Ephesians 1

Shan

Jump to: Chapter 2 →

1ၵဝ် ပေႃးလူႉ ဢၼ်ပဵၼ်တမၢၼ်ႇၸဝ်ႈ ယေႇသူႉၶရိၸ်ႈ ၸွမ်းၼင်ႇဢလူဝ်ႇၽြႃးပဵၼ်ၸဝ်ႈၼႆႉ ပၼ်ငိၼ်းၵႂႃႇၵႃႈတီႈ ၵူၼ်းမူတ်းၸၢင်ႇတင်းလၢႆ ဢၼ်ယူႇၵႃႈၼႂ်းဝဵင်း ဢေးၽႅတ်ႈ ဢၼ်ဝႃႈ ၶဝ်ၸိူဝ်းဢၼ်ယုမ်ႇမၢတ်ႈ ယေႇသူႉၶရိၸ်ႈ ၼၼ်ႉဢေႃႈ။-

2ႁႂ်ႈသူႉၵျေးၸူးဢိၵ်ႇတင်း တၢင်းၼိမ်ဢၼ်ပဵၼ်မႃးၵႃႈတီႈ ၸဝ်ႈပေႃႈႁဝ်းၽြႃးပဵၼ်ၸဝ်ႈ ဢိၵ်ႇတင်းၸဝ်ႈ ယေႇသူႉၶရိၸ်ႈ ၼၼ်ႉ မီးၼိူဝ်သူသေၵမ်းလူၺ်ႈ။

3ႁႂ်ႈၽြႃးပဵၼ်ၸဝ်ႈ ပေႃႈၸဝ်ႈႁဝ်း ယေႇသူႉၶရိၸ်ႈ ဢၼ်ဢဵတ်းလူပၼ် ထမ်ႇမႃႉမင်ႇၵလႃႇ ၵူႈၸိူဝ်ႉၵူႈပိူင် ၼႂ်းလွင်ႈတၢင်းဢၼ် ၸၢပ်ႈသႅင်ႇၵၼ်တင်း ၼႂ်းမိူင်းၵၢင်ႁၢဝ် ၼႂ်းၸဝ်ႈၶရိၸ်ႈၸိူဝ်းၼၼ်ႉတီႈႁဝ်း၊-

4ၵႃႈၼင်ႇဢၼ်မၼ်းၸဝ်ႈ လိူၵ်ႈၵဵပ်းဢဝ်ႁဝ်း ၵႃႈတီႈၼႂ်းၸဝ်ႈၶရိၸ်ႈ ၸႃႉၸဵမ်ၸူဝ်ႈဢၼ်ၵမ်ႇၽႃႇၼႆႉ ဢမ်ႇပႆႇတႄႇဢမ်ႇပႆႇမီး ႁႂ်ႈႁဝ်းလႆႈပဵၼ် ဢၼ်မူတ်းၸၢင်ႇလႄႈ ၵၢင်းလွတ်ႈတင်းဢပႅတ်ႈ ၵႃႈတီႈၽၢႆႇၼႃႈမၼ်းၸဝ်ႈ ၵွပ်ႈပိူဝ်ႈမႅတ်ႈတႃႇၼၼ်ႉ မီးမင်ႇၵလႃႇသေၵမ်းလူၺ်ႈ။-

5ၽြႃးပဵၼ်ၸဝ်ႈၼၼ်ႉ လိူၵ်ႈၵဵပ်းၽႄဢဝ်ႁဝ်း ႁႂ်ႈႁဝ်းလႆႈဢရႃႇလုၵ်ႈ ၵွပ်ႈပိူဝ်ႈ ယေႇသူႉၶရိၸ်ႈ ၵႃႈၼင်ႇဢၼ် ၸေႇတၼႃႇၸဝ်ႈမီးဢလူဝ်ႇ၊-

6ပုၼ်ႈလွင်ႈၼင်ႇႁိုဝ်တၵ်းလႆႈယွင်ႈယေႃး မုၼ်သရေႇၵျေးၸူးၸဝ်ႈ ဢၼ်ဢဵတ်းလူပၼ်တီႈႁဝ်း ၼႂ်းလုၵ်ႈၸဝ်ႈ ဢၼ်ႁၵ်ႉၼႃႇၼၼ်ႉဝႆႉ ၸႃႉၸဵမ်မိူဝ်ႈဢွၼ်ၼႆႉဢေႃႈ။-

