Exodus 7

Shan

← Chapter 6 Jump to: Chapter 8 →

1ထႃႇဝရႃႉၽြႃးလၢတ်ႈတီႈ မူဝ်းသေႇ လႄႈဝႃႈ၊ တူၺ်းလူး၊ ၵဝ်ၶၢၼ်းမႂ်းဝႆႉၼႂ်းဢရႃႇၽြႃးပဵၼ်ၸဝ်ႈ တီႈၶုၼ်ႁေႃၶမ်း ၽႃႇရေႃး ဢေႃႈ။ ပီႈၸၢႆးမႂ်း ဢႃႇရုၼ်ႇ ၼၼ်ႉ တၵ်းလႆႈပဵၼ်ပရေႃးၽႅတ်ႈမႂ်းဢေႃႈ။-

2မႂ်းတၵ်းလႆႈၶိုၼ်းလၢတ်ႈၵႃႈဢၼ်ၵဝ်သင်ႇလၢတ်ႈဝႆႉၼၼ်ႉဢေႃႈ။ ပီႈၸၢႆးမႂ်း ဢႃႇရုၼ်ႇ ၼၼ်ႉ တၵ်းလႆႈလဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး ႁႂ်ႈမၼ်းပွႆႇၵူၼ်းမဵဝ်း ဢီႉသရေႇလႃႉ ဢွၵ်ႇသေၵႃႈၼႂ်းမိူင်းမၼ်းၵႂႃႇဢေႃႈ။-

3ၵဝ်တၵ်းႁႂ်ႈ ႁူဝ်ၸႂ်ၶုၼ်ႁေႃၶမ်း ၽႃႇရေႃး ၵႅၼ်ႇၶႅင်လႄႈ ႁႂ်ႈၼီႉမိၵ်ႈလၢၵ်ႈၶၼႃႇၵဝ်ဢိၵ်ႇတင်း လွင်ႈတၢင်းဢၼ်လီဢၢမ်းၵဝ်တင်းလၢႆ ၼမ်မႃးၵိုၼ်းမႃးၵႃႈၼႂ်းမိူင်း ဢေႇၵိပ်ႉတူႉ ဢေႃႈ။-

4ၼႂ်းဝႃႈၼၼ်သေၵေႃႈ ၶုၼ်ႁေႃၶမ်း ၽႃႇရေႃး ယင်းဢမ်ႇထွမ်ႇဢမ်ႇဢဝ်ၵႂၢမ်းသူလႄႈ တၵ်းယူႇဢေႃႈ။ ၵဝ်တၵ်းဢဝ်မိုဝ်းၵဝ်တၢင်ႇသႂ်ႇ ၵႃႈၼိူဝ်မိူင်း ဢေႇၵိပ်ႉတူႉ လႄႈ ဢဝ်တင်း တၢင်းဢၼ်ပၼ်တၢမ်ႇၼမ်ၼႃႇ ၼုၵ်ႈဢဝ်ပူဝ်ႇပႃႇၵဝ်ဢၼ်ပဵၼ်ၵူၼ်းၵဝ် ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ဢေႃႈ။-

5မိူဝ်ႈဢၼ်ၵဝ်ယိုၼ်းမိုဝ်းၵဝ်ၵႃႈၼိူဝ်မိူင်း ဢေႇၵိပ်ႉတူႉ ၸိူဝ်ႉၼင်ႇၼၼ်လႄႈ ၼုၵ်ႈဢဝ်ၵူၼ်းမဵဝ်း ဢီႉသရေႇလႃႉ ဢွၵ်ႇသေၵႃႈၼႂ်းၶဝ်ၼၼ်ႉၸိုင်၊ ၵူၼ်း ဢေႇၵိပ်ႉတူႉ တင်းလၢႆတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉဢေႃႈ၊ ဝႃႈၼင်ႇၼႆဢေႃႈ။-

6မူဝ်းသေႇ တင်း ဢႃႇရုၼ်ႇ ႁဵတ်းၸိူဝ်ႉၼင်ႇၼၼ်လႄႈၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉဢေႃႈ။-

7မိူဝ်ႈဢၼ်သွင်ၶႃလဝ်ႊလၢတ်ႈတီႈၶုၼ်ႁေႃၶမ်း ၽႃႇရေႃး ၼၼ်ႉၸိုင်၊ ဢသၢၵ်ႈ မူဝ်းသေႇ လႆႈပႅတ်ႇသိပ်းပီႊဢေႃႈ။ ဢသၢၵ်ႈ ဢႃႇရုၼ်ႇ ၵေႃႈ လႆႈပႅတ်ႇသိပ်းပၢႆသၢမ်ပီႊဢေႃႈ။

8ၵမ်းၼၼ်ႉ ထႃႇဝရႃႉၽြႃးလၢတ်ႈတီႈ မူဝ်းသေႇ တင်း ဢႃႇရုၼ်ႇ လႄႈဝႃႈၸမ်ႉ၊-

9မိူဝ်ႈဢၼ်ၶုၼ်ႁေႃၶမ်း ၽႃႇရေႃး လၢတ်ႈတီႈသူလႄႈဝႃႈ၊ ၼႄပျႃးလွင်ႈတၢင်းဢၼ်လီဢၢမ်းသေၸိူဝ်ႉသေပိူင်ပုၼ်ႈသူတႃႉ၊ ဝႃႈၼင်ႇၼႆၼၼ်ႉၸိုင်၊ လၢတ်ႈတီႈ ဢႃႇရုၼ်ႇ လႄႈဝႃႈ၊ ဢဝ်ၶွၼ်ႉတဝ်ႉမႂ်းလႄႈၶျႃးတူၵ်းသႂ်ႇၵႃႈတီႈၽၢႆႇၼႃႈ ၶုၼ်ႁေႃၶမ်း ၽႃႇရေႃး တႃႉ၊ ဝႃႈၼင်ႇၼႆတႃႉ။ ၶွၼ်ႉတဝ်ႉၼၼ်ႉၵေႃႈ တၵ်းပဵၼ်ငူးၵႂႃႇယဝ်ႉ၊ ဝႃႈၼင်ႇၼႆဢေႃႈ။-

10မူဝ်းသေႇ တင်း ဢႃႇရုၼ်ႇ ၶဝ်ႈၸူးၵႃႈတီႈၶုၼ်ႁေႃၶမ်း ၽႃႇရေႃး လႄႈ ႁဵတ်းၸိူဝ်ႉၼင်ႇၼၼ် ၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။ ဢႃႇရုၼ်ႇ ဢဝ်ၶွၼ်ႉတဝ်ႉမၼ်းၶျႃးတူၵ်းသႂ်ႇ ၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး ဢိၵ်ႇတင်း ၵႃႈတီႈၽၢႆႇၼႃႈၶႃႈမၼ်းၵူၼ်းမၼ်းတင်းလၢႆၼၼ်ႉလႄႈ ပဵၼ်ငူးၵႂႃႇဢေႃႈ။-

11မိူဝ်ႈၼၼ်ႉ ၶုၼ်ႁေႃၶမ်း ၽႃႇရေႃး ႁွင်ႉဢဝ်ပိင်ႇၺႃႇသီႉဢိၵ်ႇတင်းၶဝ်ၸိူဝ်းဢၼ်ၸၢင်ႈၸေႃႉၸၢင်ႈႁဵတ်းတင်းလၢႆၼၼ်ႉလႄႈ သြႃႇဝိၵ်ႉၸႃႇၵႃႈၼႂ်းမဵဝ်းၵူၼ်း ဢေႇၵိပ်ႉတူႉ ၸိူဝ်းၼၼ်ႉ ဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇၶဝ်ႁဵတ်း မိူၼ်ၸိူဝ်ႉၼင်ႇၼၼ်လႄႈ၊-

12ဢွၼ်ၵၼ်ဢဝ်ၶွၼ်ႉတဝ်ႉဢၼ်ၶဝ်ယိပ်းၵမ်ၸိူဝ်းၼၼ်ႉၶျႃးတူၵ်းသေယဝ်ႉ၊ ပဵၼ်ငူးၵႂႃႇဢေႃႈ။ ၵူၺ်းၵႃႈ ၶွၼ်ႉတဝ်ႉ ဢႃႇရုၼ်ႇ ၼၼ်ႉဢိုၼ်ၵိၼ်ၶွၼ်ႉတဝ်ႉၶဝ်ၸိူဝ်းၼၼ်ႉပႅတ်ႈသေဢေႃႈ။-

13ၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉ၊ ႁူဝ်ၸႂ်ၶုၼ်ႁေႃၶမ်း ၽႃႇရေႃး ၼၼ်ႉ ၵႅၼ်ႇၶႅင်လႄႈ မၼ်းယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်ၼၼ်ႉလႄႈယူႇဢေႃႈ။

14ထႃႇဝရႃႉၽြႃးၵေႃႈလၢတ်ႈတီႈ မူဝ်းသေႇ လႄႈဝႃႈ၊ ၶုၼ်ႁေႃၶမ်း ၽႃႇရေႃး ၼၼ်ႉ ၸႂ်ၼၵ်းၸႂ်ၼႃလႄႈယင်းဢမ်ႇပွႆႇၵူၼ်းၸိူဝ်းၼၼ်ႉၵႂႃႇလႄႈယူႇယဝ်ႉ။-

15ၶိင်ႇၵၢင်ၼႂ်ၵႂႃႇၸူးၵႃႈတီႈၶုၼ်ႁေႃၶမ်း ၽႃႇရေႃး တႃႉ။ မၼ်းတၵ်းၵႂႃႇၵႃႈတီႈတိုဝ်ႉၼမ်ႉဢေႃႈ။ ၸုၵ်းယူႇၵႃႈတီႈႁိမ်းၽင်ႇၼမ်ႉႁွင်ႈၼၼ်ႉ ႁႂ်ႈလႆႈႁူပ်ႉထူပ်းမၼ်းတႃႉ။ ၶွၼ်ႉတဝ်ႉဢၼ်ပဵၼ်ငူးၵႂႃႇၼၼ်ႉၵေႃႈ ယိပ်းၵမ်ဝႆႉၵႃႈၼႂ်းမိုဝ်းမႂ်းတႃႉ။-

16မႂ်းတၵ်းလႆႈလၢတ်ႈတီႈမၼ်းလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈၵူၼ်း ႁေႇပြႄး တင်းလၢႆၼၼ်ႉပွႆႇၸႂ်ႉၶႃႈၸဝ်ႈမႃး ၵႃႈတီႈၸဝ်ႈႁဝ်းလႄႈ သင်ႇလၢတ်ႈဝႃႈ၊ ပွႆႇၵူၼ်းၵဝ်တင်းလၢႆၵႂႃႇ ႁႂ်ႈၶဝ်လႆႈႁဵတ်းဝၢတ်ႈတီႈၵဝ်ၵႃႈၼႂ်းထိူၼ်ႇပုၼ်ႉတႃႉ၊ ဝႃႈၼင်ႇၼႆတီႈၶႃႈယဝ်ႉ။ ၵူၺ်းၵႃႈ ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ ၸဝ်ႈႁဝ်းယင်းဢမ်ႇထွမ်ႇလႄႈယူႇလူင်ပႄႇ။-

17ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ မႂ်းတၵ်းႁူႉလွင်ႈဢၼ်ၵဝ်ပဵၼ်ထႃႇဝရႃႉၽြႃးၼၼ်ႉၸိူဝ်ႉၼင်ႇႁိုဝ် ဝႃႈၼႆၸမ်ႉ၊ ၵဝ်တၵ်းဢဝ်တင်းၶွၼ်ႉတဝ်ႉဢၼ်ၵဝ်ယိပ်းၵမ်ဝႆႉၼႆႉ ပေႃႉယႅၼ်ႉၼမ်ႉဢၼ်မီးၵႃႈၼႂ်းၼမ်ႉႁွင်ႈလႄႈၼမ်ႉၼၼ်ႉတၵ်းပဵၼ်လိူတ်ႈၵႂႃႇဢေႃႈ။-

18ပႃဢၼ်မီးၵႃႈၼႂ်းၼမ်ႉႁွင်ႈၸိူဝ်းၼၼ်ႉတၵ်းတၢႆဢေႃႈ။ ၼမ်ႉၵႃႈၼႂ်းၼမ်ႉႁွင်ႈၼၼ်ႉၵေႃႈ တၵ်းမဵၼ်တူႇၵႂႃႇဢေႃႈ။ ၵူၼ်း ဢေႇၵိပ်ႉတူႉ တင်းလၢႆၵေႃႈ တၵ်းလီႁင်ႈဢဵတ်ႇသဵတ်ႇ လွင်ႈဢၼ်ၵိၼ်ၼမ်ႉဢၼ်မီးၵႃႈၼႂ်းၼမ်ႉႁွင်ႈၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

19ၵမ်းၼၼ်ႉ ထႃႇဝရႃႉၽြႃးသမ်ႉလၢတ်ႈတီႈ မူဝ်းသေႇ လႄႈဝႃႈၸမ်ႉ၊ လၢတ်ႈတီႈ ဢႃႇရုၼ်ႇ လႄႈဝႃႈ၊ ဢဝ်ၶွၼ်ႉတဝ်ႉမႂ်းလႄႈယိုၼ်းမိုဝ်းမႂ်းၵႃႈၼိူဝ်ၼမ်ႉ ၵႃႈဢၼ်မီးၵႃႈၼႂ်းမိူင်း ဢေႇၵိပ်ႉတူႉ ဢၼ်ဝႃႈၼမ်ႉႁွင်ႈလႂ်၊ ၼမ်ႉၵႄးလႂ်၊ ၼမ်ႉၼႂ်းၼွင်လႂ်၊ ၼမ်ႉယိုင်ႈလႂ်ၼၼ်ႉတႃႉ။ ၼမ်ႉၸိူဝ်းၼၼ်ႉၵႃႈမီးတင်းသဵင်ႈတင်းလူင်တၵ်းပဵၼ်လိူတ်ႈၵႂႃႇဢေႃႈ။ ၵႃႈတီႈမိူင်း ဢေႇၵိပ်ႉတူႉ ၵူႈတီႈၵူႈလႅၼ် ၵႃႈၼႂ်းၵွၵ်းမႆႉလႂ် ဢိၵ်ႇတင်းၵႃႈၼႂ်းမေႃႈမၢၵ်ႇႁိၼ်လႂ်၊ တၵ်းပဵၼ်လိူတ်ႈၵႂႃႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

20မူဝ်းသေႇ တင်း ဢႃႇရုၼ်ႇ ႁဵတ်းၸိူဝ်ႉၼင်ႇၼၼ် ၸွမ်းၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉလႄႈ မၼ်းၼၼ်ႉယုၵ်ႉၶွၼ်ႉတဝ်ႉပေႃႉယႅၼ်ႉၼမ်ႉၵႃႈၼႂ်းၼမ်ႉႁွင်ႈၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး ဢိၵ်ႇတင်းၵႃႈတီႈၽၢႆႇၼႃႈၶႃႈမၼ်းၵူၼ်းမၼ်းတင်းလၢႆလႄႈ ၼမ်ႉၵႃႈဢၼ်မီး ၵႃႈၼႂ်းၼမ်ႉႁွင်ႈၸိူဝ်းၼၼ်ႉပဵၼ်လိူတ်ႈၵႂႃႇဢေႃႈ။-

21ပႃဢၼ်မီးၵႃႈၼႂ်းၼမ်ႉႁွင်ႈၼၼ်ႉၸိူဝ်းၼၼ်ႉတၢႆဢေႃႈ။ ၼမ်ႉၵႃႈၼႂ်းၼမ်ႉႁွင်ႈၼၼ်ႉၵေႃႈမဵၼ်တူႇၵႂႃႇဢေႃႈ။ ၵူၼ်း ဢေႇၵိပ်ႉတူႉ တင်းလၢႆၵေႃႈဢမ်ႇၵိၼ်ၼမ်ႉၵႃႈၼႂ်းၼမ်ႉႁွင်ႈၼၼ်ႉလႆႈ။ ၵႃႈၼႂ်းမိူင်း ဢေႇၵိပ်ႉတူႉ ၼၼ်ႉပဵၼ်လိူတ်ႈၸွတ်ႇတူဝ်ႈၵႂႃႇၵူႈတီႈၵူႈလႅၼ်ဢေႃႈ။-

22သြႃႇဝိၵ်ႉၸႃႇၵႃႈၼႂ်းၵူၼ်းမဵဝ်း ဢေႇၵိပ်ႉတူႉ ၸိူဝ်းၼၼ်ႉ ဢွၼ်ၵၼ်ဢဝ်တင်းဢတၢတ်ႈဝိၵ်ႉၸႃႇၶဝ်ႁဵတ်းမိူၼ်ၸိူဝ်ႉၼင်ႇၼၼ်ဢေႃႈ။ ၶုၼ်ႁေႃၶမ်း ၽႃႇရေႃး ႁူဝ်ၸႂ်ၵႅၼ်ႇၶႅင်လႄႈယင်းဢမ်ႇထွမ်ႇဢမ်ႇဢဝ်ၵႂၢမ်းၶဝ်လႄႈ ယူႇမႅၼ်ႈၵႃႈၼင်ႇဢၼ်ထႃႇဝရႃႉၽြႃးလၢတ်ႈဝႆႉၼၼ်ႉဢေႃႈ။-

23ၶုၼ်ႁေႃၶမ်း ၽႃႇရေႃး ဝၢႆႇၶိုၼ်းမိူဝ်းၵႂႃႇၵႃႈတီႈႁေႃၶမ်းလႄႈ ယင်းဢမ်ႇဢဝ်လွင်ႈတၢင်းၼၼ်ႉသႂၢင်းဝႆႉၵႃႈၼႂ်းႁူဝ်ၸႂ်လႄႈယူႇဢေႃႈ။-

24မိူဝ်ႈၼၼ်ႉၵူၼ်း ဢေႇၵိပ်ႉတူႉ တင်းသဵင်ႈတင်းလူင် ပိူဝ်ႈဢၼ်ဢမ်ႇၵိၼ်ၼမ်ႉၵႃႈၼႂ်းၼမ်ႉႁွင်ႈၼၼ်ႉလႆႈလႄႈ၊ ဢွၼ်ၵၼ်ၶုတ်း ၵႃႈတီႈႁိမ်းၼမ်ႉႁွင်ႈ ႁႂ်ႈလႆႈၼမ်ႉပုၼ်ႈဢၼ်တၵ်းၵိၼ်ဢေႃႈ။-

25ထႃႇဝရႃႉၽြႃးပၼ်တၢမ်ႇၼမ်ႉႁွင်ႈလႄႈ ႁႂ်ႈထူၼ်ႈတဵမ်ၸဵတ်းဝၼ်းဢေႃႈ။

← Chapter 6 Jump to: Chapter 8 →