Lamentations 4

Shan

← Chapter 3 Jump to: Chapter 5 →

1ၶမ်းၼၼ်ႉ ပဵၼ်ဢၼ်သွမ်ႇၵမ်ႇၼႃႇလူင်လၢင် လူင်ပႄႇ။ ၶမ်းလွတ်ႈငၢၼ်ႇဢၼ်လီၼႃႇၼၼ်ႉ ပဵၼ်ဢၼ်ၶၢႆႉပုတ်ႈၼႃႇလူင်လၢင် လူင်ပႄႇ။ သႅင်ထႃႇၼႃႉတီႈမူတ်းၸၢင်ႇၼၼ်ႉၸိူဝ်းၼၼ်ႉ မီးတၢင်းဢၼ်မိူၵ်ႇမိူဝ် ယူႇၵႃႈတီႈသူပ်းသဵၼ်ႈတၢင်းၵႃႈမီး တင်းသဵင်ႈတင်းလူင် ၼၼ်ႉဢေႃႈ။-

2ၵူၼ်းဝဵင်း ၸီႉဢုၼ်ႇ ဢၼ်ထိူၵ်ႈၵႃႈထိူၵ်ႈၶၼ် ပဵင်းတၢၼ်ႇၶမ်း ဢၼ်မျၢတ်ႈၼႃႇၸိူဝ်းၼၼ်ႉ လႆႈၶၢမ်ႇတၢင်းဢၼ်မၢတ်ႈပဵၼ် ၸိူဝ်ႉၼင်ႇ မေႃႈလိၼ် ဢၼ်ၸၢင်ႈမေႃႈ ဢဝ်မိုဝ်းႁဵတ်းၼၼ်ႉလူင်ပႄႇ။-

3တေႃႈၵႃႈ မႃလိၼ်တူဝ်မႄႈၸိူဝ်းၼၼ်ႉ ယင်းၸၢင်ႈဢဝ်တိၼ်ႇၼူမ်းၶဝ်ပၼ်လႄႈ တိုၵ်းၼူမ်းပၼ်တီႈလုၵ်ႈဢွၼ်ႇၶဝ်ဢေႃႈ။ လုၵ်ႈယိင်းၵူၼ်းမဵဝ်းၵဝ်ၸမ်ႉ၊ မီးသၽေႃးဢၼ်ၵျၢမ်းလိူင်းၼႃႇ မိူၼ်ၸိူဝ်ႉၼင်ႇ ၼူၵ်ႉၵလႃးဢုၵ်ႉ ဢၼ်ယူႇၵႃႈၼႂ်းထိူၼ်ႇၼၼ်ႉဢေႃႈ။-

4လုၵ်ႈဢွၼ်ႇ ဢၼ်ၵိၼ်ၼူမ်းၸိူဝ်းၼၼ်ႉ ဢိုပ်းၼူမ်းလႄႈ လိၼ်ႉမၼ်းမီးတၢင်းဢၼ်ၸပ်းယူႇ ၵႃႈတီႈႁိူၵ်ႇဢေႃႈ။ လုၵ်ႈဢွၼ်ႇၸိူဝ်းၼၼ်ႉ ယွၼ်းၶဝ်ႈမုၼ်းလႄႈ ၽူႈလႂ်သေၵေႃႉသေၵူၼ်း ဢမ်ႇဝိတ်းပၼ်တီႈၶဝ်။-

5ၶဝ်ၸိူဝ်းဢၼ် ၸၢင်ႈၵိၼ်လီလီငၢမ်းငၢမ်းၼၼ်ႉ လႆႈလူႉၵႂႃႇသုမ်းၵႂႃႇ ၵႃႈတႃႈၵႃႈတၢင်းလႄႈ ၶဝ်ၸိူဝ်းဢၼ်ယၢမ်ႈမူၼ်ႈပျေႃႇ ၵႃႈၼိူဝ် ၽႃႈၵွပ်း ဢၼ်လႅင်ၵမ်ႇၼၼ်ႉ လႆႈဢွၼ်ၵၼ်ၵွတ်ႇဢုမ်ႈၵွင်ၶီႈဝူဝ်းယူႇဢေႃႈ။-

6တၢမ်ႇဢပႅတ်ႈဢၼ် လုၵ်ႈယိင်း ၵူၼ်းမဵဝ်းၵဝ်လႆႈၶၢမ်ႇၼၼ်ႉ ယဵင်ႈၶႅၼ်းယႂ်ႇၼႃႇသေတၢမ်ႇဢပႅတ်ႈ ဝဵင်း သေႃးတုမ်ႇ ဢၼ်ႁွတ်ႈထိုင် တၢင်းဢၼ်လူႉလႅဝ် ၵမ်းလဵဝ်လႄႈ ၽူႈလႂ်ဢမ်ႇလႆႈဢဝ်မိုဝ်းတိူဝ်ႉထုၵ်ႇမၼ်းၼၼ်ႉဢေႃႈ။-

7ၵူၼ်း ၼႃႇၸရီႉ မၼ်းၸိူဝ်းၼၼ်ႉ မူတ်းသႂ်လိူဝ်တွၼ်းၼႃႇသေမူၺ်ႁႃႇလႄႈ ၽိူၵ်ႇၶၢဝ်လိူဝ်တွၼ်းၼႃႇသေ ၼမ်ႉၼူမ်းဢေႃႈ။ ၼိူဝ်ႉၶဝ် ၼင်ၶဝ်ၼၼ်ႉ လႅင်လိူဝ်တွၼ်းၼႃႇသေ သႅင်လႅင်လႄႈ၊ ဢဵၼ်လိူတ်ႈၶဝ်ၼၼ်ႉ မိူၼ်ၸိူဝ်ႉၼင်ႇ ၼီႇလႃႇဢေႃႈ။-

8မိူဝ်ႈလဵဝ်ၼႆႉၸမ်ႉ၊ ႁၢင်ႈၽၢင်ၶဝ်လမ်လိူဝ်တွၼ်းၼႃႇသေ ထၢၼ်ႇမီႈလႄႈ ၶဝ်ဢမ်ႇၶၢမ်ႇတၢင်းဢၼ်ပိူၼ်ႈႁူႉႁၼ် ၵႃႈတီႈၵၢင်တႃႈၵၢင်တၢင်း။ ၼင်ၶဝ်ၼၼ်ႉ ၸပ်းၵႃႈတီႈလုပ်ႇၶဝ်ယူႇလႄႈ ႁႅင်ႈႁွင်ၵႂႃႇ မိူၼ်ၸိူဝ်ႉၼင်ႇ ၽိုၼ်းၼၼ်ႉဢေႃႈ။-

9ၶဝ်ၸိူဝ်းဢၼ် လႆႈၶၢမ်ႇတၢင်းဢၼ် ၶႃႈတၢႆၽၼ်းတၢႆ လူၺ်ႈလၢပ်ႇလူၺ်ႈလႅဝ်းၼၼ်ႉ ယဵင်ႈၶႅၼ်းမီးမင်ႇၵလႃႇၼႃႇသေ ၶဝ်ၸိူဝ်းဢၼ် လႆႈၶၢမ်ႇတၢင်းတၢႆလူၺ်ႈ တၢင်းဢၼ်ဢိုပ်းယၢၵ်ႈၼၼ်ႉဢေႃႈ။ ၶဝ်ၸိူဝ်းၼႆႉ လႆႈၶၢမ်ႇတၢင်းဢၼ်ၸီးတႅင်းတမ်ပွင်ႇလႄႈ ယွမ်ႁဵဝ်ႇၵႂႃႇ ၵွပ်ႈပိူဝ်ႈတၢင်းဢၼ် မၢၵ်ႇႁူင်းထၢတ်ႇၵႂႃႇၼၼ်ႉဢေႃႈ။-

10မႄႈယိင်းဢၼ်မီးၸႂ် ဢၼ်ဢဵတ်းလူ ၸွၼ်မႆႈၸွၼ်ၶီၸိူဝ်းၼၼ်ႉ လႆႈဢဝ်မိုဝ်းၶဝ်တူမ်ႈႁုင်လုၵ်ႈလၢင်းၶဝ်လႄႈ လုၵ်ႈလၢင်း ၸိူဝ်းၼၼ်ႉ လႆႈပဵၼ်တၢင်းၵိၼ်တၢင်းၶူပ်းၶဝ် ၼႂ်းမိူဝ်ႈဢၼ် လုၵ်ႈယိင်းၵူၼ်းမဵဝ်းၵဝ်လူႉလႅဝ် ၼၼ်ႉဢေႃႈ။-

11ထႃႇဝရႃႉၽြႃး ႁႂ်ႈတၢင်းၸႂ်မႆႈၶႆႈၸႃႉမၼ်းၸဝ်ႈ ၸေးၸုမ်ႇယဝ်ႉ။ မၼ်းၸဝ်ႈ သွၼ်းလေႃႇဢၢႆႁႅင်းတၢင်းၸႂ်မႆႈၶႆႈၸႃႉမၼ်းၸဝ်ႈ ဢၼ်ယႂ်ႇၼႃႇလူင်လၢင်ယဝ်ႉ။ မၼ်းၸဝ်ႈ ဢဝ်ၽႆးတုတ်ႇဝဵင်း ၸီႉဢုၼ်ႇ လႄႈ ႁႂ်ႈမႆႈတေႃႇထိုင်ႁွတ်ႈ ႁၢၵ်ႈလမ်းဝဵင်းယဝ်ႉ။-

12ၶုၼ်ႁေႃၶမ်းလေႃးၵီႇ တင်းလၢႆ ဢိၵ်ႇတင်းၵူၼ်းသတ်ႉတဝႃႇ ၵႃႈၼိူဝ်လိၼ်မိူင်း တင်းသဵင်ႈတင်းလူင် ဢမ်ႇဢွၼ်ၵၼ်ယုမ်ႇ လွင်ႈဢၼ်ရၢၼ်ႇသူႇ ဢိၵ်ႇတင်းၵေႃႉဢၼ်တိုၵ်းသိုၵ်းၼၼ်ႉ တၵ်းၶဝ်ႈၵႃႈၼႂ်းၽၵ်းတူ ဝဵင်း ယေႇရူႉသလႅမ်ႇ လႆႈၼၼ်ႉ သေၵေႃႉသေၵူၼ်း။-

13ဢမူႉၼႆႉ ႁွတ်ႈထိုင် ၵွပ်ႈပိူဝ်ႈ ဢပႅတ်ႈပရေႃးၽႅတ်ႈမၼ်း ဢိၵ်ႇတင်း တူႉၸရိူၵ်ႈ ယိတ်ႈပရေႃးႁဵၵ်ႈမၼ်း ဢၼ်ၸၢင်ႈဢဝ်ၶဝ်ၸိူဝ်းဢၼ် သိုဝ်ႈတေႃႇၼၼ်ႉ တၢႆၵႃႈၼႂ်းၵၢင်ဝဵင်း ယေႇရူႉသလႅမ်ႇ ၼၼ်ႉ ၸိူဝ်းၼၼ်ႉယဝ်ႉ။-

14ၶဝ်ၼၼ်ႉ လႄႇၵႂႃႇလႄႇမႃးယူႇ ၵႃႈၼႂ်းသဵၼ်ႈတႃႈသၢႆတၢင်း မိူၼ်ၸိူဝ်ႉၼင်ႇ ၵူၼ်းဢၼ်တႃမွတ်ႇၼၼ်ႉလႄႈ ၵူဝ်ႈလိူတ်ႈၵူၼ်းထၼ်ႈပေႃးၽူႈလႂ် ဢမ်ႇႁတ်းတိူဝ်ႉႁတ်းယိပ်း ၶူဝ်းၼုင်ႈၶဝ်ၼၼ်ႉဢေႃႈ။-

15ပိူၼ်ႈၸၢင်ႈ ဢွၼ်ၵၼ်သႅၼ်ႇႁွင်ႉတီႈၶဝ်လႄႈဝႃႈ၊ ၵႂႃႇတႃႉ။ သူၸိူဝ်းဢၼ် ဢမ်ႇမူတ်းသႂ်ၶဝ်ဢိူၺ်း၊ ၵႂႃႇတႃႉ။ ၵႂႃႇတႃႉ။ ယႃႇပေ ဢွၼ်ၵၼ်တိူဝ်ႉ၊ ဝႃႈၼင်ႇၼႆဢေႃႈ။ မိူဝ်ႈဢၼ်ၶဝ်ဢွၵ်ႇပၢႆႈၵႂႃႇ တီႈဢၼ်ၵႆလႄႈ လႄႇလဵပ်ႈယူႇၵူႈတီႈၵူႈလႅၼ်ၼၼ်ႉၸိုင်၊ ၵူၼ်းတၢင်ႇၸိူဝ်ႉတၢင်ႇၶိူဝ်း ၵမ်ႈၽွင်ႈၸၢင်ႈဢွၼ်ၵၼ် လၢတ်ႈလႄႈဝႃႈ၊ ၶဝ်ၼၼ်ႉ ဢမ်ႇလႆႈတႄႇလႆႈယူႇ ၵႃႈတီႈၼႆႈ၊ ဝႃႈၼင်ႇၼႆဢေႃႈ။-

16ၼႃႈထႃႇဝရႃႉၽြႃးၼၼ်ႉ ႁႂ်ႈၶဝ်ၽၢတ်ႇၽႄၵၼ်ယဝ်ႉ။ မၼ်းၸဝ်ႈဢမ်ႇလူတူၺ်းဢမူႉၶဝ်။ ပိူၼ်ႈၵေႃႈ ယင်းဢမ်ႇရူဝ်ႇသေႇၵူဝ်ယမ်ယိတ်ႈပရေႃးႁဵၵ်ႈ တင်းလၢႆ၊ ယင်းဢမ်ႇဢႃးၼႃႇၶဝ်ၸိူဝ်းဢၼ်ထဝ်ႈ ဢၼ်ၵႄႇၼၼ်ႉလႄႈ ယူႇဢေႃႈ။-

17တႃႁဝ်းဢူၼ်ႈၵႂႃႇ ၼႂ်းတၢင်းဢၼ် ႁဝ်းယင်းတိုၵ်ႉပႂ်ႉမုင်ႈပႂ်ႉမွင်းၵေႃႉဢၼ် တၵ်းၸွႆႈထႅမ်မႃႉၸႃႉလႄႈ ဢမ်ႇပွင်ႇလွင်ႈၵႃႈသင်ၼၼ်ႉ ယူႇၼၼ်ႉဢေႃႈ။ ၼႂ်းတၢင်းဢၼ် ႁဝ်းပႂ်ႉမုင်ႈပႂ်ႉမွင်းယူႇၼၼ်ႉ ႁဝ်းလႆႈပႂ်ႉမုင်ႈ၊ပႂ်ႉမွင်းၵူၼ်းမဵဝ်းဢၼ် ဢမ်ႇၵႄႇသႄႇၶျွတ်ႈဢဝ်လႆႈၼၼ်ႉ ယူႇယဝ်ႉယဝ်ႉ။-

18ၶဝ်ဢွၼ်ၵၼ် ၸွမ်းႁႃႁွႆးတိၼ်ႁဝ်းထၼ်ႈပေႃး ႁဝ်းဢမ်ႇၵႂႃႇၵႃႈၼႂ်းသဵၼ်ႈတၢင်းသၢႆတႃႈလႆႈဢေႃႈ။ တီႈသုတ်းတီႈၵွႆ ႁဝ်းၸမ်ယဝ်ႉ။မိုဝ်ႉဝၼ်းဢသၢၵ်ႈႁဝ်းၸေးယဝ်ႉ။ တီႈသုတ်းတီႈၵွႆႁဝ်းႁွတ်ႈထိုင်ယဝ်ႉ။-

19ၶဝ်ၸိူဝ်းဢၼ် ၸွမ်းႁႃႁဝ်းၼၼ်ႉ ၶၼ်ၽႂ်းလိူဝ်တွၼ်းၼႃႇသေ လၢင်းတႃႉၶမ်း ၵႃႈၼိူဝ်ၵၢင်ႁၢဝ်ၼၼ်ႉလႄႈ ၶဝ်ဢွၼ်ၵၼ်ၸွမ်းႁႃ ၵႃႈၼိူဝ်သၼ်လွႆသေလႄႈ။ ၵႃႈၼႂ်းထိူၼ်ႇၼႂ်းၶိူဝ်းၵေႃႈ ၶဝ်ဢွၼ်ၵၼ်ပႂ်ႉလွမ်ယူႇဢေႃႈ။-

20တၢင်းဢၼ်ထူၺ်ႈၸႂ်ၶဝ်ႈ ထူၺ်ႈၸႂ်ဢွၵ်ႇႁဝ်းဢၼ်ဝႃႈ ၸဝ်ႈဢၼ်ၶၢမ်ႇၽိၵ်ႈသိၵ်ႈတီႈ ထႃႇဝရႃႉၽြႃးလႄႈ ႁဝ်းလႆႈလၢတ်ႈ လႄႈဝႃႈ၊ ႁဝ်းတၵ်းသွၼ်ႈပိုင်ႈႁူမ်ႈမၼ်းၸဝ်ႈ သေလႄႈ ဢသၢၵ်ႈၵတ်းယဵၼ်ၶျၢမ်းသႃႇ ယူႇၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်း ၸိူဝ်းၼၼ်ႉဢေႃႈ၊ ဝႃႈၼင်ႇၼႆၼၼ်ႉ လႆႈၶၢမ်ႇတၢင်းဢၼ်တီႉလႆႈ ၵႃႈၼႂ်းၶုမ်လိၼ် လုၵ်းလိၼ်ၶဝ်ၼၼ်ႉဢေႃႈ။-

21လုၵ်ႈယိင်း ဢေႇတုမ်ႇ ဢၼ်ယူႇၵႃႈၼႂ်းမိူင်း ဢူႉၸႃႉ ဢိူၺ်း၊ ၸူမ်းသိူဝ်းသေလႄႈ သႂၢင်ႇၸႂ်တႃႉ။ ၵွၵ်းၸဝ်ႈၼၼ်ႉ တၵ်းၶၢမ်ႈၵႂႃႇၸူး တီႈဢၼ်မႂ်းမီးၼၼ်ႉဢေႃႈ။ မႂ်းတၵ်းလႆႈမဝ်းလဝ်ႈလႄႈ ယူႇတူဝ်ပူၺ်ယူႇဢေႃႈ။-

22လုၵ်ႈယိင်း ၸီႉဢုၼ်ႇ ဢိူၺ်း၊ တၢမ်ႇဢပႅတ်ႈ ၵႃႈဢၼ်မႂ်းလႆႈၶၢမ်ႇၼၼ်ႉ ယဝ်ႉတူဝ်ႈယဝ်ႉယဝ်ႉ။ ၵမ်းလိုၼ်းမၼ်းၸဝ်ႈ တၵ်းဢမ်ႇသိမ်းဢဝ်မႂ်းၵႂႃႇထႅင်ႈ။ လုၵ်ႈယိင်း ဢေႇတုမ်ႇ ဢိူၺ်း၊ မၼ်းၸဝ်ႈ တၵ်းၸႅတ်ႈထၢမ်တူႉၸရိူၵ်ႈ ဢၼ်မႂ်းႁဵတ်းၼၼ်ႉလႄႈ ၽုၺ်ႇဢွၵ်ႇၼႄပျႃး ဢပႅတ်ႈမႂ်း ၸိူဝ်းၼၼ်ႉဢေႃႈ။

← Chapter 3 Jump to: Chapter 5 →