Amos 6

Shan

← Chapter 5 Jump to: Chapter 7 →

1ၶဝ်ၸိူဝ်းဢၼ်ယူႇ ၵႃႈၼႂ်းဝဵင်း ၸီႉဢုၼ်ႇ ၼိမ်ၼိမ်လီလီ၊ ၶဝ်ၸိူဝ်းဢၼ်ယူႇ လူင်ႉလီလွတ်ႈလီ ၵႃႈၼိူဝ်လွႆ သမႃႇရီႉ ၊ ၶဝ်ၸိူဝ်းဢၼ် ပဵၼ်ဢၼ်ထွတ်ႈဢၼ်မျၢတ်ႈ ၵႃႈၼႂ်းမဵဝ်းၵူၼ်းတင်းလၢႆ၊ ၶဝ်ၸိူဝ်းဢၼ် မဵဝ်း ဢီႉသရေႇလႃႉ သုတ်ႉၸပ်းသုတ်ႉၸူးၼၼ်ႉ မီးဢႃႉမင်ႇၵလႃႇဢေႃႈ။-

2ဢွၼ်ၵၼ်ၵႂႃႇၸူး ၵႃႈတီႈဝဵင်း ၵႃႇလၼေႇ လႄႈ လူတူၺ်းတႃႉ။ သမ်ႉလုၵ်ႉသေၵႃႈတီႈဝဵင်းၼၼ်ႉ ၵႂႃႇၸူးၵႃႈတီႈဝဵင်းလူင် ႁႃႇမတ်ႉ တႃႉ။ သမ်ႉလူင်းၵႂႃႇၸူး ၵႃႈတီႈဝဵင်း ၵႃႇသႃႉ ဢၼ်ၵူၼ်း ၽီႉလိတ်ႉတီႉ တင်းလၢႆ ယူႇၼၼ်ႉတႃႉ။ သိုင်ႇၸိုင်ႈဝၢၼ်ႈမိူင်း ၸိူဝ်းၼၼ်ႉ ယဵင်ႈၶႅၼ်းလီၼႃႇသေသိုင်ႇၸိုင်ႈဝၢၼ်ႈမိူင်း ၸိူဝ်းၼႆႉႁိုဝ်။ ၶွပ်ႇၼမ်ႉ လႅၼ်လိၼ်ၶဝ်ၼၼ်ႉ ယဵင်ႈၶႅၼ်းၵႂၢင်ႈၼႃႇသေ ၶွပ်ႇၼမ်ႉ လႅၼ်လိၼ်သူႁိုဝ်။-

3သူၸိူဝ်းဢၼ် ႁဵတ်းတၢင်းဢၼ်ၶၢႆႉမိုဝ်ႉၶၢႆႉဝၼ်း ဢၼ်ႁၢႆႉယုတ်ႈၼၼ်ႉလႄႈ ႁႂ်ႈပလၢင်ႇတီႈဢၼ် ၸီႇယၢင်ႇဢမ်ႇတြႃးလႆႈတႄႇယူႇ ၵႃႈတီႈၼၼ်ႈၸမ်ႉ၊-

4တၢင်းဢၼ်ၼွၼ်း ၵႃႈၼိူဝ်ၵူႇငႃးၸၢင်ႉလႄႈ ယဵတ်ႇတူဝ်လိူၼ်း တူဝ်ၵႃႈၼိူဝ်ၽႃႈၵွပ်း၊ တၢင်းဢၼ်ၼုၵ်ႈဢဝ် သူဝ်းဢွၼ်ႇတင်းလၢႆ ဢွၵ်ႇသေၵႃႈၼႂ်းၽုင်သူဝ်း၊ ဝူဝ်းဢွၼ်ႇတင်းလၢႆ ဢွၵ်ႇသေၵႃႈၼႂ်းၶွၵ်ႈဝူဝ်းလႄႈၵိၼ်၊-

5တၢင်းဢၼ်ပႃးသဵင် ဢၼ်လဵတ်းတိင်ႇသေလႄႈ ႁဵတ်းၵႂၢမ်း၊ တၢင်းဢၼ်ၵျၢမ်ႇႁဵတ်း ပွင်ႁဵတ်းမဵဝ်းတူႇရီႉယႃႇ တီႈဢၼ်ႁႆႇဢၼ်ပဝ်ႇ မိူၼ်ၸိူဝ်ႉၼင်ႇ တႃႇဝိတ်ႈ ၼၼ်ႉ၊-

