Amos 8

Shan

← Chapter 7 Jump to: Chapter 9 →

1ၸဝ်ႈထႃႇဝရႃႉၽြႃး သမ်ႉၼႄပျႃးတီႈၵဝ် ထႅင်ႈၸမ်ႉ၊ တူၺ်းလူး။ မီးပဵတ်ႈဢၼ်သႂ်ႇမၢၵ်ႇ ဢၼ်သုၵ်းဝႆႉၼၼ်ႉဢေႃႈ။-

2မၼ်းၸဝ်ႈထၢမ်လႄႈဝႃႈ၊ ဢႃႇမူတ်ႉ ဢိူၺ်း၊ မႂ်းႁၼ်ၵႃႈသင်၊ ဝႃႈၼင်ႇၼႆသေယဝ်ႉ၊ ၵဝ်လဝ်ႊလၢတ်ႈလႄႈဝႃႈ၊ ႁၼ်ပဵတ်ႈ ဢၼ်သႂ်ႇမၢၵ်ႇဢၼ်သုၵ်း ဝႆႉၼၼ်ႉ တီႈၶႃႈဢေႃႈ။ မိူဝ်ႈဢၼ်ဝႃႈ ၼင်ႇၼႆၸိုင်၊ ထႃႇဝရႃႉၽြႃး မီးဢမိင်ႉ တီႈၵဝ်လႄႈဝႃႈ၊ ၶိင်ႇၵႃႇလႃႉ လိုၼ်းလင်သုတ်းၼၼ်ႉ ႁွတ်ႈထိုင်ၵႃႈတီႈၵူၼ်းၵဝ် ၵူၼ်းမဵဝ်း ဢီႉသရေႇလႃႉ တင်းလၢႆယဝ်ႉယဝ်ႉ။ ၵမ်းလိုၼ်း ၵဝ်တၵ်းဢမ်ႇယိူၼ်ႉ ဢမ်ႇၶၢမ်ႇၶဝ်။-

3ၼႂ်းမိုဝ်ႉဝၼ်းၼၼ်ႉ သဵင်ဢၼ်ႁဵတ်းၵႂၢမ်းယူႇ ၵႃႈတီႈပိၵ်ႈမၢၼ်ႇၼၼ်ႉၸိူဝ်းၼၼ်ႉ တၵ်းပဵၼ်တၢင်းဢၼ် ႁွင်ႉႁႆႈႁွင်ႉသႅၼ်ႇၵႂႃႇဢေႃႈ။ တူဝ်တၢႆ တၵ်းမီးၼမ်ၼႃႇ၊ ၵူၼ်းတင်းလၢႆ တၵ်းယူႇတဵတ်ႇတဵတ်ႇ သေလႄႈ ဢဝ်ပႅတ်ႈတူၵ်း ၵူႈတီႈၵူႈလႅၼ်ဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။

4သူၸိူဝ်းဢၼ် ထူၺ်ႈၸႂ်သဝ်ႈၸႂ်လူင် လိုပ်ႈၸွမ်းလမ်းၸွမ်း ၶဝ်ၸိူဝ်းဢၼ်ၸုတ်ႈဢၼ်လုတ်ႈ ၼၼ်ႉလႄႈ မီးဢလူဝ်ႇၶႂ်ႈယႃႉၽဵဝ်ႈ ၵူၼ်းဝၢၼ်ႈၵူၼ်းမိူင်း ဢၼ်ယၢၵ်ႈဢၼ်ၽၢၼ်တင်းလၢႆ ပႅတ်ႈၼႃႇလူင်လၢင်သေလႄႈ၊-

5လၢတ်ႈလႄႈဝႃႈ၊ လွင်ႈၼင်ႇႁိုဝ် ႁဝ်းတၵ်းလႆႈၶၢႆၶဝ်ႈပိူၵ်ႇၸိုင် တၵ်းပူၼ်ႉဝၼ်း လိူၼ်မႂ်ႇမိူဝ်ႈလႂ်။ လွင်ႈၼင်ႇႁိုဝ် ႁဝ်းတၵ်းလႆႈဢဝ်ၶဝ်ႈၵျုင်ႇ ဢွၵ်ႇၽႄဝႆႉ၊ လွင်ႈၼင်ႇႁိုဝ် ႁဝ်းတၵ်းလႆႈႁဵတ်းႁႂ်ႈၵွၵ်း ဢေးၽႃႇ လဵၵ်ႉ၊ ႁႂ်ႈလုၵ်ႈၵျၢပ်ႈယႂ်ႇသေလႄႈ သုင်းသွင်ႇယႃႇၸူႇ ဢၼ်ပႅတ်ႉဢၼ်လႅၼ်ၼၼ်ႉသေလႄႈ ပႅတ်ႉလႅၼ်၊-

