Acts 23

Shan

← Chapter 22 Jump to: Chapter 24 →

1ပေႃးလူႉ ယႅၵ်ႉတူၺ်း ၶုၼ်ဢရႃႇသီႉလုမ်းလူင်ၸိူဝ်းၼၼ်ႉၸေးၸေးသေလႄႈလၢတ်ႈဝႃႈ၊ ပီႈၼွင်ႉၶဝ်ဢိူၺ်း၊ ၵဝ်ၶႃႈၸိုင်ၼႂ်းလွင်ႈတၢင်းဢၼ်ႁဵတ်းဝၢတ်ႈၽြႃးပဵၼ်ၸဝ်ႈၼၼ်ႉ ဢဝ်တင်းႁူဝ်ၸႂ်တူဝ်ၸဝ်ႈၵဝ်ႇဢၼ်ၵၢင်းလွတ်ႈတင်းတီႈတၵ်းတၢင်ႇဢပႅတ်ႈၼၼ်ႉ ပွင်ႁဵတ်းယူႇတေႃႇထိုင်ႁွတ်ႈဝၼ်းမိူဝ်ႈၼႆႉၶႃႈဢေႃႈ၊ ဝႃႈၼင်ႇၼႆဢေႃႈ။

2ၶုၼ်ယိတ်ႈပရေႃးႁဵၵ်ႈ ဢႃႇၼၼီႉ ၼၼ်ႉ မီးဢမိင်ႉတီႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉ ႁႂ်ႈၶဝ်တူပ်းယႅၼ်ႉသူပ်းမၼ်းဢေႃႈ။

3မိူဝ်ႈၼၼ်ႉ ပေႃးလူႉ လၢတ်ႈလႄႈဝႃႈ၊ ၽႃဢုတ်ႇဢၼ်တႃးထုၼ်ၽိူၵ်ႇၼႆႉဢိူၺ်း၊ ၽြႃးပဵၼ်ၸဝ်ႈတၵ်းတူပ်းယႅၼ်ႉမႂ်းဢေႃႈ။ မႂ်းၼႆႉၼင်ႈယူႇႁႂ်ႈလႆႈၸီႇယၢင်ႇၵဝ်ၶႃႈၸွမ်းၼင်ႇတြႃးၵူၺ်းလႄႈ၊ တၵ်းၸီႇယၢင်ႇႁႂ်ႈတူပ်းယႅၼ်ႉၵဝ်ၶႃႈ ၸွမ်းၼင်ႇဢၼ်ဢမ်ႇတြႃးႁိုဝ်။ ဝႃႈၼင်ႇၼႆဢေႃႈ။

4ၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉၵေႃႈထၢမ်လႄႈဝႃႈ၊ မႂ်းၼႆႉသႄႉသွမ်းၶုၼ်ယိတ်ႈပရေႃးႁဵၵ်ႈၽြႃးပဵၼ်ၸဝ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

5ပေႃးလူႉ ၵေႃႈလၢတ်ႈလႄႈဝႃႈ၊ ပီႈၼွင်ႉၶဝ်ဢိူၺ်း၊ ၵဝ်ၶႃႈဢမ်ႇႁူႉ လွင်ႈဢၼ်မၼ်းၼႆႉပဵၼ်ၶုၼ်ယိတ်ႈပရေႃးႁဵၵ်ႈၶႃႈ။ ဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈၸမ်ႉ၊ မႂ်းဢမ်ႇလႆႈသႄႉသွမ်းၶုၼ်ဢၼ်ဢုပ်ႉပိူင်ႇၵူၼ်းမဵဝ်းၸိူဝ်ႉၶိူဝ်းမႂ်း၊ ဝႃႈၼင်ႇၼႆမႃးယဝ်ႉ၊ ဝႃႈၼင်ႇၼႆဢေႃႈ။

6မိူဝ်ႈဢၼ် ပေႃးလူႉ ႁူႉႁၼ်လွင်ႈ ဢၼ်ၼႂ်းၶုၼ်ဢရႃႇသီႉၸိူဝ်းၼၼ်ႉၵမ်ႈၽွင်ႈ ပဵၼ် ၸတ်ႉတူႉၵႄး ၊ ၵမ်ႈၽွင်ႈပဵၼ် ၽႃႇရီႉသႄး ၊ ၼၼ်ႉၸိုင်၊ မၼ်းႁွင်ႉသႅၼ်ႇၵႃႈၼိူဝ်လုမ်းလူင်လႄႈဝႃႈ၊ ပီႈၼွင်ႉၶဝ်ဢိူၺ်း၊ ၵဝ်ၶႃႈၼႆႉပဵၼ် ၽႃႇရီႉသႄး ဢေႃႈ။ လုၵ်ႈၸၢႆး ၽႃႇရီႉသႄး ၵေႃႈပဵၼ်ဢေႃႈ။ ၵွပ်ႈပိူဝ်ႈတၢင်းဢၼ်မုင်ႈထႃႈမွင်းထႃႈ လွင်ႈဢၼ်ၶဝ်ၸိူဝ်းဢၼ်တၢႆယဝ်ႉၼၼ်ႉ၊ တၵ်းလုၵ်ႉၶိုၼ်းၼၼ်ႉလႄႈ၊ ၵဝ်ၶႃႈလႆႈၶၢမ်ႇတၢင်းဢၼ်ၸီႇယၢင်ႇၸႅတ်ႈထၢမ်ၼႆႉၶႃႈယဝ်ႉ၊ ဝႃႈၼင်ႇၼႆဢေႃႈ။

7မိူဝ်ႈဢၼ်မၼ်းဝႃႈၸိူဝ်ႉၼင်ႇၼႆၼၼ်ႉၸိုင်၊ ၽႃႇရီႉသႄး ဢိၵ်ႇတင်း ၸတ်ႉတူႉၵႄး ၸိူဝ်းၼၼ်ႉ ၵေႃႉၼိုင်ႈလႄႈၵေႃႉၼိုင်ႈ တွပ်ႇၵၼ်ထဵင်ၵၼ်လႄႈ ပရဵၵ်ႈသၢတ်ႈဢၼ်ၸူႉဢၼ်တုမ်ၼၼ်ႉ ႁွတ်ႈထိုင်တၢင်းဢၼ်ၽၢတ်ႇၽႄၵၼ်ဢေႃႈ။-

8လွင်ႈဢၼ်ၽၢတ်ႇၽႄၵၼ်ၵႂႃႇၼၼ်ႉၸမ်ႉ၊ ၸတ်ႉတူႉၵႄး တင်းလၢႆၸင်ႇဝႃႈ၊ တၢင်းဢၼ်လုၵ်ႉၶိုၼ်းဢမ်ႇမီး၊ တမၢၼ်ႇၵၢင်ႁၢဝ်ဢမ်ႇမီး၊ ၸႂ်ဝီႉၺိၺ်ႇဢမ်ႇမီး၊ ဝႃႈၼင်ႇၼႆဢေႃႈ။ ၽႃႇရီႉသႄး တင်းလၢႆၸိုင် ႁပ်ႉတုင်းဢဝ်တင်းသွင်ပႃးဢေႃႈ။-

9ၵမ်းၼၼ်ႉ ပဵၼ်သဵင်ဢၼ်ႁွင်ႉသႅၼ်ႇယႂ်ႇၼမ်ၼႃႇလူင်လၢင်မႃးလႄႈၵူၼ်းထုတ်ႇၵျၢမ်းဢၼ်ယူႇၽၢႆႇ ၽႃႇရီႉသႄး တင်းလၢႆၼၼ်ႉ ၸင်ႇလုၵ်ႉတွပ်ႇထဵင်လႄႈဝႃႈ၊ ႁဝ်းဢမ်ႇထူပ်းဢပႅတ်ႈၼႂ်းၵေႃႉၼႆႉလႃးလႃး။ ပေႃးၼၢမ်ႇဝီႉၺိၺ်ႇဢမ်ႇၼၼ်ၵေႃႈ တမၢၼ်ႇၵၢင်ႁၢဝ်လႆႈလၢတ်ႈတေႃႇမၼ်းယဝ်ႉၸိုင် ယႃႇပေႁႄႉၶႅၼ်ၽြႃးပဵၼ်ၸဝ်ႈတႃႉ၊ ဝႃႈၼင်ႇၼႆဢေႃႈ။

10မိူဝ်ႈဢၼ်ၶဝ်တွပ်ႇထဵင်ၵၼ် ၼမ်ၼႃႇလူင်လၢင်ၼၼ်ႉၸိုင်၊ ၵႄႇၵူၼ်းသိုၵ်းၼၼ်ႉ ပိူဝ်ႈဢၼ်ၵူဝ်ၶဝ်တၵ်းတိုတ်ႉၸၼ်ဢဝ် ပေႃးလူႉ ၶၢတ်ႇပဵၼ်ပွတ်းပဵၼ်တွၼ်ႈၵႂႃႇလႄႈ မီးဢမိင်ႉႁႂ်ႈၵူၼ်းသိုၵ်းၼမ်ၼႃႇလူင်းႁိမ်ဢဝ် ပေႃးလူႉ သေ ၵႃႈၼႂ်းၵၢင်ၶဝ် ၵႂႃႇသူင်ႇၵႃႈတီႈၼႂ်းတပ်ႉသေဢေႃႈ။

11ၼႂ်းၶမ်ႈဝၼ်းမိူဝ်ႈၽုၵ်ႈၼၼ်ႉ၊ ၸဝ်ႈၽြႃးပေႃႇမႃးၵႃႈတီႈႁိမ်းမၼ်းလႄႈဝႃႈ၊ မႂ်းမီးၸႂ်ဢၼ်ႁတ်းႁၢၼ်တႃႉ။ ၸိူဝ်ႉၼင်ႇဢၼ်မႂ်းၶၢမ်ႇသၢၵ်ႈသေႇလွင်ႈၵဝ် ၵႃႈၼႂ်းဝဵင်း ယေႇရူႉသလႅမ်ႇ ၼႆႉၼၼ်ႉ ၵႃႈၼႂ်းဝဵင်း ရူဝ်းမႃႉ ၵေႃႈ တၵ်းလႆႈၶၢမ်ႇလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။

12မိူဝ်ႈဢၼ်မိူင်းလႅင်းမႃးၸိုင်၊ ၵူၼ်း ယူႉတႃႉ ၵမ်ႈၽွင်ႈႁဵတ်းမုၵ်ႉႁဵတ်းၸိူဝ်းၵၼ်သေလႄႈ ႁဵတ်းတိၵ်ႈထၢၼ်ႇၵိၼ်ႇတူဝ်ၸဝ်ႈၵဝ်ႇလႄႈဝႃႈ၊ ၸူဝ်ႈဢၼ်ႁဝ်းဢမ်ႇပႆႇလႆႈဢဝ် ပေႃးလူႉ တၢႆၸိုင်၊ ႁဝ်းတၵ်းဢမ်ႇၵိၼ်တၢင်းၵိၼ်တၢင်းၶူပ်းသေဢိတ်း၊ ဝႃႈၼင်ႇၼႆဢေႃႈ။-

13ၶဝ်ၸိူဝ်းဢၼ်ႁဵတ်းမုၵ်ႉႁဵတ်းၸိူဝ်းၸိူဝ်ႉၼင်ႇၼႆၼၼ်ႉ၊ မီးသေသီႇသိပ်းလိူဝ်လိူဝ်ဢေႃႈ။

14ၶဝ်ၼၼ်ႉ ၵႂႃႇၸူးၵႃႈတီႈယိတ်ႈပရေႃးႁဵၵ်ႈလူင်၊ တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆလႄႈ လဝ်ႊလၢတ်ႈလႄႈဝႃႈ၊ ႁဝ်းၶႃႈၼႆႉ လႆႈႁဵတ်းတိၵ်ႈထၢၼ်ႇၵိၼ်ႇတီႈတူဝ်ၸဝ်ႈၵဝ်ႇလႄႈဝႃႈ၊ ၸူဝ်ႈဢၼ်ႁဝ်းဢမ်ႇပႆႇလႆႈဢဝ် ပေႃးလူႉ တၢႆၸိုင်၊ တၵ်းဢမ်ႇၵိၼ်တၢင်းၵိၼ်တၢင်းၶူပ်းသေဢိတ်း၊ ဝႃႈၼင်ႇၼႆယဝ်ႉၶႃႈ၊ ဝႃႈၼင်ႇၼႆဢေႃႈ။

15ပိူဝ်ႈၼႆလႄႈ သူၸဝ်ႈဢိၵ်ႇတင်းၶုၼ်ဢရႃႇသီႉတင်းလၢႆ၊ လဝ်ႊလၢတ်ႈတီႈၵႄႇၵူၼ်းသိုၵ်းႁႂ်ႈမၼ်းဢဝ် ပေႃးလူႉ မႃးတီႈသူၸဝ်ႈလႄႈ ႁဵတ်းၵဵင်ႈမိူၼ်ႁၢင်ႈတၵ်းၶႂ်ႈယဵင်ႈၶႅၼ်းၸႅတ်ႈထၢမ်ၸႅတ်ႈတူၺ်း လွင်ႈတၢင်းမၼ်းလီလီငၢမ်းငၢမ်းထႅင်ႈသေၵမ်းၶႃႈ။ ၸူဝ်ႈဢၼ် ပေႃးလူႉ ဢမ်ႇပႆႇႁွတ်ႈထိုင်ၸမ်ႁိမ်းၵႃႈတီႈသူၸဝ်ႈၼႆႉၼၼ်ႉၸိုင်၊ ႁဝ်းၶႃႈမႄးႁႅၼ်းထႃႈဝႆႉႁႂ်ႈလႆႈဢဝ်မၼ်းတၢႆၶႃႈယဝ်ႉ၊ ဝႃႈၼင်ႇၼႆဢေႃႈ။

16လၢၼ်ၸၢႆး ပေႃးလူႉ ၼၼ်ႉ၊ ငိၼ်းလွင်ႈဢၼ်ၶဝ်ပႂ်ႉလွမ်ယူႇ ၵႃႈတီႈႁိမ်းတၢင်းၸိူဝ်ႉၼင်ႇၼၼ်ၼၼ်ႉသေယဝ်ႉ၊ ၶဝ်ႈၵႃႈၼႂ်းတပ်ႉလႄႈမွၵ်ႇလၢတ်ႈတီႈ ပေႃးလူႉ ဢေႃႈ။-

17ပေႃးလူႉ ႁွင်ႉဢဝ်တပ်ႉမူးၵေႃႉၼိုင်ႈမႃးလႄႈလၢတ်ႈဝႃႈ၊ ဢဝ်ၵူၼ်းဢွၼ်ႇၼႆႉ ၵႂႃႇသူင်ႇၵႃႈတီႈၵႄႇၵူၼ်းသိုၵ်းသေၵမ်း။ မၼ်းမီးတီႈတၵ်းလဝ်ႊလၢတ်ႈသေၸိူဝ်ႉသေပိူင်ဢေႃႈ၊ ဝႃႈၼင်ႇၼႆဢေႃႈ။-

18တပ်ႉမူးၼၼ်ႉဢဝ်ၵူၼ်းဢွၼ်ႇၼၼ်ႉ ၵႂႃႇသူင်ႇၵႃႈတီႈၵႄႇၵူၼ်းသိုၵ်းသေယဝ်ႉ၊ လဝ်ႊလၢတ်ႈလႄႈဝႃႈ၊ ပေႃးလူႉ ဢၼ်လႆႈၶၢမ်ႇ တူၵ်းၵႅၼ်းယူႇၼၼ်ႉ၊ ႁွင်ႉဢဝ်ၵဝ်ၶႃႈလႄႈတွင်းပၢၼ်ႇႁႂ်ႈၵဝ်ၶႃႈ ဢဝ်ၵူၼ်းဢွၼ်ႇဢၼ် မီးတီႈတၵ်းလဝ်ႊလၢတ်ႈၵႃႈတီႈၸဝ်ႈႁဝ်းသေၸိူဝ်ႉသေပိူင်ၼႆႉ သူင်ႇႁွတ်ႈၵႃႈတီႈၸဝ်ႈႁဝ်းၶႃႈဢေႃႈ ဝႃႈၼႆဢေႃႈ။

19ၵႄႇၵူၼ်းသိုၵ်းၼၼ်ႉ ယိပ်းဢဝ်မိုဝ်းၵူၼ်းဢွၼ်ႇၼၼ်ႉ ၵႂႃႇၸူးတီႈဢၼ်ပိူၼ်ႈဢမ်ႇမီးၼၼ်ႉသေယဝ်ႉထၢမ်လႄႈဝႃႈ၊ မႂ်းၶႂ်ႈလဝ်ႊလၢတ်ႈလွင်ႈၸိူဝ်ႉၼင်ႇႁိုဝ်တီႈၵဝ်၊ ဝႃႈၼင်ႇၼႆဢေႃႈ။-

20မၼ်းၵေႃႈလဝ်ႊလၢတ်ႈလႄႈဝႃႈ၊ ၵူၼ်း ယူႉတႃႉ ၵမ်ႈၽွင်ႈၽွမ်ႉၵၼ်တိူင်ႇပၢင်ႇလူၺ်ႈလွင်ႈဢၼ် တၵ်းလဝ်ႊယွၼ်းတီႈၸဝ်ႈႁဝ်း ႁႂ်ႈၸဝ်ႈႁဝ်းဢဝ် ပေႃးလူႉ ၵႂႃႇၵႃႈတီႈလုမ်းလူင်ဝၼ်းမိူဝ်ႈၽုၵ်ႈလႄႈ ႁဵတ်းၵဵင်ႈမိူၼ်ၼင်ႇႁၢင်ႈတၵ်းၶႂ်ႈယဵင်ႈၶႅၼ်းၸႅတ်ႈထၢမ်ၸႅတ်ႈတူၺ်း လွင်ႈမၼ်းလီလီငၢမ်းငၢမ်းၼၼ်ႉၶႃႈယဝ်ႉ။-

21ၵူၺ်းၵႃႈ ယႃႇပေၸွမ်းဢလူဝ်ႇၶဝ်သေၵမ်းၶႃႈ။ ၵူၼ်း ယူႉတႃႉ ဢၼ်ႁဵတ်းတိၵ်ႈထၢၼ်ႇၵိၼ်ႇတီႈတူဝ်ၸဝ်ႈၵဝ်ႇလႄႈဝႃႈ၊ ၸူဝ်ႈဢၼ်ႁဝ်းဢမ်ႇပႆႇလႆႈဢဝ် ပေႃးလူႉ တၢႆၸိုင်၊ တၵ်းဢမ်ႇၵိၼ်တၢင်းၵိၼ်တၢင်းၶူပ်းသေဢိတ်း၊ ဝႃႈၼင်ႇၼႆၼၼ်ႉ သီႇသိပ်းၵေႃႉလိူဝ်လိူဝ် ပႂ်ႉလွမ်ယူႇၵႃႈတီႈႁိမ်းတၢင်းၶႃႈဢေႃႈ။ တေႃႈလဵဝ်ၼႆႉ ၶဝ်ပႂ်ႉထႃႈၵႂၢမ်းဢၼ်ၸဝ်ႈႁဝ်းတၵ်းႁပ်ႉတုင်းဢဝ်ၼႆႉၵူၺ်းလႄႈ မႄးႁႅၼ်းထႃႈဝႆႉၶႃႈယဝ်ႉ၊ ဝႃႈၼင်ႇၼႆဢေႃႈ။-

22ပိူဝ်ႈၼႆလႄႈ ၵႄႇၵူၼ်းသိုၵ်းၼၼ်ႉၵေႃႈသင်ႇလၢတ်ႈၵူၼ်းဢွၼ်ႇၼၼ်ႉလႄႈဝႃႈ၊ ယႃႇပေလၢတ်ႈလွင်ႈတၢင်းဢၼ်မႂ်းလဝ်ႊလၢတ်ႈတီႈၵဝ်ၼႆႉ၊ တီႈၽူႈလႂ်၊ ဝႃႈၼင်ႇၼႆသေလႄႈ ပွႆႇၵႂႃႇသေယဝ်ႉ၊

23ႁွင်ႉဢဝ်တပ်ႉမူးသွင်ၵေႃႉလႄႈမီးဢမိင်ႉဝႃႈ၊ မႄးႁႅၼ်းဝႆႉၵူၼ်းသိုၵ်းသွင်ပၢၵ်ႇ၊ ၵူၼ်းသိုၵ်းၶီႇမႃႉၸဵတ်းသိပ်း၊ ဢိၵ်ႇတင်းၵူၼ်းသိုၵ်းဢၼ်ယိပ်းၵမ်ႁွၵ်ႇသွင်ပၢၵ်ႇ၊ ႁႂ်ႈလႆႈၵႂႃႇၵႃႈတီႈဝဵင်း ၵေႇသရီႉ ပုၼ်ႉ ၶမ်ႈၼႆႉၶိင်ႇသၢမ်ၼႃႇရီႇၼၼ်ႉတႃႉ။-

24တရိၵ်ႈသၢၼ်ႇပုၼ်ႈတႃႇဢၼ်တၵ်းတၢင်ႇဢဝ် ပေႃးလူႉ ၵႂႃႇသူင်ႇၵႃႈတီႈၶုၼ် ၽေးလိတ်ႉ ပုၼ်ႉ လီလီငၢမ်းငၢမ်းၵေႃႈႁႅၼ်းပၼ်တႃႉ၊ ဝႃႈၼင်ႇၼႆဢေႃႈ။

25လိၵ်ႈဢၼ်ၵႄႇၵူၼ်းသိုၵ်းတႅမ်ႈပၼ်ၵႂႃႇၼၼ်ႉဝႃႈၸမ်ႉ၊-

26ၵလေႃးတီႉလူႉသီႉ မီးတင်းမႅတ်ႈတႃႇ လဝ်ႊလၢတ်ႈပၼ်ငိၼ်းၵႂႃႇတီႈၶုၼ် ၽေးလိတ်ႉ ၊ ဢၼ်မျၢတ်ႈၼႃႇၶႃႈဢေႃႈ။-

27ၼႂ်းမိူဝ်ႈဢၼ်ၵူၼ်း ယူႉတႃႉ တင်းလၢႆတီႉဢဝ်ၵေႃႉၼႆႉလႄႈ ငႃတၵ်းဢဝ်မၼ်းတၢႆၼၼ်ႉၸိုင် ပိူဝ်ႈဢၼ်ၵဝ်ၶႃႈႁူႉငိၼ်း လွင်ႈဢၼ်မၼ်းပဵၼ်ၵူၼ်း ရူဝ်းမႃႉ လႄႈ ၵဝ်ၶႃႈဢဝ်တင်းၵူၼ်းသိုၵ်းတင်းလၢႆ ၵႂႃႇၼုၵ်ႈဢဝ်မၼ်းၶႃႈဢေႃႈ။-

28ပိူဝ်ႈဢၼ်ၵဝ်ၶႃႈ ၶႂ်ႈႁူႉလွင်ႈဢၼ်ၶဝ်ၼၼ်ႉႁဵတ်းဢမူႉတီႈမၼ်းၵွပ်ႈပိူဝ်ႈ ဢပႅတ်ႈဢၼ်လႂ်ၼၼ်ႉလႄႈ ၵဝ်ၶႃႈဢဝ်မၼ်းၵႂႃႇသူင်ႇၵႃႈတီႈလုမ်းလူင်သေယဝ်ႉ၊-

29ႁူႉႁၼ်လွင်ႈဢၼ်ၶဝ်ႁဵတ်းဢမူႉတီႈမၼ်း ၵွပ်ႈပိူဝ်ႈဢပႅတ်ႈဢၼ်ထိူၵ်ႈၶၢမ်ႇတၢင်းတၢႆ၊ ဢမ်ႇၼၼ် ၵွပ်ႈပိူဝ်ႈဢပႅတ်ႈဢၼ်ထိူၵ်ႈၶၢမ်ႇတၢင်းဢၼ်တူၵ်းၵႅၼ်းၼၼ်ႉဢမ်ႇၸႂ်ႈ။ လွင်ႈဢၼ်ၶဝ်ဢဝ်တီႈတွင်ႈတီႈထၢမ် ၸိူဝ်းဢၼ်ၸၢပ်ႈသႅင်ႇၵၼ်တင်းတြႃးၶဝ်ၼၼ်ႉၵူၺ်း ႁဵတ်းဢမူႉတီႈမၼ်းၼၼ်ႉၶႃႈဢေႃႈ။-

30မိူဝ်ႈဢၼ်ၵဝ်ၶႃႈလႆႈႁူႉလႆႈငိၼ်း လွင်ႈဢၼ်ပိူၼ်ႈဢၢင်ႈတၵ်းၵျၢမ်ႇႁဵတ်းဢၼ်ဢမ်ႇလီတီႈမၼ်းၼၼ်ႉၸိုင်၊ ၵဝ်ၶႃႈပွႆႇၸႂ်ႉမၼ်းၵႂႃႇၵႃႈတီႈၸဝ်ႈႁဝ်းၵမ်းလဵဝ်လႄႈ ၸီႇယၢင်ႇႁႂ်ႈၶဝ်ၸိူဝ်းဢၼ်ႁဵတ်းဢမူႉတီႈမၼ်းၼၼ်ႉ လဝ်ႊလၢတ်ႈၵႃႈတီႈၽၢႆႇၼႃႈၸဝ်ႈႁဝ်းၶႃႈဢေႃႈ။ ႁႂ်ႈၸဝ်ႈႁဝ်းယူႇလီၵိၼ်ဝၢၼ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။

31ၵႃႈၼင်ႇဢၼ်ၵႄႇၵူၼ်းသိုၵ်းသင်ႇလၢတ်ႈဝႆႉၼၼ်ႉ၊ ၵူၼ်းသိုၵ်းၸိူဝ်းၼၼ်ႉ ဢဝ် ပေႃးလူႉ ၵႂႃႇ ၶိင်ႇၵၢင်ၶိုၼ်းလႄႈ သူင်ႇႁွတ်ႈၵႃႈတီႈ ဢၼ်ႇတီႉပတရီႉ သေယဝ်ႉ၊-

32ဝၼ်းမိူဝ်ႈၽုၵ်ႈ ပွႆႇၸႂ်ႉၵူၼ်းသိုၵ်းၶီႇမႃႉတင်းလၢႆ ၵႂႃႇလူၺ်ႈၵၼ်တင်း ပေႃးလူႉ သေလႄႈ တူဝ်ၶဝ်ၶိုၼ်းမိူဝ်းၵႂႃႇၵႃႈတီႈတပ်ႉသေဢေႃႈ။-

33ၵူၼ်းသိုၵ်းၶီႇမႃႉၸိူဝ်းၼၼ်ႉ ႁွတ်ႈထိုင်ၵႃႈတီႈဝဵင်း ၵေႇသရီႉ သေယဝ်ႉ၊ ဢဝ်လိၵ်ႈဢၢပ်ႈပၼ်တီႈၶုၼ်လႄႈ ပေႃးလူႉ ၵေႃႈ ဢဝ်ဝႆႉၵႃႈတီႈၽၢႆႇၼႃႈမၼ်းၸဝ်ႈၼၼ်ႉဢေႃႈ။-

34ၶုၼ်ၼၼ်ႉၽတ်းတူၺ်းလိၵ်ႈၼၼ်ႉယဝ်ႉ၊ ထၢမ်လႄႈဝႃႈ မၼ်းၼႆႉၸၢပ်ႈသႅင်ႇၵၼ်တင်းမိူင်းဢၼ်လႂ်၊ ဝႃႈၼင်ႇၼႆလႄႈ ႁူႉလွင်ႈဢၼ် မၼ်းပဵၼ်ၵူၼ်းမိူင်း ၵီႉလီႉၵီႉ သေယဝ်ႉ၊-

35လၢတ်ႈလႄႈဝႃႈ၊ မိူဝ်ႈဢၼ်ၶဝ်ၸိူဝ်းဢၼ်ႁဵတ်းဢမူႉတီႈမႂ်းၼၼ်ႉႁွတ်ႈမႃးၸိုင်၊ ၵဝ်တၵ်းထွမ်ႇလူးၵွၼ်ႇ၊ ဝႃႈၼင်ႇၼႆလႄႈ ၸီႇယၢင်ႇႁႂ်ႈ ပေႃးလူႉ ၶၢမ်ႇတူၵ်းၵႅၼ်းယူႇၼႂ်းႁေႃၶုၼ် ႁေႇရူတ်ႈ ၼၼ်ႉဢေႃႈ။

← Chapter 22 Jump to: Chapter 24 →