Acts 25

Sidamo

← Chapter 24 Jump to: Chapter 26 →

1Fisxoosi gashshino gobba Qiisaariya e"e sase barra keeshshihu gedensaanni Yerusaalame ha'ri.

2Hakkiichono qeesootu roorrootinna Ayihudete jajjabbi Phaawuloosi giwansa leellishshanni,

3«Phaawuloosi Yerusaalame daanno gede assinke» yite huuccidhu. Hatto yitinohu, daanno woyite doogote gaa'lite agarte shaa hasidheeti.

4Fisxoosi kayinni, «Phaawuloosi Qiisaariyaho usurame no. Anino xa hakka ha'rammoraati;

5Phaawuloosi assinori nooro hakkiicho ku'litannona, roorrooti'ne ane ledo hadhona» yiinsa.

6Fisxoosi settunna tonnu barri geeshsha insa ledo keeshshe, galagale Qiisaariya ha'ri. Hakkiira iille, layinki soodo yoote ofolle Phaawuloosi shiqishshanno gede hajaji.

7Phaawuloosi shiqita, Yerusaalametenni daggino Ayihudooti iso doyissite uurrite taje afi'rinokkiha lowo coye ku'litu.

8Phaawuloosino, «Ani Ayihudootu seeri aana ikko Qullaawa Mine woy jawu Roomu moote aana assoommo sao dino» yaanni umosi gargadhanno coye coyi'ri.

9Fisxoosi kayinni Ayihudoota hagiirsiisara hasi're Phaawuloosi, «Yerusaalame hadheenna coyekki hakkiicho afoheni?» yiisi.

10Phaawuloosi daware, «Ani yoo yinaera jawu moote barcimi albira shiqoommo. Atino seekkite afoottonte gede Ayihudete hunoommori mitturino dino.

11Hunoommori hee'riro woy reyote iillishannore assoommoha ikkiro, ‹Gatisie› diyeemmo. Insa ku'lora taje hoogguro insa angara sayise aaera dandaannohu dino. Kunnira coyi'ya jawu mootewa saoe» yii.

12Hakka woyite Fisxoosi amaalaasinesi ledo amaalame, «‹Coyi'ya jawu mootewa saoe› yiittoro hakka ha'ratto» yiisi.

13Shiimu barri gedensaanni moote Agiriphanna Beriniqe Fisxoosi, «Hawalle keere dayitto» yitara Qiisaariya hadhu.

14Insa Qiisaariyaho lowo barra keeshshituta Fisxoosi Phaawuloosi coye kayise moote Agiriphara kulanni, «Filikisi usure keeshshiishinohu mittu manchi no.

15Ani Yerusaalamete hee'reenna qeesootu roorrootinna Ayihudete geerri kuni manchi assino coye afe yoo yaammonsara hasidhino.

16Ani kayinni, ‹Roomu seerira, bushiinshoonni manchi mule hee're dawarannore anfikkinni yoo diyinanni› yoommo.

17Kunnira ku'litannori layinki barra gamba yite daggeenna coyensa keeshshiishummokkinni, yoote darga ofolle, Phaawuloosino abbitanno gede hajajoommo.

18Isi shiqeenna ku'litanno woyite, sao assino yine hendanni coye diafoommo.

19Isi ledo moromantinohu kayinni, seerinsareetinna reyinoha Phaawuloosi qole, ‹Lubbotenni no› yaanno Yesuusireeti.

20Aneno kuni coyi tirate qarriseennae Phaawuloosi, ‹Yerusaalame hadheenna coyekki hakkiicho afoheni?› yoommo.

21Isi kayinni, ‹Coyi'ya jawu Roomu mootewa saoe› yiita, hakkiira iilla geeshsha usuru mine keeshshanno gede hajajoommo» yii.

22Agiripha, «Kuni manchi coyi'ranna macciishsha hasi'reemmo» yii. Fisxoosino, «Maahoyye, ga'a macciishshattona» yiisi.

23Layinki barra Agiriphanna Beriniqe maareekote uddano uddidhe olantote hajajaanonna katamu jajjabbi dukkisseenna yoote hara e'e ofoltu. Fisxoosino Phaawuloosi woshshe abbisiisi.

24Fisxoosi qole, «Moote Agiriphanna ledonke heedhinoonni manni baalu! Ayihudootu, ‹Kuni manchi kunni ka'a lubbote hee'ra dihasiissanno› yite Yerusaalameteno konneno yoo yinanni gede woxarattannoe manchi konneeti.

25Anera kayinni iso reyote iillishanno coyi dileellinoe. «Isino, ‹Coyi'ya jawu Roomu mootewa saoe› yeenna sayisoommo.

26Ikkollana Mootichi'yara borreesseemmohu buunxoonni coyi dino. Kunnira xa'mine anfihu gedensaanni, qorre iillinanni coyi hee'ranno daafira, roorse moote Agiripha albira shiqishoommo.

27Tenne hedoommohu, ku'linoonni coye buunxikkinni usuranya aliidihuwa soya gara labbinoekki daafiraati» yii.

← Chapter 24 Jump to: Chapter 26 →