Lamentations 2

Shan

← Chapter 1 Jump to: Chapter 3 →

1ထႃႇဝရႃႉၽြႃး ဢဝ်ၽႃႈၽူၼ် တၢင်းဢၼ်ၸႂ်မႆႈၶႆႈၸႃႉမၼ်းၸဝ်ႈ ႁူမ်ႇသုမ်ႇလုၵ်ႈယိင်း ၸီႉဢုၼ်ႇ ယဝ်ႉ။ မၼ်းၸဝ်ႈဢဝ် မုၼ်သရေႇ မဵဝ်း ဢီႉသရေႇလႃႉ ၶျႃးသေၵႃႈၼိူဝ်ၵၢင်ႁၢဝ် တူၵ်းလူင်းတေႃႇထိုင်ႁွတ်ႈ လိၼ်မိူင်းယဝ်ႉ။ ၼႂ်းမိုဝ်ႉဝၼ်းဢၼ်မၼ်းၸဝ်ႈ ၸႂ်မႆႈၶႆႈၸႃႉၼၼ်ႉ၊ မၼ်းၸဝ်ႈ ယင်းဢမ်ႇၶုၵ်းၸႂ်လႆႈၶႆႈၸႂ်ထူပ်း ၶူင်ႇတီႈဢၼ်မၼ်းၸဝ်ႈ တၢင်ႇတိၼ်မၼ်းၸဝ်ႈ ၼၼ်ႉလႄႈ ယူႇယဝ်ႉလူင်ပႄႇ။-

2ထႃႇဝရႃႉၽြႃး ယင်းဢမ်ႇဢဵတ်းလူလႄႈ ဢိုၼ်တီႈယူႇတီႈသဝ်း မဵဝ်း ယႃႇၵုပ်ႈ ၵႃႈမီးၼၼ်ႉပႅတ်ႈယဝ်ႉ။ တၢင်းၸႂ်မႆႈၶႆႈၸႃႉမၼ်းၸဝ်ႈ ဢွၵ်ႇသေလႄႈ မၼ်းၸဝ်ႈၵိူၼ်ႇယႃႉတိူၵ်ႈတီႈတိုၵ်းသိုၵ်း လုၵ်ႈယိင်း ယူႉတႃႉ ၸိူဝ်းၼၼ်ႉပႅတ်ႈ တေႃႇထိုင်ႁွတ်ႈလိၼ်လႄႈ ၶျႃးသိုင်ႇၸိုင်ႈဝၢၼ်ႈမိူင်းၸဝ်ႈတင်းၶုၼ်မၼ်းၵႂၢၼ်မၼ်း တင်းလၢႆ တူၵ်းတီႈတႅမ်ႇယဝ်ႉ။-

3တၢင်းၸႂ်မႆႈၶႆႈၸႃႉ မၼ်းၸဝ်ႈဢွၵ်ႇႁႅင်းယႂ်ႇၼႃႇသေလႄႈ မၼ်းၸဝ်ႈတႅပ်းၶဝ်လႅမ် ဢီႉသရေႇလႃႉ ၵႃႈမီးၼၼ်ႉပႅတ်ႈယဝ်ႉ။ မၼ်းၸဝ်ႈ ယိုတ်းဢဝ်မိုဝ်းၶွၼ်ၶႂႃမၼ်းၸဝ်ႈသေ ၵႃႈတီႈၽၢႆႇၼႃႈရၢၼ်ႇသူႇမၼ်းယဝ်ႉ။ ၸိူဝ်ႉၼင်ႇၽႆးလုၵ်ႉဢၼ်မႆႈ ၵူႈတီႈၵူႈလႅၼ်ၼၼ်ႉ၊ မၼ်းၸဝ်ႈႁႂ်ႈမႆႈ မဵဝ်း ယႃႇၵုပ်ႈ ယဝ်ႉ။-