7ၵႃႈတီႈလုၵ်ႈၸဝ်ႈၼၼ်ႉၸိုင် ႁဝ်းလႆႈၶၢမ်ႇၵျေးၸူး တၢင်းဢၼ်ထုတ်ႇဢဝ်လူၺ်ႈလိူတ်ႈမၼ်းၸဝ်ႈ ဢၼ်ဝႃႈတၢင်းဢၼ်ၵၢင်းလွတ်ႈတင်းဢပႅတ်ႈ မႅၼ်ႈၼင်ႇဢၼ်ၵျေးၸူးၸဝ်ႈ၊-

8ဢၼ်မၼ်းၸဝ်ႈႁႂ်ႈၼမ်လိူင်ႇၼႃႇ ၵႃႈၼႂ်းပိင်ႇၺႃႇသတီႉ ၵူႈၸိူဝ်ႉၵူႈပိူင် ၵႃႈတီႈႁဝ်းၼႆႉ ပျေႉၸုမ်ႇၼမ်ၵိုၼ်းဝႆႉၼၼ်ႉဢေႃႈ။-

9မၼ်းၸဝ်ႈၼၼ်ႉၼႄပျႃးတၢင်းဢၼ်လိုၵ်ႉဢၼ်လမ်ႇ ဢလူဝ်ႇမၼ်းၸဝ်ႈ ဢၼ်ထုၵ်ႇၵၼ်တင်းၸေႇတၼႃႇ ဢၼ်မၼ်းၸဝ်ႈ ဢဝ်သႂၢင်းသႂ်ႇဝႆႉ ၵႃႈၼႂ်းႁူဝ်ၸႂ်မၼ်းၸဝ်ႈၼၼ်ႉ တီႈႁဝ်းဢေႃႈ။-

10တၢင်းဢၼ်လိုၵ်ႉဢၼ်လမ်ႇၼၼ်ႉၸမ်ႉ၊ ၼႂ်းသႃႇသၼႃႇ တၢင်းဢၼ်ၶိင်ႇၵႃႇလႃႉၸေးၸုမ်ႇပုၼ်ႉၼၼ်ႉ မၼ်းၸဝ်ႈတၵ်းဢဝ် လွင်ႈတၢင်းဢၼ်မီးၵႃႈၼိူဝ်ၵၢင်ႁၢဝ်၊ လွင်ႈတၢင်းဢၼ်မီးၵႃႈၼိူဝ်လိၼ်မိူင်း ၵႃႈမီးတင်းသဵင်ႈတင်းလူင် ၸူႉၵၼ်ပွင်းၵၼ်သေလႄႈ ၶျုၵ်ႈဝႆႉၵႃႈၼႂ်းၸဝ်ႈၶရိၸ်ႈ ပုၼ်ႈမၼ်းၸဝ်ႈဢေႃႈ။-

11ၵွပ်ႈပိူဝ်ႈဢၼ်မၼ်းၸဝ်ႈ လိူၵ်ႈၵဵပ်းၽႄဢဝ်ႁဝ်းဝႆႉ ၸႃႉၸဵမ်မိူဝ်ႈဢွၼ်ၼႆႉၼၼ်ႉ ၵႃႈၼင်ႇဢၼ်တၢင်းၵျၢမ်ႇတၢင်းပွင် ၵေႃႉဢၼ် ၸၢင်ႈၸွမ်းဢလူဝ်ႇၸေႇတၼႃႇတူဝ်ၸဝ်ႈၵဝ်ႇသေလႄႈ ၸီႇယၢင်ႇႁဵတ်းပဵၼ်တင်းသဵင်ႈတင်းလူင်မီးၼၼ်ႉလႄႈ ႁဝ်းပဵၼ်ၵေႃႉဢၼ် ၶၢမ်ႇဢမူၺ်ႇၼႂ်း ၸဝ်ႈၶရိၸ်ႈ ၼၼ်ႉဢေႃႈ။-

12လွင်ႈမၼ်းၸမ်ႉ လွင်ႈၼင်ႇႁိုဝ်ႁဝ်းၸိူဝ်းဢၼ်လႆႈမုင်ႈထႃႈမွင်းထႃႈၸဝ်ႈၶရိၸ်ႈမႃးယဝ်ႉၼၼ်ႉ တၵ်းလႆႈပဵၼ်လွင်ႈတၢင်းဢၼ်ယွင်ႈယေႃးမုၼ်ၸဝ်ႈၸိုင်၊ ၸင်ႇပဵၼ်ဢေႃႈ။-

