Ephesians 4

Shan

← Chapter 3 Jump to: Chapter 5 →

1ၵဝ်ဢၼ်လႆႈၶၢမ်ႇတူၵ်းၵိၼ်း ၵွပ်ႈပိူဝ်ႈၸဝ်ႈၽြႃးၼႆႉတိုၵ်းယူင်းၸူဝ်းဢဝ်သူ ႁႂ်ႈသူလႆႈၵမ်ၵျၢင်ႉဢၼ်သၢင်ႇထုၵ်ႇလီငၢမ်းၸွမ်းၼင်ႇဢၼ် သူလႆႈၶၢမ်ႇၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉၶႃႈဢေႃႈ။-

2ဢွၼ်ၵၼ်ပျေႉၸုမ်ႇတင်း တၢင်းဢၼ်ႁူဝ်ၸႂ်ၶျႃးတႅမ်ႇ ၼႂ်းၵူႈၸိူဝ်ႉၵူႈပိူင်၊ တၢင်းဢၼ်ၼိမ်သိမ်ႇဢူၼ်ႈဢွၼ်ႇ၊ တၢင်းဢၼ်ၸႂ်ယႂ်ႇၸႂ်ယၢဝ်းၸိူဝ်းၼၼ်ႉသေယဝ်ႉ၊ မီးတၢင်းဢၼ်ၵေႃႉၼိုင်ႈလႄႈၵေႃႉၼိုင်ႈ ပႃးတင်းၸႂ်မႅတ်ႈတႃႇယိူၼ်ႉၶၢမ်ႇလႄႈ၊-

3ဢဝ်ႁႅင်းလႄႈၵျူဝ်းၸႃးႁႂ်ႈလႆႈဢဝ်တၢင်းဢၼ်မတ်ႉၵိုၵ်းမတ်ႉႁွမ်း ဢၼ်သၢင်ႇထုၵ်ႇႁဵတ်းၵေႃႉသေႈပွင်းၵၼ်ၼၼ်ႉ ပႂ်ႉတၢင်းဢၼ် ဝီႉၺိၺ်ႇၸဝ်ႈပဵၼ်ပိူင်လဵဝ်ၵၼ်ၼၼ်ႉယူႇတႃႉ။-

4ၵႃႈၼင်ႇဢၼ်သူလႆႈၶၢမ်ႇတၢင်းဢၼ်မၼ်းၸဝ်ႈႁွင်ႉဢဝ်လႄႈ သႂၢင်းသႂ်ႇၵႃႈၼႂ်းတၢင်းဢၼ်မုင်ႈထႃႈမွင်းထႃႈ ဢၼ်ၸၢပ်ႈသႅင်ႇၵၼ်တင်း တၢင်းဢၼ်မၼ်းၸဝ်ႈႁွင်ႉဢဝ်သူပိူင်ၼိုင်ႈၵူၺ်းၼၼ်ႉ၊မီးတူဝ်ဢၼ်လဵဝ်တင်း ဝီႉၺိၺ်ႇၸဝ်ႈပႃးလဵဝ်ၵူၺ်းဢေႃႈ။-

5မီးၸဝ်ႈပႃႈၼိုင်ႈ၊ တၢင်းဢၼ်ယုမ်ႇမၢတ်ႈပႃးၼိုင်ႈ၊ ပပ်ႉတီႉၸမ်ႇ ပႃးၼိုင်ႈ၊-

6ၽြႃးပဵၼ်ၸဝ်ႈသူႇလဵဝ်ၵူၺ်း ဢၼ်ပဵၼ်ပေႃႈႁဝ်းတင်းသဵင်ႈတင်းလူင်ၼၼ်ႉဢေႃႈ။ မၼ်းၸဝ်ႈၼၼ်ႉမီးယူႇၵႃႈၼိူဝ်ႁဝ်းတင်းသဵင်ႈတင်းလူင်ဢေႃႈ။ မီးၸွတ်ႇတူဝ်ႈယူႇၵႃႈတီႈႁဝ်းတင်းသဵင်ႈတင်းလူင်ဢေႃႈ။ ၵႃႈၼႂ်းႁဝ်းတင်းသဵင်ႈတင်းလူင်ၵေႃႈမီးဢေႃႈ။-

