Exodus 12 — Shan

1ထႃႇဝရႃႉၽြႃးမီးဢမိင်ႉတီႈ မူဝ်းသေႇ တင်း ဢႃႇရုၼ်ႇ ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလႄႈဝႃႈၸမ်ႉ၊-

2လိူၼ်ၼႆႉတၵ်းလႆႈပဵၼ်လိူၼ်ငဝ်ႈတီႈသူဢၼ်ဝႃႈလိူၼ်ပထမႃႉၼႂ်းၵူႈပီႊတႃႇသေႇဢေႃႈ။-

3သွင်ၶိူဝ်တၵ်းလႆႈသင်ႇလၢတ်ႈဝႆႉတီႈပရဵၵ်ႈသၢတ်ႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈဝႃႈၸမ်ႉ၊ ၼႂ်းဝၼ်းဢၼ်လိူၼ်ၼႆႉ လႆႈသိပ်းဝၼ်းၼၼ်ႉ ၶဝ်ၵႃႈမီးတင်းသဵင်ႈတင်းလူင် ယေႈႁိူၼ်းတၵ်းလႆႈဢဝ်သူဝ်းဢွၼ်ႇယေႈတူဝ် ၸွမ်းလူၺ်ႈၼႃႈႁိူၼ်းၽႂ်ၼႃႈႁိူၼ်းမၼ်းဢေႃႈ။-

4ပေႃးၼႃႈႁိူၼ်းလဵၵ်ႉလႄႈ ဢမ်ႇထိူၵ်ႈတၢၼ်ႇသူဝ်းဢွၼ်ႇတူဝ်ၼိုင်ႈၸိုင်၊ မၼ်းဢိၵ်ႇတင်းၵူၼ်းႁိူၼ်းၸမ်ၵၼ်တင်းမၼ်းတၵ်းလႆႈပွင်းၵၼ်ဢဝ်ၸွမ်းလူၺ်ႈတၢင်းဢၼ်ၼပ်ႉဢၼ်ဢၢၼ်ႇလွင်ႈဢၼ်ၵူၼ်းမီးၼမ်လႂ်ၼၼ်ႉသေယဝ်ႉ၊ ထွၵ်ႈလူၺ်ႈၵူၼ်း ဢၼ်တၵ်းၵုမ်ႇၵိၼ်တူဝ်ၼိုင်ႈၼၼ်ႉသေလႄႈ ဢဝ်သူဝ်းဢွၼ်ႇတူဝ်ၼိုင်ႈဢေႃႈ။-

5သူဝ်းဢွၼ်ႇသေဢမ်ႇဝႃႈ၊ ပႄႉဢွၼ်ႇသေဢမ်ႇဝႃႈ၊ တူဝ်ဢွၼ်ႇဢၼ်သူဢဝ်ၼၼ်ႉ ယင်းဢမ်ႇလႆႈပႃးဢပႅတ်ႈလႄႈ တၵ်းလႆႈပဵၼ်တူဝ်ပေႃႈဢၼ်ဢမ်ႇပႆႇၶွပ်ႈၶူပ်ႇၼၼ်ႉဢေႃႈ။-

6ဢဝ်သူဝ်းဢွၼ်ႇၼၼ်ႉဝႆႉတေႃႇထိုင်ႁွတ်ႈဝၼ်းဢၼ်လိူၼ်ၼၼ်ႉလႆႈသိပ်းသီႇဝၼ်းသေယဝ်ႉ၊ ၼႂ်းၶိင်ႇႁူဝ်ၶမ်ႈ၊ မုၵ်ႉၵူၼ်းၸိူဝ်းၵူၼ်းပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ တၵ်းလႆႈဢဝ်တၢႆဢေႃႈ။-

7ၶဝ်တၵ်းလႆႈဢဝ်လိူတ်ႈတူဝ်ၼၼ်ႉၸမ်ႈသႂ်ႇၵႃႈတီႈသဝ်ၽၵ်းတူသွင်ၽၢႆႇ ဢိၵ်ႇတင်းၶိုဝ်ႇမၼ်းတီႈႁိူၼ်းဢၼ်ၶဝ်တၵ်းလႆႈၵိၼ်ၼိူဝ်ႉတူဝ်ၼၼ်ႉဢေႃႈ။-

