Amos 7

Shan

← Chapter 6 Jump to: Chapter 8 →

1ၸဝ်ႈထႃႇဝရႃႉၽြႃး သမ်ႉၼႄပျႃးတီႈၵဝ်ၸမ်ႉ၊ တူၺ်းလူး။ မၼ်းၸဝ်ႈ ႁဵတ်းပဵၼ်မႅင်းၵႅင်းတင်းလၢႆ ၼႂ်းၶိင်ႇမိူဝ်ႈဢၼ် ပၢတ်ႇတူၼ်ႈယိူဝ်ႈတူၼ်ႈယႃႈ ဢၼ်ၵမ်းလိုၼ်း ဢၼ်ၸႃႉဢွၵ်ႇၼၼ်ႉလႄႈ ပဵၼ်တူၼ်ႈယိူဝ်ႈတူၼ်ႈယႃႈ ဢၼ်ၵမ်းလိုၼ်း ဢၼ်ၸႃႉဢွၵ်ႇလိုၼ်းလင် ၶိင်ႇမိူဝ်ႈဢၼ်ပၢတ်ႇ တူၼ်ႈယိူဝ်ႈတူၼ်ႈယႃႈ ဢၼ်ၸၢပ်ႈသႅင်ႇၵၼ်တင်း ၶုၼ်ႁေႃၶမ်းၼၼ်ႉဢေႃႈ။-

2မႅင်းၵႅင်းၸိူဝ်းၼၼ်ႉ ၵိၼ်တူၼ်ႈယိူဝ်ႈတူၼ်ႈယႃႈ ၵႃႈဢၼ်မီး ၵႃႈၼႂ်းမိူင်းၼၼ်ႉ သဵင်ႈသေယဝ်ႉ၊ ၵဝ်လဝ်ႊလၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃးတီႈၶႃႈ၊ ၶႅၼ်းတေႃႈပွႆႇလွတ်ႈဢပႅတ်ႈသေၵမ်းတီႈၶႃႈ၊ ယႃႇၵုပ်ႈ ၼၼ်ႉ ၵွပ်ႈပိူဝ်ႈဢၼ် ပဵၼ်ဢၼ်လဵၵ်ႉ ဢၼ်ၼွႆႉၼၼ်ႉလႄႈ တၵ်းၸုၵ်းယူႇလႆႈ ၸိူဝ်ႉၼင်ႇႁိုဝ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

3ထႃႇဝရႃႉၽြႃး ၶုၵ်းၸႂ်လႆႈမႆႈၸႂ် ၵွပ်ႈလွင်ႈတၢင်းၼႆႉလႄႈ မီးဢမိင်ႉလႄႈဝႃႈ၊ ဢမ်ႇလႆႈပဵၼ်ၸိူဝ်ႉၼင်ႇၼႆ၊ ဝႃႈၼင်ႇၼႆဢေႃႈ။

4ၸဝ်ႈထႃႇဝရႃႉၽြႃး သမ်ႉၼႄပျႃးတီႈၵဝ် ထႅင်ႈၸမ်ႉ၊ ထႃႇဝရႃႉၽြႃးႁွင်ႉဢဝ် ႁႂ်ႈလႆႈဢဝ်ၽႆးပၼ်တၢမ်ႇလႄႈ ၽႆးမႆႈ မႁႃႇတီႈဢၼ်လိုၵ်ႉဢၼ်လမ်ႇ သေလႄႈ ႁုပ်ႇၵုင်း ဢၼ်ၽႄဢွၵ်ႇဝႆႉယဝ်ႉၼၼ်ႉ သုတ်းပႅတ်ႈဢေႃႈ။-

5ၵဝ်ၵေႃႈ လဝ်ႊလၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃးတီႈၶႃႈ၊ ၶႅၼ်းတေႃႈသဝ်းလူးၵွၼ်ႇ သေၵမ်းတီႈၶႃႈ၊ ယႃႇၵုပ်ႈ ၼၼ်ႉ ၵွပ်ႈပိူဝ်ႈဢၼ်ပဵၼ် ဢၼ်လဵၵ်ႉဢၼ်ၼွႆႉၼၼ်ႉလႄႈ တၵ်းၸုၵ်းယူႇလႆႈၸိူဝ်ႉၼင်ႇႁိုဝ် တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

6ထႃႇဝရႃႉၽြႃး ၶုၵ်းၸႂ်လႆႈမႆႈၸႂ် ၵွပ်ႈလွင်ႈတၢင်းၼႆႉလႄႈ မီးဢမိင်ႉလႄႈဝႃႈ၊ ဢမ်ႇလႆႈပဵၼ် ၸိူဝ်ႉၼင်ႇၼႆ၊ ဝႃႈၼင်ႇၼႆဢေႃႈ။

