Exodus 32

Shan

← Chapter 31 Jump to: Chapter 33 →

1မိူဝ်ႈဢၼ်ၵူၼ်းတင်းလၢႆ ႁူႉႁၼ်လွင်ႈဢၼ် မူဝ်းသေႇ ၼၼ်ႉ ၼၢၼ်းလုၵ်ႉသေၵႃႈၼိူဝ်လွႆလူင်းမႃးၼၼ်ႉၸိုင်၊ ၶဝ်ဢွၼ်ၵၼ်ၸူႉတုမ်ၵႃႈတီႈ ဢႃႇရုၼ်ႇ လႄႈ လၢတ်ႈတီႈမၼ်းလႄႈဝႃႈ၊ လုၵ်ႉသေၵမ်း။ ႁဵတ်းၽြႃးဢၼ်တၵ်းဢွၼ်ႁူဝ်ႁဝ်းၵႂႃႇၼၼ်ႉပုၼ်ႈႁဝ်းသေၵမ်း။ မူဝ်းသေႇ ၵေႃႉဢၼ်ၼုၵ်ႈဢဝ်ႁဝ်းဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉၸိုင်၊ ႁဝ်းဢမ်ႇႁူႉလွင်ႈဢၼ်မၼ်းပဵၼ်ၸိူဝ်ႉၼင်ႇႁိုဝ်ယူႇၼၼ်ႉ၊ ဝႃႈၼင်ႇၼႆဢေႃႈ။-

2ဢႃႇရုၼ်ႇ ၵေႃႈ လၢတ်ႈတီႈၶဝ်လႄႈဝႃႈ၊ ဢွၼ်ၵၼ်ထွတ်ႇဢဝ်ပေႇၶမ်းဢၼ်မီးၵႃႈၼႂ်းႁူမေးသူ ဢိၵ်ႇတင်းလုၵ်ႈၸၢႆးသူ တင်းလုၵ်ႈယိင်းသူၸိူဝ်းၼၼ်ႉသေလႄႈ ဢဝ်မႃးၵႃႈတီႈၵဝ်တႃႉ၊ ဝႃႈၼင်ႇၼႆသေယဝ်ႉ၊-

3ၵူၼ်းတင်းသဵင်ႈတင်းလူင်ဢွၼ်ၵၼ်ထွတ်ႇဢဝ်ပေႇၶမ်းဢၼ်မီးၵႃႈၼႂ်းႁူၶဝ်ၼၼ်ႉသေလႄႈ ဢဝ်မႃးတီႈ ဢႃႇရုၼ်ႇ ဢေႃႈ။-

4မၼ်းၵေႃႈႁပ်ႉၶၢမ်ႇဢဝ်ၶိူင်ႈပိူင်ၸိူဝ်းၼၼ်ႉၵႃႈတီႈမိုဝ်းၶဝ်လႄႈ ဢဝ်တင်းလဵၵ်းတွင်ႈမႄးႁဵတ်းသေယဝ်ႉ၊ ႁႂ်ႈပဵၼ်ႁၢင်ႈဝူဝ်းဢွၼ်ႇ ဢၼ်လေႃႇႁဵတ်းၼၼ်ႉဢေႃႈ။ ၶဝ်ၼၼ်ႉၵေႃႈ ဢွၼ်ၵၼ်လၢတ်ႈလႄႈဝႃႈ၊ မဵဝ်း ဢီႉသရေႇလႃႉ ၼႆႉဢိူၺ်း၊ ဢၼ်ၼႆႉပဵၼ်ၽြႃးမႂ်းဢၼ်ၼုၵ်ႈဢဝ်မႂ်းဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

5ဢႃႇရုၼ်ႇ ၼၼ်ႉ ႁူႉႁၼ်လွင်ႈတၢင်းၼၼ်ႉသေယဝ်ႉ၊ တႄႇႁဵတ်းယိတ်ႈပလၢင်ႇၵႃႈတီႈ ၽၢႆႇၼႃႈရုၵ်ႈထူႉၼၼ်ႉသေလႄႈ ႁႂ်ႈႁွင်ႉပၢဝ်ႇႁွင်ႉသေႃႇလႄႈဝႃႈ၊ ဝၼ်းမိူဝ်ႈၽုၵ်ႈပဵၼ်ဝၼ်းဢၼ်တၵ်းလႆႈၶၢမ်ႇပွႆးပုၼ်ႈထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။-

