Lamentations 1

Shan

Jump to: Chapter 2 →

1ဝဵင်းဢၼ်ၵူၼ်းၼမ်ၼႃႇ၊ၵိုၼ်းၼႃႇၼၼ်ႉ သဵတ်ႇၵူၼ်း၊ယဵၼ်ၵူၼ်းယူႇသေလႄႈ ၼင်ႈယူႇလူင်ပႄႇ။ မႄႈယိင်းဢၼ် ယၢမ်ႈယႂ်ႇမျၢတ်ႈၵႃႈၼႂ်းၵူၼ်း ၵူႈၸိူဝ်ႉၵူႈမဵဝ်းၼၼ်ႉ ပဵၼ်ၸိူဝ်ႉၼင်ႇ မႄႈမူၵ်းမႄႈမၢႆႈၵႂႃႇယဝ်ႉ လူင်ပႄႇ။ ၸဝ်ႈၼၢင်းပိူၼ်ႈ ၵူႈသိုင်ႇၵူႈမိူင်းၼၼ်ႉ လႆႈသၢၵ်ႈၶွၼ်ႇ ပၼ်ၶွၼ်ႇယဝ်ႉလူင်ပႄႇ။-

2မၼ်းႁႆႈႁွင်ႉႁႅင်းယႂ်ႇၼႃႇ ၶိင်ႇၵၢင်ၶိုၼ်းလႄႈ ၵႅမ်ႈမၼ်းၼၼ်ႉ ယမ်းပိူဝ်ႉဝႆႉ တင်းၼမ်ႉတႃမၼ်းဢေႃႈ။ ၼႂ်းၸူႉမၼ်းၸူဝ်းမၼ်း ၸိူဝ်းၼၼ်ႉ ဢမ်ႇမီးၵေႃႉဢၼ်ႁႂ်ႈမၼ်း ပေႇၸႂ်၊ၼိမ်ၸႂ်သေၵေႃႉသေၵူၼ်းလႄႈ ၵႃႈပဵၼ်ၵေႃႉသေႈမၼ်းၼၼ်ႉ သဵတ်ႈၸႃႇလူႉလႄႈ ဢွၼ်ၵၼ်ပဵၼ်ရၢၼ်ႇသူႇမၼ်းၵႂႃႇယဝ်ႉ။-

3ယူႉတႃႉ ၼၼ်ႉ လႆႈၶၢႆႉတီႈၵႂႃႇ ၵွပ်ႈပိူဝ်ႈဢၼ်မၼ်းလႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄး၊ တၢင်းဢၼ်ၸႂ်ႉၵိၼ်သွႆၵိၼ် ဢၼ်ႁၢဝ်ႈၵျၢမ်းၼႃႇၼၼ်ႉယဝ်ႉ။ မၼ်းယူႇၵႃႈၼႂ်း ၵူၼ်းသႃႇသၼႃႇပႃႉ တင်းလၢႆလႄႈ ဢမ်ႇလႆႈၵတ်းယဵၼ်ၶျၢမ်းသႃႇ။ ၶဝ်ၵႃႈဢၼ်လိုပ်ႈၸွမ်းမၼ်း ၸိူဝ်းၼၼ်ႉဢွၼ်ၵၼ်ၶိုတ်းမၼ်း ၵႃႈတီႈဢၼ်ၵိတ်ႇဢၼ်ၵိၼ်း ၸိူဝ်းၼၼ်ႉဢေႃႈ။-

4သဵၼ်ႈတၢင်း ၸီႉဢုၼ်ႇ ၸိူဝ်းၼၼ်ႉ ဢွၼ်ၵၼ်ၶၢင်းၶီၶၢင်းၽၢၼ်ယူႇ ၵွပ်ႈပိူဝ်ႈဢၼ်ၽူႈလႂ်ဢမ်ႇမႃး ၵႃႈတီႈပွႆးၼၼ်ႉလႄႈ၊ ၽၵ်းတူမၼ်းၵႃႈမီးၼၼ်ႉ ဢွၼ်ၵၼ်မီးတၢင်းဢၼ် သဵတ်ႇၵူၼ်းယဵၼ်ၵူၼ်းယူႇဢေႃႈ။ ယိတ်ႈပရေႃးႁဵၵ်ႈမၼ်းၸိူဝ်းၼၼ်ႉၵေႃႈ ဢွၼ်ၵၼ်ပွင်ႉၶၢင်းယူႇလႄႈ၊ ၵၼ်ႇၺႃႇလုၵ်ႈယိင်းသၢဝ်မၼ်း ၸိူဝ်းၼၼ်ႉၵေႃႈ မီးၸႂ်ဢၼ်ၸဵပ်း၊ဢၼ်သႅပ်ႇယူႇသေလႄႈ တူဝ်မၼ်းၼၼ်ႉ လႆႈၶီၸႂ်၊ၶူမ်ၸႂ်ယူႇဢေႃႈ။-

5ၶဝ်ၸိူဝ်းဢၼ် ႁဵတ်းၶတ်းၵၼ်တင်းမၼ်းၼၼ်ႉ လႆႈဢုပ်ႉပိူင်ႇမၼ်းလႄႈ ရၢၼ်ႇသူႇမၼ်းၸိူဝ်းၼၼ်ႉ လႆႈလီလႆႈပဵၼ် ၵွပ်ႈပိူဝ်ႈဢၼ် ထႃႇဝရႃႉၽြႃးပၼ်တၢမ်ႇ ပုၼ်ႈဢပႅတ်ႈမၼ်း ဢၼ်ၼမ်ၼႃႇၼၼ်ႉယဝ်ႉ။ လုၵ်ႈလၢင်းမၼ်းၸိူဝ်းၼၼ်ႉၵေႃႈ ရၢၼ်ႇသူႇမၼ်းသိမ်းဢဝ်ၵႂႃႇယဝ်ႉယဝ်ႉ။-

6မုၼ်သရေႇ လုၵ်ႈယိင်း ၸီႉဢုၼ်ႇ ၼၼ်ႉ လပ်ႉႁၢႆၵႂႃႇမူတ်းမူတ်း၊သဵင်ႈသဵင်ႈလႄႈ ၶုၼ်မၼ်းၵႂၢၼ်မၼ်း ၸိူဝ်းၼၼ်ႉပဵၼ် မိူၼ်ၸိူဝ်ႉၼင်ႇ တိုင်ၼင်ႇယီး ဢၼ်ႁႃတီႈဢၼ်တၵ်းၵိၼ်ယူႇလႄႈ ဢမ်ႇထူပ်းလႆႈၼၼ်ႉလႄႈ ယင်းဢမ်ႇမီးဢဵၼ်၊မီးႁႅင်း ဢွၼ်ၵၼ်ဢွၵ်ႇပၢႆႈၵႃႈတီႈၽၢႆႇၼႃႈ ၵေႃႉဢၼ်လိုပ်ႈၸွမ်းၶဝ်ၼၼ်ႉ ၵႂႃႇယဝ်ႉ။-

7ဝဵင်း ယေႇရူႉသလႅမ်ႇ ၼၼ်ႉ ၶုၵ်းၸႂ်လႆႈၶႆႈၸႂ်ထူပ်း ၸေးၸိမ်ႇဢၼ်ယၢမ်ႈလႆႈ ၸၢမ်ႇၸႃးမိူဝ်ႈဢွၼ်ၼႆႉၼၼ်ႉ။ ၼႂ်းမိူဝ်ႈဢၼ်မၼ်းလႆႈၶၢမ်ႇ တုၵ်ႉၶႃႉတၢင်းၽၢၼ်ၼၼ်ႉလႄႈ ၶဝ်ၸိူဝ်းဢၼ်ႁဵတ်းၶတ်းၵၼ် တင်းမၼ်းၸိူဝ်းၼၼ်ႉ ဢွၼ်ၵၼ်ႁၼ်ဢမူႉမၼ်းလႄႈ သႄႉသွမ်း တၢင်းဢၼ်မၼ်းသုမ်း၊မၼ်းၸွမ်း ၼႂ်းမိူဝ်ႈဢၼ် ၵူၼ်းမၼ်းတင်းလၢႆ ႁွတ်ႈထိုင်ၵႃႈၼႂ်းမိုဝ်းရၢၼ်ႇသူႇလႄႈ ၵေႃႉဢၼ်ၸွႆႈထႅမ်မႃႉၸႃႉ ဢမ်ႇမီး ၼၼ်ႉဢေႃႈ။-

8ဝဵင်း ယေႇရူႉသလႅမ်ႇ ၼၼ်ႉ မီးဢပႅတ်ႈ တၢင်းဢၼ်ၽိတ်းပိူင်ႈၼၼ်ႉၼမ်ၼႃႇလႄႈ ပဵၼ်တီႈဢၼ် လီႁင်ႈဢဵတ်ႇသဵတ်ႇဢေႃႈ။ ၶဝ်ၸိူဝ်းဢၼ် ယၢမ်ႈရူဝ်ႇသေႇၵူဝ်ယမ်မၼ်းၼၼ်ႉ ဢွၼ်ၵၼ်ႁဵတ်း ဢမ်ႇပေႃးၼင်ႇႁိုဝ်တီႈမၼ်း ၵွပ်ႈပိူဝ်ႈဢၼ် ၶဝ်ႁၼ်မၼ်း ယူႇတူဝ်ပူၺ်ယူႇၼၼ်ႉဢေႃႈ။ မၼ်းၵေႃႈၶၢင်းၶီၶၢင်းၽၢၼ်လႄႈ ဝၢႆႇၶိုၼ်းၵႂႃႇတၢင်းလင်ဢေႃႈ။-

9ပိၵ်ႉသမ်ႉလၢၵ်ႈၶၼႃႇ ဢၼ်ၵူဝ်ႈၵိူၵ်ႇမၼ်း ပေႃႇဢွၵ်ႇမႃးၵႃႈတီႈၶူဝ်းၼုင်ႈမၼ်း ဢၼ်လၢၵ်ႈဢၼ်ပူယူႇၼၼ်ႉသေၵေႃႈ မၼ်းဢမ်ႇၶုၵ်းၸႂ်လႆႈၶႆႈၸႂ်ထူပ်း လွင်ႈဢၼ်တၵ်း လႆႈၶၢမ်ႇၵမ်းလိုၼ်းၼၼ်ႉ။ ပိူဝ်ႈၼႆလႄႈ မၼ်းယင်းဢမ်ႇမီးၵေႃႉဢၼ် ပၼ်ၼႃႈလီတီႈမၼ်းလႄႈ ပႃးတင်းလွင်ႈတၢင်းဢၼ် လီဢၢမ်းယူႇသေလႄႈ ႁွတ်ႈထိုင်တၢင်းဢၼ်ၶျႃးတူၵ်း တီႈတႅမ်ႇဢေႃႈ။ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈ လူတူၺ်း တုၵ်ႉၶႃႉတၢင်းၽၢၼ်ၶႃႈၸဝ်ႈ သေၵမ်းတီႈၶႃႈ၊ ရၢၼ်ႇသူႇၼၼ်ႉ ယုၵ်ႉယွင်ႈတူဝ်ၸဝ်ႈၵဝ်ႇဝႆႉ တီႈၶႃႈယဝ်ႉ။-

10ရၢၼ်ႇသူႇၼၼ်ႉ ယဵတ်ႇမိုဝ်းမၼ်းယူႇၵႃႈၼိူဝ်ၸေးၸိမ်ႇမၼ်းၵႃႈမီးၼၼ်ႉ တီႈၶႃႈယဝ်ႉ။ မၼ်းလႆႈႁၼ်လွင်ႈဢၼ် ၵူၼ်းသႃႇသၼႃႇပႃႉ ဢၼ်ၸဝ်ႈႁဝ်းႁၢမ်ႈတၢပ်ႈႁႄႉၶႅၼ်ဝႆႉလႄႈဝႃႈ၊ ဢမ်ႇလႆႈၶဝ်ႈ ၵႃႈၼႂ်းပရဵၵ်ႈသၢတ်ႈၸဝ်ႈၵူၺ်ႉ၊ ဝႃႈၼင်ႇၼႆၸိူဝ်းၼၼ်ႉ ဢွၼ်ၵၼ်ၶဝ်ႈၵႃႈၼႂ်းထႃႇၼႃႉ တီႈဢၼ်မူတ်းၸၢင်ႇၸဝ်ႈၼၼ်ႉ တီႈၶႃႈယဝ်ႉ။-

11ၵူၼ်းမၼ်း တင်းသဵင်ႈတင်းလူင်ၼၼ်ႉ ဢွၼ်ၵၼ်ၶၢင်းၶီၶၢင်းၽၢၼ်ယူႇ၊ ႁႃၶဝ်ႈမုၼ်းယူႇသေလႄႈ လႆႈၸုၼ်ႉပႅတ်ႈၸေးၸိမ်ႇၶဝ် ပုၼ်ႈတၢင်းၵိၼ်တၢင်းၶူပ်း ႁႂ်ႈၶဝ်လႆႈၵၢင်းလွတ်ႈၽေးတၢင်းတၢႆတီႈၶႃႈဢေႃႈ။ ထႃႇဝရႃႉၽြႃး တီႈၶႃႈ၊ ၶႅၼ်းတေႃႈလူတူၺ်းလႄႈ ႁၼ်သေၵမ်းတီႈၶႃႈ၊ ၶႃႈၸဝ်ႈလႆႈၶၢမ်ႇတၢင်းဢၼ် ၶျႃးတူၵ်းတီႈတႅမ်ႇတီႈၶႃႈဢေႃႈ။-

12သူၵႃႈဢၼ်ၵၢႆၵႂႃႇ ၵႃႈတီႈႁိမ်းၼႆႉၶဝ်ဢိူၺ်း၊ ဢမ်ႇတိူဝ်ႉၸႂ်သူလႃးလႃးႁိုဝ်။ ဢွၼ်ၵၼ်လူတူၺ်းလႄႈ ၶႆႈၸႂ်ဝူၼ်ႉၸႂ်သေၵမ်း။တုၵ်ႉၶႃႉဢၼ်မိူၼ်ၸိူဝ်ႉၼင်ႇ တုၵ်ႉၶႃႉၵဝ်ဢၼ်ႁွတ်ႈထိုင်တီႈၵဝ် ဢၼ်ထႃႇဝရႃႉၽြႃး ဢဝ်ၼိၵ်ႈၸၢၵ်ႈငႅၼ်းသႄးၵဝ် ၼႂ်းမိုဝ်ႉဝၼ်းဢၼ် မၼ်းၸဝ်ႈၸႂ်မႆႈၶႆႈၸႃႉႁႅင်းယႂ်ႇၼႃႇ ၼၼ်ႉၼႆႉ ယင်းမီးလူးၵွၼ်ႇႁိုဝ်။-

13မၼ်းၸဝ်ႈယူႇၵႃႈတီႈၼိူဝ်ပုၼ်ႉ ဢဝ်ၽႆးပွႆႇလူင်းသႂ်ႇၵႃႈၼႂ်းလုပ်ႇၵဝ်တင်းလၢႆလႄႈ ႁႂ်ႈပႄႉၼႅင်ႇယႃႉပႅတ်ႈယဝ်ႉ။ မၼ်းၸဝ်ႈၵၢင်တူင်ႇႁႅဝ်ႉတူင်ႇၶိုမ်း တိၼ်ၵဝ်ထုၵ်ႇၶဵၼ်းမႅၼ်ႈလႄႈ ႁႂ်ႈၵဝ်ဝၢႆႇၶိုၼ်းၵႂႃႇတၢင်းလင်ယဝ်ႉ။ မၼ်းၸဝ်ႈႁႂ်ႈၵဝ်မီးတၢင်းဢၼ် ႁဵဝ်ႇၸွပ်ႈ တၢင်းဢၼ်ၸႂ်လူႉ တင်းဝၼ်းတင်းဝၼ်းဢေႃႈ။-

14မၼ်းၸဝ်ႈဢဝ်မိုဝ်းမၼ်းၸဝ်ႈ မတ်ႉၽုၵ်ႇၵၢၼ်းႁၢပ်ႇဢပႅတ်ႈဢၼ်ၵဝ်ၽိတ်းပိူင်ႈ ၸိူဝ်းၼၼ်ႉ သႂ်ႇလႄႈၸိူဝ်းၼၼ်ႉလႆႈမီးတၢင်းဢၼ် လိမ်ႇၽၼ်ႈၶဵၼ်းၶွတ်ႇသေလႄႈ သႂ်ႇဝႆႉမီးယူႇၵႃႈၼိူဝ်ၶေႃးၵဝ်လႄႈ၊ ထႃႇဝရႃႉၽြႃး ႁႂ်ႈၵဝ်ႁႅင်းဢူၼ်ႈၵႂႃႇလႄႈ ႁႂ်ႈၵဝ် ႁွတ်ႈထိုင် ၵႃႈၼႂ်းမိုဝ်းၶဝ်ၸိူဝ်းဢၼ်ၵဝ် ဢမ်ႇႁၢမ်ႈတၢပ်ႈႁႄႉၶႅၼ်လႆႈၼၼ်ႉယဝ်ႉ။-

15ၸဝ်ႈၽြႃးၼၼ်ႉ ယဵပ်ႇယမ်ႈၵူၼ်းသိုၵ်း ဢၼ်ႁႅင်းယႂ်ႇၼႃႇၵဝ် တင်းသဵင်ႈတင်းလူင်ၼၼ်ႉ ၵႃႈၼႂ်းၶိုင်ႈၵၢင်ၵဝ်လႄႈ ႁွင်ႉဢဝ် မူႇၽုင်မုၵ်ႉၸိူဝ်းၵူၼ်းတင်းလၢႆမႃး ႁႂ်ႈလႆႈၼိၵ်ႈၸၢၵ်ႈငႅၼ်းသႄးၵူၼ်းၼုမ်ႇၵူၼ်းၵမ်ၵဝ်တင်းလၢႆသေလႄႈ ယူႇၽၢႆႇၼိုင်ႈတင်းၵဝ်ယဝ်ႉ။ ၸဝ်ႈၽြႃးၼၼ်ႉ ယဵပ်ႇၼူတ်ႈၵၼ်ႇၺႃႇလုၵ်ႈယိင်းသၢဝ် ယူႉတႃႉ ၵႃႈၼႂ်းၶိူင်ႈၼူတ်ႈမၢၵ်ႇၸပိတ်ႈ ၼၼ်ႉယဝ်ႉ။-

16ၵွပ်ႈပိူဝ်ႈလွင်ႈတၢင်းၸိူဝ်းၼၼ်ႉလႄႈ ၵဝ်လႆႈႁႆႈလႆႈႁွင်ႉဢေႃႈ။ ၼမ်ႉတႃၵဝ်၊ ၼမ်ႉတႃၵဝ်မီးတၢင်းဢၼ်တူၵ်းယူႇလႄႈ ၵေႃႉဢၼ် ထုၵ်ႇလီၵမ်ႉထွၵ်ႈဢသၢၵ်ႈၵဝ်လႄႈ ႁႂ်ႈၵဝ်ပေႇၸႂ်ၼိမ်ၸႂ်ၼၼ်ႉ ၵႆၵၼ်တင်းၵဝ်ဢေႃႈ။ လုၵ်ႈၵဝ်လၢင်းၵဝ် ဢွၼ်ၵၼ်လူႉၵႂႃႇႁၢႆၵႂႃႇ ၵွပ်ႈပိူဝ်ႈ ဢၼ်ရၢၼ်ႇသူႇပႄႉၼႅင်ႇၼၼ်ႉယဝ်ႉ။-

17ပိၵ်ႉသမ်ႉလုၵ်ႈယိင်း ၸီႉဢုၼ်ႇ ၼၼ်ႉ ယုၵ်ႉမိုဝ်းဢႃႈမိုဝ်းမၼ်းသေၵေႃႈ၊ ၵေႃႉဢၼ်ႁႂ်ႈမၼ်းပေႇၸႂ်ၼိမ်ၸႂ်ၼၼ်ႉဢမ်ႇမီး။ ထႃႇဝရႃႉၽြႃး မီးဢမိင်ႉလူၺ်ႈလွင်ႈ ယႃႇၵုပ်ႈ လႄႈ ၶၢၼ်းၶဝ်ၸိူဝ်းဢၼ် လဵပ်ႈႁွပ်ႈမၼ်းၼၼ်ႉ ပဵၼ်ရၢၼ်ႇသူႇမၼ်းယဝ်ႉ။ ဝဵင်း ယေႇရူႉသလႅမ်ႇ ၼၼ်ႉ ပဵၼ်တီႈဢၼ် လီႁင်ႈဢဵတ်ႇသဵတ်ႇၵႃႈၼႂ်းၶဝ်ဢေႃႈ။-

18ထႃႇဝရႃႉၽြႃး ၸီႇယၢင်ႇၸွမ်းၼင်ႇတြႃးဢေႃႈ။ လွင်ႈမၼ်းၸမ်ႉ ၵဝ်ပူၼ်ႉလိူဝ်ပိင်းၺၢပ်ႈမၼ်းၸဝ်ႈ မႅၼ်ႈယဝ်ႉ။ ၵူၼ်းၵူႈၸိူဝ်ႉၵူႈမဵဝ်းၶဝ်ဢိူၺ်း၊ ဢွၼ်ၵၼ်ထွမ်ႇငိၼ်းလႄႈ လူတူၺ်းတုၵ်ႉၶႃႉၵဝ်သေၵမ်း။ ၶဝ်ဢွၼ်ၵၼ်သိမ်းဢဝ် ၽူႈမၢဝ်ႇတင်းၽူႈသၢဝ်ၵဝ်တင်းလၢႆၵႂႃႇယဝ်ႉ။-

19ၵဝ်ႁွင်ႉဢဝ်ၸူႉၵဝ်ၸူဝ်းၵဝ်တင်းလၢႆလႄႈ ၶဝ်ၼၼ်ႉဢမ်ႇမီးသဵတ်ႈၸႃႇ။ ယိတ်ႈပရေႃးႁဵၵ်ႈၵဝ်တင်းလၢႆ ဢိၵ်ႇတင်း ၶဝ်ၸိူဝ်းဢၼ် ပဵၼ်ၵႄႇပဵၼ်ႁူဝ်ၵဝ်ၸိူဝ်းၼၼ်ႉ ဢွၼ်ၵၼ်ၶျုၵ်ႈဢသၢၵ်ႈၶဝ်ၵႃႈၼႂ်းၶူးၼႂ်းဝဵင်း ၼႂ်းမိူဝ်ႈဢၼ်ၶဝ်ယင်းတိုၵ်ႉႁႃဢဝ်တၢင်းၵိၼ် တၢင်းၶူပ်း ပုၼ်ႈဢၼ် တၵ်းလဵင်ႉဢသၢၵ်ႈၶဝ်ယူႇၼၼ်ႉဢေႃႈ။-

20ထႃႇဝရႃႉၽြႃးတီႈၶႃႈ၊ ၶႅၼ်းတေႃႈလူတူၺ်းသေၵမ်းတီႈၶႃႈ၊ ၶႃႈၸဝ်ႈယၢပ်ႇၸႂ်ၽိုတ်ႇၸႂ်တီႈၶႃႈဢေႃႈ။ တွင်ႉၶႃႈၸဝ်ႈပုမ်ၶႃႈၸဝ်ႈၼႆႉ မီးတၢင်းဢၼ်လိူတ်ႇယူႇသၢၵ်ႇယူႇတီႈၶႃႈဢေႃႈ။ ႁူဝ်ၸႂ်ၶႃႈၸဝ်ႈမီးတၢင်းဢၼ် ပိၼ်ႈၶႂမ်ႈယူႇၵွပ်ႈပိူဝ်ႈဢၼ် ၶႃႈၸဝ်ႈၽိတ်းပိူင်ႈၼႃႇလူင်လၢင်ၼၼ်ႉ တီႈၶႃႈဢေႃႈ။ ၵႃႈတီႈၼွၵ်ႈၸမ်ႉ၊ ၽေးလၢပ်ႇယႃႉပႅတ်ႈလႄႈ၊ ၵႃႈတီႈၼႂ်းၸမ်ႉ၊ ပဵၼ်ၸိူဝ်ႉၼင်ႇဢၼ်တၢႆယူႇၼၼ်ႉ တီႈၶႃႈဢေႃႈ။-

21ၶဝ်လႆႈငိၼ်းလွင်ႈဢၼ် ၶႃႈၸဝ်ႈၶၢင်းၶီၶၢင်းၽၢၼ်လႄႈ ဢမ်ႇမီးၵေႃႉဢၼ် ႁႂ်ႈပေႇၸႂ်ၼိမ်ၸႂ်သေၵေႃႉသေၵူၼ်းၼၼ်ႉ တီႈၶႃႈယဝ်ႉ။ ရၢၼ်ႇသူႇၶႃႈၸဝ်ႈ တင်းသဵင်ႈတင်းလူင် လႆႈငိၼ်းလွင်ႈတၢင်းဢၼ် ႁွတ်ႈထိုင်တီႈၶႃႈၸဝ်ႈၼၼ်ႉလႄႈ ဢွၼ်ၵၼ် ၸူမ်းသိူဝ်းလူၺ်ႈလွင်ႈဢၼ် ၸဝ်ႈႁဝ်းႁဵတ်းၸိူဝ်ႉၼင်ႇၼၼ် တီႈၶႃႈဢေႃႈ။ လွင်ႈၼင်ႇႁိုဝ်ၶဝ်တၵ်းလႆႈပဵၼ် ၸိူဝ်ႉၼင်ႇၶႃႈၸဝ်ႈၼႆႉၸိုင်၊ ၸဝ်ႈႁဝ်းၶႅၼ်းတေႃႈ ႁႂ်ႈမိုဝ်ႉဝၼ်းဢၼ်ၸဝ်ႈႁဝ်း ၶိၼ်းဝႆႉၼၼ်ႉႁွတ်ႈထိုင်သေၵမ်းလူၺ်ႈတီႈၶႃႈ၊-

22ႁႂ်ႈတူႉၸရိူၵ်ႈၶဝ်ၵူႈၸိူဝ်ႉၵူႈပိူင် ႁွတ်ႈထိုင်ၵႃႈတီႈၽၢႆႇၼႃႈၸဝ်ႈႁဝ်းသေၵမ်းတီႈၶႃႈ၊ ၶႅၼ်းတေႃႈႁဵတ်းတီႈၶဝ် မိူၼ်ၸိူဝ်ႉၼင်ႇဢၼ် ၸဝ်ႈႁဝ်းႁဵတ်းတီႈၶႃႈၸဝ်ႈ ၵွပ်ႈပိူဝ်ႈဢပႅတ်ႈၵႃႈဢၼ် ၶႃႈၸဝ်ႈၽိတ်းပိူင်ႈၼၼ်ႉ သေၵမ်းတီႈၶႃႈ၊ ၶႃႈၸဝ်ႈမီးတၢင်းဢၼ် ၶၢင်းၶီၶၢင်းၽၢၼ် ၼမ်ၼႃႇလႄႈ ၸႂ်လူႉယူႇ တီႈၶႃႈဢေႃႈ။

Jump to: Chapter 2 →