ႈဢၼ်ဝၢႆးသေၵဝ်ဢမ်ႇမီးၼၼ်ႉ မႃထိူၼ်ႇဢၼ်လိူင်းၵျၢမ်းတင်းလၢႆ ယင်းဢမ်ႇဢဵတ်းလူၽုင်သူဝ်းလႄႈ တၵ်းၶဝ်ႈမႃးၵႃႈၼႂ်းသူ၊-

30ဢိၵ်ႇတင်းလွင်ႈဢၼ် ၶဝ်ၸိူဝ်းဢၼ် ၸၢင်ႈလၢတ်ႈၵႂၢမ်းဢၼ်ၽိတ်းဢၼ်ပိူင်ႈ၊ ႁႂ်ႈလႆႈၸူဝ်းဢဝ်တပႄးၸဝ်ႈတင်းလၢႆ ၸွမ်းလင်ၶဝ်ၵႂႃႇၼၼ်ႉ တၵ်းပေႃႇဢွၵ်ႇမႃးၵႃႈၼႂ်းသူၼၼ်ႉယူႇဢေႃႈ။-

31ပိူဝ်ႈၼႆလႄႈၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်ၵဝ်ၼႆႉသၢမ်ပီႊတဵမ်တဵမ် ၵၢင်ဝၼ်းၵၢင်ၶိုၼ်းဢမ်ႇထၢတ်ႇပႃးတင်းၼမ်ႉတႃသင်ႇသွၼ်သုင်းမႃႉပၼ် ၵူၼ်းတင်းသဵင်ႈတင်းလူင်ၼၼ်ႉယူႇသေလႄႈပႂ်ႉယူႇတႃႉ။

32ပီႈၼွင်ႉၶဝ်ဢိူၺ်း၊ တေႃႈလဵဝ်ၼႆႉ ၵဝ်ဢဝ်သူဢၢပ်ႈၵႃႈတီႈၽြႃးပဵၼ်ၸဝ်ႈ ဢိၵ်ႇတင်းၵျေးၸူးတြႃးမၼ်းၸဝ်ႈဢၼ်တႄႇႁဵတ်းသူလႆႈၼၼ်ႉလႄႈ ပၼ်ဢမူၺ်ႇတီႈသူ ဢိၵ်ႇတင်း ၶဝ်ၸိူဝ်းဢၼ်မူတ်းၸၢင်ႇတင်းသဵင်ႈတင်းလူင်ၼၼ်ႉဢေႃႈ။-

33ၵဝ်ဢမ်ႇလႆႈမီးၸႂ် ဢၼ်ၸပ်းဢၼ်ၸွႆးၶႂ်ႈလႆႈငိုၼ်းၶမ်းၶူဝ်းၼုင်ႈတၢင်းမႆပိူၼ်ႈ။-

34သူတူဝ်ၸဝ်ႈၵဝ်ႇႁူႉလွင်ႈဢၼ်မိုဝ်းၵဝ်ၼႆႉလႆႈႁဵတ်းလဵင်ႉႁဵတ်းလူတီႈၵဝ်ဢိၵ်ႇတင်း ၶဝ်ၸိူဝ်းဢၼ်ပႃးလူၺ်ႈၵၼ်တင်းၵဝ်ၼၼ်ႉယူႇဢေႃႈ။-

35ၼင်ႇၼၼ်လႄႈ ၼႂ်းၵူႈၸိူဝ်ႉၵူႈပိူင်ၵဝ်လႆႈၼႄပျႃးလွင်ႈဢၼ်သူတၵ်းလႆႈႁဵတ်းတၢင်းႁဵတ်းလႄႈ ၸွႆႈထႅမ်မႃႉၸႃႉၶဝ်ၸိူဝ်းဢၼ်ႁႅင်းၵေႇၼၼ်ႉ၊ ဢိၵ်ႇတင်းလွင်ႈဢၼ်သူ တၵ်းလႆႈၶုၵ်းၸႂ်လႆႈၶႆႈၸႂ်ထူပ်း ၵႂၢမ်းၸဝ်ႈ ယေႇသူႉ ဢၼ်ဝႃႈ၊ တၢင်းဢၼ်ၽႄၸွၼ်းယိုၼ်ႈမႅင်ႇၼၼ်ႉ ယဵင်ႈၶႅၼ်းမီးမင်ႇၵလႃႇၼႃႇသေတၢင်းဢၼ်ၶၢမ်ႇဢဝ် တၢင်းဢၼ်ၽႄၸွၼ်းယိုၼ်ႈမႅင်ႇဢေႃႈ၊ ဝႃႈၼင်ႇၼႆၼၼ်ႉဝႆႉတီႈသူယဝ်ႉ။

36မၼ်းဝႃႈၸိူဝ်ႉၼင်ႇၼႆသေယဝ်ႉ၊ ၶုပ်ႉၶဝ်ႇလႄႈသူးတွင်းလူၺ်ႈၵၼ်တင်းၶဝ် တင်းသဵင်ႈတင်းလူင်ၼၼ်ႉဢေႃႈ။-

37ၶဝ်တင်းသဵင်ႈတင်းလူင်ၼၼ်ႉႁွင်ႉႁႆႈၼႃႇလူင်လၢင်လႄႈ ၵွတ်ႇၶေႃးမၼ်းယူႇ၊ ၼူမ်မၼ်းယူႇ၊-

38မီးတၢင်းၸႂ်ဢၼ်ယဵင်ႈၶႅၼ်းငိၼ်းၽၢၼ် ၵွပ်ႈပိူဝ်ႈၵႂၢမ်းဢၼ်မၼ်းလၢတ်ႈဝႃႈ လွင်ႈဢၼ်ၵမ်းလိုၼ်းၶဝ်တၵ်းဢမ်ႇလႆႈႁၼ်ၼႃႈမၼ်းၼၼ်ႉ ၼႃႇလူင်လၢင်သေယဝ်ႉ၊ ၸင်ႇဢဝ်မၼ်းၵႂႃႇသူင်ႇတေႃႇထိုင်ႁွတ်ႈ ႁိူဝ်းသၢင်းၽေႃးဢေႃႈ။

← Chapter 19 Jump to: Chapter 21 →