Amos 3

Shan

← Chapter 2 Jump to: Chapter 4 →

1ၵူၼ်းမဵဝ်း ဢီႉသရေႇလႃႉ တင်းလၢႆၶဝ်ဢိူၺ်း၊ ဢွၼ်ၵၼ် ထွမ်ႇငိၼ်းၵႂၢမ်းဢၼ် ထႃႇဝရႃႉၽြႃးဢဝ် လွင်ႈသူဢၼ်ဝႃႈ ၵူၼ်းမဵဝ်းဢၼ်ၵဝ်ၼုၵ်ႈဢဝ် ဢွၵ်ႇသေၵႃႈၼႂ်း မိူင်း ဢေႇၵိပ်ႉတူႉ မႃး တင်းသဵင်ႈတင်းလူင် သေလႄႈ မီးဢမိင်ႉၼၼ်ႉတႃႉ။-

2ၵႃႈၼႂ်းမဵဝ်းၵူၼ်း တင်းသဵင်ႈတင်းလူင် ဢၼ်ယူႇၵႃႈၼိူဝ် လိၼ်မိူင်းၼႆႉၼၼ်ႉ၊ ၵဝ်ႁပ်ႉတုင်းဢဝ်သူ မဵဝ်းလဵဝ်ၵူၺ်းဢေႃႈ။ ပိူဝ်ႈၼႆလႄႈ ၵဝ်တၵ်းပၼ်တၢမ်ႇဢပႅတ်ႈသူ ၵႃႈမီးၼၼ်ႉ တီႈသူဢေႃႈ။

3ၵူၼ်းသွင်ၵေႃႉ ပေႃးၸႂ်သၽေႃး ဢမ်ႇမိူၼ်ၵၼ်ၸိုင် တၵ်းႁူမ်ႈပွင်းလူၺ်ႈၵၼ် သေလႄႈ ၵႂႃႇတၢင်းပႆတၢင်းလႆႈႁိုဝ်။-

4သၢင်ႇသီႈၼၼ်ႉ၊ ပေႃးတီႈလီတီႉဢဝ် ဢမ်ႇမီးၸိုင်၊ တၵ်းႁွင်ႉၶၢင်း ၵႃႈၼႂ်းထိူၼ်ႇႁိုဝ်။ သၢင်ႇသီႈၼုမ်ႇၼၼ်ႉ ပေႃးဢမ်ႇတီႉဢဝ်လွင်ႈတၢင်း သေၸိူဝ်ႉသေပိူင်ယဝ်ႉၸိုင် တၵ်းႁဵတ်းသဵင် ၵႃႈၼႂ်းၶုမ်မၼ်းႁူးမၼ်းႁိုဝ်။-

5ပေႃးဢမ်ႇၵၢင်ဝႆႉၸိုင် ၼူၵ်ႉတၵ်းထုၵ်ႇၶဵၼ်းမႅၼ်ႈ ၵႃႈၼႂ်းတူင်ႇႁႅဝ်ႉတူင်ႇၶိုမ်း ၵႃႈၼိူဝ်ၼႃႈလိၼ်ႁိုဝ်။ ၸူဝ်ႈဢၼ်ဢမ်ႇပႆႇလႆႈ လွင်ႈတၢင်း သေၸိူဝ်ႉသေပိူင်ၼၼ်ႉၸိုင် တူင်ႇႁႅဝ်ႉတူင်ႇၶိုမ်း တၵ်းမီးတၢင်းဢၼ်ထွတ်ႇထူၺ်ႈ ဢွၵ်ႇသေၵႃႈတီႈလိၼ်ၼၼ်ႉႁိုဝ်။-

6ပေႃးပဝ်ႇၼႄးၶရႃႇ ၵႃႈၼႂ်းဝဵင်းၸိုင် ၵူၼ်းဝဵင်းတင်းလၢႆ ယင်းဢမ်ႇၵူဝ်ဢမ်ႇႁႄလႄႈ တၵ်းယူႇႁိုဝ်။ ထႃႇဝရႃႉၽြႃး ယင်းဢမ်ႇၸီႇယၢင်ႇလႄႈ ၽေးသေၸိူဝ်ႉသေပိူင် တၵ်းႁွတ်ႈထိုင် ၵႃႈၼႂ်းၶူးၼႂ်းဝဵင်းႁိုဝ်။-

