Exodus 3

Shan

← Chapter 2 Jump to: Chapter 4 →

1မူဝ်းသေႇ ၼၼ်ႉ ၼႂ်းမိူဝ်ႈဢၼ်လဵင်ႉထိင်းၽုင်သူဝ်းၽုင်ပႄႉပူႇၼၢႆးမၼ်း ယေႇသရေႃး ယိတ်ႈပရေႃးႁဵၵ်ႈမိူင်း မီႉတျၼ်ႇ ယူႇၼၼ်ႉၸိုင်၊ ဢဝ်ၵႂႃႇၵႃႈတီႈၽၢႆႇတၢင်းလင်ထိူၼ်ႇလႄႈႁွတ်ႈထိုင်ၵႃႈတီႈလွႆၽြႃးပဵၼ်ၸဝ်ႈ ဢၼ်လႆႈၸိုဝ်ႈ ႁေႃးရပ်ႉ ၼၼ်ႉဢေႃႈ။-

2မိူဝ်ႈၼၼ်ႉ တမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈမၼ်း ၵႃႈၼႂ်းပဵဝ်ၽႆးဢၼ်ဢွၵ်ႇၵႃႈၼႂ်းယုမ်းမႆႉဢေႃႈ။ မူဝ်းသေႇ ၼၼ်ႉ လူတူၺ်းလႄႈႁၼ်ယုမ်းမႆႉ မႆႈၽႆးယူႇလႄႈ ယုမ်းမႆႉၼၼ်ႉဢမ်ႇၶႅမ်ႈဢမ်ႇသုတ်းၼၼ်ႉသေလႄႈဝႃႈ၊-

3ၵဝ်တၵ်းဝႄႉၵႂႃႇလူတူၺ်းရူႇပႃႇရူင်ႇဢၼ်လၢၵ်ႇလၢႆးၼႆႉ၊ ဢၼ်ယုမ်းမႆႉ ဢမ်ႇၶႅမ်ႈဢမ်ႇသုတ်းၵွပ်ႈပိူဝ်ႈၸိူဝ်ႉၼင်ႇႁိုဝ်ၼၼ်ႉလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။-

4ထႃႇဝရႃႉၽြႃးႁၼ်လွင်ႈဢၼ်မၼ်းဝႄႉၵႂႃႇ လူတူၺ်းၼၼ်ႉသေယဝ်ႉ၊ ၽြႃးပဵၼ်ၸဝ်ႈယူႇၵႃႈၼႂ်းယုမ်းမႆႉၼၼ်ႉ ႁွင်ႉတီႈမၼ်းလႄႈဝႃႈ၊ မူဝ်းသေႇ ဢိူၺ်း၊ မူဝ်းသေႇ ဢိူၺ်း၊ ဝႃႈၼင်ႇၼႆဢေႃႈ။ မၼ်းၵေႃႈလဝ်ႊလၢတ်ႈလႄႈဝႃႈ၊ ၶႃႈၸဝ်ႈမီးယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

5မၼ်းၸဝ်ႈၵေႃႈလၢတ်ႈလႄႈဝႃႈ၊ ယႃႇပေသုတ်ႉမႃးၸမ်၊ ထွတ်ႇၶႅပ်းတိၼ်သေၵႃႈတိၼ်မႂ်းတႃႉ။ တီႈဢၼ်မႂ်းယဵပ်ႇယူႇၼၼ်ႉၸမ်ႉ၊ ပဵၼ်လိၼ်ဢၼ်မူတ်းၸၢင်ႇဢေႃႈ၊ ဝႃႈၼင်ႇၼႆဢေႃႈ။-

6မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ ၵဝ်ပဵၼ်ၽြႃးပေႃႈမႂ်း၊ ၽြႃး ဢႃႇပြႃႇႁၢမ်ႇ ၊ ၽြႃး ဢီႉၸၢၵ်ႈ ၊ ၽြႃး ယႃႇၵုပ်ႈ ၸိူဝ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။ မူဝ်းသေႇ ၼၼ်ႉပိူဝ်ႈဢၼ်ဢမ်ႇႁတ်းလူတူၺ်းၽြႃးပဵၼ်ၸဝ်ႈလႄႈ ႁူမ်ႇၼႃႈမၼ်းဝႆႉဢေႃႈ။

7ထႃႇဝရႃႉၽြႃးၵေႃႈလၢတ်ႈလႄႈဝႃႈ၊ ၵဝ်လႆႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်ၵူၼ်းၵဝ်တင်းလၢႆဢၼ်မီးယူႇၵႃႈတီႈမိူင်း ဢေႇၵိပ်ႉတူႉ ပုၼ်ႉ လႆႈၶၢမ်ႇၼၼ်ႉလႄႈလႆႈငိၼ်းသဵင် ဢၼ်ၶဝ်ပွင်ႉၶၢင်းပွင်ႉမိူၼ်ႇၵွပ်ႈပိူဝ်ႈၵူၼ်းဢၼ်ဢုပ်ႉဢၼ်ထိင်းၶဝ်ၸိူဝ်းၼၼ်ႉယဝ်ႉ။ လွင်ႈမၼ်းၸမ်ႉ ၵဝ်ႁူႉဝူၺ်ႇတၼႃႇ တၢင်းဢၼ်ၶဝ်ၸဵပ်းၸႂ်ၼၼ်ႉယူႇဢေႃႈ။-

8ၵဝ်လူင်းမႃးႁႂ်ႈလႆႈၵႄႇၶျွတ်ႈဢဝ်ၶဝ်သေၵႃႈၼႂ်းမိုဝ်းၵူၼ်း ဢေႇၵိပ်ႉတူႉ တင်းလၢႆလႄႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၵႂႃႇသူင်ႇၵႃႈတီႈမိူင်းဢၼ်လီဢၼ်ငၢမ်း၊ ဢၼ်ယႂ်ႇဢၼ်ၵႂၢင်ႈ၊ ဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇ၊ တီႈယူႇၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ဢႃႇမေႃးရီႉ ၊ ၵူၼ်း ၽေႇရၸီႉ ၊ ၵူၼ်း ႁီႉဝီႉ ၊ ၵူၼ်း ယေႇပူႉသီႉ ၸိူဝ်းၼၼ်ႉယဝ်ႉ။-

9တေႃႈလဵဝ်ၼႆႉၵေႃႈ၊ သဵင်ဢၼ်ၵူၼ်းမဵဝ်း ဢီႉသရေႇလႃႉ တင်းလၢႆႁွင်ႉသႅၼ်ႇႁွင်ႉႁႆႈၼၼ်ႉ ၶိုၼ်ႈႁွတ်ႈၶိုၼ်ႈထိုင်ၵႃႈတီႈၵဝ်လႄႈ ၵဝ်လႆႈႁၼ်လွင်ႈတၢင်းဢၼ် ၵူၼ်း ဢေႇၵိပ်ႉတူႉ တင်းလၢႆ ၼိၵ်ႈၸၢၵ်ႈငႅၼ်းသႄးၶဝ်ၼၼ်ႉယဝ်ႉ။-

10ပိူဝ်ႈၼႆလႄႈ တေႃႈလဵဝ်ၼႆႉၵႂႃႇတႃႉ။ ၵဝ်တၵ်းပွႆႇၸႂ်ႉမႂ်း ၵႂႃႇၵႃႈတီႈၶုၼ်ႁေႃၶမ်း ၽႃႇရေႃး ပုၼ်ႉ ႁႂ်ႈမႂ်းလႆႈၼုၵ်ႈဢဝ်ၵူၼ်းၵဝ်ဢၼ်ဝႃႈမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ဢေႃႈ၊ ဝႃႈၼင်ႇၼႆဢေႃႈ။

11မူဝ်းသေႇ ၵေႃႈလဝ်ႊလၢတ်ႈတီႈၽြႃးပဵၼ်ၸဝ်ႈလႄႈဝႃႈ၊ လွင်ႈၼင်ႇႁိုဝ်ၶႃႈၸဝ်ႈတၵ်းလႆႈၶဝ်ႈၸူးၵႃႈတီႈၶုၼ်ႁေႃၶမ်း ၽႃႇရေႃး ဢိၵ်ႇတင်းလွင်ႈၼင်ႇႁိုဝ် ၶႃႈၸဝ်ႈတၵ်းလႆႈၼုၵ်ႈဢဝ် ၵူၼ်းမဵဝ်း ဢီႉသရေႇလႃႉ တင်းလၢႆ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ၼၼ်ႉၸိုင်၊ ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။-

12မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်တၵ်းမီးယူႇလူၺ်ႈၵၼ်တင်းမႂ်းဢမၢၼ်ႇၶၼ်ပဵၼ်ဢေႃႈ။ လၢၵ်ႈၶၼႃႇသၢၵ်ႈသေႇဢၼ်ၵဝ်ပွႆႇၸႂ်ႉမႂ်းၵႂႃႇၼႆႉၸမ်ႉ၊ မႂ်းၼုၵ်ႈဢဝ်ၵူၼ်းၸိူဝ်းၼၼ်ႉဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ သေယဝ်ႉ၊ မႂ်းတၵ်းလႆႈႁဵတ်းဝၢတ်ႈတီႈၽြႃးပဵၼ်ၸဝ်ႈ ၵႃႈၼိူဝ်လွႆၼႆႉဢေႃႈ၊ ဝႃႈၼင်ႇၼႆဢေႃႈ။-

13မူဝ်းသေႇ ၵေႃႈ ထၢမ်တီႈၽြႃးပဵၼ်ၸဝ်ႈလႄႈဝႃႈ၊ မိူဝ်ႈဢၼ်ၶႃႈၸဝ်ႈႁွတ်ႈထိုင် ၵႃႈတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ လၢတ်ႈတီႈၶဝ်လႄႈဝႃႈ၊ ၽြႃးပဵၼ်ၸဝ်ႈပူႇမွၼ်ႇသူၼၼ်ႉ ပွႆႇၸႂ်ႉၵဝ်မႃးၵႃႈတီႈဢၼ်သူမီးၼႆႉယဝ်ႉ၊ ဝႃႈၼင်ႇၼႆလႄႈ ၶဝ်သမ်ႉၶိုၼ်းထၢမ်တီႈၶႃႈၸဝ်ႈလႄႈဝႃႈ၊ ၼႃႇမႃႉၸိုဝ်ႈသဵင်မၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇႁိုဝ်။ ဝႃႈၼင်ႇၼႆၼၼ်ႉၸိုင်၊ ၶႃႈၸဝ်ႈတၵ်းလႆႈၶိုၼ်းလၢတ်ႈတီႈၶဝ်ၼၼ်ႉ ၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။-

14ၽြႃးပဵၼ်ၸဝ်ႈၵေႃႈလၢတ်ႈတီႈ မူဝ်းသေႇ လႄႈဝႃႈ၊ ၵဝ်ပဵၼ်ယူႇၵႃႈၼင်ႇဢၼ်ၵဝ်ပဵၼ်ၼႆႉဢေႃႈ၊ ဝႃႈၼင်ႇၼႆဢေႃႈ။ မၼ်းၸဝ်ႈသမ်ႉလၢတ်ႈထႅင်ႈလႄႈဝႃႈ၊ ၶိုၼ်းလၢတ်ႈတီႈၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈဝႃႈ၊ ၸဝ်ႈဢၼ်လႆႈၸိုဝ်ႈၵဝ်ပဵၼ်ယူႇၼၼ်ႉ ပွႆႇၸႂ်ႉၵဝ်မႃးၵႃႈတီႈဢၼ် သူမီးၼႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

15ၵမ်းၼၼ်ႉ ၽြႃးပဵၼ်ၸဝ်ႈသမ်ႉလၢတ်ႈတီႈ မူဝ်းသေႇ ထႅင်ႈလႄႈဝႃႈ၊ မႂ်းတၵ်းလႆႈလၢတ်ႈတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ထႃႇဝရႃႉၽြႃးၽြႃးပဵၼ်ၸဝ်ႈပူႇမွၼ်ႇသူ၊ ၽြႃး ဢႃႇပြႃႇႁၢမ်ႇ ၊ ၽြႃး ဢီႉၸၢၵ်ႈ ၊ ၽြႃး ယႃႇၵုပ်ႈ ၼၼ်ႉ ပွႆႇၸႂ်ႉၵဝ်မႃးၵႃႈတီႈဢၼ်သူမီးၼႆႉယဝ်ႉ၊ ဝႃႈၼင်ႇၼႆဢေႃႈ။ ဢၼ်ၼႆႉပဵၼ်ၼႃႇမႃႉၸိုဝ်ႈသဵင်ၵဝ်ယဝ်ႉ။ ဢၼ်ၼႆႉပဵၼ်လၢၵ်ႈၶၼႃႇသၢၵ်ႈသေႇၵဝ် ၵႃႈတီႈမဵဝ်းၵူၼ်း သိုပ်ႇသိုပ်ႇတၢမ်းတၢမ်းတႃႇသေႇဢမ်ႇထၢတ်ႇယဝ်ႉဢေႃႈ။-

16ၵႂႃႇလႄႈႁႂ်ႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢီႉသရေႇလႃႉ တင်းလၢႆ ၸူႉၵၼ်တုမ်ၵၼ်သေယဝ်ႉ၊ လၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈပူႇမွၼ်ႇသူ၊ ၽြႃး ဢႃႇပြႃႇႁၢမ်ႇ ၊ ၽြႃး ဢီႉၸၢၵ်ႈ ၊ ၽြႃး ယႃႇၵုပ်ႈ ၼၼ်ႉပေႃႇမႃးတီႈၵဝ်လႄႈလၢတ်ႈဝႃႈ၊ ၵဝ်မႃးလူမႃးတူၺ်းသူဢမၢၼ်ႇၶၼ်ပဵၼ်လႄႈ ႁၼ်လွင်ႈဢၼ်ၶဝ်ႁဵတ်းတီႈသူၵႃႈၼႂ်းမိူင်း ဢေႇၵိပ်ႉတူႉ ၼၼ်ႉယဝ်ႉ။-

17ၵဝ်လႆႈမီးၵတီႉလႄႈဝႃႈ၊ ၵဝ်တၵ်းၼုၵ်ႈဢဝ်သူဢွၵ်ႇသေၵႃႈၼႂ်းတုၵ်ႉၶႃႉဢၼ်လႆႈၶၢမ်ႇၵႃႈတီႈမိူင်း ဢေႇၵိပ်ႉတူႉ လႄႈ ဢဝ်ၵႂႃႇသူင်ႇၵႃႈတီႈမိူင်း ဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇ၊ တီႈယူႇၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ဢႃႇမေႃးရီႉ ၊ ၵူၼ်း ၽေႇရၸီႉ ၊ ၵူၼ်း ႁီႉဝီႉ ၊ ၵူၼ်း ယေႇပူႉသီႉ ၸိူဝ်းၼၼ်ႉဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆတႃႉ။-

18ၶဝ်ၼၼ်ႉတၵ်းထွမ်ႇဢဝ်ၵႂၢမ်းမႂ်းလႄႈ မႂ်းၵေႃႈတၵ်းလႆႈပႃးဢဝ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ၶဝ်ႈၸူးၵႃႈတီႈၶုၼ်ႁေႃၶမ်း ဢေႇၵိပ်ႉတူႉ လႄႈလဝ်ႊလၢတ်ႈဝႃႈ၊ ထႃႇဝရႃႉၽြႃး၊ၽြႃးပဵၼ်ၸဝ်ႈၵူၼ်းမဵဝ်း ႁေႇပြႄး လႆႈႁူပ်ႉထူပ်းၵၼ်တင်းၶႃႈၸဝ်ႈႁဝ်းၸိူဝ်းၼႆႉတီႈၶႃႈယဝ်ႉ။ ၶႅၼ်းတေႃႈႁႂ်ႈၶႃႈၸဝ်ႈၸိူဝ်းၼႆႉလႆႈၵႂႃႇၵႃႈၼႂ်းထိူၼ်ႇပုၼ်ႉ ၶၢဝ်းတၢင်းသေသၢမ်ဝၼ်းၼိုင်ႈ ႁႂ်ႈလႆႈပုၵ်ႈၸေႃႇယိတ်ႈတီႈ ထႃႇဝရႃႉၽြႃး၊ၽြႃးပဵၼ်ၸဝ်ႈၶႃႈၸဝ်ႈႁဝ်းၸိူဝ်းၼႆႉၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

19ၵူၺ်းၵႃႈ ၵဝ်ႁူႉလွင်ႈဢၼ်ပိၵ်ႉသမ်ႉ ၶုၼ်ႁေႃၶမ်း ဢေႇၵိပ်ႉတူႉ လႆႈထူပ်းလႆႈႁၼ်တၼ်းၶူဝ်းဢၼ်ယႂ်ႇၼႃႇသေၵေႃႈ၊ မၼ်းတၵ်းဢမ်ႇပၼ်ဢၶႂၢင်ႉႁႂ်ႈသူလႆႈၵႂႃႇၼၼ်ႉယူႇဢေႃႈ။-

20ၵဝ်တၵ်းယိုၼ်ႈမိုဝ်းၵဝ်သေလႄႈ ဢဝ်တင်းလွင်ႈတၢင်းဢၼ်လီဢၢမ်းတင်းလၢႆ ၵႃႈဢၼ်ၵဝ်တၵ်းႁဵတ်းၵႃႈၼႂ်းမိူင်းၼၼ်ႉ ၵူႈၸိူဝ်ႉၵူႈပိူင်ၼၼ်ႉပၼ်တၢမ်ႇတီႈမိူင်း ဢေႇၵိပ်ႉတူႉ ၼၼ်ႉဢေႃႈ။ ဝၢႆးၼၼ်ႉမၼ်းတၵ်းပွႆႇသူဢေႃႈ။-

21ၵဝ်တၵ်းႁႂ်ႈၵူၼ်းမဵဝ်းၼၼ်ႉလႆႈၼႃႈလႆႈတႃ ၵႃႈတီႈၵူၼ်း ဢေႇၵိပ်ႉတူႉ တင်းလၢႆလႄႈ၊ မိူဝ်ႈဢၼ်သူဢွၵ်ႇၵႂႃႇၼၼ်ႉၸိုင်၊ သူဢမ်ႇလႆႈဢွၵ်ႇၵႂႃႇတိၼ်လၢႆမိုဝ်းပဝ်ႇ။-

22လွင်ႈမၼ်းၸမ်ႉ ၽူႈယိင်းၵူႈၵေႃႉတၵ်းလႆႈယွၼ်းဢဝ်ၶိူင်ႈငိုၼ်းၶိူင်ႈၶမ်း တင်းၶိူင်ႈၼုင်ႈတၢင်းမႆ ၵႃႈတီႈၵူၼ်းႁိူၼ်းၸမ်ၵၼ် ဢိၵ်ႇတင်း ၵႃႈတီႈၵေႃႉဢၼ်သွၼ်ႈပိုင်ႈႁိူၼ်းမၼ်းယူႇၼၼ်ႉလႄႈ ႁၢင်ႈၶိူင်ႈပၼ်တီႈလုၵ်ႈၸၢႆးသူ လုၵ်ႈယိင်းသူတင်းလၢႆသေယဝ်ႉ၊ ႁိမ်ႁူင်ႇဢဝ် ဢုၵ်ႉၸႃႇၶူဝ်းလဵင်းၵူၼ်း ဢေႇၵိပ်ႉတူႉ တင်းလၢႆဢေႃႈ၊ ဝႃႈၼင်ႇၼႆဢေႃႈ။

← Chapter 2 Jump to: Chapter 4 →