6တၢင်းဢၼ် ဢဝ်ဝၢၼ်ႇဢဝ်ၵွၵ်းသေလႄႈ သူတ်ႉၵိၼ်ၼမ်ႉၸပိတ်ႈလႄႈ ဢဝ်ၼမ်ႉမၼ်းၼၢမ်ႇသႃႇ ဢၼ်ထိူၵ်ႈၵႃႈ ထိူၵ်ႈၶၼ်ၼၼ်ႉတႃး၊ တၢင်းဢၼ် ယင်းဢမ်ႇမီးတၢင်းဢၼ် ၸဵပ်းၸႂ်လူၺ်ႈလွင်ႈ ဢၼ်မဵဝ်း ယူဝ်းသႅပ်ႈ လႆႈၶၢမ်ႇတုၵ်ႉၶႃႉ တၢင်းၽၢၼ်ၼၼ်ႉလႄႈ ယူႇၼၼ်ႉၸိူဝ်းၼႆႉ မီးဢႃႉမင်ႇၵလႃႇဢေႃႈ။-

7ပိူဝ်ႈၼႆလႄႈ ၶဝ်ၼၼ်ႉတၵ်းလႆႈၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ် လႆႈၶၢမ်ႇတၢင်းဢၼ်သိမ်းဢဝ်ၵႂႃႇ ဢွၼ်တၢင်းသုတ်းပိူၼ်ႈၼၼ်ႉဢေႃႈ။ သဵင်ႁုၼ်ႉသဵင်ႁိုဝ်ႉပွႆးၶဝ် ၸိူဝ်းဢၼ်ၼွၼ်းဢိင်ၶႅၵ်ႇသေလႄႈ ယူႇၼၼ်ႉၵေႃႈတၵ်းလႆႈထၢတ်ႇႁၢႆ ၵႂႃႇဢေႃႈ။-

8ၽြႃးပဵၼ်ၸဝ်ႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးမီးဢမိင်ႉၸမ်ႉ၊ ၵႃႈၼင်ႇဢၼ်ၸဝ်ႈထႃႇဝရႃႉၽြႃး ဢဝ်တူဝ်ၸဝ်ႈၵဝ်ႇတိူင်ႇဝႃႈၼၼ်ႉ၊ ၵွပ်ႈပိူဝ်ႈဢၼ်ၵဝ်လီႁင်ႈ ဢဵတ်ႇသဵတ်ႇမုၼ်သရေႇ ယႃႇၵုပ်ႈ လႄႈ ၸင်းႁေႃၶမ်းမၼ်းတင်းလၢႆၼၼ်ႉလႄႈ၊ ၵဝ်တၵ်းၸုၼ်ႉပႅတ်ႈဝဵင်းၸဝ်ႈ ဢိၵ်ႇတင်း ၵႃႈဢၼ်မီးၵႃႈၼႂ်းမၼ်းဢေႃႈ။-

9ပိၵ်ႉသမ်ႉၵူၼ်းသိပ်းၼိုင်ႈ ၵိုတ်းၵျၢၼ်ႇဝႆႉ ၵႃႈၼႂ်းႁိူၼ်းလင်ၼိုင်ႈသေၵေႃႈ၊ ၶဝ်တၵ်းလႆႈတၢႆဢေႃႈ။-

10ၵေႃႉဢၼ်ပဵၼ်ပီႈပဵၼ်ၼွင်ႉလႄႈ လႆႈဢဝ်သၢင်းၵျူဝ်ႇၽႆးၼၼ်ႉ ၼႂ်းမိူဝ်ႈဢၼ်ယင်းတိုၵ်ႉယွင်ႈဢဝ်လႄႈ ဢဝ်တူဝ်တၢႆဢွၵ်ႇသေၵႃႈၼႂ်း ႁိူၼ်းၼၼ်ႉယူႇၼၼ်ႉၸိုင်၊ တၵ်းႁွင်ႉထၢမ်တီႈၵေႃႉဢၼ် မီးၵႃႈၼႂ်းတီႈသုတ်းႁိူၼ်း ၼၼ်ႉလႄႈဝႃႈ၊ တီႈမႂ်းယင်းၵိုတ်းယင်းၵျၢၼ်ႇ သေၵေႃႉသေၵူၼ်းႁိုဝ်။ မိူဝ်ႈဢၼ်ဝႃႈၼင်ႇၼႆၸိုင် မၼ်းတၵ်းၶိုၼ်းလၢတ်ႈလႄႈဝႃႈ၊ ဢမ်ႇၵိုတ်းဢမ်ႇၵျၢၼ်ႇၵူၺ်ႉ၊ ဝႃႈၼင်ႇၼႆဢေႃႈ။ မၼ်းၼၼ်ႉတၵ်းၶိုၼ်းလၢတ်ႈလႄႈဝႃႈ၊ ယူႇတဵတ်ႇတဵတ်ႇယဵၼ်ယဵၼ်တႃႉ။ ႁဝ်းဢမ်ႇမီးဢၶႂၢင်ႉ ဢၼ်လႆႈဢဝ်ၼႃႇမႃႉ ၸိုဝ်ႈသဵင်ထႃႇဝရႃႉၽြႃး ဢွၵ်ႇသူပ်းဝႃႈၵူၺ်ႉ၊ ဝႃႈၼင်ႇၼႆဢေႃႈ။-

11လွင်ႈမၼ်းၸမ်ႉ တူၺ်းလူး။ ထႃႇဝရႃႉၽြႃးမီးဢမိင်ႉသေယဝ်ႉ၊ မၼ်းၸဝ်ႈတၵ်းၵိူၼ်ႇယႃႉ ႁိူၼ်းဢၼ်ယႂ်ႇ ဢၼ်လူင်ပႅတ်ႈလႄႈ ႁိူၼ်းဢၼ်လဵၵ်ႉ ဢၼ်ဢွၼ်ႇၵေႃႈ မၼ်းၸဝ်ႈတၵ်းႁႂ်ႈ တႅၵ်ႇလႅဝ်ပႅတ်ႈဢေႃႈ။-

12မႃႉၸၢင်ႈၶုၼ်ႇလႅၼ်ႈ ၵႃႈၼိူဝ်မၢၵ်ႇႁိၼ်မၢၵ်ႇၽႃႁိုဝ်။ ၵူၼ်းၸၢင်ႈဢဝ်ဝူဝ်းထႆထိူၼ်ႇ ၵႃႈၼိူဝ်တီႈၼၼ်ႈႁိုဝ်။ သူႁဵတ်းႁႂ်ႈတၢင်းဢၼ်ၸီႇယၢင်ႇၸွမ်းၼင်ႇတြႃး ပဵၼ်ၵွင်ႉပဵၼ်ယၢင်ၵႂႃႇလႄႈ ႁႂ်ႈတၢင်းဢၼ်သိုဝ်ႈတေႃႇ ပဵၼ်မႂ်ယႃႈၶူမ်ၵႂႃႇယဝ်ႉလူင်ပႄႇ။-

13သူမူၼ်ႈပျေႃႇၸူမ်းသိူဝ်းယူႇ ၵႃႈၼႂ်းလွင်ႈတၢင်းဢၼ် လၢႆလၢႆ ဢမ်ႇပွင်ႇလွင်ႈၵႃႈသင်လႄႈ ၸၢင်ႈလၢတ်ႈလႄႈဝႃႈ၊ ႁဝ်းၼႆႉဢဝ်တၢင်းၵတ်ႉတၢင်းၶၼ်ႁဝ်း သိမ်းဢဝ်ၶဝ်လႅမ်တင်းလၢႆယဝ်ႉယဝ်ႉ၊ ဝႃႈၼင်ႇၼႆလူင်ပႄႇ။-

14တူၺ်းလူး။ မဵဝ်း ဢီႉသရေႇလႃႉ ဢိူၺ်း၊ ၵဝ်တၵ်းႁႂ်ႈၵူၼ်းမဵဝ်းၼိုင်ႈ လုၵ်ႉယူႇၽၢႆႇၼိုင်ႈတင်းသူလႄႈ ၶဝ်ၼၼ်ႉတၵ်း ၼိၵ်ႈၸၢၵ်ႈငႅၼ်းသႄးသူ ဢဝ်ၵႃႈတီႈၸႃႉၸဵမ်သူပ်းတၢင်း ဝဵင်း ႁႃႇမတ်ႉ ၵႂႃႇတေႃႇထိုင်ႁွတ်ႈၼမ်ႉႁွင်ႈ ဢၼ်မီးၵႃႈၼႂ်းထိူၼ်ႇ ၼၼ်ႉဢေႃႈ၊ ဝႃႈၼင်ႇၼႆလႄႈ ၽြႃးပဵၼ်ၸဝ်ႈ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉဢေႃႈ။

← Chapter 5 Jump to: Chapter 7 →