13ၵႃႈတီႈမၼ်းၸဝ်ႈၼၼ်ႉသူၵေႃႈ လႆႈထွမ်ႇလႆႈငိၼ်းသမ်ႇမႃႇတြႃးဢၼ်ဝႃႈတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တင်း တၢင်းဢၼ်ၵႄႇၶျွတ်ႈဢဝ်သူၼၼ်ႉလႄႈ ယုမ်ႇမၢတ်ႈၸဝ်ႈၶရိၸ်ႈၼၼ်ႉသေယဝ်ႉ၊ လႆႈၶၢမ်ႇဢဝ်တၢင်းဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ ဢၼ်ၸၢပ်ႈသႅင်ႇၵၼ်တင်း ၵတီႉၸဝ်ႈၼၼ်ႉ တွၵ်ႇတၼ်းသိၵ်ႈဝႆႉယဝ်ႉ။-

14ဝီႉၺိၺ်ႇၸဝ်ႈၼၼ်ႉပဵၼ်ၸရၢၼ်ႇဢမူၺ်ႇႁဝ်းယူႇ တေႃႇထိုင်ႁွတ်ႈၶိင်ႇၵႃႇလႃႉ တၢင်းဢၼ်မၼ်းၸဝ်ႈထုတ်ႇဢဝ် ၶဝ်ၸိူဝ်းဢၼ်မၼ်းၸဝ်ႈထိူၵ်ႈပိူင်ႇ ဢိၵ်ႇတင်းလွင်ႈတၢင်းဢၼ်ယွင်ႈယေႃးမုၼ်ၸဝ်ႈၼၼ်ႉဢေႃႈ။

15ပိူဝ်ႈၼႆလႄႈ ၵဝ်လႆႈငိၼ်းလွင်ႈတၢင်းဢၼ်သူယုမ်ႇမၢတ်ႈၸဝ်ႈ ယေႇသူႉ ဢိၵ်ႇတင်း လွင်ႈတၢင်းဢၼ်သူႁၵ်ႉၵူၼ်းမူတ်းၸၢင်ႇ တင်းသဵင်ႈတင်းလူင်ၼၼ်ႉသေယဝ်ႉ၊-

16ဢဝ်လွင်ႈသူယွင်ႈယေႃးၵျေးၸူးၸဝ်ႈယူႇသေႇသေႇလႄႈ ႁဵတ်းသူးတွင်းပထၼႃႇပုၼ်ႈသူယူႇဢေႃႈ။-

17တီႈႁဵင်းဢၼ်ၵဝ်သူးတွင်းၼၼ်ႉၸမ်ႉ၊ လွင်ႈၼင်ႇႁိုဝ်ပေႃႈၸဝ်ႈဢၼ်မုၼ်ယႂ်ႇလႄႈပဵၼ်ၽြႃးၸဝ်ႈႁဝ်း ယေႇသူႉၶရိၸ်ႈ ၼၼ်ႉ တၵ်းပၼ်ပိင်ႇၺႃႇတင်းၺၢၼ်ႇ ဢၼ်ၸၢင်ႈၶုတ်းမူင်ႇၸီးၸွင်ႁူႉလႆႈၼၼ်ႉတီႈသူပုၼ်ႈဢၼ်သူ တၵ်းလႆႈႁူႉၸၵ်းမၼ်းၸဝ်ႈလီလီငၢမ်းငၢမ်း လွင်ႈၼင်ႇႁိုဝ်မၼ်းၸဝ်ႈတၵ်းႁႂ်ႈမၢၵ်ႇတႃႁူဝ်ၸႂ်သူသႂ်လႅင်း ႁႂ်ႈသူလႆႈႁူႉလွင်ႈတၢင်းဢၼ် တၵ်းလႆႈမုင်ႈထႃႈမွင်းထႃႈ၊-

