Ephesians 5

Shan

← Chapter 4 Jump to: Chapter 6 →

1ၼင်ႇၼၼ်လႄႈ ၸိူဝ်ႉၼင်ႇလုၵ်ႈႁၵ်ႉၽြႃးပဵၼ်ၸဝ်ႈတင်းလၢႆၼၼ်ႉ၊ သူၵမ်ၵျၢင်ႉမိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈၵမ်ၵျၢင်ႉ ၼၼ်ႉတႃႉ။-

2သူၵႂႃႇမႃးယူႇၼႂ်းမႅတ်ႈတႃႇမိူၼ်ၸိူဝ်ႉၼင်ႇဢၼ်ၸဝ်ႈၶရိၸ်ႈ ႁၵ်ႉႁဝ်းလႄႈဢဝ်တူဝ်ၸဝ်ႈၵဝ်ႇ ဢၼ်ဝႃႈ တၢင်းဢၼ်သၢၵ်ႈၵၢပ်ႈလႄႈ ပုၵ်ႈၸေႃႇၵႃႈတီႈၽၢႆႇၼႃႈ ၽြႃးပဵၼ်ၸဝ်ႈ ပုၼ်ႈဢၼ်တၵ်းပဵၼ် ဢၢႆဢၼ်ႁွမ်ဢၼ်ႁူၺ်းၼၼ်ႉသေလႄႈ ၸုၼ်ႉပႅတ်ႈပုၼ်ႈႁဝ်းၼၼ်ႉတႃႉ။

3ၸိူဝ်ႉၼင်ႇဢၼ် ၵူၼ်းမူတ်းၸၢင်ႇတင်းလၢႆ ထုၵ်ႇလီဝႄႈပႅတ်ႈၼၼ်ႉ၊ သူယႃႇပေဢဝ်တင်းၵႂၢမ်းလၢတ်ႈ ၸပ်းတၢင်းဢၼ် ႁဵတ်း မေႇထုင်ႇဢၼ်ဢမ်ႇတြႃး၊ တၢင်းဢၼ်ၵီႉလေႇသႃႇၵူဝ်ႈၵိူၵ်ႇ ၵူႈၸိူဝ်ႉၵူႈပိူင်၊ တၢင်းဢၼ်လေႃးၽႃႉပူၼ်ႉလိူဝ် ၸိူဝ်းၼၼ်ႉလႃးလႃး။-

4ဝႄႈပႅတ်ႈၵႂၢမ်းဢၼ်ၵူဝ်ႈၵိူၵ်ႇ၊ ၵႂၢမ်းဢၼ်ႁဵတ်းပျၢၵ်ႈႁဵတ်းၶျေႃး ဢၼ်ဢမ်ႇလီဢမ်ႇထုၵ်ႇၸိူဝ်းၼၼ်ႉသေလႄႈ လၢတ်ႈၵႂၢမ်းဢၼ် ယွင်ႈယေႃးၵျေးၸူးၸဝ်ႈၵူၺ်းတႃႉ။-

5သူႁူႉလွင်ႈဢၼ်ၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃး၊ ၵေႃႉဢၼ်ႁဵတ်းလွင်ႈတၢင်းဢၼ်ၵူဝ်ႈၵိူၵ်ႇ၊ ၵေႃႉဢၼ်လေႃးၽႃႉပူၼ်ႉလိူဝ် ဢၼ်ပဵၼ်ၵေႃႉဢၼ်ၵူဝ်းၵႂၢႆႇရုၵ်ႈထူႉ သေၵေႃႉသေၵူၼ်းၼၼ်ႉ ဢမ်ႇလႆႈၶၢမ်ႇဢမူၺ်ႇ ၼႂ်းမိူင်းၸဝ်ႈၶရိၸ်ႈ၊ တင်းၽြႃးပဵၼ်ၸဝ်ႈၼၼ်ႉယူႇဢေႃႈ။-

