Lamentations 5

Shan

← Chapter 4 Jump to:

1ထႃႇဝရႃႉၽြႃးတီႈၶႃႈ၊ ၶႅၼ်းတေႃႈ ၶုၵ်းၸႂ်လႆႈၶႆႈၸႂ်ထူပ်း ဢမူႉဢၼ်ႁွတ်ႈထိုင် ၵႃႈၼိူဝ်ၶႃႈၸဝ်ႈႁဝ်းၶဝ်ၼၼ်ႉ သေၵမ်းတီႈၶႃႈ၊ၶႅၼ်းတေႃႈ လူတူၺ်းလႄႈ ႁၼ်တၢင်းဢၼ်သႄႉသွမ်း ဢၼ်ၶႃႈၸဝ်ႈႁဝ်းၶဝ် လႆႈၶၢမ်ႇၼၼ်ႉသေၵမ်းတီႈၶႃႈ၊-

2လိၼ်တီႈဢၼ်ၶႃႈၸဝ်ႈႁဝ်းၶဝ်ၶၢမ်ႇဢမူၺ်ႇၼၼ်ႉ ႁွတ်ႈထိုင်ၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်း တင်းလၢႆလႄႈ ႁိူၼ်းတီႈယူႇၶႃႈၸဝ်ႈႁဝ်းၶဝ်ၸိူဝ်းၼၼ်ႉ ႁွတ်ႈထိုင်ၵႃႈၼႂ်းမိုဝ်း ၵူၼ်းတၢင်ႇသိုင်ႇတၢင်ႇမိူင်း တင်းလၢႆ တီႈၶႃႈယဝ်ႉ။-

3ၶႃႈၸဝ်ႈႁဝ်းၶဝ်ပဵၼ် လုၵ်ႈတိၼ်ႇၽႃႉလႄႈ ပေႃႈတၢႆတီႈၶႃႈယဝ်ႉ။ မႄႈလႆႈယူႇၸိူဝ်ႉၼင်ႇ မႄႈမူၵ်းမႄႈမၢႆႈၼၼ်ႉ တီႈၶႃႈဢေႃႈ။-

4ပၼ်ငိုၼ်း ၸင်ႇလႆႈၵိၼ်ၼမ်ႉ တီႈၶႃႈယဝ်ႉ။ ၽိုၼ်းၵေႃႈလႆႈပၼ် ၵႃႈမၼ်းၶၼ်မၼ်းလႄႈ သိုဝ်ႉဢဝ်တီႈၶႃႈဢေႃႈ။-

5လႆႈၶၢမ်ႇတၢင်းဢၼ်ပိူၼ်ႈဢဝ် ၵၢၼ်းႁၢပ်ႇတၢင်ႇသႂ်ႇ ၵႃႈၼိူဝ်ၶေႃးၶႃႈၸဝ်ႈႁဝ်းၶဝ်လႄႈ ၼိၵ်ႈၸၢၵ်ႈငႅၼ်းသႄးတီႈၶႃႈဢေႃႈ။ ယင်းဢမ်ႇလႆႈ ၵိုတ်းလႆႈသဝ်းလႄႈ လႆႈႁဵတ်းလႆႈသၢင်ႈယူႇတီႈၶႃႈဢေႃႈ။-

6လႆႈဢဝ်မိုဝ်းၶႃႈၸဝ်ႈႁဝ်းၶဝ်ၶၢမ်ႇႁဵတ်းၶႃႈ တီႈၵူၼ်းမိူင်း ဢေႇၵိပ်ႉတူႉ ဢိၵ်ႇတင်း ၵူၼ်းမိူင်း ဢႃႇသူႉရီႉ ၸိူဝ်းၼၼ်ႉ ႁႂ်ႈလႆႈတၢင်းၵိၼ် တၢင်းၶူပ်းတီႈၶႃႈဢေႃႈ။-

7ပူႇမွၼ်ႇၶႃႈၸဝ်ႈႁဝ်းၶဝ်ၼၼ်ႉ ၽိတ်းပိူင်ႈလႄႈတၢႆသေယဝ်ႉ၊ ၶႃႈၸဝ်ႈႁဝ်းၶဝ် လႆႈၶၢမ်ႇဢပႅတ်ႈၶဝ်ၼၼ်ႉ တီႈၶႃႈဢေႃႈ။-