18ၵွပ်ႈပိူဝ်ႈဢၼ်မၼ်းၸဝ်ႈႁွင်ႉဢဝ်ၼၼ်ႉ၊ ပဵၼ်ၸိူဝ်ႉႁိုဝ်ၼၼ်ႉ၊ လွင်ႈဢၼ်မုၼ်ၸေးၸိမ်ႇဢမူၺ်ႇၸဝ်ႈ ဢၼ်ၵူၼ်းမူတ်းၸၢင်ႇတင်းလၢႆ လႆႈၶၢမ်ႇဢဝ်ၼၼ်ႉ ယႂ်ႇၼႃႇၵႃႈႁိုဝ်ၼၼ်ႉ၊-

19တၼ်းၶူဝ်းၸဝ်ႈဢၼ်ယႂ်ႇလူင်ယႂ်ႇလၢင် ဢၼ်မၼ်းၸဝ်ႈဢဝ်တင်းႁႅင်းဢၼ်ယႂ်ႇၼႃႇ ၼႄပျႃးတီႈႁဝ်းၸိူဝ်းဢၼ်ယုမ်ႇမၢတ်ႈၼၼ်ႉၸမ်ႉ၊ ယႂ်ႇၼႃႇၵႃႈႁိုဝ်ၼၼ်ႉၸိုင် ႁဵတ်းသူးတွင်းပထၼႃႇဢေႃႈ။-

20တၼ်းၶူဝ်းၸဝ်ႈၼၼ်ႉၸမ်ႉ၊ ပဵၼ်မႁႃႇႁႅင်းတၼ်းၶူဝ်းဢႃႇၼူႉၽေႃႇ ဢၼ်ပွင်ႁဵတ်းၼႂ်းၸဝ်ႈၶရိၸ်ႈ ၼႂ်းမိူဝ်ႈဢၼ်မၼ်းၸဝ်ႈ ႁႂ်ႈၸဝ်ႈၶရိၸ်ႈလုၵ်ႉၵႃႈတၢင်းတၢႆၶိုၼ်းလိပ်းလႄႈ ပၼ်တီႈယူႇဢၼ်သုင်မျၢတ်ႈၼႃႇ ၵႃႈတီႈၽၢႆႇၶႂႃမၼ်းၸဝ်ႈ ၵႃႈၼႂ်းတီႈၵၢင်ႁၢဝ်တင်းလၢႆ၊-

21ၵႃႈၼိူဝ်ၸႃႉၸဵမ်ဢၼ်ထွတ်ႈဢၼ်မျၢတ်ႈ၊ ဢႃႇၼႃႇတၼ်းၶူဝ်း တၢင်းဢၼ်ဢုပ်ႉပိူင်ႇၼၼ်ႉ တင်းသဵင်ႈတင်းလူင် ဢိၵ်ႇတင်း ၼႃႇမႃႉၸိုဝ်ႈသဵင် ဢၼ်လႆႈၶၢမ်ႇတၢင်းဢၼ်ႁွင်ႉႁဵၵ်ႈၸၢတ်ႈၼႆႉၸၢတ်ႈၼႃႈ ၵႃႈမီးတင်းသဵင်ႈတင်းလူင်ၼၼ်ႉ တီႈၸဝ်ႈၶရိၸ်ႈလႄႈ၊-

22ဢဝ်လွင်ႈတၢင်းၵႃႈမီးတင်းသဵင်ႈတင်းလူင်ၶျႃးဝႆႉ ၵႃႈတီႈတႂ်ႈတိၼ်မၼ်းၸဝ်ႈ ႁႂ်ႈမၼ်းၸဝ်ႈပဵၼ်ႁူဝ် ဢၼ်ဢုပ်ႉဢၼ်ၶျုၵ်ႈ လွင်ႈတၢင်းၵႃႈမီးတင်းသဵင်ႈတင်းလူင် ပုၼ်ႈၸိူဝ်းၸဝ်ႈဢေႃႈ။-

23ၸိူဝ်းၸဝ်ႈၼၼ်ႉၸမ်ႉ၊ ပဵၼ်တူဝ်ၸဝ်ႈၶရိၸ်ႈဢၼ်ဝႃႈ တၢင်းဢၼ်ပျေႉၸုမ်ႇ ၵေႃႉဢၼ်ႁႂ်ႈတင်းသဵင်ႈတင်းလူင်ပျေႉၸုမ်ႇ ၼႂ်းတင်းသဵင်ႈတင်းလူင်ဢေႃႈ။

Jump to: Chapter 2 →