8ၶဝ်တၵ်းလႆႈဢဝ်ၼိူဝ်ႉၼၼ်ႉပိင်ႈၽႆးႁၢင်းၽႆးသေယဝ်ႉ၊ ၵိၼ်လူၺ်ႈၵၼ်တင်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ ၼႂ်းၶိုၼ်းၼၼ်ႉဢေႃႈ။ ဢိၵ်ႇလူၺ်ႈၵၼ်တင်းၽၵ်းၶဵဝ်ဢၼ်ၶူမ်ၼၼ်ႉၵေႃႈ ၶဝ်တၵ်းလႆႈၵိၼ်ဢေႃႈ။-

9ၼိူဝ်ႉဢၼ်လိပ်းသေဢမ်ႇဝႃႈ၊ ဢၼ်ဢဝ်ၼမ်ႉတူမ်ႈသေဢမ်ႇဝႃႈ၊ ဢမ်ႇလႆႈၵိၼ်။ တၵ်းလႆႈဢဝ်ဢိၵ်ႇလူၺ်ႈၵၼ်တင်းၸႃႉၸဵမ်ႁူဝ်၊ တိၼ်၊ တပ်းပွတ်ႇ၊ ႁူဝ်ၸႂ် ၸိူဝ်းၼၼ်ႉ ပိင်ႈၽႆးႁၢင်းၽႆးသေလႄႈၵိၼ်ဢေႃႈ။-

10ၼိူဝ်ႉၼၼ်ႉၸိုင်၊ သူဢမ်ႇလႆႈဝႆႉၵိုတ်းဝႆႉၵျၢၼ်ႇတေႃႇထိုင်ႁွတ်ႈၶိင်ႇၵၢင်ၼႂ်။ ၵႃႈဢၼ်ဝႆႉၵိုတ်းဝႆႉၵျၢၼ်ႇတေႃႇထိုင်ႁွတ်ႈၶိင်ႇၵၢင်ၼႂ်ၼၼ်ႉသူတၵ်းလႆႈဢဝ်တုတ်ႇၽႆးပႅတ်ႈသေဢေႃႈ။

11သူတၵ်းလႆႈၵိၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူတၵ်းလႆႈႁတ်ႉသၢႆဢႅဝ်၊ တိုဝ်းသွၵ်းတိၼ်၊ ယိပ်းၵမ်ၶွၼ်ႉတဝ်ႉသေလႄႈ ၵိၼ်ၶၼ်ၶၼ်ၽႂ်းၽႂ်းဢေႃႈ။ ပဵၼ် ပႃႉသၶႃႇ ထႃႇဝရႃႉၽြႃးဢေႃႈ။-

12လွင်ႈမၼ်းၸမ်ႉ ၼႂ်းၶိုၼ်းၼႆႉ၊ ၵဝ်တၵ်းၵႂႃႇၵႃႈၼႂ်းမိူင်း ဢေႇၵိပ်ႉတူႉ ႁႂ်ႈသုတ်းႁႂ်ႈတိူၵ်ႈလႄႈပၼ်တၢမ်ႇတီႈလုၵ်ႈတူၼ်ႈၵူၼ်းဢိၵ်ႇတင်း လုၵ်ႈတူၼ်ႈတရိၵ်ႈသၢၼ်ႇၵႃႈမီးၵႃႈၼႂ်းမိူင်း ဢေႇၵိပ်ႉတူႉ တင်းသဵင်ႈတင်းလူင်ၼၼ်ႉလႄႈ ၸီႇယၢင်ႇတြႃး တီႈၽြႃးမိူင်း ဢေႇၵိပ်ႉတူႉ တင်းလၢႆၼၼ်ႉဢေႃႈ။ ၵဝ်ပဵၼ်ထႃႇဝရႃႉၽြႃးဢေႃႈ။-

13လိူတ်ႈၼၼ်ႉတၵ်းလႆႈပဵၼ်လၢၵ်ႈၶၼႃႇသၢၵ်ႈသေႇသူ ၵႃႈတီႈႁိူၼ်းဢၼ်သူယူႇၼၼ်ႉလႄႈ၊ မိူဝ်ႈဢၼ်ၵဝ်ႁၼ်လိူတ်ႈၼၼ်ႉၸိုင်၊ ၵဝ်တၵ်းပူၼ်ႉသူၵႂႃႇသေဢေႃႈ။ ၼင်ႇၼၼ်လႄႈ မိူဝ်ႈဢၼ်ၵဝ်ပၼ်တၢမ်ႇတီႈမိူင်း ဢေႇၵိပ်ႉတူႉ ၼၼ်ႉၸိုင် ၽေးဢူႉပၢတ်ႈ တၢင်းဢၼ်လူႉလႅဝ် တၵ်းဢမ်ႇလႆႈတိူဝ်ႉလႆႈထုၵ်ႇသူ။-