7ၼႂ်းဝႃႈၼၼ်သေၵေႃႈ ႁဝ်းလႆႈၶၢမ်ႇဢဝ်ၵျေးၸူးၸဝ်ႈၸွမ်းၵႃႈၼင်ႇဢၼ်ၸဝ်ႈၶရိၸ်ႈပၼ် သူႉၵျေးၸူးလဵၵ်ႉလဵၵ်ႉယႂ်ႇယႂ်ႇၼၼ်ႉ ႁင်းၽႂ်ႁင်းမၼ်းယဝ်ႉ။-

8မႅၼ်ႈၸိူဝ်ႉၼင်ႇၼၼ်လႄႈ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ မၼ်းၸဝ်ႈၶိုၼ်ႈၵႂႃႇၵႃႈတီႈဢၼ်သုင်ၼၼ်ႉသေယဝ်ႉ၊ လႆႈတီႉဢဝ်ၵူၼ်းၵႂႃႇၼမ်ၼႃႇလႄႈပၼ် သူးလၢပ်ႈတီႈၵူၼ်းတင်းလၢႆယဝ်ႉ၊ ဝႃႈၼင်ႇၼႆဢေႃႈ။

9မိူဝ်ႈဢၼ်ဝႃႈ၊ၶိုၼ်ႈၵႂႃႇ၊ ဝႃႈၼင်ႇၼႆၼၼ်ႉၸိုင်၊ ၶႂ်ႈဝႃႈလွင်ႈဢၼ်မၼ်းၸဝ်ႈလူင်းမႃး ၵႃႈတီႈတႂ်ႈလိၼ်မိူင်းၼႆႉဢမ်ႇၸႂ်ႈႁိုဝ်။-

10ၵေႃႉဢၼ်လူင်းမႃးၼၼ်ႉ ပဵၼ်တၢင်ႇၵေႃႉတၢင်ႇၵူၼ်းဢမ်ႇၸႂ်ႈ။ ပဵၼ်ၵေႃႉဢၼ်ၶိုၼ်ႈၵႂႃႇလႄႈ ပူၼ်ႉပၢႆၸိၵ်းၸွမ်ၵၢင်ႁၢဝ်ၵႃႈမီး တင်းသဵင်ႈတင်းလူင် ႁႂ်ႈတင်းသဵင်ႈတင်းလူင်လႆႈပျေႉၸုမ်ႇ ၽွမ်ႉလူၺ်ႈၵၼ်တင်းမၼ်းၸဝ်ႈဢေႃႈ။-

11မၼ်းၸဝ်ႈၼၼ်ႉ ၶၢၼ်းဝႆႉႁႂ်ႈလႆႈမႄးႁႅၼ်းၵူၼ်းမူတ်းၸၢင်ႇတင်းလၢႆ ပုၼ်ႈလွင်ႈၼင်ႇႁိုဝ် တၵ်းမေႃႁဵတ်းဢမူႉ ထမ်ႇမႃႉသြႃႇလႄႈ တႄႇႁဵတ်းတူဝ်ၸဝ်ႈၶရိၸ်ႈ၊-

12ၵမ်ႈၽွင်ႈ ၼႂ်းဢရႃႇတမၢၼ်ႇၸဝ်ႈ၊ ၵမ်ႈၽွင်ႈၼႂ်းဢရႃႇပရေႃးၽႅတ်ႈ၊ ၵမ်ႈၽွင်ႈၼႂ်းဢရႃႇဢၼ်ပွင်သႃႇသၼႃႇ၊ ၵမ်ႈၽွင်ႈၼႂ်းဢရႃႇ ဢၼ်ဢုပ်ႉၸိူဝ်းၸဝ်ႈ ဢိၵ်ႇတင်းၼႂ်းဢရႃႇသြႃႇဢေႃႈ။-

13လွင်ႈတၢင်းၸိူဝ်းၼႆႉ တၵ်းပဵၼ်တေႃႇထိုင်ႁွတ်ႈႁဝ်းၵႃႈမီးတင်းသဵင်ႈတင်းလူင် ၶိုတ်းထိုင်ၵႃႈတီႈတၢင်းဢၼ်ယုမ်ႇမၢတ်ႈ ဢိၵ်ႇတင်း တၢင်းဢၼ်ႁူႉၸၵ်းလုၵ်ႈၸဝ်ႈမိူၼ်မိူၼ်ၵၼ်လႄႈ ထိုင်ပဵၼ်ၵူၼ်းယႂ်ႇၵူၼ်းၵႄႇဢၼ်ဝႃႈ ပမႃႇၼႃႉ တၢင်းဢၼ် ၸဝ်ႈၶရိၸ်ႈပျေႉၸုမ်ႇၼၼ်ႉဢေႃႈ။-

14လွင်ႈမၼ်းၸမ်ႉ လွင်ႈၼင်ႇႁိုဝ် မိူဝ်ႈၵမ်းလိုၼ်း ႁဝ်းတၵ်းဢမ်ႇပဵၼ်လုၵ်ႈဢွၼ်ႇ ဢၼ်လူမ်းဢေႃးဝႃႇတႃႉ ၵႃႈမီးတင်းသဵင်ႈတင်းလူင်ထူဝ်းလႄႈၽူင်ႉၵႂႃႇ ၵူႈတီႈၵူႈလႅၼ်ၵွပ်ႈပိူဝ်ႈဢၼ်ပိူၼ်ႈတၢင်ႇၵေႃႉ ဢဝ်တင်းပရီႉယႄႇ ၵူၼ်းပႅတ်ႉလႅၼ်လၢတ်ႈႁႂ်ႈ ၸူဝ်းၵႂႃႇၼႂ်းဢပႅတ်ႈ၊-

15ဢိၵ်ႇတင်း လွင်ႈၼင်ႇႁိုဝ်တၵ်းဢဝ်တင်းၸႂ်မႅတ်ႈတႃႇၸွမ်းသမ်ႇမႃႇတြႃးယူႇသေလႄႈယႂ်ႇမႃးၼႂ်း ၵူႈၸိူဝ်ႉၵူႈပိူင်ၵႃႈတီႈဢၼ် ပဵၼ်ႁူဝ်ႁဝ်း ဢၼ်ဝႃႈၸဝ်ႈၶရိၸ်ႈၼၼ်ႉၸိုင်၊ ၸင်ႇပဵၼ်ဢေႃႈ။-

16တင်းတူဝ်တင်းၶိင်း ဢိင်မၼ်းၸဝ်ႈၼၼ်ႉသေလႄႈ ငီႇငႅၼ်ႈမတ်ႉၽွတ်ႇယူႇ ၵွပ်ႈပိူဝ်ႈဢၼ်ပွင်ႈလုပ်ႇတင်းလၢႆ လႆႈလိုဝ်ႈဢဝ်ႁႅင်း၊ ၸွမ်းၵႃႈၼင်ႇဢၼ် ဢၢင်ႇၵႃႇတင်းလၢႆႁင်းၽႂ်ႁင်းမၼ်း ပွင်ႁဵတ်းပုၼ်ႈတႃႇၽႂ်ပုၼ်ႈတႃႇမၼ်းၼၼ်ႉလႄႈ ၸင်ႇႁႂ်ႈတူဝ်ယႂ်ႇမႃးႁႂ်ႈလႆႈတႄႇႁဵတ်းတူဝ်ၸဝ်ႈၵဝ်ႇ ၼႂ်းမႅတ်ႈတႃႇဢေႃႈ။

17ပိူဝ်ႈၼႆလႄႈ ၼင်ႇႁိုဝ်ၵမ်းလိုၼ်းသူတၵ်းဢမ်ႇၵမ်ၵျၢင်ႉ မိူၼ်ၸိူဝ်ႉၼင်ႇဢၼ် ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ယင်းၵိုတ်းယင်းၵျၢၼ်ႇတင်းလၢႆ မီးတင်းၸႂ်ဢၼ်မဝ်မၢင် ၵမ်ၵျၢင်ႉၼၼ်ႉၸိုင်၊ ၵဝ်ဢဝ်တင်းဢၶႂၢင်ႉၸဝ်ႈၽြႃးသင်ႇလၢတ်ႈၵႂႃႇဢေႃႈ။-

18ၶဝ်ၼၼ်ႉ ဢၼ်လႅင်းၺၢၼ်ႇလပ်ႉႁၢႆၵႂႃႇလႄႈၽၢတ်ႇယၢၼ်ၵၼ်တင်းဢသၢၵ်ႈၽြႃးပဵၼ်ၸဝ်ႈၵွပ်ႈပိူဝ်ႈ ဢၼ်ဢမ်ႇႁူႉၵႃႈသင်လႃးလႃးၵွပ်ႈပိူဝ်ႈတၢင်းဢၼ်ႁူဝ်ၸႂ် ၵႅၼ်ႇၶႅင်ၼၼ်ႉယူႇဢေႃႈ။-

19ၶဝ်ၼၼ်ႉဢမ်ႇမီးတၢင်းဢၼ်ၵူဝ်ဢၼ်ဢၢႆ။ ဢဝ်တူဝ်ၸဝ်ႈၵဝ်ႇဢၢပ်ႈၵႃႈၼႂ်း မိုဝ်းၵီႉလေႇသႃႇ ႁႂ်ႈလႆႈမီးတင်းၸႂ် ဢၼ်ၸပ်းၸွႆး ႁႅင်းယႂ်ႇၼႃႇလႄႈ ၵျူဝ်းၸႃးၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ၵူဝ်ႈၵိူၵ်ႇၵူႈၸိူဝ်ႉၵူႈပိူင်ဢေႃႈ။-

20သူသွၼ်ဢဝ်တြႃးၸဝ်ႈၶရိၸ်ႈႁႂ်ႈလႆႈပဵၼ်ၸိူဝ်ႉၼင်ႇၼၼ်ဢမ်ႇၸႂ်ႈ။-

21သူလႆႈငိၼ်းၵႂၢမ်းၸဝ်ႈၶရိၸ်ႈလႄႈ ၶၢမ်ႇဢဝ်ၼႄးတီႈမၼ်းၸဝ်ႈၵႃႈၼင်ႇဢၼ်သမ်ႇမႃႇတြႃးမီးၼႂ်း ယေႇသူႉ ၼၼ်ႉ၊-

22ႁႂ်ႈသူလႆႈထွတ်ႇၵူၼ်းၵဝ်ႇသူဢၼ်ၼဝ်ႈတူႇလူႉလႅဝ် ၵွပ်ႈပိူဝ်ႈၸႂ်လေႃးၽႃႉဢၼ် ၸၢင်ႈပႅတ်ႉလႅၼ်ၼႂ်းလွင်ႈတၢင်းဢၼ် သူၵႂႃႇမႃးမိူဝ်ႈဢွၼ်ၼႆႉၼၼ်ႉပႅတ်ႈ၊-

23ႁႂ်ႈသူလႆႈႁူဝ်ၸႂ်သၽေႃးဢၼ်မႂ်ႇလႄႈ ဢဝ်ၵူၼ်းမႂ်ႇဢၼ်ဢဝ်တင်းပႃႇရမီႇတၢင်းဢၼ်သိုဝ်ႈတေႃႇ၊-

24တၢင်းဢၼ်မူတ်းၸၢင်ႇ ဢၼ်ၸၢပ်ႈသႅင်ႇၵၼ်တင်း သမ်ႇမႃႇတြႃးၽၢၼ်ႇသၢင်းႁဵတ်းပဵၼ် မိူၼ်ၸိူဝ်ႉၼင်ႇ ၽြႃးပဵၼ်ၸဝ်ႈ ၼၼ်ႉၼုင်ႈမႆဢေႃႈ။

25ပိူဝ်ႈၼႆ ပႄႇပႅတ်ႈၵႂၢမ်းမူႉသႃႇသေလႄႈ ၵေႃႉၼိုင်ႈလႄႈၵေႃႉၼိုင်ႈ ၼင်ႇၵၼ်ၵၼ်လၢတ်ႈၵႂၢမ်းဢၼ်မၢၼ်ႇဢၼ်မႅၼ်ႈၼၼ်ႉတေႃႇၵၼ်ၵူၺ်းတႃႉ။ လွင်ႈမၼ်းၸမ်ႉ ႁဝ်းပဵၼ်ဢၢင်ႇၵႃႇ ၼင်ႇၵၼ်ၵၼ်ဢေႃႈ။-

26ၼႂ်းလွင်ႈဢၼ် တၢင်းၸႂ်မႆႈဢွၵ်ႇၼၼ်ႉၸိုင် ယႃႇပေႁႂ်ႈလႆႈမီးဢပႅတ်ႈ။ ၸူဝ်ႈဢၼ်တၢင်းၸႂ်မႆႈ ဢမ်ႇပႆႇႁၢႆၼၼ်ႉၸိုင်၊ ယႃႇႁႂ်ႈၵၢင်ဝၼ်းတၼ်းတူၵ်း။-

27ယႃႇပေပၼ်ဢၶႂၢင်ႉတီႈမႃႇၼၢတ်ႈ။-

28ႁႂ်ႈၵေႃႉဢၼ်ၸၢင်ႈလၵ်ႉၸၢင်ႈလိူတ်ႈၼၼ်ႉ ၵမ်းလိုၼ်းယင်းဢမ်ႇလၵ်ႉဢမ်ႇလိူတ်ႈလႄႈ ဢဝ်တင်းမိုဝ်းတူဝ်ၸဝ်ႈၵဝ်ႇႁဵတ်း တၢင်းႁဵတ်းဢၼ်လီဢၼ်ငၢမ်း ႁႂ်ႈလႆႈမီးပုၼ်ႈဢၼ် တၵ်းလႆႈမႅင်ႇပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉတႃႉ။-

29ယႃႇပေႁႂ်ႈၵႂၢမ်းဢၼ်ၵူဝ်ႈဢၼ်ၵိူၵ်ႇၼၼ်ႉ လႆႈဢွၵ်ႇၵႃႈၼႂ်းသူပ်းသူသေၶေႃႈသေၵမ်း။ လၢတ်ႈၵႂၢမ်းဢၼ်လီဢၼ်ငၢမ်းပုၼ်ႈဢၼ်တၵ်း တႄႇႁဵတ်းႁႂ်ႈလႆႈပွင်ဢၵျူဝ်းၶဝ်ၸိူဝ်းဢၼ်လႆႈထွမ်ႇလႆႈငိၼ်းၼၼ်ႉၵူၺ်းတႃႉ။-

30ယႃႇပေႁႂ်ႈဝီႉၺိၺ်ႇဢၼ်မူတ်းၸၢင်ႇၽြႃးပဵၼ်ၸဝ်ႈ ဢၼ်တွၵ်ႇတၼ်းသိၵ်ႈတီႈသူ တေႃႇထိုင်ႁွတ်ႈဝၼ်းတၢင်းဢၼ် တၵ်းထုတ်ႇဢဝ်ၼၼ်ႉလႆႈၸဵပ်းၸႂ်။-

31ပႄႇပႅတ်ႈတၢင်းဢၼ်ၸႂ်ပွတ်းၸႂ်လွတ်းၵူႈၸိူဝ်ႉၵူႈပိူင်၊ တၢင်းဢၼ်ၸႂ်မႆႈၸႂ်လိူတ်ႇ၊ တၢင်းဢၼ်တေႃးသႃႉဢွၵ်ႇ၊ တၢင်းဢၼ်ႁိုတ်းသႅၼ်ႇ၊ တၢင်းဢၼ်လၢတ်ႈ ယႃႉသရေႇပိူၼ်ႈၸိူဝ်းၼၼ်ႉ ဢိၵ်ႇတင်းတၢင်းဢၼ်သီႈၵေႉႁေႈတႃပိူၼ်ႈ ၵူႈၸိူဝ်ႉၵူႈပိူင် ၼၼ်ႉသေၵႃႈတီႈသူတႃႉ။-

32ႁႂ်ႈမီးတၢင်းဢၼ်ၵေႃႉၼိုင်ႈလႄႈၵေႃႉၼိုင်ႈ ႁဵတ်းၵျေးၸူးတီႈၵၼ်၊ တၢင်းဢၼ်ဢဵတ်းလူႁၵ်ႉပႅင်း၊ တၢင်းဢၼ်ပွႆႇလွတ်ႈဢပႅတ်ႈ ၵေႃႉၼိုင်ႈလႄႈၵေႃႉၼိုင်ႈ မိူၼ်ၸိူဝ်ႉၼင်ႇဢၼ်ၽြႃးပဵၼ်ၸဝ်ႈ ပွႆႇလွတ်ႈဢပႅတ်ႈသူၵွပ်ႈပိူဝ်ႈၸဝ်ႈၶရိၸ်ႈၼၼ်ႉတႃႉ။

← Chapter 3 Jump to: Chapter 5 →