1 Thessalonians 4

Sinhala Bile - Revised Old Version (SROV)

← Chapter 3 Jump to: Chapter 5 →

1ඉතින්, සහෝදරයෙනි, ඔබ සැම කොයි ආකාර හැසිර දෙවියන්වහන්සේ ප්‍රසන්නකරන්ට ඕනෑද කියා ඔබ සැම අපෙන් දැනගත් ලෙසද, ඔබ සැම හැසිරෙන ලෙසද, වඩ වඩා කරන මෙන් ස්වාමිවූ යේසුස්වහන්සේ තුළ අපි ඔබ සැමගෙන් ඉල්ලමින් අවවාදකරමුව.

2මක්නිසාද අපි ස්වාමිවූ යේසුස්වහන්සේගේ නාමයෙන් ඔබ සැමට මොන ආඥා දුනිමුද කියා ඔබ සැම දන්නහුය.

3දෙවියන්වහන්සේගේ කැමැත්ත නම්, ඔබ සැම ශුද්ධව සිටීමය-ඔබ සැම වේශ්‍යාකමින් වැලකී,

4ඔබ සැමගෙන් එකිනෙකා තම තමාගේ භාජනය, දෙවියන්වහන්සේ නාඳුනන්නාවූ ජාතීන් මෙන් කාමරාගයෙහි නොව,

5ශුද්ධකමෙහිත් ගෞරවයෙහිත් තබාගන්ට දැනගන සිටීමත්,

6මේ කාරණය ගැන කිසිවෙක් තමාගේ සහෝදරයා රවටා වාසියක් නොගැනීමත්ය. මක්නිසාද අපි පළමු ඔබ සැමට කියා සාක්ෂිදුන් ලෙස, ස්වාමීන්වහන්සේ එබඳුවූ සියල්ල ගැන පළිගන්න කෙනෙක්ය.

7දෙවියන්වහන්සේ අප කැඳෙවුවේ අපවිත්‍රකමට නොව ශුද්ධකමටය.

8එබැවින් එපාකරන්නා මනුෂ්‍යයාව නොව තමන්ගේ ශුද්ධාත්මයාණන් ඔබ සැමට දෙන්නාවූ දෙවියන්වහන්සේව එපා කරන්නේය.

9එහෙත් සහෝදර ප්‍රේමය ගැන නම් ඔබ සැමට ලියන්ට වුවමනා නැත. මක්නිසාද එකිනෙකාට ප්‍රේමකරන්ට ඔබ සැමම දෙවියන්වහන්සේගෙන් ඉගෙනගෙන සිටින්නහුය.

10සැබවින් ඔබ සැම මකිදෝනිය මුළුල්ලෙහි සිටින සියලු සහෝදරයන්ට එසේ ප්‍රේමකරන්නහුය. එහෙත්, සහෝදරයෙනි, වඩ වඩා එසේ කරන මෙන්ද,

11පිටත සිටින්නන් ගැන ඔබිනලෙස හැසිරෙන පිණිසත් කිසි හිඟයක් නැතුව සිටින පිණිසත්,

12අප ඔබ සැමට අණකළ ලෙස නිශ්චලව සිටින්ට උත්සාහකරන මෙන්ද, ඔබ සැමගේ ම කාරණා බලාගන්න මෙන්ද, ඔබ සැමගේ අත්වලින් වැඩකරන මෙන්ද, අපි ඔබ සැමට අවවාදකරමුව.

13තවද, සහෝදරයෙනි, බලාපොරොත්තුවක් නැත්තාවූ අන් තැනැත්තන් මෙන් ඔබ සැම සෝක නොවන පිණිස, සැතපෙන්නන් ගැන ඔබ සැම නොදැන සිටිනවාට අපි නොකැමැත්තෙමුව.

14මක්නිසාද යේසුස්වහන්සේ මැරී නැවත නැගුටුණුසේකැයි අපි අදහමු නම්, එසේම දෙවියන්වහන්සේ යේසුස්වහන්සේ කරණකොටගෙන, සැතපී සිටින්නන් උන්වහන්සේ සමඟ ගෙනෙනසේක.

15මක්නිසාද ස්වාමීන්වහන්සේගේ ඊම දක්වා ජීවත්ව ඉතුරුවෙන අපි සැතපුණු තැනැත්තන්ට කිසිසේත් ඉස්සර නොවන්නෙමුයයි ස්වාමීන්වහන්සේගේ වචනයෙන් අපි ඔබ සැමට කියමුව.

16මක්නිසාද ස්වාමීන්වහන්සේම මහත් ශබ්දයක්ද උත්තම දේවදූතයෙකුගේ හඬද දෙවියන්වහන්සේගේ හොරණෑ නාදයද ඇතුව ස්වර්ගයෙන් බස්නාසේක. ක්‍රිස්තුස්වහන්සේ තුළ මළාවූ අය පළමුකොට නැගිටින්නෝය.

17එවිට ජීවත්ව ඉතුරුව සිටින අපි එකවිටම ඔවුන් සමඟ ස්වාමීන්වහන්සේ සම්මුඛවන පිණිස වලාකුල්වලින් අහසට ඇදගනු ලබන්නෙමුව. මෙසේ අපි නිතරම ස්වාමීන්වහන්සේ සමඟ සිටින්නෙමුව.

18ඉන්නිසා මේ වචනවලින් එකිනෙකා සනසාගන්න.

← Chapter 3 Jump to: Chapter 5 →