6ဝၼ်းမိူဝ်ႈၽုၵ်ႈၼၼ်ႉ ၶဝ်ဢွၼ်ၵၼ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉသေလႄႈ ပုၵ်ႈၸေႃႇယိတ်ႈဢၼ်တုတ်ႇၽႆးလႄႈ ဢဝ်ယိတ်ႈ မိၵ်ႉသႃႇႁႃယႃႉမႃးသေယဝ်ႉ၊ ဢွၼ်ၵၼ်ၼင်ႈယူႇႁႂ်ႈလႆႈၵိၼ်လႆႈၶူပ်းဢေႃႈ။ လိုၼ်းၼၼ်ႉ ဢွၼ်ၵၼ်လုၵ်ႉႁႂ်ႈလႆႈၵႃႈလႆႈဝႅၼ်ဢေႃႈ။

7ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊ မႂ်းၵႂႃႇလႄႈလူင်းတႃႉ။ ၵူၼ်းဢၼ်မႂ်းၼုၵ်ႈဢဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၸိူဝ်းၼၼ်ႉဢွၼ်ၵၼ်ၽွၵ်ႈပျၢၼ်ႇၶိုၼ်းၵႂႃႇယဝ်ႉ။-

8ၶဝ်ပိူင်ႈသေၵႃႈၼႂ်းသဵၼ်ႈတၢင်းဢၼ်ၵဝ်သင်ႇလၢတ်ႈဝႆႉၼၼ်ႉ ၵႂႃႇၶၼ်ၶၼ်ၽႂ်းၽႂ်းလႄႈ ဢွၼ်ၵၼ်လေႃႇႁဵတ်းႁၢင်ႈဝူဝ်းဢွၼ်ႇသေယဝ်ႉ၊ ၵူဝ်းၵႂၢႆႇလႄႈပုၵ်ႈၸေႃႇယိတ်ႈၵႃႈတီႈၽၢႆႇၼႃႈမၼ်းလႄႈဝႃႈ၊ မဵဝ်း ဢီႉသရေႇလႃႉ ၼႆႉဢိူၺ်း၊ ဢၼ်ၼႆႉပဵၼ်ၽြႃးဢၼ်ၼုၵ်ႈဢဝ်မႂ်းဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉယဝ်ႉ၊ ဝႃႈၸိူဝ်ႉၼင်ႇၼႆယူႇဢေႃႈ၊ ဝႃႈၼင်ႇၼႆဢေႃႈ။-

9ထႃႇဝရႃႉၽြႃးသမ်ႉလၢတ်ႈတီႈ မူဝ်းသေႇ ထႅင်ႈလႄႈဝႃႈ၊ ၵဝ်လႆႈႁၼ်ၵူၼ်းမဵဝ်းၼႆႉယဝ်ႉ။ တူၺ်းလူး၊ ပဵၼ်ၵူၼ်းမဵဝ်းဢၼ်လမ်းၶေႃးၵႅၼ်ႇၶႅင်ဢေႃႈ။-

10ပိူဝ်ႈၼႆလႄႈ ယႃႇၵဝ်တႃႉ။ ၵဝ်တၵ်းၸႂ်မႆႈၶႆႈၸႃႉၼႃႇလူင်လၢင်တေႃႇၶဝ်လႄႈ ယႃႉၽဵဝ်ႈၶဝ်ပႅတ်ႈဢေႃႈ။ မႂ်းၸမ်ႉ၊ ၵဝ်တၵ်းႁႂ်ႈပဵၼ်မဵဝ်းၵူၼ်းဢၼ်ယႂ်ႇၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။

11မူဝ်းသေႇ ၵေႃႈ တွင်းပၢၼ်ႇတီႈထႃႇဝရႃႉၽြႃး ၽြႃးပဵၼ်ၸဝ်ႈမၼ်းလႄႈဝႃႈ၊ ထႃႇဝရႃႉၽြႃးတီႈၶႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၸႂ်မႆႈၶႆႈၸႃႉၼႃႇလူင်လၢင်တေႃႇၵူၼ်းၸဝ်ႈႁဝ်း ဢၼ်ၸဝ်ႈႁဝ်းဢဝ်တင်းမႁႃႇတၼ်းၶူဝ်းဢိၵ်ႇတင်းမိုဝ်းဢၼ်ႁႅင်းယႂ်ႇၼႃႇ ၼုၵ်ႈဢဝ်ဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ မႃးၸိူဝ်းၼၼ်ႉၼင်ႇႁိုဝ်တီႈၶႃႈ။-

12ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵူၼ်း ဢေႇၵိပ်ႉတူႉ တင်းလၢႆ တၵ်းလႆႈမီးလွင်ႈဢၼ်တၵ်းလၢတ်ႈလႄႈဝႃႈ၊ မၼ်းၸဝ်ႈၼုၵ်ႈဢဝ်ၶဝ်ဢွၵ်ႇၵႂႃႇ ပုၼ်ႈလွင်ႈတၢင်းဢၼ်ဢမ်ႇလီႁႂ်ႈလႆႈဢဝ်ၶဝ်တၢႆၵႃႈတီႈၼႂ်းလွႆလႄႈ ပႄႇၽဵဝ်ႈၶဝ်ပႅတ်ႈသေၵႃႈၼိူဝ်ၼႃႈလိၼ်မိူင်းၼႆႉၵူၺ်းယဝ်ႉ၊ ဝႃႈၼင်ႇၼႆၼင်ႇႁိုဝ်တီႈၶႃႈ။ ၶႅၼ်းတေႃႈဝႆႉသေဝၢင်းသေတၢင်းဢၼ်ၸႂ်မႆႈၶႆႈၸႃႉၸဝ်ႈႁဝ်းဢၼ်ယႂ်ႇၼႃႇလူင်လၢင်ၼႆႉသေၵမ်းတီႈၶႃႈ။ ၶႅၼ်းတေႃႈၶုၵ်းၸႂ်လႆႈမႆႈၸႂ်လူၺ်ႈလွင်ႈတၢင်းဢၼ်ဢမ်ႇလီၼႆႉ ဢၼ်တၵ်းပၼ်တီႈၵူၼ်းၸဝ်ႈႁဝ်းတင်းလၢႆၼၼ်ႉသေၵမ်းတီႈၶႃႈ။-

13ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၶႃႈၸဝ်ႈႁဝ်း ဢႃႇပြႃႇႁၢမ်ႇ၊ ဢီႉၸၢၵ်ႈ၊ ဢီႉသရေႇလႃႉ ဢၼ်လႆႈၶၢမ်ႇဢဝ်ၵႂၢမ်းဢၼ် ၸဝ်ႈႁဝ်းတိူင်ႇတူဝ်ၸဝ်ႈၵဝ်ႇလႄႈဝႃႈ၊ ၵဝ်တၵ်းႁႂ်ႈၸိူဝ်ႉၶိူဝ်းသူယႂ်ႇၽႄႈၼမ်ၵိုၼ်းမႃးမိူၼ်ၸိူဝ်ႉၼင်ႇလၢဝ်ၵၢင်ႁၢဝ်ဢေႃႈ။ ၵဝ်တၵ်းဢဝ်လိၼ်ဢၼ်ၵဝ်လၢတ်ႈဝႆႉၵႃႈမီးတင်းသဵင်ႈတင်းလူင်ၼႆႉ ပၼ်တီႈၸိူဝ်ႉၶိူဝ်းသူၼၼ်ႉလႄႈ ၶဝ်တၵ်းလႆႈၶၢမ်ႇဢမူၺ်ႇယူႇသေႇသေႇဢေႃႈ၊ ဝႃႈၼင်ႇၼႆမႃးယဝ်ႉၸိူဝ်းၼၼ်ႉ သေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

14ထႃႇဝရႃႉၽြႃးၶုၵ်းၸႂ်လႆႈလႄႈမႆႈၸႂ်လူၺ်ႈလွင်ႈတၢင်းဢၼ်ဢမ်ႇလီဢၼ်ဢၢင်ႈတၵ်းပၼ်တီႈၵူၼ်းမၼ်းၸဝ်ႈတင်းလၢႆၼၼ်ႉဢေႃႈ။

