Exodus 13

Shan

← Chapter 12 Jump to: Chapter 14 →

1ထႃႇဝရႃႉၽြႃးမီးဢမိင်ႉတီႈ မူဝ်းသေႇ လႄႈဝႃႈ၊-

2ၼႂ်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ၊ ႁႂ်ႈၵႃႈဢၼ်ၵိူတ်ႇလဵင်ႉမႃးဢွၼ်တၢင်း၊ ပဵၼ်ၵူၼ်းသေဢမ်ႇဝႃႈ၊ ပဵၼ်တရိၵ်ႈသၢၼ်ႇသေဢမ်ႇဝႃႈ၊ လုၵ်ႈတူၼ်ႈၵႃႈမီးတင်းသဵင်ႈတင်းလူင် မူတ်းၸၢင်ႇပုၼ်ႈၵဝ်တႃႉ။ ပဵၼ်ဢုၵ်ႉၸႃႇၵဝ်ဢေႃႈ၊ ဝႃႈၼင်ႇၼႆဢေႃႈ။

3မူဝ်းသေႇ သမ်ႉလၢတ်ႈတီႈၵူၼ်းတင်းလၢႆလႄႈဝႃႈ၊ ဢွၼ်ၵၼ်ၶုၵ်းၸႂ်လႆႈၶႆႈၸႂ်ထူပ်း ဝၼ်းဢၼ်သူလႆႈဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ တီႈဢၼ်သူလႆႈၶၢမ်ႇႁဵတ်းၶႃႈၼၼ်ႉၵႂႃႇၼႆႉတႃႉ။ ထႃႇဝရႃႉၽြႃးဢဝ်တင်း မိုဝ်းဢၼ်ႁႅင်းယႂ်ႇၼႃႇ ၼုၵ်ႈဢဝ်သူဢွၵ်ႇသေ ၵႃႈၼႂ်းမိူင်းၼၼ်ႉယဝ်ႉ။ သူဢမ်ႇလႆႈၵိၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈ။-

4သူဢွၵ်ႇမႃးၼႂ်းလိူၼ် ဢပီႉပႃႉ ဝၼ်းၼႆႉယဝ်ႉ။

5မိူဝ်ႈဢၼ်ထႃႇဝရႃႉၽြႃးဢဝ်မႂ်းၵႂႃႇသူင်ႇၵႃႈတီႈမိူင်းတီႈယူႇၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ဢႃႇမေႃးရီႉ ၊ ၵူၼ်း ႁီႉဝီႉ ၊ ၵူၼ်း ယေႇပူႉသီႉ ၊ မိူင်းဢၼ်မၼ်းၸဝ်ႈတိူင်ႇတီႈပူႇမွၼ်ႇမႂ်းလႄႈဝႃႈ၊ တၵ်းပၼ်တီႈမႂ်း၊ ဝႃႈၼင်ႇၼႆ၊ မိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉယဝ်ႉၼၼ်ႉၸိုင်၊ မႂ်းတၵ်းလႆႈႁဵတ်းဝၢတ်ႈဢၼ်ၼႆႉ ၼႂ်းလိူၼ်လုၵ်ႈၼႆႉဢေႃႈ။-

6ၸဵတ်းဝၼ်းတဵမ်တဵမ်မႂ်းတၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈလႄႈ ၼႂ်းဝၼ်းဢၼ်ထူၼ်ႈထိုင်ၸဵတ်းဝၼ်းၼၼ်ႉ မႂ်းတၵ်းလႆႈၶၢမ်ႇပွႆးပုၼ်ႈထႃႇဝရႃႉၽြႃးဢေႃႈ။-

7တၵ်းလႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉၸဵတ်းဝၼ်းဢေႃႈ။ တီႈမႂ်းဢမ်ႇလႆႈထူပ်းလႆႈႁၼ်ၶဝ်ႈမုၼ်းဢၼ်ပႃးၸိူဝ်ႉပႅင်ႈလႃးလႃး။ ၵႃႈတီႈဢၼ်မႂ်းယူႇၵူႈတီႈၵူႈလႅၼ်ၼၼ်ႉၵေႃႈ ဢမ်ႇလႆႈထူပ်းလႆႈႁၼ်ၸိူဝ်ႉပႅင်ႈလႃးလႃး။