14ဝၼ်းမိူဝ်ႈၼႆႉၵေႃႈ တၵ်းလႆႈပဵၼ်ပုၼ်ႈဢၼ်သူတၵ်းၶုၵ်းၸႂ်လႆႈၶႆႈၸႂ်ထူပ်းလႄႈ သူတၵ်းလႆႈၶၢမ်ႇပွႆးတီႈထႃႇဝရႃႉၽြႃးၼႂ်းဝၼ်းမိူဝ်ႈၼႆႉဢေႃႈ။ ၵွပ်ႈပိူဝ်ႈဢၼ်ပဵၼ်ပိင်းၺၢပ်ႈဢၼ်တႃႇသေႇလႄႈ ၸိူဝ်ႉၶိူဝ်းသူသိုပ်ႇသိုပ်ႇတၢမ်းတၢမ်းဢမ်ႇထၢတ်ႇၼၼ်ႉ တၵ်းလႆႈဢွၼ်ၵၼ်ၶၢမ်ႇပွႆးၼၼ်ႉဢေႃႈ။

15ၸဵတ်းဝၼ်းတဵမ်တဵမ်သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢေႃႈ။ ဝၼ်းပထမႃႉၼၼ်ႉ သူတၵ်းလႆႈပႄႇပႅတ်ႈၸိူဝ်ႉပႅင်ႈသေ ၵႃႈၼႂ်းႁိူၼ်းသူဢေႃႈ။ ၸႃႉၸဵမ်ဝၼ်းပထမႃႉတေႃႇထိုင်ႁွတ်ႈဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ ၵေႃႉဢၼ်ၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉၸမ်ႉ၊ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်း မဵဝ်းၸိူဝ်ႉၶိူဝ်း ဢီႉသရေႇလႃႉ ဢေႃႈ။-

16ၼႂ်းဝၼ်းပထမႃႉၼၼ်ႉ သူတၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ဢေႃႈ။ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၵေႃႈ သူတၵ်းလႆႈႁဵတ်းတၢင်းဢၼ်ၸူႉတုမ်ထမ်ႇမႃႉၵၼ်ထႅင်ႈဢေႃႈ။ ၼႂ်းမိုဝ်ႉဝၼ်းၼၼ်ႉ လိူဝ်သေတၢင်းႁဵတ်းဢၼ်ၸၢပ်ႈသႅင်ႇၵၼ်တင်း လွင်ႈဢၼ်ၵူၼ်းၵူႈၵေႃႉတၵ်းလႆႈၵိၼ်လႆႈၶူပ်းၼၼ်ႉ၊ ဢမ်ႇလႆႈႁဵတ်းတၢင်းႁဵတ်းတၢင်ႇၸိူဝ်ႉတၢင်ႇပိူင်။ မီးဢၶႂၢင်ႉဢၼ်လႆႈႁဵတ်းလွင်ႈၼၼ်ႉၵူၺ်းဢေႃႈ။-

17လွင်ႈဢၼ်သူတၵ်းလႆႈၶၢမ်ႇပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၸမ်ႉ၊ ၼႂ်းဝၼ်းၼၼ်ႉ ၵဝ်ၼုၵ်ႈဢဝ်ပူဝ်ႇပႃႇသူဢွၵ်ႇသေၵႃႈၼႂ်း မိူင်း ဢေႇၵိပ်ႉတူႉ ဢေႃႈ။ ၵွပ်ႈပိူဝ်ႈလွင်ႈၼၼ်ႉလႄႈ ပိူဝ်ႈဢၼ်ပဵၼ်ပိင်းၺၢပ်ႈဢၼ်တႃႇသေႇလႄႈ၊ ၸိူဝ်ႉၶိူဝ်းသူသိုပ်ႇသိုပ်ႇတၢမ်းတၢမ်း ဢမ်ႇထၢတ်ႇၼၼ်ႉ တၵ်းလႆႈဢွၼ်ၵၼ်ပႂ်ႉဝၼ်းၼၼ်ႉယူႇဢေႃႈ။