7မၼ်းၸဝ်ႈသမ်ႉ ၼႄပျႃးတီႈၵဝ်ထႅင်ႈၸမ်ႉ၊ တူၺ်းလူး။ ထႃႇဝရႃႉၽြႃး ၸုၵ်းယူႇၵႃႈၼိူဝ် တႄးမၢၵ်ႇႁိၼ် ဢၼ်ဢဝ်ၸိူၵ်ႈၵၢင်းမႅဝ်းယွၼ်ႇလႄႈ ႁဵတ်းၼၼ်ႉလႄႈ ဢဝ်မိုဝ်းၸဝ်ႈ ယိပ်းၵမ်ၸိူၵ်ႈၵၢင်းမႅဝ်းယူႇသေလႄႈ-

8ထႃႇဝရႃႉၽြႃး ထၢမ်တီႈၵဝ်လႄႈဝႃႈ၊ ဢႃႇမူတ်ႉ ဢိူၺ်း၊ မႂ်းႁၼ်ၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊ ၵဝ်လဝ်ႊလၢတ်ႈလႄႈဝႃႈ၊ ၶႃႈၸဝ်ႈႁၼ် ၸိူၵ်ႈမႆမီႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ၸဝ်ႈထႃႇဝရႃႉၽြႃး လၢတ်ႈလႄႈဝႃႈ၊ တူၺ်းလူး။ ၵဝ်တၵ်းဢဝ် ၸိူၵ်ႈၵၢင်းမႅဝ်းယွၼ်ႇတူၵ်း ၵႃႈၼႂ်းၵၢင်ၵူၼ်းၵဝ် ၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။ ၵမ်းလိုၼ်း ၵဝ်တၵ်းဢမ်ႇယိူၼ်ႉဢမ်ႇၶၢမ်ႇ ၶဝ်။-

9တီႈဢၼ်သုင် ဢီႉၸၢၵ်ႈ ၸိူဝ်းၼၼ်ႉ တၵ်းမီးတၢင်းဢၼ် သဵတ်ႇယဵၼ်ယူႇ၊ တီႈဢၼ်မူတ်းၸၢင်ႇ ဢီႉသရေႇလႃႉ ၸိူဝ်းၼၼ်ႉ တၵ်းမီးတၢင်းဢၼ် ပႄႇၽဵဝ်ႈပႅတ်ႈယူႇဢေႃႈ။ ၵဝ်တၵ်းဢဝ်လၢပ်ႇဢဝ်လႅဝ်း တိုၵ်းတေႃး မဵဝ်းၸိူဝ်ႉၶိူဝ်း ယေႇရူဝ်းပုမ်ႇ ဢေႃႈ၊ ဝႃႈၼင်ႇၼႆဢေႃႈ။

10မိူဝ်ႈၼၼ်ႉ ဢႃႇမၸီႉ ယိတ်ႈပရေႃးႁဵၵ်ႈ ပေႇသလႃႉ ၼၼ်ႉ ပွႆႇၸႂ်ႉၸူးၵႃႈတီႈ ယေႇရူဝ်းပုမ်ႇ ၶုၼ်ႁေႃၶမ်း ဢီႉသရေႇလႃႉ လႄႈ သင်ႇလၢတ်ႈၵႂႃႇလႄႈဝႃႈ၊ ဢႃႇမူတ်ႉ ၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီယူႇ ၽၢႆႇၼိုင်ႈတင်းၸဝ်ႈႁဝ်း ၵႃႈၼႂ်းၵၢင်မဵဝ်း ဢီႉသရေႇလႃႉ တီႈၶႃႈယဝ်ႉ။ မိူင်းၸဝ်ႈဢမ်ႇၶၢမ်ႇ ၵႂၢမ်းမၼ်း ၵူႈၸိူဝ်ႉၵူႈပိူင်ၼၼ်ႉလႆႈ တီႈၶႃႈ၊-

11လွင်ႈမၼ်းၸမ်ႉ ဢႃႇမူတ်ႉ လၢတ်ႈလႄႈဝႃႈ၊ ယေႇရူဝ်းပုမ်ႇ တၵ်းလႆႈတၢႆ လူၺ်ႈလၢပ်ႇလူၺ်ႈလႅဝ်းလႄႈ ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းလႆႈၶၢမ်ႇ တၢင်းဢၼ်သိမ်းဢဝ် ဢွၵ်ႇသေ ၵႃႈၼႂ်းမိူင်းၸဝ်ႈၼႆႉၵႂႃႇ ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

12ဢႃႇမၸီႉ သမ်ႉလၢတ်ႈတီႈ ဢႃႇမူတ်ႉ လႄႈဝႃႈ၊ ၵေႃႉဢၼ်ႁူလႅင်းတႃပွင်ႇၼႆႉဢိူၺ်း၊ ၵႂႃႇလႄႈ ဢွၵ်ႇပၢႆႈၸူးၵႃႈတီႈ မိူင်း ယူႉတႃႉ ပုၼ်ႉလႄႈ လဵင်ႉဢသၢၵ်ႈမႂ်းယူႇသေလႄႈ ႁဵတ်းပရေႃးၽႅတ်ႈယူႇ ၵႃႈၼႂ်းမိူင်းၼၼ်ႉတႃႉ။-

