Lamentations 3 — Shan

18ပိူဝ်ႈၼႆလႄႈ ၵဝ်လႆႈလၢတ်ႈလႄႈဝႃႈ၊ လွင်ႈဢၼ်ၵဝ်လီဢိင်ပိုင်ႈ ဢိၵ်ႇတင်း လွင်ႈဢၼ် ၵဝ်လီမုင်ႈထႃႈမွင်းထႃႈ ၵႃႈတီႈၽၢႆႇၼႃႈ ထႃႇဝရႃႉၽြႃးၼၼ်ႉ လူႉၵႂႃႇယဝ်ႉ၊ ဝႃႈၼင်ႇၼႆဢေႃႈ။-

19ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်း တုၵ်ႉၶႃႉတၢင်းၽၢၼ်ၶႃႈၸဝ်ႈ၊ တၢင်းဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈ ဢိၵ်ႇတင်း မႂ် တေႃးၼႃႉ တင်းလီဢၼ်ၶူမ်ၶႃႈၸဝ်ႈၸိူဝ်းၼၼ်ႉ သေၵမ်းတီႈၶႃႈ၊-

20ႁူဝ်ၸႂ်ၶႃႈၸဝ်ႈ ယင်းၶုၵ်းၸႂ်လႆႈၶႆႈၸႂ်ထူပ်း ၸိူဝ်းၼၼ်ႉယူႇလႄႈ လႆႈၶၢမ်ႇတၢင်းဢၼ် ၶျႃးတူၵ်းတီႈတႅမ်ႇယူႇ ၵႃႈၼႂ်းၶႃႈၸဝ်ႈတီႈၶႃႈဢေႃႈ။-

21ၵွပ်ႈပိူဝ်ႈဢၼ် ႁူဝ်ၸႂ်ၶႃႈၸဝ်ႈလႆႈသတီႉ ၸိူဝ်ႉၼင်ႇၼၼ်လႄႈ ၶႃႈၸဝ်ႈမီးဢၶႂၢင်ႉဢၼ်လႆႈ မုင်ႈထႃႈမွင်းထႃႈတီႈၶႃႈဢေႃႈ။-

22ၵွပ်ႈပိူဝ်ႈဢၼ် ထႃႇဝရႃႉၽြႃး ဢဵတ်းလူလႄႈ ၵရူႉၼႃႇမၼ်းၸဝ်ႈ ဢမ်ႇသုတ်းဢမ်ႇသဵင်ႈၼၼ်ႉလႄႈ၊ ႁဝ်းယင်းဢမ်ႇလႆႈ ႁွတ်ႈထိုင် တၢင်းဢၼ်လူႉသုမ်းလႄႈယူႇဢေႃႈ။-

23လႆႈဢွၼ်ၵၼ်ၶၢမ်ႇဢဝ် ၵရူႉၼႃႇၸဝ်ႈဢၼ်မႂ်ႇယူႇၵူႈၼႂ်ဢေႃႈ။ သဵတ်ႈၸႃႇၸဝ်ႈႁဝ်း ယႂ်ႇမျၢတ်ႈၼႃႇတီႈၶႃႈဢေႃႈ။-

24ဝီႉၺိၺ်ႇၵဝ်ဝႃႈၸမ်ႉ၊ ထႃႇဝရႃႉၽြႃးၼၼ်ႉ ပဵၼ်ပုၼ်ႈၵဝ်တႃႇၵဝ်ဢေႃႈ။ ပိူဝ်ႈၼႆလႄႈ ၵဝ်တၵ်း ဢိင်မၼ်းၸဝ်ႈသေလႄႈ မုင်ႈထႃႈမွင်းထႃႈဢေႃႈ။-

25ထႃႇဝရႃႉၽြႃး ႁဵတ်းၵျေးၸူးတီႈၶဝ်ၸိူဝ်းဢၼ် မုင်ႈမွင်းမၼ်းၸဝ်ႈ ဢိၵ်ႇတင်း ဝီႉၺိၺ်ႇၶဝ်ၸိူဝ်းဢၼ် ႁႃဢဝ်မၼ်းၸဝ်ႈၼၼ်ႉဢေႃႈ။-

26တၢင်းဢၼ် မုင်ႈထႃႈမွင်းထႃႈလႄႈ ပႂ်ႉထႃႈတၢင်းဢၼ်မၼ်းၸဝ်ႈ ၵႄႇသႄႇၶျွတ်ႈဢဝ်ၼၼ်ႉ ယူႇၼိမ်ၼိမ်လီလီၼၼ်ႉ ပဵၼ်ဢၼ်ထုၵ်ႇဢၼ်လီဢေႃႈ။-

27တၢင်းဢၼ်ၵူၼ်းႁၢပ်ႇၵၢၼ်း ၼႂ်းမိူဝ်ႈဢၼ် ဢသၢၵ်ႈမၼ်းယင်းလဵၵ်ႉ ယင်းၼုမ်ႇၼၼ်ႉ ပဵၼ်ဢၼ်ထုၵ်ႇဢၼ်လီဢေႃႈ။-

28ႁႂ်ႈမၼ်း ၼင်ႈယူႇၵေႃႉလဵဝ်ၵူၺ်းမၼ်းလႄႈ ယူႇတဵတ်ႇတဵတ်ႇယဵၼ်ယဵၼ် ၵွပ်ႈပိူဝ်ႈဢၼ် မၼ်းၸဝ်ႈဢဝ်ၵၢၼ်းတၢင်ႇသႂ်ႇၼၼ်ႉ သေၵမ်းလူၺ်ႈ။-

29ပေႃးမၼ်းထၢင်ႇလႄႈဝႃႈ၊ ၸၢင်ႈၶႄးတၵ်းမီး ဢၶႂၢင်ႉတၢင်းဢၼ်မုင်ႈမွင်းဢေႃႈ၊ ဝႃႈၼင်ႇၼႆၸိုင် ႁႂ်ႈမၼ်းဢဝ်သူပ်းမၼ်းၸပ်း ၵႃႈတီႈမုၼ်ႈလိၼ်ယူႇ သေၵမ်းလူၺ်ႈ။-

30ႁႂ်ႈမၼ်းဢဝ်ၵႅမ်ႈမၼ်းဢၢပ်ႈပၼ် တီႈၵေႃႉဢၼ်ပေႃႉယႅၼ်ႉမၼ်း ၼၼ်ႉလႄႈ ဢိမ်ႇတဵမ်ဝႆႉတင်း တၢင်းဢၼ် သႄႉသွမ်းတၢင်ႇဢပႅတ်ႈသေၵမ်းလူၺ်ႈ။-

31လွင်ႈမၼ်းၸမ်ႉ ထႃႇဝရႃႉၽြႃး ဢမ်ႇၸၢင်ႈၸုၼ်ႉပႅတ်ႈယူႇသေႇသေႇ။-

32ပိၵ်ႉသမ်ႉမၼ်းၸဝ်ႈ ႁႂ်ႈငိၼ်းၽၢၼ်ထိုင်ၸႂ်သေၵေႃႈ၊ မၼ်းၸဝ်ႈ တၵ်းဢဵတ်းလူမႅၼ်ႈၸွမ်းၵႃႈၼင်ႇဢၼ် ၵရူႉၼႃႇမၼ်းၸဝ်ႈ ယႂ်ႇၼမ်ၼၼ်ႉဢေႃႈ။-

33မၼ်းၸဝ်ႈဢမ်ႇမီးၸႂ်ဢၼ် ၶႂ်ႈႁႂ်ႈၵူၼ်း မီးတုၵ်ႉၶႃႉတၢင်းၽၢၼ်လႄႈ ႁႂ်ႈလႆႈငိၼ်းၽၢၼ်ထိုင်ၸႂ်။-

34ဢမူႉတၢင်းဢၼ်ဢဝ်တိၼ်ယဵပ်ႇယမ်ႈ ၵူၼ်းမိူင်းၵႃႈဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉ၊-

35ဢမူႉတၢင်းဢၼ်ယႃႉတြႃး ဢၼ်ၵူၼ်းထုၵ်ႇၶၢမ်ႇၸိူဝ်းၼၼ်ႉပႅတ်ႈ သိုဝ်ႈၼႃႈတႂ်ႈတႃ ၽြႃးဢၼ်သုင်ၼႃႇသေပိူၼ်ႈ၊-

36ဢမူႉတၢင်းဢၼ် ႁႂ်ႈပိူၼ်ႈတၢင်ႇၵေႃႉ တူၵ်းသုမ်းၼႂ်းတၢင်းဢၼ်ဢမ်ႇၸွမ်းၼင်ႇတြႃးၼၼ်ႉ ၸိူဝ်းၼၼ်ႉၸိုင်၊ ထႃႇဝရႃႉၽြႃး ဢမ်ႇထုၵ်ႇၸႂ်ၵျိူၵ်ႈၸႂ်။-

37ထႃႇဝရႃႉၽြႃး ယင်းဢမ်ႇသင်ႇလၢတ်ႈဝႆႉလႄႈ ၽူႈလႂ်လၢတ်ႈလႄႈ ႁႂ်ႈပဵၼ်သေၸိူဝ်ႉသေပိူင်လႆႈ။-

38မင်ႇၵလႃႇ ဢိၵ်ႇတင်း ဢႃႉမင်ႇၵလႃႇ ဢွၵ်ႇသေၵႃႈၼႂ်း သူပ်းၽြႃးဢၼ်သုင်ၼႃႇသေပိူၼ်ႈၼၼ်ႉမႃး ဢမ်ႇၸႂ်ႈႁိုဝ်။-

39ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၵူၼ်းသတ်ႉတဝႃႇ ဢၼ်ဢသၢၵ်ႈလိပ်းယူႇၼၼ်ႉ လႆႈပွင်ႉမိူၼ်ႇယူႇဢၼ်ဝႃႈ ၵူၼ်းလႆႈပွင်ႉမိူၼ်ႇယူႇၵွပ်ႈပိူဝ်ႈ ဢၼ်လႆႈၶၢမ်ႇတၢမ်ႇဢပႅတ်ႈတူႉၸရိူၵ်ႈမၼ်းၼၼ်ႉ ၼင်ႇႁိုဝ်။-

40ႁဝ်းၼႆႉၸႅတ်ႈထၢမ်ၸၢမ်းတူၺ်း သဵၼ်ႈတၢင်းဢၼ်ႁဝ်းၸွမ်းၸိူဝ်းၼၼ်ႉယူႇ သေလႄႈ ဢွၼ်ၵၼ်ဝၢႆႇၶိုၼ်းၸူး တီႈထႃႇဝရႃႉၽြႃး တႃႉႁဝ်း။-

41ဢွၼ်ၵၼ်ယုၵ်ႉယွင်ႈ ႁူဝ်ၸႂ်ႁဝ်း ဢိၵ်ႇတင်းမိုဝ်းႁဝ်းၸူး ၵႃႈတီႈ ၽြႃးပဵၼ်ၸဝ်ႈ ဢၼ်မီးယူႇၵႃႈၼိူဝ်ၽုင်ႇၵၢင်ႁၢဝ်ၼၼ်ႉ တႃႉႁဝ်း။-

42ၶႃႈၸဝ်ႈႁဝ်းၶဝ်ၽိတ်းပိူင်ႈလႄႈ ပုင်ႇၵၢၼ်ႇမႅၼ်ႈတီႈၶႃႈယဝ်ႉ။ ၸဝ်ႈႁဝ်း ဢမ်ႇပွႆႇလွတ်ႈဢပႅတ်ႈတီႈၶႃႈ၊-

43ၸဝ်ႈႁဝ်း ဢဝ်တၢင်းၸႂ်မႆႈၶႆႈၸႃႉၸဝ်ႈႁဝ်း ႁႄႉၵင်ႈႁႄႉလပ်ႉၸဝ်ႈႁဝ်းသေလႄႈ၊ ၸဝ်ႈႁဝ်းလိုပ်ႈၸွမ်းလမ်းၸွမ်း ၶႃႈၸဝ်ႈႁဝ်းၶဝ် လႄႈ ယင်းဢမ်ႇမီးၵရူႉၼႃႇလႄႈ ၶႃႈၽၼ်းပႅတ်ႈတီႈၶႃႈဢေႃႈ။-

44ၸဝ်ႈႁဝ်း ဢဝ်ၽႃႈၽူၼ်ႁႄႉၵင်ႈႁႄႉလပ်ႉၸဝ်ႈႁဝ်းဝႆႉ ထၼ်ႈပေႃးၵႂၢမ်းပထၼႃႇၶႃႈၸဝ်ႈႁဝ်းၶဝ် ဢမ်ႇပွင်ႇၽႅဝ်ႁွတ်ႈ ၵႃႈတီႈၸဝ်ႈႁဝ်းလႆႈ တီႈၶႃႈဢေႃႈ။-

45ၸဝ်ႈႁဝ်း ႁႂ်ႈၶႃႈၸဝ်ႈႁဝ်းၶဝ် ပဵၼ်ၸိူဝ်ႉၼင်ႇ တီႈဢၼ်လီႁင်ႈဢဵတ်ႇသဵတ်ႇ ဢိၵ်ႇတင်းၸိူဝ်ႉၼင်ႇမုၼ်ႈ ဢၢင်ႉဢၢၵ်ႇ ဢၼ်ဢဝ်ယူးပတ်းဢွၵ်ႇပႅတ်ႈၼၼ်ႉ ၵႃႈၼႂ်းၵူၼ်းမဵဝ်းတင်းလၢႆ တီႈၶႃႈဢေႃႈ။-

46ရၢၼ်ႇသူႇၶႃႈၸဝ်ႈႁဝ်းၶဝ် တင်းသဵင်ႈတင်းလူင် ဢွၼ်ၵၼ်ၽုၺ်ႇသူပ်းၶဝ် ယူႇၽၢႆႇၼိုင်ႈတင်းၶႃႈၸဝ်ႈႁဝ်းၶဝ်တီႈၶႃႈဢေႃႈ။-

47တၢင်းဢၼ်လီၵူဝ်လီႁႄ၊ တၢင်းဢၼ်တူၵ်းၵႃႈၼႂ်းၶုမ်မရၼႃႉ၊ တၢင်းဢၼ်သဵတ်ႇၵူၼ်းယဵၼ်ၵူၼ်း၊ တၢင်းဢၼ်ပႄႇၽဵဝ်ႈယႃႉပႅတ်ႈၼၼ်ႉ ၸိူဝ်းၼၼ်ႉ ဢွၼ်ၵၼ်ႁွတ်ႈထိုင်တီႈၶႃႈၸဝ်ႈႁဝ်းၶဝ် တီႈၶႃႈယဝ်ႉ။-

48မၢၵ်ႇတႃၵဝ်ၼႆႉ မီးတၢင်းဢၼ်ပဵၼ်ၼမ်ႉႁွင်ႈလႄႈလႆယူႇ ၵွပ်ႈပိူဝ်ႈ ဢၼ်လုၵ်ႈယိင်းၵူၼ်းမဵဝ်းၵဝ်ၼၼ်ႉ လူႉလႅဝ်ၼၼ်ႉဢေႃႈ။-

49ၼမ်ႉတႃၵဝ်တူၵ်းလႄႈ ယင်းဢမ်ႇထၢတ်ႇဢမ်ႇယဵၼ်လႄႈ လႆယူႇသေႇသေႇ။-

50တေႃႇထိုင်ႁွတ်ႈ ထႃႇဝရႃႉၽြႃး ယူႇၵႃႈၼိူဝ်ၽုင်ႇၵၢင်ႁၢဝ် သေလႄႈ လူတူၺ်းလႄႈ မၢတ်ႈတွင်းဝႆႉၼၼ်ႉဢေႃႈ။-

51မၢၵ်ႇတႃၵဝ်ၸၢင်ႈ ႁႂ်ႈႁူဝ်ၸႂ်ၵဝ်မႆႈႁွၼ်ႉယူႇ ၵွပ်ႈပိူဝ်ႈလုၵ်ႈယိင်းဝဵင်းၵဝ် တင်းသဵင်ႈတင်းလူင်ၼၼ်ႉဢေႃႈ။-

52ၶဝ်ၸိူဝ်းဢၼ် ယင်းဢမ်ႇမီးလွင်ႈမၼ်းလႄႈ ႁဵတ်းတၢင်းဢၼ်ၽိတ်းၵၼ်တင်းၵဝ်ၼၼ်ႉ ဢွၼ်ၵၼ်လိုပ်ႈၸွမ်း ႁႃၵဝ်မိူၼ်ၸိူဝ်ႉၼင်ႇ ၼူၵ်ႉၼၼ်ႉဢေႃႈ။-

53ၶဝ်ဢွၼ်ၵၼ်တႅပ်းဢသၢၵ်ႈၵဝ်ၶၢတ်ႇ ၵႃႈၼႂ်းၶုမ်လိၼ်လုၵ်းလိၼ်လႄႈ ဢဝ်မၢၵ်ႇႁိၼ် တၢင်ႇသႂ်ႇဝႆႉၵႃႈၼိူဝ်ၵဝ်ဢေႃႈ။-

54ၼမ်ႉထူမ်ႈႁူမ်ႇႁူဝ်ၵဝ်လႄႈ ၵဝ်လႆႈလၢတ်ႈလႄႈဝႃႈ၊ ၵဝ်ၼႆႉသုမ်းၸွမ်းယဝ်ႉ၊ ဝႃႈၼင်ႇၼႆဢေႃႈ။-

55ထႃႇဝရႃႉၽြႃး တီႈၶႃႈ၊ ၶႃႈၸဝ်ႈယူႇၵႃႈၼႂ်းၶုမ်လိၼ်လုၵ်းလိၼ် ဢၼ်လိုၵ်ႉၼႃႇသေပိူၼ်ႈၼၼ်ႉ ႁွင်ႉႁႃၼႃႇမႃႉၸိုဝ်ႈသဵင်ၸဝ်ႈႁဝ်း တီႈၶႃႈဢေႃႈ။-

56ၸဝ်ႈႁဝ်း လႆႈငိၼ်းသဵင်ၶႃႈၸဝ်ႈလႄႈ ၶႅၼ်းတေႃႈ ယႃႇပေဝၢႆႇႁူၸဝ်ႈႁဝ်းပႅတ်ႈသေ ၼႂ်းမိူဝ်ႈဢၼ် ၶႃႈၸဝ်ႈ ၶၢင်းၶီၶၢင်းၽၢၼ်လႄႈ ႁွင်ႉႁႃယူႇၼၼ်ႉ သေၵမ်းတီႈၶႃႈ၊-

57ၸဝ်ႈႁဝ်းသုတ်ႉၸပ်းသုတ်ႉၸူးၼႂ်းမိုဝ်ႉဝၼ်းဢၼ် ၶႃႈၸဝ်ႈႁွင်ႉႁႃယူႇၼၼ်ႉလႄႈ မီးဢမိင်ႉလႄႈဝႃႈ၊ ယႃႇပေၵူဝ်ပေႁႄ၊ ဝႃႈၼင်ႇၼႆတီႈၶႃႈယဝ်ႉ။-

58ၸဝ်ႈၽြႃးတီႈၶႃႈ၊ ၸဝ်ႈႁဝ်းပႂ်ႉဢမူႉဢၼ် ၸၢပ်ႈသႅင်ႇၵၼ်တင်း ဝီႉၺိၺ်ႇၶႃႈၸဝ်ႈၸိူဝ်းၼၼ်ႉ သေလႄႈ ထုတ်ႇဢဝ်ဢသၢၵ်ႈၶႃႈၸဝ်ႈ တီႈၶႃႈယဝ်ႉ။-

59ထႃႇဝရႃႉၽြႃး တီႈၶႃႈ၊ ၸဝ်ႈႁဝ်းႁၼ်တၢင်းဢၼ် ၼိၵ်ႈၸၢၵ်ႈငႅၼ်းသႄး ဢၼ်ၶႃႈၸဝ်ႈလႆႈၶၢမ်ႇၼၼ်ႉတီႈၶႃႈယဝ်ႉ။ ၶႅၼ်းတေႃႈၸီႇယၢင်ႇတြႃး ပုၼ်ႈၶႃႈၸဝ်ႈ သေၵမ်းတီႈၶႃႈ၊-

60ၸဝ်ႈႁဝ်းႁၼ် ၵႃႈဢၼ်ၶဝ်ဝႆႉတၢင်းၽိတ်း ဢိၵ်ႇတင်း ၵႃႈဢၼ်ၶဝ်ၵျၢမ်ႇပွင် ဢၼ်ဢမ်ႇလီဢမ်ႇငၢမ်း တီႈၶႃႈၸဝ်ႈၸိူဝ်းၼၼ်ႉ တီႈၶႃႈယဝ်ႉ။-

61ထႃႇဝရႃႉၽြႃး တီႈၶႃႈ၊ ၸဝ်ႈႁဝ်း ငိၼ်းတၢင်းဢၼ်ၶဝ်သႄႉသွမ်း၊ တၢင်းဢၼ်ၶဝ်ၵျၢမ်ႇပွင် ဢၼ်ဢမ်ႇလီဢမ်ႇငၢမ်းၵႃႈမီး တီႈၶႃႈၸဝ်ႈႁဝ်း၊-

62တၢင်းဢၼ်သူပ်းၶဝ်ၸိူဝ်းဢၼ် လုၵ်ႉယူႇၽၢႆႇၼိုင်ႈ တင်းၶႃႈၸဝ်ႈႁဝ်းၼၼ်ႉလၢတ်ႈ၊ တၢင်းဢၼ်ၶဝ်ၵျၢမ်ႇပွင် ယူႇၽၢႆႇၼိုင်ႈ တင်းၶႃႈၸဝ်ႈႁဝ်းယူႇ တင်းဝၼ်းတင်းဝၼ်းၼၼ်ႉ တီႈၶႃႈယဝ်ႉ။-

63ၸဝ်ႈႁဝ်း ၶႅၼ်းတေႃႈလူတူၺ်း တၢင်းဢၼ်ၶဝ်ၼင်ႈ၊ တၢင်းဢၼ်ၶဝ်လုၵ်ႉၼၼ်ႉ သေၵမ်းတီႈၶႃႈ၊ ၶႃႈၸဝ်ႈပဵၼ်လွင်ႈဢၼ်ၶဝ်ႁဵတ်းၵႂၢမ်းၵပ်း တီႈၶႃႈဢေႃႈ။-

64ထႃႇဝရႃႉၽြႃး တီႈၶႃႈ၊ ၶႅၼ်းတေႃႈ တွပ်ႇတႅၼ်းပၼ် ဢၵျူဝ်းဢပႅတ်ႈတီႈၶဝ် ၸွမ်းၵႃႈၼင်ႇဢၼ်ၶဝ်ၵမ်ၵျၢင်ႉၼၼ်ႉ သေၵမ်းတီႈၶႃႈ၊-

65ၶႅၼ်းတေႃႈ ပၼ်ႁူဝ်ၸႂ် ဢၼ်ၵႅၼ်ႇၶႅင်ဢၼ်ဝႃႈ တၢင်းဢၼ် ၸဝ်ႈႁဝ်းၵိၼ်ႇဝႃႈၼၼ်ႉတီႈၶဝ် သေၵမ်းတီႈၶႃႈ၊-

66ၸဝ်ႈႁဝ်း ၶႅၼ်းတေႃႈၸႂ်မႆႈၶႆႈၸႃႉသေလႄႈ လိုပ်ႈၸွမ်းလမ်းၸွမ်းၶဝ်လႄႈ ယႃႉၽဵဝ်ႈၶဝ်ပႅတ်ႈသေ ၵႃႈတႂ်ႈၽႃႉၵၢင်ႁၢဝ် ထႃႇဝရႃႉၽြႃး သေၵမ်းတီႈၶႃႈ၊