6ယႃႇပေႁႂ်ႈၽူႈလႂ် လႆႈဢဝ်တင်းၵႂၢမ်းဢၼ်မဝ်မၢင်သေလႄႈ ပႅတ်ႉလႅၼ်သူ။ ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႄႈ၊ တၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈ ႁွတ်ႈထိုင်ၵႃႈၼိူဝ်ၶဝ်ၸိူဝ်းဢၼ် ၸၢင်ႈတွပ်ႇၸၢင်ႈထဵင်ၼၼ်ႉဢေႃႈ။

7ပိူဝ်ႈၼႆလႄႈ ယႃႇပေသိူၵ်ႈသမ်ႇလႄႈၵမ်ၵျၢင်ႉလူၺ်ႈၵၼ်တင်းၶဝ်။-

8ၼႂ်းၶိင်ႇၵႃႇလႃႉမိူဝ်ႈဢွၼ်ၼႆႉၼၼ်ႉ၊ သူပဵၼ်ဢၼ်လပ်းသိင်ႇဢေႃႈ။ တေႃႈလဵဝ်ၼႆႉၸမ်ႉ၊ သူပဵၼ်ဢၼ်လႅင်းၼႂ်းၸဝ်ႈၽြႃးဢေႃႈ။ ပိူဝ်ႈၼႆလႄႈၵမ်ၵျၢင်ႉၸိူဝ်ႉၼင်ႇလုၵ်ႈဢၼ်လႅင်းၼၼ်ႉတႃႉ။-

9ဢၵျူဝ်းဢၼ်လႅင်းၸမ်ႉ၊ ပဵၼ်တၢင်းဢၼ်လီဢၼ်ငၢမ်းၵူႈၸိူဝ်ႉၵူႈပိူင်၊ တၢင်းဢၼ်သိုဝ်ႈဢၼ်တေႃႇ၊ တၢင်းဢၼ်ပႂ်ႉသဵတ်ႈၸႃႇဢေႃႈ။-

10လွင်ႈတၢင်းဢၼ်ထုၵ်ႇၸႂ်ၸဝ်ႈၽြႃး၊ပဵၼ်လွင်ႈတၢင်းၸိူဝ်ႉၼင်ႇႁိုဝ်ဝႃႈၼႆ သွၼ်ဢဝ်တႃႉ။-

11ဢမ်ႇသိူၵ်ႈဢမ်ႇသမ်ႇၵၼ်တင်းလွင်ႈတၢင်းဢၼ် ၸၢပ်ႈသႅင်ႇၵၼ်တင်းလပ်းသိင်ႇ၊ဢၼ်ဢမ်ႇမီးဢၵျူဝ်းၸိူဝ်းၼၼ်ႉဢမ်ႇၵႃး၊ ၼႄပျႃး ဢပႅတ်ႈလွင်ႈတၢင်းၸိူဝ်းၼၼ်ႉတႃႉ။-

12လွင်ႈမၼ်းၸမ်ႉ ၼႂ်းလွင်ႈဢၼ်ဢဝ်ၵႂၢမ်းလၢတ်ႈ ၸပ်းလွင်ႈတၢင်းၸိူဝ်းဢၼ်ၶဝ်ႁဵတ်း ၼႂ်းတီႈဢၼ်လပ်ႉဢၼ်သိူင်ႇၼၼ်ႉ၊ ယင်းပႃးတၢင်းဢၼ် လီဢူၵ်းလီဢၢႆယူႇဢေႃႈ။-

13လွင်ႈတၢင်းဢၼ်ဢပႅတ်ႈထၢင်ႇသႃးမႃး၊ၵႃႈမီးတင်းသဵင်ႈတင်းလူင်ၼၼ်ႉ ထၢင်ႇသႃးမႃးၵွပ်ႈပိူဝ်ႈဢၼ်လႅင်းဢေႃႈ။ လွင်ႈတၢင်းဢၼ်ၸၢင်ႈႁႂ်ႈထၢင်ႇသႃးမႃး၊ၵႃႈမီးတင်းသဵင်ႈတင်းလူင်ၼၼ်ႉၵေႃႈ ပဵၼ်ဢၼ်လႅင်းဢေႃႈ။-

14ပိူဝ်ႈၼႆလႄႈ၊ဢၼ်မႃးလႄႈဝႃႈၸမ်ႉ၊ ၵေႃႉဢၼ်ၼွၼ်းလပ်းယူႇဢိူၺ်း၊တိုၼ်ႇမႃးတႃႉ။ လုၵ်ႉၵႃႈတၢင်းတၢႆၶိုၼ်းလိပ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ႉၸိုင်၊ ၸဝ်ႈၶရိၸ်ႈတၵ်းပၼ်ဢၼ်လႅင်းတီႈမႂ်းဢေႃႈ၊ ဝႃႈၼင်ႇၼႆဢေႃႈ။

15ပိူဝ်ႈၼႆလႄႈ ယႃႇပေပဵၼ်ၸိူဝ်ႉၼင်ႇၶဝ်ၸိူဝ်းဢၼ် ဢမ်ႇမီးပိင်ႇၺႃႇၼၼ်ႉ။ ပဵၼ်ၸိူဝ်ႉၼင်ႇ၊ ၶဝ်ၸိူဝ်းဢၼ်မီးပိင်ႇၺႃႇၼၼ်ႉလႄႈ ႁဵတ်းသတီႉ ႁႂ်ႈလႆႈၵမ်ၵျၢင်ႉ ၸေးၸေးၸွတ်ႇၸွတ်ႇတႃႉ။-

16ၵွပ်ႈပိူဝ်ႈဢၼ်ၶိင်ႇဝၼ်းၵႃႇလႃႉတေႃႈလဵဝ်ၼႆႉ ႁၢႆႉမိူၵ်ႈလႄႈဢွၼ်ၵၼ်ထုတ်ႇဢဝ်ၶိင်ႇၵႃႇလႃႉတႃႉ။-

17ပိူဝ်ႈၼႆလႄႈယႃႇပေပဵၼ်ၵေႃႉဢၼ်ဢမ်ႇမီးသတီႉ။ ပဵၼ်ၵေႃႉဢၼ်ၶႆႈၸႂ်လႄႈႁူႉ လွင်ႈဢၼ်ဢလူဝ်ႇၽြႃးပဵၼ်ၸဝ်ႈ မီးၼၼ်ႉတႃႉ။

18ဝႄႈပႅတ်ႈတၢင်းဢၼ်မဝ်းလဝ်ႈလူၺ်ႈၼမ်ႉၸပိတ်ႈ ဢၼ်ၸၢင်ႈႁႂ်ႈပူၼ်ႉလိူဝ်ၼၼ်ႉသေလႄႈ ပျေႉၸုမ်ႇဝႆႉတင်းဝီႉၺိၺ်ႇၸဝ်ႈယူႇတႃႉ။-

19ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်ဢဝ်တင်း တၢင်းဢၼ်ႁဵတ်းၵႂၢမ်းသႃႇလၢမ်ႇ တင်းၵႂၢမ်းထမ်ႇမႃႉၵူႈမဵဝ်းလၢတ်ႈဝႃႈလႄႈ ဢွၼ်ၵၼ်မီး တင်းၸႂ်ဢၼ်ဢူၼ်ႈဢၼ်ဢွၼ်ႇ ဢိုၼ်းယွင်ႈႁဵတ်းၵႂၢမ်း ၵႃႈတီႈၽၢႆႇၼႃႈၽြႃးပဵၼ်ၸဝ်ႈတႃႉ။

20ဢိင်ၼႃႇမႃႉၸိုဝ်ႈသဵင်ၸဝ်ႈႁဝ်း ယေႇသူႉၶရိၸ်ႈ သေလႄႈဢွၼ်ၵၼ်ႁပ်ႉတုင်းဢဝ် ၵႃႈတီႈၽၢႆႇၼႃႈၽြႃးပဵၼ်ၸဝ်ႈ ၼႂ်းလွင်ႈတၢင်းၵႃႈမီးတင်းသဵင်ႈတင်းလူင် ၵျေးၸူးၸဝ်ႈယႂ်ႇၼႃႇတီႈၶႃႈဢေႃႈ၊ ဝႃႈၼင်ႇၼႆယူႇသေႇသေႇတႃႉ။

21ၼႂ်းလွင်ႈတၢင်းဢၼ်ရူဝ်ႇသေႇၵူဝ်ယမ်ၸဝ်ႈၶရိၸ်ႈၼၼ်ႉ၊ ၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ် ဢဝ်တူဝ်ၸဝ်ႈၵဝ်ႇၶျႃးတႅမ်ႇတႂ်ႈၵၼ်တႃႉ။-

22ၽူႈယိင်းၶဝ်ဢိူၺ်း၊ ၸိူဝ်ႉၼင်ႇဢၼ်သူႁပ်ႉတုင်းဢဝ် တၢင်းဢၼ်ၸဝ်ႈၽြႃးဢုပ်ႉပိူင်ႇသူၼၼ်ႉ၊ ႁပ်ႉတုင်းဢဝ်တၢင်းဢၼ်ၽူဝ်သူဢုပ်ႉပိူင်ႇတႃႉ။-

23လွင်ႈမၼ်းၸမ်ႉ ၸိူဝ်ႉၼင်ႇဢၼ်ၸဝ်ႈၶရိၸ်ႈ ပဵၼ်ႁူဝ်ၵႃႈၼိူဝ်ၸိူဝ်းၸဝ်ႈၼၼ်ႉ၊ ၽူႈၸၢႆးပဵၼ်ႁူဝ်ၵႃႈၼိူဝ်မေးမၼ်းဢေႃႈ။ မၼ်းၸဝ်ႈၵေႃႈပဵၼ်ၵေႃႉဢၼ်ၵႄႇၶျွတ်ႈဢဝ်တူဝ်မၼ်းၸဝ်ႈဢေႃႈ။-

24ၸိူဝ်ႉၼင်ႇဢၼ်ၸိူဝ်းၸဝ်ႈႁပ်ႉတုင်းဢဝ် တၢင်းဢၼ်ၸဝ်ႈၶရိၸ်ႈဢုပ်ႉပိူင်ႇၼၼ်ႉ၊ ၽူႈယိင်းတင်းလၢႆၵေႃႈ တၵ်းလႆႈႁပ်ႉတုင်းဢဝ်တၢင်းဢၼ်ၽူဝ်ၶဝ် ဢုပ်ႉပိူင်ႇၼႂ်းလွင်ႈတၢင်းၵူႈၸိူဝ်ႉၵူႈပိူင်ဢေႃႈ။

25ၽူႈၸၢႆးၶဝ်ဢိူၺ်း၊ သူၵေႃႈႁၵ်ႉမေးသူ မိူၼ်ၸိူဝ်ႉၼင်ႇဢၼ် ၸဝ်ႈၶရိၸ်ႈႁၵ်ႉၸိူဝ်းၸဝ်ႈလႄႈ ၸုၼ်ႉတူဝ်ၸဝ်ႈၵဝ်ႇပုၼ်ႈၸိူဝ်းၸဝ်ႈ၊-

26လွင်ႈၼင်ႇႁိုဝ်တၵ်းလႆႈဢဝ်တင်း တၢင်းဢၼ်သုၵ်ႈပွတ်ႈၵႃႈၼႂ်းၼမ်ႉ ၼုၵ်ႈၵပၢတ်ႈတြႃးၸဝ်ႈၼၼ်ႉ ႁႂ်ႈၸိူဝ်းၸဝ်ႈမူတ်းၸၢင်ႇ၊-

27ႁႂ်ႈလႆႈဢဝ်ၸိူဝ်းၸဝ်ႈဢၼ်မီးမုၼ်သရေႇ ဢၼ်ၵၢင်းလွတ်ႈတင်းၸႃႉၸဵမ်တၢင်းဢၼ်ၵူဝ်ႈၵိူၵ်ႇလႄႈၶႆးတင်၊ တၢင်းဢၼ်ၼင်ႁူႇ ဢိၵ်ႇတင်းလွင်ႈတၢင်းၸိူဝ်ႉၼင်ႇၼၼ်ႉ ၵူႈၸိူဝ်ႉၵူႈပိူင်လႄႈ ပဵၼ်ဢၼ်မူတ်းၸၢင်ႇ ၵၢင်းလွတ်ႈတင်းဢပႅတ်ႈယူႇၼၼ်ႉသေလႄႈ သၢၵ်ႈၵၢပ်ႈၵႃႈတီႈတူဝ်ၸဝ်ႈၵဝ်ႇၼၼ်ႉတႃႉ။-

28မိူၼ်ၸိူဝ်ႉၼင်ႇၼၼ်၊ ၽူႈၸၢႆးတင်းလၢႆ တၵ်းလႆႈႁၵ်ႉမေးၶဝ်မိူၼ်ၸိူဝ်ႉၼင်ႇဢၼ် ၶဝ်ႁၵ်ႉတူဝ်ၶဝ်ၼၼ်ႉဢေႃႈ။ ၵေႃႉဢၼ်ႁၵ်ႉမေးမၼ်းၼၼ်ႉ ပဵၼ်ၵေႃႉဢၼ်ႁၵ်ႉတူဝ်ၸဝ်ႈၵဝ်ႇဢေႃႈ။-

29ၵေႃႉဢၼ်ၸင်းၼိူဝ်ႉၸင်းလိူတ်ႈမၼ်းၼၼ်ႉ ဢမ်ႇမီးသေၵေႃႉသေၵူၼ်း။ မၼ်းၸၢင်ႈပွင်ႁဵတ်းလဵင်ႉႁဵတ်းလူၼိူဝ်ႉလိူတ်ႈမၼ်း မိူၼ်ၸိူဝ်ႉၼင်ႇဢၼ်ၸဝ်ႈၶရိၸ်ႈ ပွင်ႁဵတ်းလဵင်ႉႁဵတ်းလူၸိူဝ်းၸဝ်ႈၼၼ်ႉဢေႃႈ။-

30ၵွပ်ႈပိူဝ်ႈဢၼ်ႁဝ်းပဵၼ်ဢၼ်ၶဝ်ႈပႃးၼႂ်းၼိူဝ်ႉၼႂ်းလုပ်ႇၸဝ်ႈၽြႃးလႄႈ ႁဝ်းပဵၼ်ဢၢင်ႇၵႃႇတူဝ်မၼ်းၸဝ်ႈဢမၢၼ်ႇၶၼ်ပဵၼ်ဢေႃႈ။-

31ၵွပ်ႈပိူဝ်ႈလွင်ႈတၢင်းၼၼ်ႉလႄႈ၊ ၽူႈၸၢႆးတၵ်းလႆႈၽၢတ်ႇယၢၼ်ၵၼ်တင်းပေႃႈမႄႈမၼ်းသေလႄႈ ၸပ်းၸွမ်းၽၢႆႇမေးမၼ်းယူႇဢေႃႈ။ သွင်ၶႃတၵ်းလႆႈပဵၼ်ၼိူဝ်ႉဢၼ်လဵဝ်၊လိူတ်ႈဢၼ်လဵဝ်ၵၼ်ဢေႃႈ။

32လွင်ႈတၢင်းၼႆႉ ပဵၼ်လွင်ႈတၢင်းဢၼ်လိုၵ်ႉဢၼ်လမ်ႇၼႃႇလူင်လၢင်ဢေႃႈ။ မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼၼ်ၼၼ်ႉၸိုင်၊ ၵဝ်ၶႂ်ႈဝႃႈလွင်ႈၸဝ်ႈၶရိၸ်ႈတင်းၸိူဝ်းၸဝ်ႈဢေႃႈ။-

33ၼႂ်းဝႃႈၼၼ်သေၵေႃႈ ၸိူဝ်ႉၼင်ႇဢၼ်သူႁၵ်ႉတူဝ်ၸဝ်ႈၵဝ်ႇႁင်းၽႂ်ႁင်းမၼ်းၼၼ်ႉ ႁၵ်ႉမေးတူဝ်ၸဝ်ႈၵဝ်ႇတႃႉ။ ၽူႈယိင်းၵေႃႈ၊ ႁႂ်ႈမီးတၢင်းဢၼ်ရူဝ်ႇသေႇၵူဝ်ယမ်ၽူဝ်တူဝ်ၸဝ်ႈၵဝ်ႇတႃႉ။

← Chapter 4 Jump to: Chapter 6 →