13ၵမ်းလိုၼ်း ယႃႇပေႁဵတ်း ပရေႃးၽႅတ်ႈ ၵႃႈၼႂ်းဝဵင်း ပေႇသလႃႉ ၼႆႉ။ ပဵၼ်ထႃႇၼႃႉ တီႈမူတ်းၸၢင်ႇ ၶုၼ်ႁေႃၶမ်း ဢိၵ်ႇတင်းဝဵင်း တီႈဢၼ်တႄႇႁေႃၶမ်းၸဝ်ႈဢေႃႈ၊ ဝႃႈၼင်ႇၼႆသေယဝ်ႉ၊-

14ဢႃႇမူတ်ႉ ၶိုၼ်းလၢတ်ႈတီႈ ဢႃႇမၸီႉ လႄႈဝႃႈ၊ ၵဝ်ၼႆႉ ယင်းဢမ်ႇၸႂ်ႈ ပရေႃးၽႅတ်ႈ။ ယင်းဢမ်ႇပဵၼ် လုၵ်ႈၸၢႆးပရေႃးၽႅတ်ႈလႄႈ ပဵၼ်ၵေႃႉဢၼ်လဵင်ႉဝူဝ်း၊ ၵေႃႉဢၼ်ဝိတ်းမၢၵ်ႇလိူဝ်ႇ သၢင်းၽေႃးၵူၺ်းဢေႃႈ။-

15ထႃႇဝရႃႉၽြႃး ၼုၵ်ႈဢဝ်ၵဝ်ဢွၵ်ႇသေ ၵႃႈၼႂ်းတီႈဢၼ်လဵင်ႉဝူဝ်းၼၼ်ႉလႄႈ မီးဢမိင်ႉတီႈၵဝ်လႄႈဝႃႈ၊ မႂ်းၵႂႃႇတႃႉ။ ႁဵတ်းပရေႃးၽႅတ်ႈ ၵႃႈၼႂ်းၵူၼ်းၵဝ် ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉတႃႉ၊ ဝႃႈၼင်ႇၼႆဢေႃႈ။-

16ပိူဝ်ႈၼႆလႄႈ တေႃႈလဵဝ်ၼႆႉ ထွမ်ႇငိၼ်းဢမိင်ႉ ထႃႇဝရႃႉၽြႃးသေၵမ်း။ မႂ်းလၢတ်ႈလႄႈဝႃႈ၊ ယႃႇပေႁဵတ်းပရေႃးၽႅတ်ႈယူႇၽၢႆႇၼိုင်ႈ တင်းမဵဝ်း ဢီႉသရေႇလႃႉ ။ ယႃႇပေဝႃႈဢွၵ်ႇသူပ်း ယူႇၽၢႆႇၼိုင်ႈတင်းမဵဝ်း ဢီႉၸၢၵ်ႈ ၊ ဝႃႈၼင်ႇၼႆဢေႃႈ။-

17ပိူဝ်ႈၼႆလႄႈ ထႃႇဝရႃႉၽြႃး မီးဢမိင်ႉၸမ်ႉ၊ မေးမႂ်းၼၼ်ႉ တၵ်းပဵၼ် မႄႈမွၵ်ႇယႃႈ ၵႃႈၼႂ်းဝဵင်းလႄႈ၊ လုၵ်ႈၸၢႆးမႂ်း လုၵ်ႈယိင်းမႂ်းၸိူဝ်းၼၼ်ႉ တၵ်းလႆႈလူမ်ႉတၢႆ လူၺ်ႈလၢပ်ႇလူၺ်ႈလႅဝ်းဢေႃႈ။ လိၼ်မႂ်းတၵ်းလႆႈၶၢမ်ႇ တၢင်းဢၼ် ပိူၼ်ႈၶဵင်ႈၸိူၵ်ႈမႆမီႈ သေလႄႈ ၽႄမႅင်ႇပၼ်ၵၼ်လႄႈ တူဝ်မႂ်းတၵ်းလႆႈတၢႆ ၵႃႈၼႂ်းမိူင်းဢၼ် ၵူဝ်ႈၵိူၵ်ႇဢေႃႈ။ မဵဝ်း ဢီႉသရေႇလႃႉ တၵ်းလႆႈၶၢမ်ႇ တၢင်းဢၼ်သိမ်းဢဝ် ဢွၵ်ႇသေၵႃႈၼႂ်းမိူင်း တီႈဢၼ်ၶဝ်ယူႇၼႆႉၵႂႃႇ ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။

← Chapter 6 Jump to: Chapter 8 →