Acts 10

Sidamo

← Chapter 9 Jump to: Chapter 11 →

1Qiisaariyaho Roomu olanto hunda, Ixaaliyu Garo yinannitera xibbu roorricha ikkinohu mittu Qornelewoosi yinanni manchi no.

2Isi minisi manni ledo Magano magansi'rannohonna Magano waajjannoho. Buxaneteno lowo woxe aanno. Wo'manka woyite Magano huucci'ranno.

3Mitto barra honse saatera Maganu sokkaasinchi isiwa e"e, «Qornelewoosi!» yee woshshannasi ajuujatenni mucci asse afino.

4Waajje sokkaasincho seekke lae, «Mooticha! Maati?» yii. Sokkaasinchuno, «Huuccattokkinna buxanete ootto kaa'lo dancha qaaggo ikkite Maganoho leeltino.

5Xa manna Iyophe soqqite Pheexiroosi yinanniha Simiooni woshshiishi'ri!

6Isi xa baaru mule noohuwa goga duugannohu Simiooni mine wosinchimma ofolle no» yiisi.

7Konne kulisi sokkaasinchi isiwiinni ha'rihu gedensaanni Qornelewoosi, soqqamaanosi giddonni lame mannanna olantosi garo giddonni mitto Magano waajjannoha woshshe,

8baalanka coye kulinsahu gedensaanni Iyophe hadhanno gede assi.

9Layinki soodo insa marte katama iilla rakkuta, Pheexiroosi lee saate ikkanno hedora minu aanaanni minnoonni mini giddo huuccatto assi'rara fuli.

10Hatte yannara Pheexiroosi hudi're sagale itara hasi'ri. Sagale iillitanni heedheenna ajuuja afi.

11Ajuujatenni gordu fa'nameenna mittu hala'ladu hocci shoole maddenni uullara dirranna afi.

12Hakkunni hala'ladu hocci aana addi addi saada, godowunni ha'ranno kalaqaminna iima bubbanno cea no.

13Hatte yannara, «Pheexiroosi, ka'e gorrite iti!» yitanno huuro macciishshi.

14Pheexiroosi, «Mooticha'ya! Di"ikkanno! Ani lagonnire woy batte ikkinore ite diegennoommo» yii.

15Qole, «Maganu faansinoha ati battete yitooti» yitanno huuro macciishshi.

16Kuni coyi sase hige ikkihu gedensaanni hakku hala'ladu hocci hakkawoyintenni galagale gordu iimira fuli.

17Pheexiroosi ajuujate tiro afara quqquxamanni hee'reenna, Qornelewoosi soyi manni Pheexiroosi mine xa'misiisse iillite marte nafara uurrite no.

18Mine qolte woshshite, «Pheexiroosi yinanni Simiooni wosinchu konniicho nooni?» yite xa'mitu.

19Pheexiroosi laino ajuujare hedanni hee'reenna, Qullaawu Ayyaani, «Kuneeti sasu manchi hasidhanni noohe;

20soommohu aneetina mittoreno huluullamittokkinni ka'e dirrite insa ledo ha'ri!» yiisi.

21Pheexiroosino dirre mannootunniwa mare, «Kuneeti, hasidhinannihu aneeti; mayira hassinoonnie?» yiinsa.

22Insano, «Ninke xibbu roorrichi Qornelewoosi soyennanke dangoommo. Iso Ayihudete manni baalu ayirrisannosi; keeraanchohonna Magano waajjanno manchooti. Ate minisira woshshi're ati yaattore macciishshanno gede Maganu sokkaasinchi kulinosi» yitu.

23Pheexiroosi insa minira eesse hasiisannore baala shiqishe galtanno gede assi. Layinki soodo fule insa ledo ha'ri. Iyophe heedhanno roduuwi giddonni mitu mitu isi ledo hadhu.

24Layinki barra Qiisaariya iillitu. Qornelewoosi fiixasinna muli jaallasi woshshe, ledonsa Pheexiroosi agare no.

25Pheexiroosi minira eanni hee'reenna, Qornelewoosi isiwa shiqqi yee lekkasira uwi.

26Pheexiroosi kayinni, «Gotti yii! Ani ate gedee manchooti» yee amade kayisisi.

27Ledosi hasaawanni minira e"e, gamba yee nooha lowo manna afi.

28Pheexiroosi mannaho, «Ayihudete ilama ikkinohu wolu manni ledo hosannota amma'nonke garinni seeru hoolannota ki'nenni affinoonni. Maganu kayinni ayeno lagaawinoho woy battaawinoho yeemmokki gede leellishinoe.

29Kunnira woshshinieta mittoreno moromummokkinni dayommo. Xa mayira woshshitinoonniero kulle"e» yiinsa.

30Qornelewoosi, «Shoolu barrira albaanni, tenne yannara honse saatenni huuccatto assi'ranni hee'reenna, hedeweelcho mitte bilicci yitanno uddano uddi'rino manchi daye alba'yaanni uurre,

31‹Qornelewoosi! Maganu huuccattokki macciishshinohe; buxanete ootto kaa'lono qaaginohe.

32Kunnira Iyophe manna sokke Pheexiroosi yinanniha Simiooni woshshi'ri. Isi baaru mule goga duugannohu Simiooni mine wosinchimma ofolle no› yiinoe.

33Atewa manna soqqoommohu kunniraati; atino dancha dayotto. Xa Mootichu kulattora hajajinohere baala macciishshate, ninke baalunku Maganu albaanni gamba yine hee'noommo» yii.

34Pheexiroosino, «Halaalinta Maganu manna mallaadannokkita xa buuxoommo.

35Aye gosano ikkiro Maganu waajjannosihanna dancha loosannoha baxanno.

36Maganu soyino qaali, baalunku Mooticha ikkinohu Yesuusi Kiristoosi widoonni hige keerunnihu Danchu Duduwi kulamanna Israeelete mannira iillanno gede sonkoonniha ikkinota egentinoonni.

37Yohaannisi cuuamannire kulihu gedensaanni, Galiilunni kayise Yihudu gobba baalate ikkinore affinoonni.

38Qoleno Maganu Naaziretete Yesuusa Qullaawu Ayyaaninni buurinotanna wolqa uyinosita affinoonni. Maganu isi ledo noo daafira danchare assanninna Sheexaanu amadino manna baala hursanni gobba duucha tuqino.

39Yihudahonna Yerusaalamete isi assino coyi baalaho ninke naqaashshete. Insa kayinni haqqu aana sutte shitinosi.

40Ikkollana Maganu sayikki barra reyotenni kayise leellanno gede assino.

41Leellinohuno Maganu umo asse doorino naqaashsheraati ikkinnina manna baalaho di"ikkino. Isi reyotenni kaihu gedensaanni isi ledo inte angoommori ninke naqaashshete.

42Isi nooriranna reyitinorira yoo yaanno gede Maganu doorinoha ikkinota farci'neemmo gede hajajinonke.

43Iso amma'ninohu baalu su'misinni cubbu maaro afi'rannota himanaano baalanti farcidhino» yii.

44Pheexiroosi coyi'ranna konne qaale macciishshi manni baalu aana Qullaawu Ayyaani dirri.

45Pheexiroosi ledo dagginori Ayihudete ammanaano, Maganu dagate Qullaawa Ayyaana dirrisanna la'e, lowo geeshsha dhaggeeffattu.

46Hakkuno, daga haaru afiinni coyidhannanna Magano galattanna macciishshitinohuraati. Hatte yannara Pheexiroosi,

47«Kuni manni ninkente gede Qullaawa Ayyaana adhino; xa insa cuuama hoolannonsahu nooni?» yee coyi'ri.

48Kunnira Yesuusi Kiristoosi su'minni cuuantanno gede hajajinsa. Hakkunni gedensaanni Pheexiroosi insa ledo shiima barra keeshshanno gede huuccidhusi.

← Chapter 9 Jump to: Chapter 11 →