6လွင်ႈၼင်ႇႁိုဝ် ႁဝ်းတၵ်းလႆႈဢဝ်ငိုၼ်း သိုဝ်ႉဢဝ်ၵေႃႉဢၼ် ယၢၵ်ႈဢၼ်ၽၢၼ်လႄႈ ဢဝ်ၶႅပ်းတိၼ် ၵူႈၼိုင်ႈသိုဝ်ႉဢဝ် ၵေႃႉဢၼ်ၸုတ်ႈ ဢၼ်လုတ်ႈၼၼ်ႉ၊ လွင်ႈၼင်ႇႁိုဝ် ႁဝ်းတၵ်းလႆႈၶၢႆ ၶဝ်ႈသၢၼ်ၵျုင်ႇ ဢၼ်ယုတ်ႈဢၼ်ၺၢမ်ႉၼၼ်ႉၸိုင်၊ တၵ်းပူၼ်ႉဝၼ်းၵမ်သိၼ်မိူဝ်ႈလႂ်၊ ဝႃႈၼင်ႇၼႆၼၼ်ႉၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းၵႂၢမ်းၼႆႉတႃႉ။-

7ထႃႇဝရႃႉၽြႃးဢဝ်မုၼ်ၽုင်း ယႃႇၵုပ်ႈ တိူင်ႇလႄႈဝႃႈၸမ်ႉ၊ ၵဝ်တၵ်းဢမ်ႇလူင်ဢမ်ႇလိုမ်း ၵႃႈဢၼ်ၶဝ်ၵမ်ၵျၢင်ႉ သၢင်ႈႁဵတ်းၼၼ်ႉယူႇ တႃႇသေႇဢမ်ႇထၢတ်ႇ။-

8ၵွပ်ႈပိူဝ်ႈဢပႅတ်ႈၼၼ်ႉလႄႈ မိူင်းၸဝ်ႈတၵ်းသၼ်ႇဝႆလႄႈ ၵူၼ်းမိူင်းၸဝ်ႈ တင်းသဵင်ႈတင်းလူင် တၵ်းၶၢင်းၶီၶၢင်းၽၢၼ် ဢမ်ႇၸႂ်ႈႁိုဝ်။ တၵ်းလုၵ်ႉတင်းမိူင်း မိူၼ်ၸိူဝ်ႉၼင်ႇ ၼမ်ႉႁွင်ႈလူင်ၼၼ်ႉလႄႈ ပဵၼ်ၸွၼ်ပဵၼ်ၸႅၼ်လႄႈ ယွမ်းတူၵ်းၵႂႃႇ မိူၼ်ၸိူဝ်ႉၼင်ႇၼမ်ႉႁွင်ႈ ဢေႇၵိပ်ႉတူႉ ၼၼ်ႉ ဢမ်ႇၸႂ်ႈႁိုဝ်။-

9ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းၼၼ်ႉ ၵဝ်တၵ်းႁႂ်ႈၵၢင်ဝၼ်းတူၵ်း ၶိင်ႇဢၼ်ၵၢင်ဝၼ်းတဵင်ႈၼၼ်ႉလႄႈ ႁႂ်ႈလိၼ်မိူင်းလပ်းသိင်ႇ ၼႂ်းဝၼ်းဢၼ်သႂ်လီ လႅင်းလီၼၼ်ႉဢေႃႈ။-

10ၵဝ်တၵ်းႁႂ်ႈတၢင်းဢၼ်သူၶၢမ်ႇပွႆးၼၼ်ႉ ပဵၼ်တၢင်းဢၼ် ၶၢင်းၶီၶၢင်းၽၢၼ်ၵႂႃႇလႄႈ ႁႂ်ႈတၢင်းဢၼ်သူ ႁဵတ်းၵႂၢမ်းၵႃႈမီးၼၼ်ႉ ပဵၼ်တၢင်းဢၼ်ႁႆႈႁွင်ႉပွင်ႉၶၢင်းၵႂႃႇဢေႃႈ။ ၵဝ်တၵ်းႁဵတ်းႁႂ်ႈ ၵူၼ်းတင်းသဵင်ႈတင်းလူင် ဢဝ်ၶူဝ်းၼုင်ႈၼင်ပေႃႁတ်ႉဢႅဝ်လႄႈ ႁႂ်ႈၵူႈၵေႃႉၵူႈၵူၼ်း လႆႈၶၢမ်ႇတၢင်းဢၼ် ထႃႁူဝ်ၵႅတ်းႁူဝ်ပႅတ်ႈဢေႃႈ။ ၵဝ်တၵ်းႁႂ်ႈလွင်ႈတၢင်းၼၼ်ႉ ပဵၼ်ၸိူဝ်ႉၼင်ႇတၢင်းဢၼ်ၶၢင်းၶီၶၢင်းၽၢၼ် ၵွပ်ႈပိူဝ်ႈ လုၵ်ႈၸၢႆးၵေႃႉလဵဝ်ၵူၺ်းၼၼ်ႉ ဢိၵ်ႇတင်း ႁႂ်ႈတီႈသုတ်းတီႈၵွႆမၼ်း ပဵၼ်ၸိူဝ်ႉၼင်ႇမိုဝ်ႉဝၼ်းဢၼ်ၶူမ်ၼႃႇၼၼ်ႉဢေႃႈ၊ ဝႃႈၼင်ႇၼႆဢေႃႈ။-

11ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၶိင်ႇမိုဝ်ႉဝၼ်းဢၼ် ၵဝ်တၵ်းႁႂ်ႈၽေး တၢင်းဢၼ်ဢိုပ်းဢၼ်ယၢၵ်ႈ ပဵၼ်ၵႃႈၼႂ်းမိူင်းၸဝ်ႈၼၼ်ႉ တၵ်းႁွတ်ႈထိုင်လႄႈ တၵ်းဢမ်ႇပဵၼ်ၽေး တၢင်းဢၼ်ၶဝ်ႈၵႃႈမၢၵ်ႇပႅင်းလႄႈ ဢိုပ်းယၢၵ်ႈ၊ ၽေးတၢင်းဢၼ်ဢိုပ်းၼမ်ႉ ယၢၵ်ႇၼမ်ႉၼၼ်ႉလႄႈ တၵ်းပဵၼ်ၽေး တၢင်းဢၼ်ဢိုပ်းဢၼ်ယၢၵ်ႈ ဢၼ်ဝႃႈတၢင်းဢၼ် ဢမ်ႇလႆႈငိၼ်းဢမိင်ႉထႃႇဝရႃႉၽြႃးဢေႃႈ။-

12ၵူၼ်းတင်းလၢႆ တၵ်းလႄႇၵႂႃႇလဵပ်ႈၵႂႃႇ ဢဝ်ၵႃႈတီႈပၢင်ႇလၢႆႇမႄႈၼိုင်ႈ တေႃႇထိုင်ႁွတ်ႈ ပၢင်ႇလၢႆႇမႄႈၼိုင်ႈ ဢိၵ်ႇတင်းဢဝ်ၵႃႈတီႈၽၢႆႇတၢင်းႁွင်ႇ တေႃႇထိုင်ႁွတ်ႈၽၢႆႇတၢင်းဢွၵ်ႇၼၼ်ႉလႄႈ ပိၵ်ႉသမ်ႉၶဝ်လႅၼ်ႈၵႂႃႇလႅၼ်ႈမႃး ႁႂ်ႈလႆႈႁႃဢဝ်ဢမိင်ႉထႃႇဝရႃႉၽြႃးသေၵေႃႈ ၶဝ်ဢမ်ႇလႆႈထူပ်းလႆႈႁၼ်။-

13ၼႂ်းမိုဝ်ႉဝၼ်းၼၼ်ႉ ၽူႈသၢဝ်ဢၼ်ႁၢင်ႈလီၽၢင်လီ ဢိၵ်ႇတင်း ၽူႈမၢဝ်ႇတင်းလၢႆ တၵ်းဢိုပ်းၼမ်ႉယၢၵ်ႇၼမ်ႉလႄႈ ႁိူဝ်ႉၼူၼ်းဢေႃႈ။-

14ၶဝ်ၸိူဝ်းဢၼ် ဢဝ်ဢပႅတ်ႈ သမႃႇရီႉ တိူင်ႇဝႃႈ ၵိၼ်ႇဝႃႈလႄႈဝႃႈ၊ တၢၼ်ႇ ဢိူၺ်း၊ ၵႃႈၼင်ႇဢၼ် ၽြႃးမႂ်း ဢသၢၵ်ႈလိပ်းယူႇၼၼ်ႉ၊ ဝႃႈၼင်ႇၼႆလႄႈသမ်ႉဝႃႈ၊ ၵႃႈၼင်ႇဢၼ် ဢသၢၵ်ႈၽႃႇသႃႇသဵၼ်ႈတၢင်း ပေႇရသေႇၽႃႉ တႄႇယူႇၼၼ်ႉ၊ ဝႃႈၼင်ႇၼႆ ဢၼ်ဝႃႈ ၶဝ်ၸိူဝ်းဢၼ်ဝႃႈၸိူဝ်ႉၼင်ႇၼႆၼၼ်ႉ တၵ်းလႆႈလူမ်ႉတူၵ်းလႄႈ ၵမ်းလိုၼ်း ဢမ်ႇလႆႈသမ်ႉၶိုၼ်းလုၵ်ႉ၊ ဝႃႈၼင်ႇၼႆဢေႃႈ။

← Chapter 7 Jump to: Chapter 9 →