18ၸႃႉၸဵမ်ႁူဝ်ၶမ်ႈလိူၼ်ပထမႃႉ သိပ်းသီႇဝၼ်းၼၼ်ႉတေႃႇထိုင်ႁွတ်ႈႁူဝ်ၶမ်ႈသၢဝ်းဢဵတ်းဝၼ်းၼၼ်ႉၸိုင်၊ သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢေႃႈ။-

19ၸဵတ်းဝၼ်းၼၼ်ႉတဵမ်တဵမ်၊ ၸိူဝ်ႉပႅင်ႈဢမ်ႇလႆႈမီးၵႃႈတီႈႁိူၼ်းသူလႃးလႃး။ ၵေႃႉဢၼ်ၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈၼၼ်ႉၸမ်ႉ၊ ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းသေဢမ်ႇဝႃႈ၊ ပဵၼ်ၵူၼ်းၼႂ်းဝၢၼ်ႈၼႂ်းမိူင်းသေဢမ်ႇဝႃႈ၊ တၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ ဢေႃႈ။-

20သူဢမ်ႇလႆႈၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈလႃးလႃး။ ၵႃႈတီႈဢၼ်သူယူႇၵူႈတီႈၵူႈလႅၼ်ၼၼ်ႉ သူတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈဢေႃႈ၊ ဝႃႈၼင်ႇၼႆဢေႃႈ။

21မိူဝ်ႈၼၼ်ႉ မူဝ်းသေႇ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ် ၼႂ်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်လႄႈလၢတ်ႈတီႈၶဝ်လႄႈဝႃႈ၊ သူၸွမ်းလူၺ်ႈၼႃႈႁိူၼ်းၽႂ်ၼႃႈႁိူၼ်းမၼ်းတီႈလႂ်တီႈၼၼ်ႉသေလႄႈ၊ ဢွၼ်ၵၼ်ဢဝ်သူဝ်းဢွၼ်ႇဢွၵ်ႇလႄႈဢဝ်တၢႆ ပုၼ်ႈပွႆး ပႃႉသၶႃႇ တႃႉ။-

22သူတၵ်းလႆႈဢဝ်ယွတ်ႈတူၼ်ႈ ႁုတ်ႉသူပ်ႇ မတ်ႉၼိုင်ႈၸုမ်ႇသႂ်ႇၵႃႈၼႂ်းလိူတ်ႈဢၼ်မီးၵႃႈၼႂ်းမေႃႈမိၼ်ႈၼၼ်ႉသေယဝ်ႉ၊ ၸမ်ႈသႂ်ႇၵႃႈတီႈၶိုဝ်ႇၽၵ်းတူတင်းသဝ်သွင်ၽၢႆႇဢေႃႈ။ လိုၼ်းၼၼ်ႉ တေႃႇထိုင်ႁွတ်ႈၶိင်ႇၵၢင်ၼႂ်လႄႈ ၽူႈလႂ်ဢမ်ႇလႆႈဢွၵ်ႇၵႃႈတီႈၽၢႆႇၼွၵ်ႈၽၵ်းတူႁိူၼ်းမၼ်း။-

23လွင်ႈမၼ်းၸမ်ႉ ထႃႇဝရႃႉၽြႃးၼၼ်ႉ တၵ်းၵႂႃႇႁႂ်ႈသုတ်းႁႂ်ႈတိူၵ်ႈ ႁႂ်ႈလႆႈပၼ်တၢမ်ႇတီႈၵူၼ်း ဢေႇၵိပ်ႉတူႉ တင်းလၢႆဢေႃႈ။ မိူဝ်ႈဢၼ်ထႃႇဝရႃႉၽြႃးႁၼ်လိူတ်ႈဢၼ်မီးၵႃႈတီႈၶိုဝ်ႇၽၵ်းတူတင်းသဝ်သွင်ၽၢႆႇၼၼ်ႉၸိုင်၊ မၼ်းၸဝ်ႈတၵ်းပူၼ်ႉၽၵ်းတူၼၼ်ႉၵႂႃႇသေဢေႃႈ။ တီႈၵေႃႉဢၼ်တၵ်းယႃႉပႅတ်ႈၼၼ်ႉၵေႃႈ မၼ်းၸဝ်ႈတၵ်းဢမ်ႇပၼ်ဢၶႂၢင်ႉ ဢၼ်လႆႈၶဝ်ႈၸူးၵႃႈၼႂ်းႁိူၼ်းသူ ႁႂ်ႈလႆႈပၼ်တၢမ်ႇတီႈသူ။-

24တၵ်းလႆႈပႂ်ႉၵမ်ပႂ်ႉၸွမ်းလွင်ႈတၢင်းၼႆႉလႄႈ ႁႂ်ႈပဵၼ်ထုင်းၽိင်ႈတြႃးဢၼ်တႃႇသေႇတီႈမႂ်းဢိၵ်ႇတင်းတီႈလုၵ်ႈလၢင်းမႂ်းတင်းလၢႆၼၼ်ႉဢေႃႈ။-

25မိူဝ်ႈဢၼ်သူႁွတ်ႈထိုင်ၵႃႈတီႈမိူင်းဢၼ်ထႃႇဝရႃႉၽြႃးတၵ်းပၼ်မႅၼ်ႈၸွမ်းၵႃႈၼင်ႇဢၼ်ၵတီႉၸဝ်ႈမီးၼၼ်ႉၸိုင်၊ သူတၵ်းလႆႈႁဵတ်းဝၢတ်ႈၼႆႉဢေႃႈ။-

26မိူဝ်ႈဢၼ်လုၵ်ႈလၢင်းသူထၢမ်တီႈသူလႄႈဝႃႈ၊ လွင်ႈဢၼ်ႁဵတ်းဝၢတ်ႈၼႆႉ ပဵၼ်လွင်ႈၸိူဝ်ႉၼင်ႇႁိုဝ်။ ဝႃႈၼင်ႇၼႆၸိုင်၊-

27သူတၵ်းလႆႈၶိုၼ်းလၢတ်ႈလႄႈဝႃႈ၊ ပဵၼ်ယိတ်ႈ ပႃႉသၶႃႇ ထႃႇဝရႃႉၽြႃးဢၼ်ပူၼ်ႉသေႁိူၼ်းၵူၼ်းမဵဝ်း ဢီႉသရေႇလႃႉ ၵႂႃႇ ၼႂ်းမိူင်း ဢေႇၵိပ်ႉတူႉ ပုၼ်ႉ ၼႂ်းမိူဝ်ႈဢၼ်မၼ်းၸဝ်ႈပၼ်တၢမ်ႇတီႈၵူၼ်း ဢေႇၵိပ်ႉတူႉ တင်းလၢႆလႄႈ ပၼ်ၵတ်းယဵၼ်ၶျၢမ်းသႃႇတီႈႁိူၼ်းႁဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉဢွၼ်ၵၼ်ၵူမ်ႈၵွမ်းႁူဝ်လႄႈ ၵူဝ်းၵႂၢႆႇယူႇဢေႃႈ။-

28ၼင်ႇၼၼ်လႄႈ ၵူၼ်းမဵဝ်း ဢီႉသရေႇလႃႉ တင်းလၢႆၵႂႃႇလႄႈႁဵတ်းဢေႃႈ။ ၶဝ်ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇ တင်း ဢႃႇရုၼ်ႇ ၼၼ်ႉဢေႃႈ။

29ၶိင်ႇတဵင်ႈၶိုၼ်းထႃႇဝရႃႉၽြႃးပၼ်တၢမ်ႇတီႈလုၵ်ႈတူၼ်ႈၵႃႈဢၼ်မီးၵႃႈၼႂ်းမိူင်း ဢေႇၵိပ်ႉတူႉ တင်းသဵင်ႈတင်းလူင်ဢၼ်ဝႃႈ ၸႃႉၸဵမ်လုၵ်ႈတူၼ်ႈၶုၼ်ႁေႃၶမ်း ၽႃႇရေႃး ဢၼ်ၼင်ႈယူႇၵႃႈၼိူဝ်ႁေႃ တေႃႇထိုင်ႁွတ်ႈလုၵ်ႈတူၼ်ႈၵေႃႉဢၼ်လႆႈၶၢမ်ႇတၢင်းဢၼ်ၶင်ဝႆႉ ၵႃႈၼႂ်းထွင်ႇၼၼ်ႉလႄႈ လုၵ်ႈတူၼ်ႈတရိၵ်ႈသၢၼ်ႇၵႃႈမီးတင်းသဵင်ႈတင်းလူင်ၼၼ်ႉဢေႃႈ။-

30ၼႂ်းၶိုၼ်းၼၼ်ႉ ၶုၼ်ႁေႃၶမ်း ၽႃႇရေႃး ဢိၵ်ႇတင်းၶႃႈမၼ်းၵူၼ်းမၼ်းတင်းသဵင်ႈတင်းလူင် တင်းၵူၼ်း ဢေႇၵိပ်ႉတူႉ တင်းသဵင်ႈတင်းလူင် ဢွၼ်ၵၼ်လုၵ်ႉလႄႈ၊ ၵွပ်ႈပိူဝ်ႈဢၼ်ႁိူၼ်းဢၼ်ၵၢင်းလွတ်ႈတင်းတူဝ်တၢႆ ဢမ်ႇမီးသေႁိူၼ်းၼၼ်ႉလႄႈ ပဵၼ်တၢင်းဢၼ်ႁွင်ႉဢၼ်ႁႆႈ ဢၼ်ယႂ်ႇၼႃႇလူင်လၢင် ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉဢေႃႈ။

31ၼႂ်းၶိုၼ်းၼၼ်ႉ ၶုၼ်ႁေႃၶမ်း ၽႃႇရေႃး ႁွင်ႉဢဝ် မူဝ်းသေႇ တင်း ဢႃႇရုၼ်ႇ လႄႈလၢတ်ႈလႄႈဝႃႈ၊ ၸႃႉၸဵမ်သွင်ၶိူဝ်လႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်လုၵ်ႉလႄႈ ဢွၵ်ႇၵႂႃႇသေၵႃႈၼႂ်းၵူၼ်းၵဝ်ၸိူဝ်းၼႆႉတႃႉ။ ဢွၼ်ၵၼ်ၵႂႃႇႁဵတ်းဝၢတ်ႈ တီႈထႃႇဝရႃႉၽြႃး ၸွမ်းၵႃႈၼင်ႇဢၼ်သူယွၼ်းၼၼ်ႉတႃႉ။-

32ဢွၼ်ၵၼ်ဢဝ်ၽုင်သူဝ်းၽုင်ဝူဝ်းသူလႄႈ ၵႂႃႇၸွမ်းၵႃႈၼင်ႇဢၼ်သူယွၼ်းၼၼ်ႉတႃႉ။ တီႈၵဝ်ၵေႃႈပၼ်တၢင်းလီမင်ႇၵလႃႇသေၵမ်း၊ ဝႃႈၼင်ႇၼႆဢေႃႈ။-

33ၵူၼ်း ဢေႇၵိပ်ႉတူႉ တင်းလၢႆၵေႃႈ၊ ၵွပ်ႈပိူဝ်ႈဢၼ်လၢတ်ႈလႄႈဝႃႈ၊ ႁဝ်းၵႃႈမီးၼႆႉတၵ်းပဵၼ်တူဝ်တၢႆယဝ်ႉ၊ ဝႃႈၼင်ႇၼႆလႄႈ ဢွၼ်ၵၼ်ႁိပ်ႈၼႅတ်ႈတိုၵ်းယူင်း ၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈပွႆႇၶဝ်ဢွၵ်ႇၵႂႃႇသေၵႃႈၼႂ်းမိူင်း ဢေႇၵိပ်ႉတူႉ ၶၼ်ၶၼ်ၽႂ်းၽႂ်းဢေႃႈ။-

34ၵူၼ်းတင်းလၢႆၵေႃႈ ဢွၼ်ၵၼ်ဢဝ်ၶဝ်ႈမုၼ်းလိပ်းဢၼ်ဢမ်ႇပႆႇပႃးၸိူဝ်ႉပႅင်ႈၼၼ်ႉလႄႈ ၵွၵ်းဝၢၼ်ႇဢၼ်ၼူတ်ႈၶဝ်ႈမုၼ်းၶဝ်ၵေႃႈ ဢွၼ်ၵၼ်ဢဝ်တင်းၶူဝ်းၼုင်ႈပူၵ်ႉႁေႃႇသေလႄႈ ႁၢပ်ႇတၢင်ႇၵႃႈၼိူဝ်ႁူဝ်မႃႇၶဝ်ဢေႃႈ။

35ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ႁဵတ်းၸွမ်းၵႃႈၼင်ႇဢၼ် မူဝ်းသေႇ ၸီႇယၢင်ႇဝႆႉၼၼ်ႉလႄႈ၊ ဢွၼ်ၵၼ်ယွၼ်းယိုမ်ဢဝ် ၶိူင်ႈငိုၼ်းၶိူင်ႈၶမ်းၶူဝ်းၼုင်ႈတၢင်းမႆ တီႈၵူၼ်း ဢေႇၵိပ်ႉတူႉ ၶဝ်ဢေႃႈ။-