7ထႃႇဝရႃႉၽြႃး ယင်းဢမ်ႇၽုၺ်ႇဢွၵ်ႇၼႄပျႃး တီႈၶႃႈမၼ်းၸဝ်ႈ ပရေႃးၽႅတ်ႈတင်းလၢႆ လႄႈ မၼ်းၸဝ်ႈဢမ်ႇၸီႇယၢင်ႇ လွင်ႈတၢင်းသေၸိူဝ်ႉသေပိူင်။-

8မိူဝ်ႈဢၼ် သၢင်ႇသီႈႁွင်ႉၶၢင်းၼၼ်ႉၸိုင် ၽူႈလႂ်ယင်းဢမ်ႇၵူဝ်ဢမ်ႇႁႄလႄႈ တၵ်းယူႇ။ မိူဝ်ႈဢၼ်ၸဝ်ႈထႃႇဝရႃႉၽြႃး မီးဢမိင်ႉၼၼ်ႉၸိုင် ၽူႈလႂ်ယင်းဢမ်ႇႁဵတ်း ပရေႃးၽႅတ်ႈလႄႈ တၵ်းယူႇ။

9တၵ်းလႆႈႁွင်ႉပၢဝ်ႇ ႁွင်ႉလၢတ်ႈ ၵႃႈၼႂ်းႁေႃၶမ်းဝဵင်း ဢႃႇၸုတ်ႉ ဢိၵ်ႇတင်း ၵႃႈၼႂ်းႁေႃၶမ်းမိူင်း ဢေႇၵိပ်ႉတူႉ ၸိူဝ်းၼၼ်ႉလႄႈ ဝႃႈၸမ်ႉ၊ သူၸူႉၵၼ်တုမ်ၵၼ် ၵႃႈၼိူဝ်လွႆ သမႃႇရီႉ တင်းလၢႆ လႄႈ လူတူၺ်း လွင်ႈတၢင်းဢၼ် ႁုၼ်ႉႁၼ်ႉဢူၼ်ဢဵၼ်မေႃးမႄး ၵႃႈၼႂ်းဝဵင်းၼၼ်ႉ၊ ဢိၵ်ႇတင်း လွင်ႈတၢင်းဢၼ် ၼိၵ်ႈၸၢၵ်ႈငႅၼ်းသႄး ၵႃႈၼႂ်းၵၢင်ဝဵင်းၼၼ်ႉတႃႉ။-

10ၶဝ်ၼၼ်ႉ ဢၼ်ပဵၼ်ၶဝ်ၸိူဝ်းဢၼ် ၸၢင်ႈဢွၼ်ၵၼ်ဢဝ်ဢုၵ်ႉၸႃႇ ဢၼ်ႁဵတ်းပႄႉႁဵတ်းၼႅင်ႇလႄႈ ႁိမ်ႁူင်ႇဢဝ်ၼၼ်ႉ သိမ်းဝႆႉၵႃႈၼႂ်းႁေႃၶမ်းၼၼ်ႉ ၸိူဝ်းၼၼ်ႉ ဢမ်ႇႁူႉတၢင်းဢၼ် ၸၢင်ႈႁဵတ်းၸွမ်းၼင်ႇတြႃးၼၼ်ႉလႃးလႃး၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။-

11ပိူဝ်ႈၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ရၢၼ်ႇသူႇတၵ်းမီးမႃးလႄႈ လွမ်ႉလဵပ်ႈႁွပ်ႈမိူင်းဝႆႉသေလႄႈ ဢွၼ်ၵၼ်ၶျႃးတၢင်းၵတ်ႉတၢင်းၶၼ်မႂ်း တူၵ်းတီႈတႅမ်ႇလႄႈ ႁိမ်ဢဝ်ယႃႉၽဵဝ်ႈ ႁေႃၶမ်းမႂ်းတင်းလၢႆ ပႅတ်ႈဢေႃႈ။-

12ထႃႇဝရႃႉၽြႃးမီးဢမိင်ႉၸမ်ႉ၊ မိူၼ်ၸိူဝ်ႉၼင်ႇဢၼ်ၵူၼ်း ဢၼ်လဵင်ႉသူဝ်းထိင်းသူဝ်း ၼုၵ်ႈဢဝ်တိၼ်သွင်ၶွၼ်၊ ဢမ်ႇၼၼ် မႂ်ႁူပွတ်းၼိုင်ႈ ဢွၵ်ႇသေၵႃႈၼႂ်း သူပ်းသၢင်ႇသီႈ ၼၼ်ႉလႄႈ ၵူၼ်းမဵဝ်း ဢီႉသရေႇလႃႉ ဢၼ်ၼင်ႈယူႇ ၵႃႈတီႈၸဵင်ႇၵူႇတီႈၼွၼ်း ၵႃႈၼႂ်းဝဵင်း သမႃႇရီႉ ဢိၵ်ႇတင်း ၵႃႈၼိူဝ်ၽႃႈၵွပ်း ၵႃႈတီႈဝဵင်း ထမ်ႇမသႅတ်ႉ ၸိူဝ်းၼၼ်ႉ တၵ်းလႆႈၶၢမ်ႇ တၢင်းဢၼ် ၼုၵ်ႈဢဝ်ဢေႃႈ။-

13ၸဝ်ႈထႃႇဝရႃႉၽြႃး ၽြႃးပဵၼ်ၸဝ်ႈ ပူဝ်ႇပႃႇၵၢင်ႁၢဝ် မီးဢမိင်ႉၸမ်ႉ၊ သူဢွၼ်ၵၼ်ထွမ်ႇငိၼ်းလႄႈ ၶၢမ်ႇသၢၵ်ႈသေႇ ယူႇၽၢႆႇၼိုင်ႈတင်းမဵဝ်း ယႃႇၵုပ်ႈ တႃႉ။-

14ၼႂ်းမိုဝ်ႉဝၼ်းဢၼ် ၵဝ်ပၼ်တၢမ်ႇ ဢပႅတ်ႈမဵဝ်း ဢီႉသရေႇလႃႉ ၵႃႈၼိူဝ်မၼ်းၼၼ်ႉ ၵဝ်တၵ်း ပၼ်တၢမ်ႇဢပႅတ်ႈတီႈ ယိတ်ႈပလၢင်ႇ ပေႇသလႃႉ တင်းလၢႆ ဢမၢၼ်ႇၶၼ်ပဵၼ်လႄႈ ၶဝ်လႅမ်ယိတ်ႈပလၢင်ႇမၼ်း တၵ်းလႆႈ ၶၢမ်ႇတၢင်းဢၼ် တႅပ်းၶၢတ်ႇလႄႈ တူၵ်းပႅတ်ႈ ၵႃႈၼိူဝ်လိၼ်ဢေႃႈ။-

15ၵဝ်တၵ်းတိူဝ်ႉထုၵ်ႇသႂ်ႇ ႁေႃၸဝ်ႈ ဢၼ်ယူႇၼႂ်း မိူဝ်ႈၶိင်ႇၵတ်း ဢိၵ်ႇတင်း ႁေႃၸဝ်ႈဢၼ်ယူႇၼႂ်း မိူဝ်ႈၶိင်ႇမႆႈ ၸိူဝ်းၼၼ်ႉလႄႈ ႁိူၼ်းဢၼ်ယဝ်ႉတူဝ်ႈလူၺ်ႈ ငႃးၸၢင်ႉၸိူဝ်းၼၼ်ႉ တၵ်းလႆႈလူႉလႆႈလႅဝ်ဢေႃႈ။ ႁိူၼ်းယႂ်ႇႁိူၼ်းလူင် တင်းလၢႆၵေႃႈ တၵ်းလႆႈသုမ်းလႆႈၸွမ်းဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။

← Chapter 2 Jump to: Chapter 4 →