8ၶဝ်ၸိူဝ်းဢၼ်ပဵၼ်ၶႃႈၼၼ်ႉ လႆႈဢုပ်ႉပိူင်ႇၶႃႈၸဝ်ႈႁဝ်းၶဝ်လႄႈ ၽူႈလႂ်သေၵေႃႉသေၵူၼ်း ဢမ်ႇၵႄႇသႄႇၼုၵ်ႈဢဝ် ၶႃႈၸဝ်ႈႁဝ်းၶဝ် ဢွၵ်ႇသေၵႃႈၼႂ်းမိုဝ်းၶဝ်ၼၼ်ႉတီႈၶႃႈ၊-

9ၶႃႈၸဝ်ႈႁဝ်းၶဝ် လႆႈဢွၼ်ၵၼ် ၸုၼ်ႉဢသၢၵ်ႈၵွပ်ႈပိူဝ်ႈ ၽေးလၢပ်ႇၽေးလႅဝ်း ၵႃႈတီႈထိူၼ်ႇၼၼ်ႉယူႇ သေလႄႈ ႁႃတၢင်းၵိၼ်တၢင်းၶူပ်းတီႈၶႃႈဢေႃႈ။-

10ၽိဝ်ၼင်ၶႃႈၸဝ်ႈႁဝ်းၶဝ်လမ်ၵႂႃႇ မိူၼ်ၸိူဝ်ႉၼင်ႇ ၽီးၽႆးၼၼ်ႉ ၵွပ်ႈပိူဝ်ႈဢၢႆႁႅင်း တၢင်းဢၼ်ဢိုပ်း၊ဢၼ်ယၢၵ်ႈၼၼ်ႉ မႆႈၼႃႇၼၼ်ႉ တီႈၶႃႈဢေႃႈ။-

11ၶဝ်ဢွၼ်ၵၼ်ႁဵတ်းဢႃႉထမ်ႇမႃႉ တီႈမႄႈယိင်းတင်းလၢႆ ၵႃႈၼႂ်းဝဵင်း ၸီႉဢုၼ်ႇ ဢိၵ်ႇတင်း ၽူႈသၢဝ်တင်းလၢႆ ၵႃႈၼႂ်းဝဵင်း ယူႉတႃႉ ၸိူဝ်းၼၼ်ႉ တီႈၶႃႈဢေႃႈ။-

12မူးမၢတ်ႈၽွင်းမိူင်းတင်းလၢႆ လႆႈၶၢမ်ႇတၢင်းဢၼ် ႁိဝ်ႈဢဝ်မိုဝ်းႁွႆႈဝႆႉလႄႈ ၼႃႈၶဝ်ၸိူဝ်းဢၼ်ထဝ်ႈ ဢၼ်ၵႄႇၼၼ်ႉ လႆႈၶၢမ်ႇတၢင်းဢၼ် ၶဝ်ႁဵတ်းဢမ်ႇရူဝ်ႇသေႇၵူဝ်ယမ်တီႈၶႃႈ၊-

13ၵူၼ်းၼုမ်ႇၵူၼ်းၵမ်တင်းလၢႆ လႆႈဢွၼ်ၵၼ် ၶိုတ်ႈလူၺ်တီႈမၢၵ်ႇႁိၼ်လူၺ်လႄႈ၊ လုၵ်ႈဢွၼ်ႇတင်းလၢႆၵေႃႈ လႆႈလူမ်ႉယူႇ ၵႃႈတီႈတႂ်ႈၽိုၼ်း တီႈၶႃႈဢေႃႈ။-

14ၶဝ်ၸိူဝ်းဢၼ်ထဝ်ႈ ဢၼ်ၵႄႇၼၼ်ႉ လႆႈလပ်ႉႁၢႆၵႂႃႇ ၵႃႈတီႈႁူးၽၵ်းတူဝဵင်းလႄႈ ၵူၼ်းၼုမ်ႇၵူၼ်းၵမ်တင်းလၢႆ လပ်ႉႁၢႆၵႂႃႇ ၵႃႈတီႈပွႆး ဢၼ်ႁဵတ်းၵႂၢမ်းၼၼ်ႉ တီႈၶႃႈဢေႃႈ။-

15တၢင်းဢၼ်ႁူဝ်ၸႂ်ၶႃႈၸဝ်ႈႁဝ်းၶဝ် သႂၢင်ႇသိူဝ်းၼၼ်ႉ ထၢတ်ႇႁၢႆဝၢႆးဝွတ်ႈၵႂႃႇလႄႈ တၢင်းဢၼ်ၵႃႈဢၼ်ဝႅၼ်ၶႃႈၸဝ်ႈႁဝ်းၶဝ်ၼၼ်ႉ လႆႈၶၢႆႉပုတ်ႈပဵၼ်တၢင်းဢၼ် ၶၢင်းၶီၶၢင်းၽၢၼ်ယူႇၵႃႈၼႂ်း တီႈၶႃႈဢေႃႈ။-

16မွၵ်ႇႁူဝ်သရၽူႇၶႃႈၸဝ်ႈႁဝ်းၶဝ် တူၵ်းသေၵႃႈတီႈႁူဝ်ၵႂႃႇလႄႈ ၶႃႈၸဝ်ႈႁဝ်းၶဝ် မီးဢႃႉမင်ႇၵလႃႇ ၵွပ်ႈပိူဝ်ႈဢၼ်ၽိတ်းပိူင်ႈၼၼ်ႉ တီႈၶႃႈဢေႃႈ။-

17ပိူဝ်ႈၼႆလႄႈ ႁူဝ်ၸႂ်ၶႃႈၸဝ်ႈႁဝ်းၶဝ် လူႉၵႂႃႇလႄႈ မၢၵ်ႇတႃၶႃႈၸဝ်ႈႁဝ်းၶဝ် မူဝ်းၵႂႃႇၵွပ်ႈပိူဝ်ႈ လွင်ႈတၢင်းၸိူဝ်းၼၼ်ႉ၊-

18ဢိၵ်ႇတင်း ၵွပ်ႈပိူဝ်ႈလွႆ ၸီႉဢုၼ်ႇ ဢၼ်သဵတ်ႇၵူၼ်းယဵၼ်ၵူၼ်းလႄႈ မႃလိၼ်ဢွၼ်ၵၼ်ၵႂႃႇမႃးယူႇ ၵႃႈၼိူဝ်မၼ်းၼၼ်ႉဢေႃႈ။-

19ထႃႇဝရႃႉၽြႃး တီႈၶႃႈ၊ ၸဝ်ႈႁဝ်းတႄႇယူႇၼိၵ်ႈၸႃႉ ထႃႇဝရႃႉတီႈၶႃႈဢေႃႈ။ ပလၢင်ႇၸဝ်ႈႁဝ်းၵေႃႈ ပဵၼ်ပလၢင်ႇၵူႈၸူဝ်ႈၵူႈပၢၼ် သိုပ်ႇသိုပ်ႇတၢမ်းတၢမ်း တီႈၶႃႈဢေႃႈ။-

20ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ ၸဝ်ႈႁဝ်းလူင်လိုမ်းၶႃႈၸဝ်ႈႁဝ်းၶဝ်ယူႇတႃႇသေႇ ဢမ်ႇထၢတ်ႇလႄႈ ၸဝ်ႈႁဝ်းၸုၼ်ႉပႅတ်ႈၶႃႈၸဝ်ႈႁဝ်းၶဝ် ယူႇၶိင်ႇၵႃႇလႃႉႁိုင်ၼႃႇလူင်လၢင် ၼင်ႇႁိုဝ်တီႈၶႃႈ၊-

21ထႃႇဝရႃႉၽြႃး တီႈၶႃႈ၊ ႁႂ်ႈၶႃႈၸဝ်ႈႁဝ်းၶဝ်ဝၢႆႇၸူး ၵႃႈတီႈၸဝ်ႈႁဝ်းသေၵမ်းတီႈၶႃႈ၊ ၶႃႈၸဝ်ႈႁဝ်းၶဝ်တၵ်းၶၢမ်ႇတၢင်းဢၼ်ဝၢႆႇၶိုၼ်း တီႈၶႃႈဢေႃႈ။ ၶႅၼ်းတေႃႈပွင်ႁဵတ်းပွင်မႄး မိုဝ်ႉဝၼ်းၶႃႈၸဝ်ႈႁဝ်းၶဝ် မိူၼ်ၸိူဝ်ႉၼင်ႇ မိူဝ်ႈၵွၼ်ႇဢွၼ်ၼႆႉၼၼ်ႉ သေၵမ်းတီႈၶႃႈ၊-

22ၸဝ်ႈႁဝ်းလႆႈထဵင်ပႄႇပႅတ်ႈ ၶႃႈၸဝ်ႈႁဝ်းၶဝ် မူတ်းမူတ်းသဵင်ႈသဵင်ႈ တီႈၶႃႈယဝ်ႉ။ ၸဝ်ႈႁဝ်း ၸႂ်မႆႈၶႆႈၸႃႉတေႃႇၶႃႈၸဝ်ႈႁဝ်းၶဝ် ႁႅင်းယႂ်ႇၼႃႇလူင်လၢင် တီႈၶႃႈယဝ်ႉ။ လိၵ်ႈတၢင်းဢၼ် ယေႇရမီႉ ပွင်ႉၶၢင်းပွင်ႉဝႃႈယဝ်ႉယဝ်ႉဢေႃႈ။

← Chapter 4 Jump to: