Acts 7 — Shan

1မိူဝ်ႈၼၼ်ႉ ၶုၼ်ယိတ်ႈပရေႃးႁဵၵ်ႈထၢမ်လႄႈဝႃႈ လွင်ႈတၢင်းၸိူဝ်းၼႆႉမႅၼ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

2မၼ်းၵေႃႈမွၵ်ႇလၢတ်ႈလႄႈဝႃႈ၊ ပီႈၼွင်ႉၶဝ်ဢိၵ်ႇတင်းပေႃႈၶဝ်ဢိူၺ်း၊ ထွမ်ႇငိၼ်းသေၵမ်း။ ၽြႃးပဵၼ်ၸဝ်ႈဢၼ်မုၼ်ၽုင်းယႂ်ႇၼႃႇၼၼ်ႉ ပေႃႇမႃးတီႈပေႃႈႁဝ်း ဢႃႇပြႃႇႁၢမ်ႇ ၼၼ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉမီးယူႇ ၵႃႈၼႂ်းမိူင်း မေႇသေႃးပေႃးတႃႇမီႉ ၸူဝ်ႈဢၼ်မၼ်း ဢမ်ႇပႆႇယူႇၵႃႈတီႈဝဵင်း ၶႃႇရၢၼ်ႇ ၼၼ်ႉလႄႈ၊-

3မီးဢမိင်ႉဝႃႈ ဢွၵ်ႇသေၵႃႈၼႂ်းမိူင်းမႂ်း ဢိၵ်ႇတင်းပီႈၼွင်ႉၸိူဝ်ႉၶိူဝ်းမႂ်းလႄႈ ၵႂႃႇၵႃႈတီႈမိူင်းဢၼ်ၵဝ်တၵ်းၼႄပၼ်တီႈမႂ်းၼၼ်ႉတႃႉ၊ ဝႃႈၼင်ႇၼႆဢေႃႈ။-

4မိူဝ်ႈၼၼ်ႉ မၼ်းၸင်ႇဢွၵ်ႇသေၵႃႈၼႂ်းမိူင်း ၵႃႇလတေး လႄႈ ၵႂႃႇယူႇၵႃႈၼႂ်းဝဵင်း ၶႃႇရၢၼ်ႇ ဢေႃႈ။ မိူဝ်ႈဢၼ်ပေႃႈမၼ်းတၢႆယဝ်ႉၸိုင် မၼ်းၸဝ်ႈၸင်ႇႁႂ်ႈမၼ်းၶၢႆႉမႃးၵႃႈတီႈမိူင်းဢၼ်သူယူႇတေႃႈလဵဝ်ၼႆႉဢေႃႈ။-

5ပိၵ်ႉသမ်ႉမၼ်းၸဝ်ႈဢမ်ႇပၼ်ဢမူၺ်ႇတီႈမၼ်း ထၢၼ်ႇတီႈတိၼ်ၶွၼ်ၼိုင်ႈတၵ်းယဵပ်ႇၼႂ်းတီႈမိူင်းၼႆႉသေၵေႃႈ မၼ်းၸဝ်ႈဝႆႉၵတီႉၸဵမ်မိူဝ်ႈဢၼ်မၼ်းဢမ်ႇပႆႇမီးလုၵ်ႈမီးလၢင်းသေၵေႃႉသေၵူၼ်းၼၼ်ႉလႄႈဝႃႈ တၵ်းပၼ်မိူင်းၼႆႉ တီႈၸႃႉၸဵမ်မၼ်းတင်းလုၵ်ႈလၢၼ်မၼ်းတင်းလၢႆပိူင်ႇဢေႃႈ၊ ဝႃႈၼင်ႇၼႆဢေႃႈ။-

6ၽြႃးပဵၼ်ၸဝ်ႈပျႃႇတိၵ်ႈဝႆႉလႄႈဝႃႈ ၸိူဝ်ႉၶိူဝ်းမၼ်းတၵ်းလႆႈပဵၼ်ၶႅၵ်ႇယူႇ ၵႃႈၼႂ်းမိူင်းဢၼ်ပိူၼ်ႈဢုပ်ႉပိူင်ႇၼၼ်ႉလႄႈ ၶၢမ်ႇတၢင်းဢၼ်ၶၢမ်ႇႁဵတ်းၶႃႈပိူၼ်ႈ၊ တၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးသီႇပၢၵ်ႇပီႊဢေႃႈ၊-

7မဵဝ်းၵူၼ်းဢၼ်ၸႂ်ႉၵိၼ်ၶဝ်ၼၼ်ႉၵေႃႈ ၵဝ်တၵ်းၸီႇယၢင်ႇဢေႃႈ။ လိုၼ်းၼၼ်ႉၶဝ်တၵ်းလႆႈဢွၵ်ႇလႄႈ ႁဵတ်းဝၢတ်ႈတီႈၵဝ်ၵႃႈၼႂ်းတီႈၼႆႈဢေႃႈ၊ ဝႃႈၼင်ႇၼႆဢေႃႈ။-

8မၼ်းၸဝ်ႈပၼ်ပတီႉၺိၺ်ႇတြႃးဢၼ်ၸၢပ်ႈသႅင်ႇၵၼ်တင်းတၢင်းဢၼ်ထိူဝ်ႁိမ်းၼၼ်ႉ တီႈ ဢႃႇပြႃႇႁၢမ်ႇ ဢေႃႈ။ ၼင်ႇၼၼ်လႄႈ မၼ်းၵိူတ်ႇလဵင်ႉ ဢီႉၸၢၵ်ႈ မႃးလႄႈ ၼႂ်းဝၼ်းဢၼ်ထူၼ်ႈထိုင်ပႅတ်ႇဝၼ်းၼၼ်ႉ ပၼ်တၢင်းဢၼ်ထိူဝ်ႁိမ်းဢေႃႈ။ ဢီႉၸၢၵ်ႈ ၼၼ်ႉသမ်ႉ ပၼ်တီႈလုၵ်ႈၸၢႆးမၼ်း ယႃႇၵုပ်ႈ လႄႈ ယႃႇၵုပ်ႈ ၼၼ်ႉသမ်ႉ ပၼ်တီႈလုၵ်ႈၸၢႆးမၼ်းသိပ်းသွင်ၵေႃႉ ဢၼ်ပဵၼ်ပေႃႈၸိူဝ်ႉၶိူဝ်းႁဝ်းၸိူဝ်းၼၼ်ႉဢေႃႈ။-

9ပေႃႈၸိူဝ်ႉၶိူဝ်းၸိူဝ်းၼၼ်ႉၵေႃႈ မီးၸႂ်ဢၼ်သီႈၵေႉႁေႈတႃလႄႈ ၶၢႆ ယူဝ်းသႅပ်ႈ တေႃႇၵႃႈတီႈမိူင်း ဢေႇၵိပ်ႉတူႉ ပႅတ်ႈဢေႃႈ။-

10ၽြႃးပဵၼ်ၸဝ်ႈပႂ်ႉလူပႂ်ႉတူၺ်းမၼ်းယူႇလႄႈ ၼုၵ်ႈဢဝ်မၼ်းဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်မၼ်းတင်းလၢႆသေယဝ်ႉ ပၼ်ၼႃႈၵီႈတႃဝၢၼ်ဢိၵ်ႇတင်း ဢတၢတ်ႈပိင်ႇၺႃႇ ၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး ဢၼ်ဢုပ်ႉပိူင်ႇမိူင်း ဢေႇၵိပ်ႉတူႉ ၼၼ်ႉလႄႈ ၶုၼ်ႁေႃၶမ်းၼၼ်ႉၵေႃႈ ဢဝ်မၼ်းၶၢၼ်းဝႆႉၵႃႈၼႂ်းဢရႃႇဢၼ်ဢုပ်ႉပိူင်ႇ မိူင်း ဢေႇၵိပ်ႉတူႉ တင်းဢရႃႇဢၼ်ဢုပ်ႉပိူင်ႇႁေႃၶမ်းဢေႃႈ။

11ၼႂ်းမိူင်း ၶႃႇၼၢၼ်ႇ တင်းမိူင်း ဢေႇၵိပ်ႉတူႉ ၼၼ်ႉတင်းမိူင်း ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်း ဢိၵ်ႇတင်းတုၵ်ႉၶႃႉတၢင်းၽၢၼ်ဢၼ်ယႂ်ႇၼႃႇမႃးလႄႈ တီႈပေႃႈႁဝ်းၸိူဝ်းၼၼ်ႉ တၢင်းၵိၼ်တၢင်းၶူပ်းသဵင်ႈၵႂႃႇမူတ်းၵႂႃႇဢေႃႈ။-

12မိူဝ်ႈဢၼ် ယႃႇၵုပ်ႈလႆႈငိၼ်းလွင်ႈဢၼ်ၶဝ်ႈပိူၵ်ႇၶဝ်ႈသၢၼ် မီးၵႃႈၼႂ်းမိူင်း ဢေႇၵိပ်ႉတူႉ ၼၼ်ႉၸိုင် ပွႆႇၸႂ်ႉပေႃႈႁဝ်းၸိူဝ်းၼၼ်ႉၵႂႃႇပွၵ်ႈပထမႃႉဢေႃႈ။-

13ပွၵ်ႈတူႉတီႉယႃႉ ယူဝ်းသႅပ်ႈ ၼၼ်ႉ ၽုၺ်ႇဢွၵ်ႇၼႄပျႃးလွင်ႈတူဝ်ၸဝ်ႈၵဝ်ႇ တီႈပီႈၼွင်ႉမၼ်းတင်းလၢႆလႄႈ ၶုၼ်ႁေႃၶမ်း ၽႃႇရေႃး ၼၼ်ႉ လႆႈႁူႉၸိူဝ်ႉၶိူဝ်းယူဝ်းသႅပ်ႈဢေႃႈ။-

14မိူဝ်ႈၼၼ်ႉ ယူဝ်းသႅပ်ႈ ပွႆႇၸႂ်ႉၵႂႃႇႁွင်ႉပၢင်းဢဝ်ပေႃႈမၼ်း ယႃႇၵုပ်ႈ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတင်းသဵင်ႈတင်းလူင် ဢၼ်ၼပ်ႉဢၢၼ်ႇမီးသေၸဵတ်းသိပ်းပၢႆႁႃႈၵေႃႉၸိူဝ်းၼၼ်ႉမႃးဢေႃႈ။-

15ယႃႇၵုပ်ႈ ၵေႃႈလူင်းၵႂႃႇၵႃႈတီႈမိူင်း ဢေႇၵိပ်ႉတူႉ ၼၼ်ႉလႄႈ ၸႃႉၸဵမ်တူဝ်ၸဝ်ႈၵဝ်ႇ ဢိၵ်ႇတင်းပေႃႈႁဝ်းၸိူဝ်းၼၼ်ႉ တၢႆၵႂႃႇဝၢႆးၵႂႃႇသေဢေႃႈ။-

16ၶဝ်ၼၼ်ႉၶၢမ်ႇဢဝ်တၢင်းဢၼ်ဢဝ်ၵႂႃႇသူင်ႇၵႃႈတီႈ ဝဵင်း သေႇၶိမ်ႇ လႄႈ သႂ်ႇဝႆႉၵႃႈၼႂ်းသၢင်းၶႅင်း ဢၼ် ဢႃႇပြႃႇႁၢမ်ႇ ဢဝ်တင်းငိုၼ်းသိုဝ်ႉဢဝ် တီႈၶဝ်ၸိူဝ်းဢၼ်ပဵၼ် လုၵ်ႈ ႁေႇမေႃႇ ပေႃႈ သေႇၶိမ်ႇ ၸိူဝ်းၼၼ်ႉဢေႃႈ။

17မိူဝ်ႈဢၼ်ၶိင်ႇၵႃႇလႃႉၵတီႉၸဝ်ႈဢၼ်ၽြႃးပဵၼ်ၸဝ်ႈ တိၵ်ႈထၢၼ်ႇဝႃႈတီႈ ဢႃႇပြႃႇႁၢမ်ႇ ၼၼ်ႉ ၸမ်တၵ်းႁွတ်ႈမႃးၼၼ်ႉၸိုင် ၵူၼ်းမဵဝ်းၼၼ်ႉယႂ်ႇၵႂၢင်ႈလႄႈ ၼမ်မႃးၵိုၼ်းမႃးၵႃႈၼႂ်းမိူင်း ဢေႇၵိပ်ႉတူႉ ။-

18တေႃႇထိုင်ႁွတ်ႈၶုၼ်ႁေႃၶမ်းပႃးၼိုင်ႈ ဢၼ်ဢမ်ႇႁူႉၸၵ်း ယူဝ်းသႅပ်ႈ ၼၼ်ႉပေႃႇမႃးဢေႃႈ။-

19ၶုၼ်ႁေႃၶမ်းၼၼ်ႉႁဵတ်းပရီႉယႄႇ တီႈၸိူဝ်ႉၶိူဝ်းႁဝ်းၼၼ်ႉလႄႈ ၼင်ႇႁိုဝ်ၶဝ်တၵ်းလႆႈထိမ်ႈပႅတ်ႈလုၵ်ႈၸၢႆးဢွၼ်ႇၶဝ်တင်းလၢႆ ႁႂ်ႈဢသၢၵ်ႈဢမ်ႇလႆႈလိပ်းၸိုင် ၼိၵ်ႈၸၢၵ်ႈငႅၼ်းသႄးပေႃႈႁဝ်းၸိူဝ်းၼၼ်ႉဢေႃႈ။-

20မိူဝ်ႈၼၼ်ႉ မူဝ်းသေႇ ၵေႃႉဢၼ်ႁၢင်ႈလီၼႃႇၼၼ်ႉၵိူတ်ႇလဵင်ႉမႃးလႄႈ လႆႈၶၢမ်ႇတၢင်းဢၼ်လဵင်ႉဢၼ်လူဝႆႉၵႃႈၼႂ်းႁိူၼ်းပေႃႈမၼ်းသၢမ်လိူၼ်တဵမ်တဵမ်ဢေႃႈ။-

21လိုၼ်းၼၼ်ႉ မိူဝ်ႈဢၼ်မၼ်းလႆႈၶၢမ်ႇတၢင်းဢၼ်ထိမ်ႈပႅတ်ႈၼၼ်ႉၸိုင် လုၵ်ႈယိင်းၶုၼ်ႁေႃၶမ်း ၽႃႇရေႃး ၼၼ်ႉ ၸင်ႇၵဵပ်းဢဝ်လႄႈလဵင်ႉလူဝႆႉ ၸိူဝ်ႉၼင်ႇလုၵ်ႈၼင်ႇလၢင်းတူဝ်ၸဝ်ႈၵဝ်ႇဢေႃႈ။

22မူဝ်းသေႇ ၼၼ်ႉၵေႃႈ သွၼ်ဢဝ်ဢတၢတ်ႈပိင်ႇၺႃႇမိူင်း ဢေႇၵိပ်ႉတူႉ ၵႃႈမီးတင်းသဵင်ႈတင်းလူင်သေလႄႈ သူပ်းၸၢင်ႈလၢတ်ႈ မိုဝ်းၸၢင်ႈႁဵတ်းဢေႃႈ။-

23မိူဝ်ႈဢၼ်ဢသၢၵ်ႈမၼ်းလႆႈသီႇသိပ်းပီႊၼၼ်ႉၸိုင် မၼ်းမီးတၢင်းၵျၢမ်ႇတၢင်းပွင်ၼႂ်းၸႂ်လႄႈဝႃႈ၊ တၵ်းၵႂႃႇလူၵႂႃႇတူၺ်းပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇ ဢၼ်ပဵၼ်ၵူၼ်း ဢီႉသရေႇလႃႉ ၼၼ်ႉဢေႃႈ။-

24မိူဝ်ႈဢၼ်မၼ်းႁၼ်ပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇၵေႃႉၼိုင်ႈ လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉၸိုင် မၼ်းယူႇၽၢႆႇမၼ်းၼၼ်ႉသေလႄႈ ပေႃႉယႅၼ်ႉၵူၼ်း ဢေႇၵိပ်ႉတူႉ တၢႆသေယဝ်ႉ၊ ပၼ်ၵေႃႉဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၼၼ်ႉပႄႉၼႅင်ႇဢေႃႈ။-

25ပိၵ်ႉသမ်ႉမၼ်းထၢင်ႇပီႈၼွင်ႉမၼ်းၸိူဝ်းၼၼ်ႉတၵ်းႁူႉႁၼ်လွင်ႈဢၼ်ၽြႃးပဵၼ်ၸဝ်ႈ တၵ်းဢဝ်တင်းမိုဝ်းမၼ်းၵႄႇၼုၵ်ႈဢဝ်ၶဝ်ၼၼ်ႉယူႇသေၵေႃႈ ၶဝ်ၼၼ်ႉဢမ်ႇႁူႉဢမ်ႇႁၼ်။-

26ၼႂ်းဝၼ်းမိူဝ်ႈၽုၵ်ႈ မၼ်းၸင်ႇပေႃႇမႃး ၵႃႈတီႈၵူၼ်းဢၼ်ၼင်ႇၵၼ်ၵၼ်ၽိတ်းၵၼ်ယူႇၼၼ်ႉလႄႈ ၸူဝ်းဢဝ်ႁႂ်ႈၶဝ်တဵတ်ႇယဵၼ်လႄႈဝႃႈ၊ ၵူၼ်းၶဝ်ဢိူၺ်း၊ သူၼႆႉပဵၼ်ပီႈၼွင်ႉၵၼ်လူင်လၢင်၊ ႁဵတ်းသင်ၵေႃႉၼိုင်ႈလႄႈၵေႃႉၼိုင်ႈၼိၵ်ႈၸၢၵ်ႈငႅၼ်းသႄးၵၼ်ၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

27ၵေႃႉဢၼ်ၼိၵ်ႈၸၢၵ်ႈငႅၼ်းသႄးၵူၼ်းႁိူၼ်းၸမ်ၵၼ်ၼၼ်ႉၵေႃႈ ပႄႇပႅတ်ႈ မူဝ်းသေႇ သေလႄႈလၢတ်ႈဝႃႈ၊ ၽူႈလႂ်ၶၢၼ်းမႂ်းဝႆႉႁႂ်ႈမႂ်းႁဵတ်းၵူၼ်းယႂ်ႇၵူၼ်းလူင် ၵူၼ်းဢၼ်ၸီႇယၢင်ႇၵႃႈၼိူဝ်ႁဝ်း။-

28မႂ်းတၵ်းၶႂ်ႈဢဝ်ၵဝ်တၢႆၸိူဝ်ႉၼင်ႇဢၼ် ဢဝ်ၵူၼ်း ဢေႇၵိပ်ႉတူႉ တၢႆ မိူဝ်ႈဝႃးၼၼ်ႉလူးၵွၼ်ႇႁိုဝ်၊ ဝႃႈၼင်ႇၼႆဢေႃႈ။-

29မူဝ်းသေႇ ငိၼ်းၵႂၢမ်းၼၼ်ႉသေယဝ်ႉ ဢွၵ်ႇပၢႆႈၵႂႃႇလႄႈ ပဵၼ်ၶႅၵ်ႇၵႃႈၼႂ်းမိူင်း မီႉတျၼ်ႇ ယူႇသေလႄႈ မီးလုၵ်ႈၸၢႆးသွင်ၵေႃႉဢေႃႈ။-

30မိူဝ်ႈဢၼ်ပူၼ်ႉသီႇသိပ်းပီႊယဝ်ႉၸိုင် တမၢၼ်ႇၵၢင်ႁၢဝ်ပေႃႇမႃးၵႃႈၼႂ်းယုမ်းဢၼ်ၽႆးမႆႈယူႇၼၼ်ႉ ၵႃႈတီႈၼႂ်းထိူၼ်ႇ ႁိမ်းတိၼ်လွႆ သီႉၼႃႉ ဢေႃႈ။-

31မိူဝ်ႈဢၼ် မူဝ်းသေႇ ႁၼ်ၼၼ်ႉၸိုင် မၼ်းဢၢမ်းၼႃႇလူင်လၢင်လႄႈ သုတ်ႉၸမ်ႁႂ်ႈလႆႈယႅၵ်ႉတူၺ်း ၸေးၸေးၸွတ်ႇၸွတ်ႇသေယဝ်ႉ၊ သဵင်ပျႃႇတိၵ်ႈထႃႇဝရႃႉၽြႃးဢွၵ်ႇမႃးလႄႈဝႃႈ၊-

32ၵဝ်ၼႆႉၸမ်ႉပဵၼ်ၽြႃးၸူဝ်ႈပူႇပၢၼ်ပေႃႈသူ၊ ၽြႃး ဢႃႇပြႃႇႁၢမ်ႇ ၊ ၽြႃး ဢီႉၸၢၵ်ႈ ၊ ၽြႃး ယႃႇၵုပ်ႈ ၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ မူဝ်းသေႇ သၼ်ႇဝႆယူႇလႄႈ ဢမ်ႇႁတ်းယႅၵ်ႉတူၺ်းၸေးၸေးၸွတ်ႇၸွတ်ႇ။-

33ထႃႇဝရႃႉၽြႃးၵေႃႈပျႃႇတိၵ်ႈလႄႈဝႃႈ ထွတ်ႇၶႅပ်းတိၼ်မႂ်းတႃႉ၊ တီႈဢၼ်မႂ်းယဵပ်ႇၼၼ်ႉၸမ်ႉ၊ ပဵၼ်လိၼ်ဢၼ်မူတ်းၸၢင်ႇ ဢေႃႈ။-

34ၵဝ်လႆႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်ၵူၼ်းၵဝ်တင်းလၢႆလႆႈၶၢမ်ႇ ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလီလီငၢမ်းငၢမ်းယဝ်ႉ။ သဵင်ဢၼ်ၶဝ်ၶၢင်းၶီၶၢင်းၽၢၼ်ၼၼ်ႉၵေႃႈၵဝ်လႆႈငိၼ်းယဝ်ႉ။ ၵဝ်လူင်းမႃးႁႂ်ႈလႆႈၼုၵ်ႈဢဝ်ၶဝ်ၼၼ်ႉယဝ်ႉ။ တေႃႈလဵဝ်ၼႆႉၵႂႃႇတႃႉ။ ၵဝ်တၵ်းပွႆႇၸႂ်ႉမႂ်းၵႂႃႇၵႃႈတီႈမိူင်း ဢေႇၵိပ်ႉတူႉ ပုၼ်ႉဢေႃႈ၊ ဝႃႈၼင်ႇၼႆဢေႃႈ။-

35မူဝ်းသေႇ ၵေႃႉဢၼ်ၶဝ်လႆႈပႄႇပႅတ်ႈလႄႈဝႃႈ၊ ၽူႈလႂ်ၶၢၼ်းမႂ်းဝႆႉ ႁႂ်ႈမႂ်းလႆႈႁဵတ်းၵူၼ်းယႂ်ႇၵူၼ်းလူင် ၵူၼ်းဢၼ်ၸီႇယၢင်ႇ၊ ဝႃႈၼင်ႇၼႆၼၼ်ႉၸိုင် ၽြႃးပဵၼ်ၸဝ်ႈဢဝ်မိုဝ်းတမၢၼ်ႇၵၢင်ႁၢဝ် ဢၼ်ပေႃႇမႃးၵႃႈၼႂ်းယုမ်းမႆႈၼၼ်ႉ ၶၢၼ်းဝႆႉႁႂ်ႈပဵၼ်ၵူၼ်းယႂ်ႇၵူၼ်းလူင်ၵူၼ်းဢၼ်ၵႄႇသႄႇၶျွတ်ႈဢဝ်ဢေႃႈ။-

36ၵေႃႉၼၼ်ႉၼုၵ်ႈဢဝ်ၶဝ်ၼၼ်ႉသေလႄႈ ႁဵတ်းၼီႉမိၵ်ႈလၢၵ်ႈၶၼႃႇ ဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆ ၵႃႈၼႂ်းမိူင်း ဢေႇၵိပ်ႉတူႉ တင်း ၵႃႈၼႂ်းပၢင်ႇလၢႆႇ ဢေႇတုမ်ႇ တင်းၵႃႈၼႂ်းထိူၼ်ႇသီႇသိပ်းပီႊတဵမ်တဵမ်ဢေႃႈ။

37ၵေႃႉၼၼ်ႉပဵၼ် မူဝ်းသေႇ ဢၼ်လၢတ်ႈဝႆႉၵႃႈတီႈ ၵူၼ်း ဢီႉသရေႇလႃႉ တင်းလၢႆလႄႈဝႃႈ၊ ၽြႃးပဵၼ်ၸဝ်ႈတၵ်းႁႂ်ႈပရေႃးၽႅတ်ႈ ဢၼ်မိူၼ်ၸိူဝ်ႉၼင်ႇၵဝ်ၵေႃႉၼိုင်ႈ ပေႃႇဢွၵ်ႇမႃးၵႃႈၼႂ်းပီႈၼွင်ႉၸိူဝ်ႉၶိူဝ်းသူပုၼ်ႈသူဢေႃႈ၊ ဝႃႈၼင်ႇၼႆၼၼ်ႉဢေႃႈ။-

38ၵေႃႉၼၼ်ႉ ပဵၼ်ၵေႃႉဢၼ်လႆႈမီးယူႇၵႃႈၼႂ်းမုၵ်ႉၵူၼ်းၸိူဝ်းၵူၼ်း ၵႃႈၼႂ်းထိူၼ်ႇလူၺ်ႈၵၼ်တင်း တမၢၼ်ႇၵၢင်ႁၢဝ်ဢၼ်တၵ်ႉလၢတ်ႈမၼ်းၵႃႈၼိူဝ်လွႆ သီႉၼႃႉ ၼၼ်ႉ ဢိၵ်ႇတင်းပေႃႈႁဝ်းၸိူဝ်းၼၼ်ႉဢေႃႈ။ ၵေႃႉၼၼ်ႉလႆႈၶၢမ်ႇဢဝ် ပျႃႇတိၵ်ႈဢၼ်ႁႂ်ႈဢသၢၵ်ႈလိပ်းၼၼ်ႉ ႁႂ်ႈလႆႈဢၢပ်ႈပၼ်တီႈႁဝ်းဢေႃႈ။-

39ၵႂၢမ်းၵေႃႉၼၼ်ႉၸိုင် ပူႇပေႃႈႁဝ်းၸိူဝ်းၼၼ်ႉ ယင်းဢမ်ႇၶႂ်ႈထွမ်ႇၶႂ်ႈဢဝ်လႄႈ ပႄႇပႅတ်ႈသေယဝ်ႉ၊ မီးတင်းၸႂ်ဢၼ်ၶႂ်ႈၶိုၼ်းမိူဝ်းၵႂႃႇၵႃႈတီႈမိူင်း ဢေႇၵိပ်ႉတူႉ ယူႇသေလႄႈ၊-

40လႆႈလၢတ်ႈတီႈ ဢႃႇရုၼ်ႇ လႄႈဝႃႈ ႁဵတ်းၽြႃးဢၼ်တၵ်းၵႂႃႇဢွၼ်တၢင်းႁဝ်းပုၼ်ႈႁဝ်းသေၵမ်း။ ႁဝ်းဢမ်ႇႁူႉလွင်ႈ ဢၼ် မူဝ်းသေႇ ဢၼ်ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ပုၼ်ႉမႃးၼၼ်ႉ ပဵၼ်ၸိူဝ်ႉၼင်ႇႁိုဝ်ယူႇၼၼ်ႉ၊ ဝႃႈၼင်ႇၼႆဢေႃႈ။

41မိူဝ်ႈၶိင်ႇၵႃႇလႃႉဝၼ်းၼၼ်ႉ ၶဝ်လႆႈႁဵတ်းဝူဝ်းဢွၼ်ႇသေယဝ်ႉ၊ ပုၵ်ႈၸေႃႇတီႈရုၵ်ႈထူႉၼၼ်ႉလႄႈ မူၼ်ႈပျေႃႇၵႃႈၼႂ်းလွင်ႈတၢင်းဢၼ်မိုဝ်းတူဝ်ၸဝ်ႈၵဝ်ႇႁဵတ်းဝႆႉၼၼ်ႉဢေႃႈ။-

42ၽြႃးပဵၼ်ၸဝ်ႈဝၢႆႇၼႃႈပႅတ်ႈၶဝ်သေလႄႈၸုၼ်ႉပႅတ်ႈၶဝ် ႁႂ်ႈၶဝ်လႆႈႁဵတ်းဝၢတ်ႈၵႃႈတီႈၶိူင်ႈပိူင်ၵၢင်ႁၢဝ်တင်းလၢႆၼၼ်ႉဢေႃႈ။ ၼင်ႇၼၼ်လႄႈ ဢၼ်တႅမ်ႈဝႆႉၼႂ်းၵျၢမ်းဢၼႃႇၵၢတ်ႈတီႉလႄႈဝႃႈၸမ်ႉ မဵဝ်း ဢီႉသရေႇလႃႉ ဢိူၺ်း၊ သူလႆႈဢွၼ်ၵၼ်ဢဝ်တရိၵ်ႈသၢၼ်ႇ ဢၼ်ဢဝ်တၢႆယဝ်ႉ ဢိၵ်ႇတင်းယိတ်ႈတင်းလၢႆပုၵ်ႈၸေႃႇတီႈၵဝ် ၵႃႈၼႂ်းထိူၼ်ႇၼၼ်ႉသီႇသိပ်းပီႊတဵမ်တဵမ်ႁိုဝ်။-

43သူႁၢပ်ႇဢဝ်ပႃးဢဝ်သုမ်ႉထဵင် မူးလွၵ်ႉ တင်းလၢဝ်ၸဝ်ႈၽြႃး ရိမ်ႇၽၼ်ႇ ဢၼ်ဝႃႈ ပုင်ႇႁၢင်ႈဢၼ်သူႁဵတ်းပုၼ်ႈဢၼ်တၵ်းၵူဝ်းၵႂၢႆႇၸိူဝ်းၼၼ်ႉယဝ်ႉလူင်ပႄႇ။ ပိူဝ်ႈၼႆလႄႈၵဝ်တၵ်းဢဝ်သူ ၵႂႃႇၵႃႈတီႈၽၢႆႇပုၼ်ႉဝဵင်း ပႃႇပူႉလုၼ်ႇ ၼၼ်ႉဢေႃႈ မီးမႃးၼင်ႇၼႆဢေႃႈ။-

44သုမ်ႉထဵင်ၸဝ်ႈဢၼ်ၶၢမ်ႇသၢၵ်ႈသေႇၼၼ်ႉ လႆႈမီးၵႃႈတီႈပေႃႈႁဝ်းၸိူဝ်းၼၼ်ႉ ၵႃႈၼႂ်းထိူၼ်ႇၵႃႈၼင်ႇဢၼ် မၼ်းၸဝ်ႈဢၼ်သင်ႇလၢတ်ႈဝႆႉ တီႈ မူဝ်းသေႇ လွင်ႈၼင်ႇႁိုဝ်မၼ်းတၵ်းႁဵတ်းသုမ်ႉထဵင်ၸဝ်ႈ မိူၼ်ၸိူဝ်ႉၼင်ႇပုင်ႇႁၢင်ႈ ဢၼ်မၼ်းလႆႈႁၼ်ယဝ်ႉၼၼ်ႉမီးဢမိင်ႉဝႆႉၼၼ်ႉဢေႃႈ။-

45ပူႇပေႃႈႁဝ်းဢၼ်တူၵ်းလိုၼ်းၶဝ်ၼၼ်ႉ ဢိၵ်ႇလူၺ်ႈၵၼ်တင်း ယေႃးသူႉ ဢွၼ်ၵၼ်ၶၢမ်ႇဢဝ်သုမ်ႉထဵင်ၸဝ်ႈၼၼ်ႉ ၵႂႃႇလူၺ်ႈၵၼ်လႄႈ သႂၢင်းသႂ်ႇၵႃႈၼႂ်းလိၼ်ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ၽြႃးပဵၼ်ၸဝ်ႈႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈပူႇပေႃႈႁဝ်းၸိူဝ်းၼၼ်ႉ တေႃႇထိုင်ႁွတ်ႈၸူဝ်ႈပၢၼ် တႃႇဝိတ်ႈ ။-

46ဢၼ်လႆႈၶၢမ်ႇၵျေးၸူးသိုဝ်ႈၼႃႈတႂ်ႈတႃၽြႃးပဵၼ်ၸဝ်ႈလႄႈ ယွၼ်းဢဝ်ႁႂ်ႈလႆႈထူပ်းထႃႇၼႃႉတီႈဢၼ် ၽြႃးပဵၼ်ၸဝ်ႈ ယႃႇၵုပ်ႈ တၵ်းၵိင်းၼွၼ်းၼၼ်ႉဢေႃႈ။-

47ၵူၺ်းၵႃႈ သေႃးလမုၼ်ႇ လႆႈႁဵတ်းပိၵ်ႈမၢၼ်ႇပုၼ်ႈမၼ်းၸဝ်ႈဢေႃႈ။-

48ၼႂ်းဝႃႈၼၼ်သေၵေႃႈ ၽြႃးဢၼ်သုင်ၼႃႇသေပိူၼ်ႈၼၼ်ႉ ၵိင်းၼွၼ်းယူႇၵႃႈၼႂ်းပိၵ်ႈမၢၼ်ႇဢၼ်မိုဝ်းၵူၼ်းႁဵတ်းဢမ်ႇၸႂ်ႈ။-

49ၵႃႈၼင်ႇဢၼ်ပရေႃးၽႅတ်ႈ ဢဝ်ပျႃႇတိၵ်ႈၸဝ်ႈလၢတ်ႈဝႆႉလႄႈဝႃႈၼၼ်ႉၸမ်ႉ ၽႃႉၵၢင်ႁၢဝ်ပဵၼ်ပလၢင်ႇၵဝ်ဢေႃႈ။ လိၼ်မိူင်းပဵၼ်ၶူင်ႇတီႈတၢင်ႇတိၼ်ၵဝ်ဢေႃႈ။ တၵ်းတႄႇႁဵတ်းပိၵ်ႈမၢၼ်ႇၸိူဝ်ႉၼင်ႇႁိုဝ်ပုၼ်ႈၵဝ်။ တီႈလႂ်တၼ်းလႂ်တၵ်းပဵၼ်တီႈဢၼ်ၵဝ်ၵိင်းၼွၼ်း။-

50မိုဝ်းၵဝ်ၼႆႉၽၢၼ်ႇသၢင်းႁဵတ်းပဵၼ် လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉဢမ်ႇၸႂ်ႈႁိုဝ် မီးမႃးၼင်ႇၼႆဢေႃႈ။

51ၵူၼ်းဢၼ်ၶေႃးၶႅင်လႄႈ ဢမ်ႇထိူဝ်ႁိမ်းၵႃႈတီႈႁူဝ်ၸႂ် ဢိၵ်ႇတင်းၵႃႈတီႈႁူၶဝ်ဢိူၺ်း၊ သူၶတ်းၵၼ်တင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇတႃႇသေႇဢေႃႈ။ သူႁဵတ်းၸိူဝ်ႉၼင်ႇဢၼ်ပူႇပေႃႈသူႁဵတ်းၼၼ်ႉဢေႃႈ။-

52ပူႇပေႃႈသူၼၼ်ႉ ယင်းဢမ်ႇၼိၵ်ႈၸၢၵ်ႈငႅၼ်းသႄးပရေႃးၽႅတ်ႈၵေႃႉလႂ် သေၵေႃႉသေၵူၼ်းလႄႈယူႇ။ ၶဝ်ၼၼ်ႉဢဝ်ၶဝ်ၸိူဝ်းဢၼ်ႁေႃးလၢတ်ႈၽုၺ်ႇၼႄ လွင်ႈဢၼ်ၵူၼ်းသိုဝ်ႈတေႃႇတၵ်းမႃးၼၼ်ႉတၢႆဢေႃႈ။ မၼ်းၸဝ်ႈၼၼ်ႉၵေႃႈတေႃႈလဵဝ်ၼႆႉ သူဢဝ်ဢၢပ်ႈပၼ်လႄႈဢဝ်တၢႆယဝ်ႉ။-

53သူၼႆႉ ပိၵ်ႉသမ်ႉလႆႈၶၢမ်ႇဢဝ်ပိင်းၺၢပ်ႈတြႃးၸဝ်ႈ ၵႃႈၼင်ႇဢၼ်တမၢၼ်ႇၵၢင်ႁၢဝ် မၵ်းၶၢၼ်းဝႆႉၼၼ်ႉသေၵေႃႈ၊ ဢမ်ႇၵမ်ဢမ်ႇၸွမ်းလူင်ပႄႇ၊ ဝႃႈၼင်ႇၼႆဢေႃႈ။

54ၶဝ်ၼၼ်ႉငိၼ်းၵႂၢမ်းၼၼ်ႉသေယဝ်ႉ ႁူဝ်ၸႂ်မိူၼ်ၸိူဝ်ႉၼင်ႇတၵ်းတႅၵ်ႇတၵ်းလႅဝ်ၵႂႃႇလႄႈ ၵတ်းၶဵဝ်ႈၵတ်းၽၼ်း တေႃႇ သထေႇၽၢၼ်ႇ ဢေႃႈ။-

55မၼ်းၵေႃႈ တဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈယူႇသေလႄႈ ႁႅၼ်တူၺ်းၵၢင်ႁၢဝ်ၸေးၸေးလႄႈ ႁၼ်မုၼ်ၽုင်းၽြႃးပဵၼ်ၸဝ်ႈ ဢိၵ်ႇတင်း တၢင်းဢၼ် ယေႇသူႉ ၸုၵ်းယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈၼၼ်ႉသေယဝ်ႉ လၢတ်ႈလႄႈဝႃႈ၊-

56တူၺ်းလူး၊ ၵဝ်ႁၼ်ၵၢင်ႁၢဝ်ၽုၺ်ႇပိုတ်ႇလႄႈ လုၵ်ႈၵူၼ်းၸုၵ်းယူႇၵႃႈတီႈၽၢႆႇၶႂႃၽြႃးပဵၼ်ၸဝ်ႈယူႇဢေႃႈ၊ ဝႃႈၼင်ႇၼႆဢေႃႈ။-

57ၶဝ်ၼၼ်ႉႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇသေယဝ်ႉ၊ ဢိုတ်းႁူၶဝ်ယူႇသေလႄႈ ၽွမ်ႉၵၼ်ၶုၼ်ႇလႅၼ်ႈၵႂႃႇၸူးမၼ်းလႄႈ၊-

58ဢဝ်ဢွၵ်ႇၵႂႃႇၵႃႈၼွၵ်ႈဝဵင်းသေယဝ်ႉ ဢဝ်မၢၵ်ႇႁိၼ်ထိမ်ႈဢေႃႈ။ ၵူၼ်းၶၢမ်ႇသၢၵ်ႈသေႇၸိူဝ်းၼၼ်ႉၵေႃႈ၊ ဢဝ်ၶူဝ်းၼုင်ႈတူဝ်ၸဝ်ႈၵဝ်ႇဝႆႉၵႃႈတီႈႁိမ်းတိၼ်ၵူၼ်းဢွၼ်ႇ ဢၼ်လႆႈၸိုဝ်ႈ သေႃးလူႉ ၼၼ်ႉဢေႃႈ။-

59ၼႂ်းမိူဝ်ႈဢၼ်ဢဝ်မၢၵ်ႇႁိၼ်ထိမ်ႈယူႇၼၼ်ႉၸိုင်၊ သထေႇၽၢၼ်ႇ သူးတွင်းယူႇသေလႄႈလဝ်ႊလၢတ်ႈလႄႈဝႃႈ၊ ၸဝ်ႈ ယေႇသူႉ တီႈၶႃႈ၊ ၶႅၼ်းတေႃႈသိမ်းဢဝ်ဝီႉၺိၺ်ႇၵဝ်ၶႃႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

60မၼ်းၶုပ်ႉၶဝ်ႇယူႇသေယဝ်ႉ ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈဝႃႈ၊ ၸဝ်ႈႁဝ်းတီႈၶႃႈ ယႃႇပေဢဝ်တူႉၸရိူၵ်ႈဢပႅတ်ႈၼႆႉတၢင်ႇၵႃႈၼိူဝ်ၶဝ်သေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ ၵိင်းၼွၼ်းၵႂႃႇဢေႃႈ။ သေႃးလူႉ ၵေႃႈႁပ်ႉတုင်းဢဝ် လွင်ႈဢၼ်ဢဝ်မၼ်းတၢႆၼၼ်ႉယူႇဢေႃႈ။