4မၼ်းၸဝ်ႈ ဝူတ်ႈၵၢင်ႇမၼ်းၸဝ်ႈမိူၼ်ၸိူဝ်ႉၼင်ႇရၢၼ်ႇသူႇၼၼ်ႉယူႇ၊ ၸုၵ်းယုၵ်ႉမိုဝ်းၶွၼ်ၶႂႃမၼ်းၸဝ်ႈ မိူၼ်ၸိူဝ်ႉၼင်ႇၵေႃႉဢၼ် ႁဵတ်းရၢၼ်ႇသူႇၼၼ်ႉ ယူႇသေလႄႈ ဢဝ်ၶဝ်ၸိူဝ်းဢၼ် ထုၵ်ႇတႃငမ်းတႃ တင်းသဵင်ႈတင်းလူင်ၼၼ်ႉတၢႆယဝ်ႉ။ မၼ်းၸဝ်ႈဢဝ် တၢင်းၸႂ်မႆႈၶႆႈၸႃႉမၼ်းၸဝ်ႈ ႁူတ်းလေႃႇသႂ်ႇ ၵႃႈၼႂ်းသုမ်ႉထဵင် တီႈယူႇတီႈသဝ်းလုၵ်ႈယိင်း ၸီႉဢုၼ်ႇ ၼၼ်ႉ မိူၼ်ၸိူဝ်ႉၼင်ႇၽႆးၼၼ်ႉယဝ်ႉ။-

5ထႃႇဝရႃႉၽြႃး ႁဵတ်းရၢၼ်ႇသူႇသေလႄႈ ဢိုၼ်မဵဝ်း ဢီႉသရေႇလႃႉ ပႅတ်ႈယဝ်ႉ။ မၼ်းၸဝ်ႈဢိုၼ်ႁေႃၶမ်းမၼ်းၵႃႈမီးပႅတ်ႈလႄႈ ၵိူၼ်ႇယႃႉတိူၵ်ႈတီႈတိုၵ်းသိုၵ်းမၼ်း တင်းလၢႆပႅတ်ႈယဝ်ႉ။ မၼ်းၸဝ်ႈႁႂ်ႈတၢင်းဢၼ်ၶီၸႂ်ၶူမ်ၸႂ်၊ တၢင်းဢၼ် ႁႆႈႁွင်ႉပွင်ႉၶၢင်းမီးၼမ်ၼႃႇ တီႈလုၵ်ႈယိင်းမဵဝ်း ယူႉတႃႉ ယဝ်ႉ။-

6မၼ်းၸဝ်ႈ ႁၵ်းႁဵၵ်းႁူဝ်ႉဝၢင်းမၼ်းၸဝ်ႈပႅတ်ႈ မိူၼ်ၸိူဝ်ႉၼင်ႇႁူဝ်ႉဢၼ်လွမ်ႉႁႆႊလွမ်ႉၼႃးၼၼ်ႉယဝ်ႉ။ မၼ်းၸဝ်ႈယႃႉ တီႈဢၼ် ၶၢမ်ႇပွႆးထမ်ႇမႃႉမၼ်းၸဝ်ႈၼၼ်ႉပႅတ်ႈယဝ်ႉ။ ထႃႇဝရႃႉၽြႃး ႁႂ်ႈလူင်လိုမ်းပႅတ်ႈဝၼ်းပွႆးထမ်ႇမႃႉ ဢိၵ်ႇတင်းဝၼ်းၵမ်သိၼ် ၵႃႈၼႂ်းဝဵင်း ၸီႉဢုၼ်ႇ ၼၼ်ႉယဝ်ႉ။ ဢၢႆႁႅင်းတၢင်းၸႂ်မႆႈၶႆႈၸႃႉမၼ်းၸဝ်ႈ ႁႅင်းယႂ်ႇၼႃႇလႄႈ မၼ်းၸဝ်ႈႁဵတ်းဢမ်ႇပေႃးၼင်ႇႁိုဝ် တီႈၶုၼ်ႁေႃၶမ်း တင်းယိတ်ႈပရေႃးႁဵၵ်ႈယဝ်ႉ။-

7ထႃႇဝရႃႉၽြႃး ပႄႇယိတ်ႈပလၢင်ႇမၼ်းၸဝ်ႈပႅတ်ႈလႄႈ လီႁင်ႈဢဵတ်ႇသဵတ်ႇ ထႃႇၼႃႉတီႈမူတ်းၸၢင်ႇမၼ်းၸဝ်ႈယဝ်ႉ။ မၼ်းၸဝ်ႈ ဢဝ်ႁူဝ်ႉဝၢင်းႁေႃၶမ်းတင်းလၢႆ ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇလႄႈ ၶဝ်ၼၼ်ႉဢွၼ်ၵၼ်ႁဵတ်းသဵင်ၼႂ်းႁိူၼ်း ထႃႇဝရႃႉၽြႃး မိူၼ်ၸိူဝ်ႉၼင်ႇဢၼ် ႁဵတ်းသဵင်ၼႂ်းမိုဝ်ႉဝၼ်းဢၼ် ၶၢမ်ႇပွႆးထမ်ႇမႃႉၼၼ်ႉယဝ်ႉ။-

8ထႃႇဝရႃႉၽြႃး မီးတၢင်းၵျၢမ်ႇတၢင်းပွင် တၵ်းၵိူၼ်ႇယႃႉလမ်းဝဵင်းလုၵ်ႈယိင်း ၸီႉဢုၼ်ႇ ပႅတ်ႈလႄႈ ဢဝ်ၸိူၵ်ႈၶဵင်ႈသေလႄႈ ဢမ်ႇယိုတ်း ဢဝ်မိုဝ်းမၼ်းၸဝ်ႈသေၵႃႈတီႈ တၢင်းဢၼ်ယႃႉပႅတ်ႈၼၼ်ႉ။ မၼ်းၸဝ်ႈႁဵတ်းႁႂ်ႈလမ်းဝဵင်းဢၼ်ၵႃႈၼႂ်း ဢိၵ်ႇတင်းလမ်းဝဵင်းဢၼ်ၵႃႈၼွၵ်ႈ ၸိူဝ်းၼၼ်ႉ လႆႈၶၢင်းၶီၶၢင်းၽၢၼ်လႄႈ ႁႆႈႁွင်ႉပွင်ႉၶၢင်းလူၺ်ႈၵၼ်ယဝ်ႉ။-

9မႂ်ၽၵ်းတူမၼ်းၸိူဝ်းၼၼ်ႉ မီးတၢင်းဢၼ်ၸူမ်ၶဝ်ႈၵႃႈၼႂ်းလိၼ်ယူႇဢေႃႈ။ မၼ်းၸဝ်ႈယႃႉပႅတ်ႈလႄႈ ႁၵ်းၵိူၼ်ႇၽၵ်းတူမၼ်း ၸိူဝ်းၼၼ်ႉပုတ်းပႅတ်ႈယဝ်ႉ။ ၶုၼ်ႁေႃၶမ်းမၼ်း ဢိၵ်ႇတင်း ၶုၼ်မၼ်းၵႂၢၼ်မၼ်းၸိူဝ်းၼၼ်ႉ လႆႈဢွၼ်ၵၼ်ယူႇ ၵႃႈၼႂ်းၵူၼ်းတၢင်ႇၸိူဝ်ႉ တၢင်ႇၶိူဝ်း ဢၼ်ဢမ်ႇမီးတြႃးၸိူဝ်းၼၼ်ႉဢေႃႈ။ ပရေႃးၽႅတ်ႈမၼ်းၸိူဝ်းၼၼ်ႉ ဢမ်ႇလႆႈပျႃႇတိၵ်ႈတီႈ ထႃႇဝရႃႉၽြႃး။-

10ၶဝ်ၸိူဝ်းဢၼ် ပဵၼ်ၵႄႇပဵၼ်ႁူဝ် တီႈလုၵ်ႈယိင်း ၸီႉဢုၼ်ႇ ၼၼ်ႉ ဢွၼ်ၵၼ်ၼင်ႈၵႃႈၼိူဝ်လိၼ်ယူႇ တဵတ်ႇတဵတ်ႇ ယဵၼ်ယဵၼ်ယူႇ၊ ဢဝ်မုၼ်ႈလိၼ်ပႅတ်ႈတၢင်ႇသႂ်ႇ ၵႃႈၼိူဝ်ၵွၵ်းႁူဝ်တူဝ်ၸဝ်ႈၵဝ်ႇယူႇ၊ ဢဝ်ၼင်ပေႃႁတ်ႉဢႅဝ်ယူႇဢေႃႈ။ ၵၼ်ႇၺႃႇလုၵ်ႈယိင်းသၢဝ် ဝဵင်း ယေႇရူႉသလႅမ်ႇ ၸိူဝ်းၼၼ်ႉ ဢွၼ်ၵၼ်ၵူမ်ႈႁူဝ်ၶဝ်ငဝ်ယူႇ ၸွၼ်းၸွၼ်းတေႃႇထိုင်ႁွတ်ႈလိၼ်ဢေႃႈ။-