8ၼႂ်းဝၼ်းၼၼ်ႉ မႂ်းတၵ်းလႆႈမွၵ်ႇလၢတ်ႈတီႈလုၵ်ႈတီႈလၢၼ်မႂ်းလႄႈဝႃႈ၊ ဢၼ်ၼႆႉၸမ်ႉ၊ ပဵၼ်ၵွပ်ႈပိူဝ်ႈၵျေးၸူးဢၼ်ထႃႇဝရႃႉၽြႃး ႁဵတ်းၼႂ်းၶိင်ႇၵႃႇလႃႉ မိူဝ်ႈဢၼ်ႁဝ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉဢေႃႈ။

9ဢၼ်ၼႆႉတၵ်းလႆႈပဵၼ်လၢၵ်ႈၶၼႃႇသၢၵ်ႈသေႇၵႃႈတီႈမိုဝ်းမႂ်း တင်းပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်း ၼႂ်းၵႄႈဝူင်ႈၵၢင်မၢၵ်ႇတႃမႂ်း ႁႂ်ႈတြႃးထႃႇဝရႃႉၽြႃးလႆႈတႄႇယူႇၵႃႈၼႂ်းသူပ်းမႂ်းဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃး ဢဝ်တင်းမိုဝ်းဢၼ်ႁႅင်းယႂ်ႇၼႃႇလႄႈ ၼုၵ်ႈဢဝ်မႂ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉယဝ်ႉ။-

10ပိူဝ်ႈၼႆလႄႈ ပေႃးထိုင်ႁွတ်ႈၶိင်ႇမၼ်းၸိုင်၊ မႂ်းတၵ်းလႆႈပႂ်ႉၵမ်ပႂ်ႉၸွမ်းထုင်းၽိင်ႈတြႃးၼႆႉၵူႈပီႊတႃႇသေႇဢမ်ႇထၢတ်ႇဢေႃႈ။

11မိူဝ်ႈဢၼ်ထႃႇဝရႃႉၽြႃးဢဝ်မႂ်းၵႂႃႇသူင်ႇ မိူင်းၵူၼ်း ၶႃႇၼၼီႉ ၸွမ်းၵႃႈၼင်ႇဢၼ်မၼ်းၸဝ်ႈတိူင်ႇဝႃႈဝႆႉတီႈမႂ်း ဢိၵ်ႇတင်း ပူႇမွၼ်ႇမႂ်းၼၼ်ႉလႄႈ ဢဝ်မိူင်းၼၼ်ႉပၼ်တီႈမႂ်းယဝ်ႉၼၼ်ႉၸိုင်၊-

12မႂ်းတၵ်းလႆႈၽႄဢဝ်လုၵ်ႈၸၢႆးၵႃႈဢၼ်ၵိူတ်ႇလဵင်ႉမႃးဢွၼ်တၢင်းတီႈမႂ်းတင်းသဵင်ႈတင်းလူင် ဢိၵ်ႇတင်းလုၵ်ႈတူၼ်ႈတရိၵ်ႈသၢၼ်ႇ ဢၼ်မီးတီႈမႂ်းတင်းသဵင်ႈတင်းလူင်ၼၼ်ႉ ဝႆႉၶေႃၶေႃပုၼ်ႈထႃႇဝရႃႉၽြႃးဢေႃႈ။ ၵႃႈဢၼ်ပဵၼ်တူဝ်ပေႃႈတၵ်းလႆႈပဵၼ်ဢုၵ်ႉၸႃႇထႃႇဝရႃႉၽြႃးဢေႃႈ။-

13လုၵ်ႈတူၼ်ႈဢၼ်ၵိူတ်ႇလဵင်ႉမႃးဢွၼ်တၢင်းတီႈလီႈမႄႈၼၼ်ႉၸိုင်၊ မႂ်းတၵ်းလႆႈဢဝ်သူဝ်းဢွၼ်ႇထုတ်ႇဢဝ်ဢေႃႈ။ ပေႃးဢမ်ႇၶႂ်ႈထုတ်ႇဢဝ်ၸိုင်၊ မႂ်းတၵ်းလႆႈႁၵ်းၶေႃး လီႈဢွၼ်ႇၼၼ်ႉပႅတ်ႈဢေႃႈ။ ၵႃႈၼႂ်းလုၵ်ႈၸၢႆးၵူၼ်းတင်းလၢႆၸမ်ႉ၊ မႂ်းတၵ်းလႆႈထုတ်ႇဢဝ် လုၵ်ႈၸၢႆးတူၼ်ႈ တင်းသဵင်ႈတင်းလူင်ဢေႃႈ။

14ၶိင်ႇၵႃႇလႃႉၵမ်းလိုၼ်း၊ ပေႃးလုၵ်ႈၸၢႆးမႂ်းထၢမ်လႄႈဝႃႈ၊ ဢၼ်ၼႆႉပဵၼ်လွင်ႈၸိူဝ်ႉၼင်ႇႁိုဝ်။ ဝႃႈၼင်ႇၼႆၸိုင်၊ မႂ်းၶိုၼ်းလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃးဢဝ်တင်း မိုဝ်းဢၼ်ႁႅင်းယႂ်ႇၼႃႇ ၼုၵ်ႈဢဝ်ႁဝ်းဢွၵ်ႇသေ ၵႃႈၼႂ်းမိူင်း ဢေႇၵိပ်ႉတူႉ ၊ တီႈဢၼ်ႁဝ်းလႆႈၶၢမ်ႇႁဵတ်းၶႃႈၼၼ်ႉမႃးဢေႃႈ။-

15မိူဝ်ႈဢၼ်ၶုၼ်ႁေႃၶမ်း ၽႃႇရေႃး ဢမ်ႇပွႆႇႁဝ်းငၢႆႈငၢႆႈလႄႈယူႇၼၼ်ႉၸိုင်၊ ထႃႇဝရႃႉၽြႃး ဢဝ်လုၵ်ႈၸၢႆးတူၼ်ႈတင်းသဵင်ႈတင်းလူင်ဢၼ်ဝႃႈလုၵ်ႈတူၼ်ႈၵူၼ်း ဢိၵ်ႇတင်းလုၵ်ႈတူၼ်ႈတရိၵ်ႈသၢၼ်ႇၸိူဝ်းၼၼ်ႉတၢႆပႅတ်ႈၵႃႈၼႂ်းမိူင်း ဢေႇၵိပ်ႉတူႉ ဢေႃႈ။ ပိူဝ်ႈၼႆလႄႈ ၵဝ်တၵ်းလႆႈဢဝ်တူဝ်ပေႃႈတရိၵ်ႈသၢၼ်ႇဢၼ်ၵိူတ်ႇလဵင်ႉမႃးဢွၼ်တၢင်းၵႃႈမီးတင်းသဵင်ႈတင်းလူင် ပုၵ်ႈၸေႃႇတီႈ ထႃႇဝရႃႉၽြႃးဢေႃႈ။ ၵႃႈၼႂ်းလုၵ်ႈလၢင်းတူဝ်ၸဝ်ႈၵဝ်ႇတင်းလၢႆၼၼ်ႉၸမ်ႉ၊ ၵဝ်တၵ်းလႆႈထုတ်ႇဢဝ်လုၵ်ႈၸၢႆးတူၼ်ႈဢေႃႈ၊ ဝႃႈၼင်ႇၼႆတႃႉ။-

16ဢၼ်ၼႆႉၵေႃႈ တၵ်းလႆႈပဵၼ်လၢၵ်ႈၶၼႃႇသၢၵ်ႈသေႇ ၵႃႈတီႈမိူင်းမႂ်း၊ ၶိူင်ႈဢၼ်ဝႆႉၵႃႈတီႈၵႄႈဝူင်ႈၵၢင် မၢၵ်ႇတႃမႂ်းဢေႃႈ။ လွင်ႈမၼ်းၸမ်ႉ၊ ထႃႇဝရႃႉၽြႃးဢဝ်တင်းမိုဝ်းဢၼ်ႁႅင်းယႂ်ႇၼႃႇလႄႈ ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

17ဝၢႆးသေၶုၼ်ႁေႃၶမ်း ၽႃႇရေႃး ပွႆႇၵူၼ်းၸိူဝ်းၼၼ်ႉၵႂႃႇယဝ်ႉၼၼ်ႉ၊ ပိၵ်ႉသမ်ႉသဵၼ်ႈတၢင်းဢၼ်ၽႃႇလတ်းၵႃႈၼႂ်း မိူင်း ၽီႉလိတ်ႉတီႉ ၵႂႃႇၼၼ်ႉ သိုဝ်ႈလီသေၵေႃႈ၊ ၽြႃးပဵၼ်ၸဝ်ႈဢမ်ႇဢဝ်ၶဝ်ၵႂႃႇသဵၼ်ႈတၢင်းၼၼ်ႉ။ လွင်ႈမၼ်းၸမ်ႉ ၽြႃးပဵၼ်ၸဝ်ႈဝႃႈ၊ ၵူဝ်ၵူၼ်းတင်းလၢႆၸႂ်တၵ်းလူႉ ၼႂ်းမိူဝ်ႈဢၼ်ၶဝ်ထူပ်းႁၼ်ဢမူႉသိုၵ်းၼၼ်ႉလႄႈ ၶဝ်တၵ်းၶိုၼ်းမိူဝ်းၵႂႃႇၸူးၵႃႈတီႈ မိူင်း ဢေႇၵိပ်ႉတူႉ သေဢေႃႈ၊ ဝႃႈၼင်ႇၼႆဢေႃႈ။-

18ပိူဝ်ႈၼႆလႄႈ ၽြႃးပဵၼ်ၸဝ်ႈဢဝ်ၶဝ်လဵပ်ႈၵႂႃႇသဵၼ်ႈတၢင်းထိူၼ်ႇ ၵႃႈတီႈႁိမ်းပၢင်ႇလၢႆႇ ဢေႇတုမ်ႇ ဢေႃႈ။ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ မႄးႁႅၼ်းၶၢင်းတပ်ႉၶၢင်းငႃးသေလႄႈ ဢွၼ်ၵၼ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉၵႂႃႇဢေႃႈ။-

19မိူဝ်ႈၶိင်ႇၵႃႇလႃႉဢွၼ်တၢင်းၼၼ်ႉ၊ ပိူဝ်ႈဢၼ် ယူဝ်းသႅပ်ႈ ႁႂ်ႈၵူၼ်းမဵဝ်း ဢီႉသရေႇလႃႉ ၵိၼ်ႇဝႃႈၼႃႇလူင်လၢင်လႄႈဝႃႈ၊ ၽြႃးပဵၼ်ၸဝ်ႈ တၵ်းမႃးလူမႃးတူၺ်းသူဢမၢၼ်ႇၶၼ်ပဵၼ်ဢေႃႈ။ သူတၵ်းလႆႈဢဝ်လုပ်ႇၵဝ်ၶႃႈ ဢွၵ်ႇသေၵႃႈတီႈၼႆႈၵႂႃႇဢေႃႈ၊ ဝႃႈၼင်ႇၼႆဝႆႉလႄႈ မူဝ်းသေႇ ဢဝ်လုပ်ႇမၼ်းၸိူဝ်းၼၼ်ႉ ပႃးၵႂႃႇလူၺ်ႈၵၼ်တင်းမၼ်းဢေႃႈ။-

20ၵမ်းၼၼ်ႉ ၶဝ်ဢွၵ်ႇသေၵႃႈတီႈ သူႉၵုတ်ႉ ၵႂႃႇလႄႈ ၶျႃးပၢင်ၵႃႈတီႈဝဵင်း ဢေးသမ်ႇ ၵႃႈႁိမ်းထိူၼ်ႇဢေႃႈ။-

21ထႃႇဝရႃႉၽြႃးၼၼ်ႉ ၵႃႈတီႈၶိင်ႇၵၢင်ဝၼ်းၸမ်ႉ၊ ဢဝ်တင်းသဝ်မွၵ်ႇၵုမ်ႈ ပုၼ်ႈဢၼ်တၵ်းၼႄတၢင်းတီႈၶဝ်၊ ၵႃႈတီႈၶိင်ႇၵၢင်ၶိုၼ်းၸမ်ႉ၊ ဢဝ်တင်းသဝ်ၽႆးပုၼ်ႈဢၼ်တၵ်းပၼ်ဢၼ်လႅင်းတီႈၶဝ်သေလႄႈ ၵႂႃႇဢွၼ်တၢင်းၶဝ် ႁႂ်ႈၶဝ်လႆႈၵႂႃႇၵႃဝၼ်း ဢိၵ်ႇတင်း ၵႃၶိုၼ်းလႆႈဢေႃႈ။-

22မၼ်းၸဝ်ႈဢမ်ႇသိမ်းဢဝ်သဝ်မွၵ်ႇၵုမ်ႈ ၵႃႈတီႈၶိင်ႇၵၢင်ဝၼ်း သဝ်ၽႆးၵႃႈတီႈၶိင်ႇၵၢင်ၶိုၼ်းၼၼ်ႉသေၵႃႈတီႈၶဝ်။

← Chapter 12 Jump to: Chapter 14 →