15မူဝ်းသေႇ ဝၢႆႇၶိုၼ်းလႄႈ ဢဝ်မိုဝ်းမၼ်းယိပ်းၵမ်ဢဝ် ၶႅပ်းမၢၵ်ႇႁိၼ်ၶိူင်ႈဢၼ်ၶၢမ်ႇသၢၵ်ႈသေႇသွင်ၽႅၼ်ႇသေလႄႈ လုၵ်ႉသေၵႃႈၼိူဝ်လွႆလူင်းဢေႃႈ။ ၶႅပ်းမၢၵ်ႇႁိၼ်ၸိူဝ်းၼၼ်ႉ ၵႃႈတီႈသွင်ၼႃႈမၼ်းမီးတၢင်းဢၼ်ဢဝ်တူဝ်လိၵ်ႈဢႅၵ်ႉၶရႃႇ တၢင်ႇသႂ်ႇဝႆႉဢေႃႈ။ ၵႃႈတီႈၼႃႈမၼ်းသွင်ၼႃႈၼၼ်ႉမီးတၢင်းဢၼ်ဢဝ်တူဝ်လိၵ်ႈဢႅၵ်ႉၶရႃႇ တၢင်ႇသႂ်ႇဝႆႉဢေႃႈ။-

16ၶႅပ်းမၢၵ်ႇႁိၼ်ၸိူဝ်းၼၼ်ႉပဵၼ်မၢၵ်ႇႁိၼ်ဢၼ်ၽြႃးပဵၼ်ၸဝ်ႈ ႁဵတ်းပဵၼ်ဢေႃႈ။ လိၵ်ႈၼၼ်ႉၵေႃႈပဵၼ်လိၵ်ႈၽြႃးပဵၼ်ၸဝ်ႈ ဢၼ်ဢဝ်တူဝ်လိၵ်ႈဢႅၵ်ႉၶရႃႇတၢင်ႇသႂ်ႇဝႆႉၵႃႈၼိူဝ်ၶႅပ်းမၢၵ်ႇႁိၼ်ၸိူဝ်းၼၼ်ႉဢေႃႈ။

17ယေႃးသူႉ လႆႈငိၼ်းသဵင်ဢၼ် ၵူၼ်းတင်းလၢႆႁူၼ်ႈမေႃးၵၼ်ယူႇၼၼ်ႉသေယဝ်ႉ၊ လၢတ်ႈတီႈ မူဝ်းသေႇ လႄႈဝႃႈ၊ မီးသဵင်ဢၼ်တိုၵ်းၵၼ်ယူႇ ၵႃႈတီႈတပ်ႉၶႃႈဢေႃႈ၊ ဝႃႈၼင်ႇၼႆဢေႃႈ။-

18မူဝ်းသေႇ ၵေႃႈ ၶိုၼ်းလၢတ်ႈလႄႈဝႃႈ၊ သဵင်ဢၼ်ၵဝ်လႆႈငိၼ်းၸိုင်၊ ပဵၼ်သဵင်ၶဝ်ၸိူဝ်းဢၼ်ပႄႉၼႅင်ႇလႄႈႁူၼ်ႈမေႃးၵၼ်ယူႇၼၼ်ႉဢမ်ႇၸႂ်ႈ၊ ပဵၼ်သဵင်ၶဝ်ၸိူဝ်းဢၼ်သုမ်းလႄႈ ဢွၼ်ၵၼ်ႁွင်ႉႁႆႈၵေႃႈဢမ်ႇၸႂ်ႈ၊ ပဵၼ်သဵင်ၶဝ်ၸိူဝ်းဢၼ်ႁဵတ်းၵႂၢမ်းဢေႃႈ၊ ဝႃႈၼင်ႇၼႆဢေႃႈ။

19မိူဝ်ႈဢၼ်ႁွတ်ႈထိုင်ၵႃႈတီႈဢၼ်ၸမ်ႁိမ်းတပ်ႉလႄႈ ႁၼ်ဝူဝ်းဢွၼ်ႇဢိၵ်ႇတင်း တၢင်းဢၼ်ၵႃႈဢၼ်ဝႅၼ်ၼၼ်ႉၸိုင်၊ မူဝ်းသေႇ ၸႂ်မႆႈၼႃႇလူင်လၢင်လႄႈ ဢဝ်ၶႅပ်းမၢၵ်ႇႁိၼ်ၸိူဝ်းၼၼ်ႉ ထိမ်ႈဢွၵ်ႇပႅတ်ႈသေၵႃႈၼႂ်းမိုဝ်းမၼ်းလႄႈ ႁႂ်ႈတႅၵ်ႇပႅတ်ႈသေၵႃႈတီႈတိၼ်လွႆၼၼ်ႉဢေႃႈ။-

20ဝူဝ်းဢွၼ်ႇဢၼ်ၶဝ်ႁဵတ်းၼၼ်ႉၵေႃႈ၊ မၼ်းဢဝ်ၽႆးမႆႈပႅတ်ႈသေဢေႃႈ။ မၼ်းႁဵတ်းႁႂ်ႈလႅဝ်သေယဝ်ႉ၊ ဢဝ်ဢွႆသႂ်ႇၵႃႈၼိူဝ်ၼမ်ႉလႄႈ ႁႂ်ႈၵူၼ်းမဵဝ်း ဢီႉသရေႇလႃႉ တင်းလၢႆၵိၼ်ဢေႃႈ။-

21မူဝ်းသေႇ သမ်ႉထၢမ်တီႈ ဢႃႇရုၼ်ႇ လႄႈဝႃႈ၊ ၶဝ်ၸိူဝ်းၼႆႉဢွၼ်ၵၼ်ႁဵတ်းၸိူဝ်ႉၼင်ႇႁိုဝ်တီႈမႂ်း ႁႂ်ႈမႂ်းလႆႈႁႂ်ႈဢပႅတ်ႈဢၼ်ယႂ်ႇၼႃႇထၢၼ်ႇၼႆႉ ႁွတ်ႈထိုင်ၵႃႈၼိူဝ်ၶဝ်၊ မိူဝ်ႈဢၼ်ဝႃႈၼင်ႇၼႆၸိုင်၊-

22ဢႃႇရုၼ်ႇ ၵေႃႈ ၶိုၼ်းလၢတ်ႈလႄႈဝႃႈ၊ ၸဝ်ႈႁဝ်းယႃႇပေၸႂ်မႆႈၶႆႈၸႃႉၼႃႇလူင်လၢင်သေၵမ်း။ ၸဝ်ႈႁဝ်းႁူႉလွင်ႈဢၼ်ၵူၼ်းၸိူဝ်းၼႆႉမီးၼႂ်းတၢင်းဢၼ်ဢမ်ႇလီၼၼ်ႉယူႇၶႃႈဢေႃႈ။-

23ၶဝ်ဢွၼ်ၵၼ်လၢတ်ႈတီႈၵဝ်ၶႃႈလႄႈဝႃႈ၊ ႁဵတ်းၽြႃးဢၼ်တၵ်းဢွၼ်ႁူဝ်ႁဝ်းၵႂႃႇၼၼ်ႉပုၼ်ႈႁဝ်းသေၵမ်း။ မူဝ်းသေႇ ၵေႃႉဢၼ်ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉၸိုင်၊ ႁဝ်းဢမ်ႇႁူႉလွင်ႈဢၼ်မၼ်းပဵၼ်ၸိူဝ်ႉၼင်ႇႁိုဝ်ယူႇၼၼ်ႉ၊ ဝႃႈၼင်ႇၼႆသေယဝ်ႉ၊-

24ၵဝ်ၶႃႈၵေႃႈလၢတ်ႈတီႈၶဝ်လႄႈဝႃႈ၊ ၵေႃႉဢၼ်မီးၶမ်းၸိုင်၊ ႁႂ်ႈမၼ်းထွတ်ႇဢွၵ်ႇတႃႉ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၶဝ်ဢွၼ်ၵၼ်ဢဝ်ၶမ်းပၼ်တီႈၵဝ်ၶႃႈလႄႈ၊ ၵဝ်ၶႃႈဢဝ်သႂ်ႇၵႃႈၼႂ်းၽႆးလႄႈ ဝူဝ်းဢွၼ်ႇၼႆႉဢွၵ်ႇမႃးၶႃႈဢေႃႈ၊ ဝႃႈၼင်ႇၼႆဢေႃႈ။

25မိူဝ်ႈဢၼ် မူဝ်းသေႇ ႁၼ်လွင်ႈဢၼ် ၵူၼ်းတင်းလၢႆယူႇတူဝ်လွတ်ႈတူဝ်ပူၺ်ၵွပ်ႈပိူဝ်ႈဢၼ် ဢႃႇရုၼ်ႇ ႁဵတ်းႁႂ်ႈၶဝ်လွတ်ႈၶဝ်ပူၺ် ပုၼ်ႈဢၼ်ၶဝ်တၵ်းပဵၼ်လွင်ႈဢၼ်ရၢၼ်ႇသူႇၶဝ်တၵ်းႁဵတ်းပျၢၵ်ႈတီႈၶဝ်ၼၼ်ႉၸိုင်၊-

26မူဝ်းသေႇ ၸုၵ်းယူႇၵႃႈတီႈၽၵ်းတူတပ်ႉသေလႄႈလၢတ်ႈဝႃႈ၊ ၽူႈလႂ်ယူႇၽၢႆႇထႃႇဝရႃႉၽြႃးၵေႃႈ၊ ႁႂ်ႈမၼ်းမႃးတီႈၵဝ်ၼႆႉတႃႉ၊ ဝႃႈၼင်ႇၼႆသေယဝ်ႉ၊ ၵူၼ်းမဵဝ်း လေႇဝီႉ တင်းသဵင်ႈတင်းလူင်ဢွၼ်ၵၼ်မႃးၸူႉတုမ်ၵႃႈတီႈမၼ်းဢေႃႈ။-

27မၼ်းၵေႃႈလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ ၵူၼ်းမဵဝ်း ဢီႉသရေႇလႃႉ ၼၼ်ႉမီးဢမိင်ႉလႄႈဝႃႈ၊ ႁႂ်ႈၵူၼ်းၵူႈၵေႃႉဢဝ်လၢပ်ႇလႅဝ်း ပႃးသႂ်ႇၵႃႈတီႈဢႅဝ်ၶဝ်သေလႄႈ ၵႂႃႇၵႂႃႇမႃးမႃး ဢဝ်ၸႃႉၸဵမ်ၽၵ်းတူၼႃႈတပ်ႉၽၢႆႇၼိုင်ႈတေႃႇထိုင်ႁွတ်ႈၽၵ်းတူၼႃႈတပ်ႉၽၢႆႇၼိုင်ႈ ႁႂ်ႈသုတ်းႁႂ်ႈတိူၵ်ႈလႄႈ၊ ၵူႈၵေႃႉဢွၼ်ၵၼ်ဢဝ်ပီႈၼွင်ႉၶဝ်၊ ၵူႈၵေႃႉဢွၼ်ၵၼ်ဢဝ်ၵေႃႉသေႈၶဝ်၊ ၵူႈၵေႃႉဢွၼ်ၵၼ် ဢဝ်ၵူၼ်းႁိူၼ်းၸမ်ၵၼ်တင်းၶဝ်လႄႈဢဝ်တၢႆတႃႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

28ၵူၼ်းမဵဝ်း လေႇဝီႉ ၸိူဝ်းၼၼ်ႉၵေႃႈ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ် မူဝ်းသေႇ ၸီႇယၢင်ႇၼၼ်ႉလႄႈ၊ ၼႂ်းဝၼ်းၼၼ်ႉၼႂ်းၵူၼ်းတင်းလၢႆၼၼ်ႉ ၵူၼ်းသၢမ်ႁဵင်ၸမ်ၸမ်တၢႆဢေႃႈ။-

29ၵမ်းၼၼ်ႉ မူဝ်းသေႇ ၵေႃႈသမ်ႉလၢတ်ႈလႄႈဝႃႈ၊ လွင်ႈၼင်ႇႁိုဝ်ထႃႇဝရႃႉၽြႃးတၵ်းပၼ်တၢင်းလီတီႈသူ ၼႂ်းဝၼ်းမိူဝ်ႈၼႆႉၸိုင်၊ ဝၼ်းမိူဝ်ႈၼႆႉ သူဢွၼ်ၵၼ်ဢဝ်ႁႂ်ႈတဵမ်ၵမ်တဵမ်မိုဝ်းတူဝ်ၸဝ်ႈၵဝ်ႇဝႆႉပုၼ်ႈထႃႇဝရႃႉၽြႃး ၵွပ်ႈပိူဝ်ႈဢၼ်သူယူႇၽၢႆႇၼိုင်ႈ ႁဵတ်းၶတ်းၵၼ်တင်း လုၵ်ႈလၢင်းတူဝ်ၸဝ်ႈၵဝ်ႇ ဢိၵ်ႇတင်းပီႈၼွင်ႉတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းၼၼ်ႉတႃႉ၊ ဝႃႈၼင်ႇၼႆဢေႃႈ။

30ဝၼ်းမိူဝ်ႈၽုၵ်ႈၵေႃႈ မူဝ်းသေႇ လၢတ်ႈတီႈၵူၼ်းတင်းလၢႆလႄႈဝႃႈ၊ ဢပႅတ်ႈဢၼ်သူၽိတ်းပိူင်ႈၼႆႉ ယႂ်ႇၼႃႇလူင်လၢင်ဢေႃႈ။ တေႃႈလဵဝ်ၵဝ်တၵ်းၶိုၼ်ႈၸူးၵႃႈတီႈထႃႇဝရႃႉၽြႃးလႄႈ ပေႃးဢပႅတ်ႈသူလွတ်ႈလႆႈၸိုင်၊ တၵ်းႁဵတ်းႁႂ်ႈလွတ်ႈဢေႃႈ၊ ဝႃႈၼင်ႇၼႆသေယဝ်ႉ၊-

31မူဝ်းသေႇ သမ်ႉၶိုၼ်း ၶိုၼ်ႈၸူးၵႃႈတီႈထႃႇဝရႃႉၽြႃးလႄႈလဝ်ႊလၢတ်ႈဝႃႈ၊ ဢူဝ်းၸဝ်ႈႁဝ်း၊ ဢပႅတ်ႈဢၼ်ၵူၼ်းၸိူဝ်းၼႆႉ ၽိတ်းပိူင်ႈၼၼ်ႉ ယႂ်ႇၼႃႇလူင်လၢင်တီႈၶႃႈဢေႃႈ။ ၶဝ်ဢွၼ်ၵၼ်ႁဵတ်းၽြႃးၶမ်းပုၼ်ႈၶဝ်တီႈၶႃႈယဝ်ႉ။-

32ၵူၺ်းၵႃႈ ပေႃးၸဝ်ႈႁဝ်းမီးဢလူဝ်ႇၶႂ်ႈပွႆႇလွတ်ႈဢပႅတ်ႈၶဝ်ၸိုင်၊ ပွႆႇလွတ်ႈသေၵမ်းတီႈၶႃႈ။ ဢမ်ႇၼၼ်ၵေႃႈ ၶႅၼ်းတေႃႈမွတ်ႇပႅတ်ႈၼႃႇမႃႉၸိုဝ်ႈသဵင်ၶႃႈၸဝ်ႈသေၵႃႈၼႂ်းၸရၢင်းဢၼ်ၸဝ်ႈႁဝ်းၸီႇယၢင်ႇတႅမ်ႈဝႆႉၼၼ်ႉသေၵမ်းတီႈၶႃႈ၊ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

33ထႃႇဝရႃႉၽြႃးၵေႃႈ လၢတ်ႈတီႈ မူဝ်းသေႇ လႄႈဝႃႈ၊ ၽူႈလႂ်သေဢမ်ႇဝႃႈ၊ ၵေႃႉဢၼ်ၽိတ်းပိူင်ႈၵဝ်ၼႆႉၼၼ်ႉၸိုင်၊ ၵဝ်တၵ်းမွတ်ႇပႅတ်ႈ ၼႃႇမႃႉၸိုဝ်ႈသဵင်ၵေႃႉၼၼ်ႉသေၵႃႈၼႂ်းၸရၢင်းၵဝ်ဢေႃႈ။-

34တေႃႈလဵဝ်ၼႆႉ ၵႂႃႇလႄႈ ဢဝ်ၵူၼ်းတင်းလၢႆသူင်ႇၵႃႈတီႈဢၼ်ၵဝ်သင်ႇလၢတ်ႈဝႆႉၼၼ်ႉတႃႉ။ တမၢၼ်ႇၵဝ်တၵ်းဢွၼ်ႁူဝ်မႂ်းၵႂႃႇဢေႃႈ။ ၼႂ်းဝႃႈၼၼ်သေၵေႃႈ ၼႂ်းမိုဝ်ႉဝၼ်းဢၼ်ၵဝ်မႃးလူမႃးတူၺ်းၼၼ်ႉ ၵဝ်တၵ်းမႃးလႄႈပၼ်ဢပႅတ်ႈတီႈၶဝ်ဢေႃႈ၊ ဝႃႈၼင်ႇၼႆဢေႃႈ။-

35ထႃႇဝရႃႉၽြႃးပၼ်တၢမ်ႇတီႈၵူၼ်းတင်းလၢႆ ၵွပ်ႈပိူဝ်ႈဢၼ်ၶဝ်ႁဵတ်းဝူဝ်းဢွၼ်ႇဢၼ် ဢႃႇရုၼ်ႇ ႁဵတ်းၼၼ်ႉဢေႃႈ။

← Chapter 31 Jump to: Chapter 33 →