11ၵွပ်ႈပိူဝ်ႈဢၼ် လုၵ်ႈယိင်းၵူၼ်းမဵဝ်းၵဝ်လူႉလႅဝ်ၼၼ်ႉလႄႈ ၼမ်ႉတႃၵဝ်တူၵ်းလႄႈ မၢၵ်ႇတႃၵဝ်လူႉယဝ်ႉ။ တွင်ႉၵဝ်ပုမ်ၵဝ်ၼႆႉ မီးတၢင်းဢၼ်လိူတ်ႇယူႇသတ်ႉယူႇလႄႈ တပ်းၵဝ်ၵေႃႈ မီးတၢင်းဢၼ်ထွၵ်ႇႁိုဝ်ႈၵႃႈၼိူဝ်လိၼ်ယူႇဢေႃႈ။ လွင်ႈမၼ်းၸမ်ႉ လုၵ်ႈဢွၼ်ႇႁၢႆး တင်းလုၵ်ႈဢွၼ်ႇၵိၼ်ၼူမ်းၸိူဝ်းၼၼ်ႉ ဢွၼ်ၵၼ်လိုမ်းတူဝ်လိုမ်းႁၢင်ႈယူႇ ၵႃႈၼႂ်းသဵၼ်ႈတၢင်းဝဵင်းဢေႃႈ။-

12ၶဝ်ၸင်ႇဢွၼ်ၵၼ်ထၢမ်တီႈမႄႈၶဝ်လႄႈဝႃႈ၊ ၶဝ်ႈပိူၵ်ႇၶဝ်ႈသၢၼ် ဢိၵ်ႇတင်းၼမ်ႉၸပိတ်ႈ မီးၵႃႈတီႈလႂ်၊ ဝႃႈၼင်ႇၼႆယူႇ ၼႂ်းမိူဝ်ႈဢၼ်ၶဝ်လိုမ်းတူဝ်လိုမ်းႁၢင်ႈၶဝ် ၵႃႈၼႂ်းသဵၼ်ႈတၢင်းဝဵင်း မိူၼ်ၸိူဝ်ႉၼင်ႇၵေႃႉဢၼ် ပိူၼ်ႈတႅင်းတၢႆပႅတ်ႈၼၼ်ႉလႄႈ ဢဝ်ဢသၢၵ်ႈၶဝ် ထွၵ်ႇႁိုဝ်ႈပႅတ်ႈၵႃႈၼႂ်းႁူဝ်ဢူၵ်း မႄႈၶဝ်ယူႇၼၼ်ႉလူင်ပႄႇ။-

13လုၵ်ႈယိင်း ဝဵင်း ယေႇရူႉသလႅမ်ႇ ဢိူၺ်း၊ ၵဝ်တၵ်းလႆႈဢဝ်သၢၵ်ႈသေႇဢၼ်လႂ် ၼႄပျႃးတီႈမႂ်း။ ၵဝ်တၵ်းလႆႈဢဝ်ၽူႈလႂ် တႅၵ်ႈတိူင်းၵၼ်တင်းမႂ်း။ ၵၼ်ႇၺႃႇလုၵ်ႈယိင်းသၢဝ် ၸီႉဢုၼ်ႇ ဢိူၺ်း၊ ၵဝ်တၵ်းလႆႈဢဝ်ၽူႈလႂ် ၵပ်းတႅၵ်ႈၵၼ်တင်းမႂ်း ႁႂ်ႈမႂ်းလႆႈပေႇၸႂ်ၼိမ်ၸႂ်။ ၵွပ်ႈပိူဝ်ႈဢၼ်တီႈဢၼ်ၵိူၼ်ႇလူႉမႂ်းၼၼ်ႉ ပဵၼ်ၸိူဝ်ႉၼင်ႇ ၼမ်ႉသမ်ႇမုၵ်ႉတြႃႇလႄႈ ၽူႈလႂ်တၵ်းမႄးၵုမ်းမႄးႁဵတ်းလႆႈ။-

14ပရေႃးၽႅတ်ႈမႂ်းၸိူဝ်းၼၼ်ႉ ဢွၼ်ၵၼ်လႆႈႁၼ် လွင်ႈတၢင်းဢၼ်လၢႆလၢႆ ဢမ်ႇပွင်လွင်ႈၵႃႈသင် ဢိၵ်ႇတင်းလွင်ႈတၢင်းဢၼ်မိူၵ်ႈ တင်းလၢႆပုၼ်ႈမႂ်းယဝ်ႉ။ ၶဝ်ယင်းဢမ်ႇၽုၺ်ႇဢွၵ်ႇၼႄပျႃးဢပႅတ်ႈမႂ်း ႁႂ်ႈဢမူႉတၢင်းဢၼ်သိမ်းဢဝ်မႂ်းၵႂႃႇ ၶျုၵ်ႈဝႆႉၼၼ်ႉ လႆႈပေႇလႄႈႁၼ်ရူႇပႃႇရူင်ႇ ဢိၵ်ႇတင်း လွင်ႈတၢင်းဢၼ်ႁႂ်ႈပိူင်ႈတၢင်းၵႂႃႇ ဢၼ်ဢမ်ႇၸိုဝ်ႈဢမ်ႇၸႂ်ႈ ၸိူဝ်းၼၼ်ႉဢေႃႈ။-

15ၶဝ်ၸိူဝ်းဢၼ်ၵၢႆၵႂႃႇၼၼ်ႉ ၸင်ႇဢွၼ်ၵၼ်တူပ်းမိုဝ်းယူႇ၊ ႁဵတ်းသဵင်ဢၼ်သႄႉသွမ်း သီႉသီႉသေႃႉသေႃႉယူႇ၊ ဝႆႁူဝ်ၶွၼ်းႁူဝ် ၸူးတီႈလုၵ်ႈယိင်း ယေႇရူႉသလႅမ်ႇ ယူႇသေလႄႈ ထၢမ်ဝႃႈ၊ ဝဵင်းဢၼ်ၵူၼ်းတင်းလၢႆ ႁွင်ႉႁဵၵ်ႈၸိုဝ်ႈဝဵင်းပၢႆၸိၵ်းၸွမ်ၵုင်ႇသရေႇ၊ ဝဵင်းတီႈဢၼ်လီသႂၢင်ႇလီသိူဝ်းၵႃႈၼိူဝ်လိၼ်မိူင်း တင်းသဵင်ႈတင်းမူတ်း ၼၼ်ႉၸမ်ႉ၊ ပဵၼ်ဝဵင်းၼႆႉႁိုဝ်။ ဝႃႈၼင်ႇၼႆဢေႃႈ။-

16ရၢၼ်ႇသူႇမႂ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ၽုၺ်ႇသူပ်းယူႇၽၢႆႇၼိုင်ႈတင်းမႂ်းဢေႃႈ။ ၶဝ်ဢွၼ်ၵၼ် ႁဵတ်းသဵင် ဢၼ်သႄႉသွမ်း သီႉသီႉသေႃႉသေႃႉယူႇ၊ ၵတ်းၶဵဝ်ႈၵတ်းၽၼ်း ယူႇသေလႄႈ လၢတ်ႈလႄႈဝႃႈ၊ ႁဝ်းဢိုၼ်မၼ်းပႅတ်ႈယဝ်ႉ။ မိုဝ်ႉဝၼ်းၼႆႉၸမ်ႉ၊ ပဵၼ်မိုဝ်ႉဝၼ်းဢၼ် ႁဝ်းမုင်ႈမွင်းမႃးယဝ်ႉၼၼ်ႉ ဢမၢၼ်ႇၶၼ်ပဵၼ်ဢေႃႈ။ ႁဝ်းလႆႈထူပ်းလႆႈႁၼ်ယဝ်ႉ၊ ဝႃႈၼင်ႇၼႆဢေႃႈ။-

17ထႃႇဝရႃႉၽြႃး ႁဵတ်းလွင်ႈတၢင်းဢၼ် မၼ်းၸဝ်ႈၵျၢမ်ႇပွင်ယူႇၼၼ်ႉယဝ်ႉ။ မၼ်းၸဝ်ႈႁႂ်ႈၵႂၢမ်းမၼ်းၸဝ်ႈ ဢၼ်မီးဢမိင်ႉဝႆႉ မိူဝ်ႈၵွၼ်ႇ ဢွၼ်ၼႆႉၼၼ်ႉပျေႉၸုမ်ႇယဝ်ႉ။ မၼ်းၸဝ်ႈယင်းဢမ်ႇသေလၢႆလႄႈ ၵိူၼ်ႇယႃႉပႅတ်ႈယဝ်ႉ။ မၼ်းၸဝ်ႈပၼ်ဢၶႂၢင်ႉ ဢၼ်ရၢၼ်ႇသူႇမႂ်းလႆႈ ၸူမ်းသိူဝ်းၵႃႈၼိူဝ်မႂ်းလႄႈ ယုၵ်ႉယွင်ႈၶဝ်လႅမ် ၶဝ်ၸိူဝ်းဢၼ် ႁဵတ်းၶတ်းၵၼ်တင်းမႂ်းၼၼ်ႉဝႆႉယဝ်ႉ။-

18ႁူဝ်ၸႂ်ၶဝ်ၼၼ်ႉ ႁွင်ႉႁႃထႃႇဝရႃႉၽြႃး ယူႇဢေႃႈ။ လမ်းဝဵင်းလုၵ်ႈယိင်း ၸီႉဢုၼ်ႇ ဢိူၺ်း၊ ႁႂ်ႈၼမ်ႉတႃမႂ်းၼၼ်ႉ လႆယူႇဝၼ်းဝၼ်း ၶိုၼ်းၶိုၼ်းဢမ်ႇထၢတ်ႇ မိူၼ်ၸိူဝ်ႉၼင်ႇဢၼ် ၼမ်ႉႁွင်ႈၼမ်ႉၵႄးလႆၼၼ်ႉတႃႉ။ တူဝ်ၸဝ်ႈၵဝ်ႇ ယႃႇပေႁႄႉတူဝ်ၸဝ်ႈၵဝ်ႇ လႆႈထၢတ်ႇ လႆႈယဵၼ်သေၵမ်း။ ႁူၺ်ႇတႃမႂ်းၵေႃႈ ယႃႇပေႁႂ်ႈထၢတ်ႇႁႂ်ႈယဵၼ်သေၵမ်း။-

19လုၵ်ႉလႄႈ သႅၼ်ႇႁွင်ႉၶိင်ႇႁူဝ်ၶမ်ႈတႃႉ။ ဢဝ်ႁူဝ်ၸႂ်မႂ်းသွၼ်းလေႃႇ မိူၼ်ၸိူဝ်ႉၼင်ႇၼမ်ႉၼၼ်ႉ သိုဝ်ႈၼႃႈတႂ်ႈတႃ ထႃႇဝရႃႉၽြႃး တႃႉ။ ယုၵ်ႉမိုဝ်းမႂ်း ယဵတ်ႇၸူးတီႈမၼ်းၸဝ်ႈ ႁႂ်ႈလုၵ်ႈဢွၼ်ႇမႂ်း ဢၼ်ဢိုပ်းယၢၵ်ႈလႄႈ ႁႅင်းဢူၼ်ႈႁႅင်းယွမ်းၵႂႃႇယူႇ ၵႃႈတီႈသူပ်းသဵၼ်ႈတၢင်း ၵႃႈမီးၼၼ်ႉ လႆႈဢသၢၵ်ႈ ၵတ်းယဵၼ်ၶျၢမ်းသႃႇတႃႉ။-

20ထႃႇဝရႃႉၽြႃးတီႈၶႃႈ၊ ၶႅၼ်းတေႃႈလူတူၺ်းလႄႈ ႁၼ်လွင်ႈဢၼ် ၸဝ်ႈႁဝ်းၸီႇယၢင်ႇၸိူဝ်ႉၼင်ႇၼႆ တီႈၽူႈလႂ်ၼၼ်ႉ သေၵမ်းတီႈၶႃႈ၊ မႄႈယိင်းၸိူဝ်းၼၼ်ႉ လႆႈဢွၼ်ၵၼ်ၵိၼ် မၢၵ်ႇတွင်ႉမၢၵ်ႇပုမ်ၶဝ်၊ လုၵ်ႈလၢင်းဢၼ်ၶဝ်ႁွပ်ႇဢုမ်ႈဢဝ်ယွပ်ႇယူႇ ၵႃႈၼႂ်းမိုဝ်း ၶဝ်ၼၼ်ႉတီႈၶႃႈႁိုဝ်။ ယိတ်ႈပရေႃးႁဵၵ်ႈ ဢိၵ်ႇတင်း ပရေႃးၽႅတ်ႈၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ် ဢဝ်တၢႆၵႃႈတီႈထႃႇၼႃႉ တီႈမူတ်းၸၢင်ႇၸဝ်ႈ တီႈၶႃႈႁိုဝ်။-

21ၵူၼ်းၸဵမ်လဵၵ်ႉၸဵမ်ယႂ်ႇၸိူဝ်းၼၼ်ႉ လႆႈဢွၼ်ၵၼ်ယဵတ်ႇဢိူၼ်လိူၼ်ယူႇ ၵႃႈၼိူဝ်လိၼ်ၵႃႈၼႂ်းသဵၼ်ႈတၢင်းတီႈၶႃႈဢေႃႈ။ၽူႈမၢဝ်ႇ ဢိၵ်ႇတင်း ၽူႈသၢဝ်ၶႃႈၸဝ်ႈၸိူဝ်းၼၼ်ႉ လႆႈဢွၼ်ၵၼ် တၢႆလူၺ်ႈလၢပ်ႇလူၺ်ႈလႅဝ်းတီႈၶႃႈယဝ်ႉ။ ၼႂ်းမိုဝ်ႉဝၼ်းဢၼ်ၸဝ်ႈႁဝ်း ၸႂ်မႆႈၶႆႈၸႃႉၼၼ်ႉ၊ ၸဝ်ႈႁဝ်းဢဝ်ၶဝ်တၢႆပႅတ်ႈလႄႈ ယင်းဢမ်ႇဢဵတ်းလူလႄႈ ၶႃႈၽၼ်းၶဝ်ပႅတ်ႈတီႈၶႃႈယဝ်ႉ။-

22ၸဝ်ႈႁဝ်းႁွင်ႉဢဝ်တၢင်းဢၼ်ၵဝ် လီၵူဝ်လီႁႄၸိူဝ်းၼၼ်ႉ မႃးၵႃႈတီႈလဵပ်ႈႁွပ်ႈၶႃႈၸဝ်ႈ မိူၼ်ၸိူဝ်ႉၼင်ႇဢၼ်ႁွင်ႉဢဝ် ၵူၼ်းတင်းလၢႆမႃး ၼႂ်းၶိင်ႇမိုဝ်ႉဝၼ်းပွႆးထမ်ႇမႃႉၼၼ်ႉ တီႈၶႃႈယဝ်ႉ။ ၼႂ်းမိုဝ်ႉဝၼ်းဢၼ်တၢင်းၸႂ်မႆႈၶႆႈၸႃႉ ထႃႇဝရႃႉၽြႃး ဢွၵ်ႇၼၼ်ႉ၊ ၽူႈလႂ် သေၵေႃႉသေၵူၼ်း ဢမ်ႇၵၢင်းဢမ်ႇလွတ်ႈ ဢမ်ႇၵိုတ်းဢမ်ႇၵျၢၼ်ႇတီႈၶႃႈ၊ ၶဝ်ၸိူဝ်းဢၼ်ၶႃႈၸဝ်ႈႁွပ်ႇဢုမ်ႈလႄႈ လဵင်ႉလူၸိူဝ်းၼၼ်ႉၸိုင်၊ ရၢၼ်ႇသူႇၶႃႈၸဝ်ႈ ယႃႉပႅတ်ႈတီႈၶႃႈယဝ်ႉ။

← Chapter 1 Jump to: Chapter 3 →