36ထႃႇဝရႃႉၽြႃးႁႂ်ႈၶဝ်ထူပ်းၵျေးၸူးသိုဝ်ႈၼႃႈတႂ်ႈတႃ ၵူၼ်း ဢေႇၵိပ်ႉတူႉ တင်းလၢႆလႄႈ ၶဝ်ၼၼ်ႉၵေႃႈ ဢွၼ်ၵၼ်ပၼ်ၶဝ်ၵူႈၶဝ်ယိုမ်ဢေႃႈ။ ၼင်ႇၼၼ်လႄႈ ၶဝ်ႁိမ်ႁူင်ႇဢဝ်ဢုၵ်ႉၸႃႇ ၵူၼ်း ဢေႇၵိပ်ႉတူႉ ၸိူဝ်းၼၼ်ႉဢေႃႈ။

37ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ၊ လုၵ်ႈဢွၼ်ႇဢမ်ႇဝႃႈဢမ်ႇပႃး၊ ၼပ်ႉဢၢၼ်ႇၽူႈၸၢႆးၵူၺ်းၵူၺ်းမီးႁူၵ်းသႅၼ်ၸမ်ၸမ်လႄႈ ဢွၼ်ၵၼ်ဢွၵ်ႇသေၵႃႈတီႈဝဵင်း ရႃႇမသိတ်ႈ လႄႈ ပႆတိၼ်ၸွမ်းတၢင်းၵႂႃႇၸူး ၵႃႈတီႈ သူႉၵုတ်ႉ ဢေႃႈ။-

38ၵူၼ်းမဵဝ်းၼမ်ၼႃႇဢိၵ်ႇတင်း ၸႃႉၸဵမ်ၽုင်သူဝ်းၽုင်ဝူဝ်းလႄႈ တရိၵ်ႈသၢၼ်ႇၼမ်ၼႃႇၸွမ်းၵၼ်တင်းၶဝ်ၵႂႃႇဢေႃႈ။-

39ၶဝ်လႆႈဢဝ်ၶဝ်ႈမုၼ်းလိပ်း ဢၼ်ဢဝ်ၵႃႈတီႈမိူင်း ဢေႇၵိပ်ႉတူႉ မႃးၼၼ်ႉ ၽဝ်ႁဵတ်းၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ ၵွပ်ႈပိူဝ်ႈဢၼ်ၸိူဝ်ႉပႅင်ႈဢမ်ႇပႆႇလႆႈလေႃးၼၼ်ႉဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ဢမ်ႇလႆႈႁဵတ်းၵွႆႈႁဵတ်းထိူင်း၊ လႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလႄႈ ၶဝ်ဢမ်ႇတၼ်းမႄးႁႅၼ်းဝႆႉပုၼ်ႈဢၼ်ၶဝ်တၵ်းၵိၼ်တၵ်းၶူပ်း။

40ပီႊမိူင်းဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ပဵၼ်ၶႅၵ်ႇလႄႈသွၼ်ႈပိုင်ႈယူႇၵႃႈၼႂ်းမိူင်း ဢေႇၵိပ်ႉတူႉ ၼၼ်ႉၸမ်ႉ၊ ပဵၼ်သီႇပၢၵ်ႇပၢႆသၢမ်သိပ်းပီႊဢေႃႈ။-

41ၼႂ်းဝၼ်းဢၼ်ပဵၼ်တီႈသုတ်းပီႊမိူင်းသီႇပၢၵ်ႇပၢႆသၢမ်သိပ်းပီႊၼၼ်ႉ၊ ပူဝ်ႇပႃႇထႃႇဝရႃႉၽြႃးတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလႄႈ ၵႂႃႇဢေႃႈ။-

42ၵွပ်ႈပိူဝ်ႈဢၼ်မၼ်းၸဝ်ႈၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉလႄႈ၊ မိူဝ်ႈၶိုၼ်းၼၼ်ႉၸိုင်၊ လီပႂ်ႉပုၼ်ႈ ထႃႇဝရႃႉၽြႃးဢေႃႈ။ ၶိုၼ်းၼႆႉၸမ်ႉ၊ ပဵၼ်ၶိုၼ်းထႃႇဝရႃႉၽြႃးဢၼ်ၵူၼ်းမဵဝ်း ဢီႉသရေႇလႃႉ သိုပ်ႇသိုပ်ႇတၢမ်းတၢမ်းဢမ်ႇထၢတ်ႇတၵ်းလႆႈပႂ်ႉၼၼ်ႉဢေႃႈ။

43ထႃႇဝရႃႉၽြႃးဝႆႉပိင်းၺၢပ်ႈတီႈ မူဝ်းသေႇ တင်း ဢႃႇရုၼ်ႇ လႄႈဝႃႈ၊ တြႃးပွႆး ပႃႉသၶႃႇ ၸမ်ႉ၊ ၵူၼ်းတၢင်ႇၸိူဝ်ႉတၢင်ႇၶိူဝ်းဢမ်ႇလႆႈၵိၼ်။-

44ၵူၺ်းၵႃႈ ၶႃႈဢၼ်ဢဝ်တင်းငိုၼ်းသိုဝ်ႉဢဝ်ၼၼ်ႉ၊ ပေႃးၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်းယဝ်ႉၸိုင်၊ တၵ်းလႆႈၵိၼ်ဢေႃႈ။-

45ပဵၼ်ၵူၼ်းတၢင်ႇဝၢၼ်ႈတၢင်ႇမိူင်းလႄႈသင်၊ ပဵၼ်ၵူၼ်းၵိၼ်ၸၢင်ႈၵိၼ်ငႃလႄႈသင်၊ ဢမ်ႇလႆႈၵိၼ်။-

46ၵႃႈတီႈႁိူၼ်းၼိုင်ႈ တၵ်းလႆႈၵိၼ်တူဝ်ၼိုင်ႈဢေႃႈ။ ၼိူဝ်ႉမၼ်းၸိုင်၊ မႂ်းဢမ်ႇလႆႈဢဝ်ဢွၵ်ႇၵႃႈၼွၵ်ႈႁိူၼ်း။ လုပ်ႇမၼ်းၵေႃႈသူဢမ်ႇလႆႈဢဝ်ႁၵ်း။-

47ပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်တၵ်းလႆႈၶၢမ်ႇပွႆးၼၼ်ႉဢေႃႈ။-

48ပေႃးၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇ ၵႃႈတီႈမႂ်းၼၼ်ႉမီးဢလူဝ်ႇၶႂ်ႈၶၢမ်ႇပွႆး ပႃႉသၶႃႇ ပုၼ်ႈထႃႇဝရႃႉၽြႃးၸိုင်၊ ႁႂ်ႈၵူၼ်းၸၢႆး ၵႃႈဢၼ်မီးတီႈမၼ်းၼၼ်ႉတင်းသဵင်ႈတင်းလူင် ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းသေတႃႉ။ ဝၢႆးၼၼ်ႉယဝ်ႉႁႂ်ႈၵေႃႉၼၼ်ႉ သုတ်ႉၶဝ်ႈသုတ်ႉၸူးလႄႈၶၢမ်ႇပွႆးၼၼ်ႉတႃႉ။ မၼ်းပဵၼ်ၸိူဝ်ႉၼင်ႇၵူၼ်းဝၢၼ်ႈၵူၼ်းမိူင်းယဝ်ႉ။ ၵေႃႉဢၼ်ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၼၼ်ႉၸမ်ႉ၊ ဢမ်ႇလႆႈၵိၼ်ပွႆးၼၼ်ႉ။-

49ၵေႃႉဢၼ်ပဵၼ်ၸိူဝ်ႉၶိူဝ်းဢၼ်လဵဝ်ၵၼ် ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်သွၼ်ႈပိုင်ႈယူႇၵႃႈတီႈသူၼၼ်ႉတၵ်းလႆႈမီးတြႃးပႃးလဵဝ်ၵူၺ်းဢေႃႈ၊ ဝႃႈၼင်ႇၼႆဢေႃႈ။

50ၼင်ႇၼၼ်လႄႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ႁဵတ်းဢေႃႈ။ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃး ဝႆႉပိင်းၺၢပ်ႈတီႈ မူဝ်းသေႇ တင်း ဢႃႇရုၼ်ႇ ၼၼ်ႉဢေႃႈ။-

51ၼႂ်းဝၼ်းၼၼ်ႉၵမ်းလဵဝ် ထႃႇဝရႃႉၽြႃးဢဝ်ပူဝ်ႇပႃႇၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉၵႂႃႇသေဢေႃႈ။