Amos 1

Shan

Jump to: Chapter 2 →

1ၵႂၢမ်းပျႃႇတိၵ်ႈၸဝ်ႈ ဢၼ် ဢႃႇမူတ်ႉ ဢၼ်ၶဝ်ႈပႃး ၵႃႈၼႂ်းမုၵ်ႉၸိူဝ်းၵူၼ်း ဢၼ်လဵင်ႉထိင်းသူဝ်း ၵႃႈတီႈဝၢၼ်ႈ တေႇၵေႃႇ ၼၼ်ႉ လႆႈၶၢမ်ႇဢဝ် ပုၼ်ႈမိူင်း ဢီႉသရေႇလႃႉ ၼႂ်းၸူဝ်ႈပၢၼ် ၶုၼ် ဢူဝ်းၸီႉယႃႉ ၶုၼ်ႁေႃၶမ်း ယူႉတႃႉ ဢိၵ်ႇတင်း ၼႂ်းၸူဝ်ႈပၢၼ်ၶုၼ် ယေႇရူဝ်းပုမ်ႇ လုၵ်ႈၸၢႆး ယေႃးသႃႉ ၶုၼ်ႁေႃၶမ်း ဢီႉသရေႇလႃႉ ဢွၼ်တၢင်း ပီႊဢၼ်ဢိင်ႇသၼ်ႇၼၼ်ႉ သွင်ပီႊၼၼ်ႉၸမ်ႉ။-

2ထႃႇဝရႃႉၽြႃး ယူႇၵႃႈၼိူဝ်လွႆ ၸီႉဢုၼ်ႇ ႁွင်ႉသႅၼ်ႇလႄႈ ယူႇၵႃႈၼႂ်းဝဵင်း ယေႇရူႉသလႅမ်ႇ ၵိဝ်သဵင်ဢေႃႈ။ တီႈဢၼ် ၵူၼ်းလဵင်ႉထိင်းသူဝ်းယူႇ ၸိူဝ်းၼၼ်ႉ တမ်ႇၼွႆႉမွင်ၸႂ်ၵႂႃႇလႄႈ ပၢႆၸိၵ်းလွႆ ၵရမေႇလႃႉ ၼၼ်ႉ ႁဵဝ်ႇၸွပ်ႈၵႂႃႇဢေႃႈ။

3ထႃႇဝရႃႉၽြႃး မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈဝဵင်း ထမ်ႇမသႅတ်ႉ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ ၶဝ်ဢဝ်ၸၢၵ်ႈလဵၵ်း ဢၼ်ၶိုတ်ႈၼူတ်ႈၶဝ်ႈပိူၵ်ႇ ၸိူဝ်းၼၼ်ႉ ၶိုတ်ႈၼူတ်ႈမိူင်း ၵီႉလတ်ႉ ၼၼ်ႉ ယဝ်ႉယဝ်ႉ။-

4ၵဝ်တၵ်းပွႆႇၸႂ်ႉၽႆး သႂ်ႇၵႃႈၼိူဝ်မဵဝ်းၶုၼ် ႁႃႇၸေႇလႃႉ လႄႈ ႁႂ်ႈမႆႈႁေႃၶမ်းၶုၼ် ပိၼ်ႇႁႃႇတတ်ႉ တင်းလၢႆဢေႃႈ။-

5ၵဝ်တၵ်းႁၵ်းႁဵၵ်း ၵိူၼ်ႇၽၵ်းတူဝဵင်း ထမ်ႇမသႅတ်ႉ ပႅတ်ႈလႄႈ ၵဝ်တၵ်းပႄႇၽဵဝ်ႈ ၵေႃႉဢၼ်ႁဵတ်းၶုၼ်မၼ်း ပႅတ်ႈသေၵႃႈတီႈပၢင်ႇႁူၺ်ႈ ဢႃႇဝိၼ်ႇ ၼၼ်ႉ ဢိၵ်ႇတင်း ၶုၼ်ဢၼ်ယိပ်းၵၼ်းႁွၵ်ႇ ရႃႇၸႃႉမၼ်းပႅတ်ႈသေၵႃႈတီႈဝဵင်း ပႅတ်ႉဢေႇတိၼ်ႇ ၼၼ်ႉဢေႃႈ။ ၵူၼ်းမိူင်း သူႉရီႉ တင်းလၢႆ တၵ်းလႆႈဢွၼ်ၵၼ် ၶၢမ်ႇတၢင်းဢၼ် သိမ်းဢဝ်ၵႂႃႇၸူး ၵႃႈတီႈဝဵင်း ၵီႉရႃႉ ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။

6ထႃႇဝရႃႉၽြႃးသမ်ႉ မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈဝဵင်း ၵႃႇၸႃႉ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ ၶဝ်သိမ်းဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉ ၵႂႃႇႁႂ်ႈလႆႈဢၢပ်ႈပၼ်တီႈၶုၼ် ဢေႇတုမ်ႇ ၼၼ်ႉ တင်းသဵင်ႈတင်းမူတ်း ယဝ်ႉယဝ်ႉ။-

7ၵဝ်တၵ်းပွႆႇၸႂ်ႉၽႆးသႂ်ႇၵႃႈၼိူဝ်လမ်းဝဵင်း ၵႃႇၸႃႉ လႄႈ ႁႂ်ႈမႆႈႁေႃၶမ်းမၼ်းတင်းလၢႆဢေႃႈ။-

8ၵဝ်တၵ်းပႄႇၽဵဝ်ႈ ၵေႃႉဢၼ်ႁဵတ်းၶုၼ်မၼ်း ပႅတ်ႈသေၵႃႈတီႈဝဵင်း ဢႃႇၸုတ်ႉ ၼၼ်ႉ ဢိၵ်ႇတင်း ၶုၼ်ဢၼ်ယိပ်းၵၼ်းႁွၵ်ႇရႃႇၸႃႉမၼ်း ပႅတ်ႈသေၵႃႈတီႈဝဵင်း ဢႃႇသၵေႇလုၼ်ႇ ၼၼ်ႉဢေႃႈ။ ၵဝ်တၵ်းဢဝ်မိုဝ်းၵဝ် ဝၢႆႇၶိုၼ်းၸူးၵႃႈတီႈဝဵင်း ဢေႇၵြုၼ်ႇ လႄႈ ၵူၼ်း ၽီႉလိတ်ႉတီႉ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉ တၵ်းလႆႈလူႉလႅဝ်ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။-

9ထႃႇဝရႃႉၽြႃးသမ်ႉ မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈ ဝဵင်း တူႉရူႉ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ ၶဝ်ယင်းဢမ်ႇပႂ်ႉ မိၵ်ႉသႃႇႁႃယႃႉ ဢၼ်ပီႈၼွင်ႉၵၼ်ႁဵတ်းၼၼ်ႉလႄႈ ဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉ ၵႂႃႇဢၢပ်ႈပၼ် တီႈၶုၼ် ဢေႇတုမ်ႇ ၼၼ်ႉ တင်းသဵင်ႈတင်းမူတ်း ယဝ်ႉယဝ်ႉ။-

10ၵဝ်တၵ်းပွႆႇၸႂ်ႉ ၽႆးသႂ်ႇ ၵႃႈၼိူဝ်လမ်းဝဵင်း တူႉရူႉ လႄႈ ႁႂ်ႈမႆႈႁေႃၶမ်းမၼ်း တင်းလၢႆဢေႃႈ၊ ဝႃႈၼင်ႇၼႆဢေႃႈ။

11ထႃႇဝရႃႉၽြႃးသမ်ႉ မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈ မိူင်း ဢေႇတုမ်ႇ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ မၼ်းၶျုၵ်ႈဝႆႉၸႂ်ဢၼ်ဢဵတ်းလူသေလႄႈ ဢဝ်လၢပ်ႇဢဝ်လႅဝ်း လိုပ်ႈၸွမ်းလမ်းၸွမ်းပီႈမၼ်းၼွင်ႉမၼ်းလႄႈ တေႃးသႃႉတၢင်းၸႂ်မႆႈမၼ်း တိုတ်ႉၶၢတ်ႇပႅတ်ႈယူႇတႃႇသေႇလႄႈ မၼ်းဝႆႉတၢင်းၽိတ်းမၼ်း ယူႇသေႇသေႇၼၼ်ႉ ယဝ်ႉယဝ်ႉ။-

12ၵဝ်တၵ်းပွႆႇၸႂ်ႉၽႆးသႂ်ႇ ၵႃႈၼိူဝ်ဝဵင်း တေႇမၢၼ်ႇ လႄႈ ႁႂ်ႈမႆႈႁေႃၶမ်းဝဵင်း ပေႃႇၸရႃႉ တင်းလၢႆဢေႃႈ၊ ဝႃႈၼင်ႇၼႆဢေႃႈ။

13ထႃႇဝရႃႉၽြႃးသမ်ႉမီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈၵူၼ်းမဵဝ်း ဢမ်ႇမုၼ်ႇ တင်းလၢႆ သၢမ်ပႃးဢမ်ႇၵႃး၊ ၵွပ်ႈပိူဝ်ႈဢပႅတ်ႈသီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈဢမ်ႇယူႇ။ လွင်ႈမၼ်းၸမ်ႉ ၶဝ်ၽႃႇတွင်ႉမႄႈယိင်းမိူင်း ၵီႉလတ်ႉ ဢၼ်ပႃးပတိၵ်ႉသၼ်ႇထေႇၸိူဝ်းၼၼ်ႉ ႁႂ်ႈၶွပ်ႇၼမ်ႉလႅၼ်လိၼ်ၶဝ် လႆႈၵႂၢင်ႈမႃးယဝ်ႉယဝ်ႉ။-

14ၵဝ်တၵ်း ဢဝ်ၽႆးၸပ်းသႂ်ႇၵႃႈတီႈလမ်းဝဵင်း ရပ်ႉပႃႇ လႄႈ ႁႂ်ႈမႆႈႁေႃၶမ်းမၼ်းတင်းလၢႆဢေႃႈ။ တၵ်းမီးတၢင်းဢၼ်သႅၼ်ႇႁွင်ႉ ၼႂ်းမိုဝ်ႉဝၼ်းဢၼ်တိုၵ်းသိုၵ်း ဢိၵ်ႇတင်းတၢင်းဢၼ်ပိဝ်သဵၼ်ၵႂႃႇ ၼႂ်းဝၼ်းဢၼ်ၽူၼ်လူင်လူမ်းလူင် ႁွတ်ႈမႃးၼၼ်ႉဢေႃႈ။-

15ၶုၼ်ႁေႃၶမ်းၶဝ် ဢိၵ်ႇလူၺ်ႈၵၼ်တင်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။

Jump to: Chapter 2 →