Acts 24

Sidamo

← Chapter 23 Jump to: Chapter 25 →

1Ontu barri gedensaanni qeesootu roorrichi Hanaaniya cimeeyyete ledonna Xerxeluusi yinanni xawaqi ledo Qiisaariya ha'ri. Insano gobba gashshinohuwa Filikisiwa marte Phaawuloosi bushiishshu.

2Phaawuloosi woshshineenna shiqita Xerxeluusi, «Ayirrado Filikisi, ate widoonni lowo keere afi'noommo. Ate gashshootinni manninkera lowo coyi woyyino.

3Ayirrado Filikisi, konne dancha loosokki wo'mante yannara wo'manka darga lowo galatinni adhinanni hee'noommo.

4Xa kayinni daafursummohekkinni ku'leemmohere macciishshattoera huucci'reemmo.

5Kuni manchi ninkera dhibba ikkinonke. Gobba baalate noo Ayihudootira qarra kalaqino. Naaziraanote yinanni so'risiisaanora sooreessaho.

6Qullaawa Mine batteessara yorinoha anfe amandoommo. Seerinke garinni yoo yinammora hendoommo.

7Olantote hajajaanchi Lusiyoosi wolqatenni angankenni fushshe haa're, atewa dange coyi'rammeemmo gede hajajino.

8Kuni ku'linummo coyi halaale ikkinota qorittoro afatto» yii.

9Ayihudootuno, «Kuni halaaleho» yite afo xaaddu.

10Gobba gashshinohu Filikisino, Phaawuloosi coyi'ranno gede angatenni malaatise kulisi. Phaawuloosino, «Lowo dirinni kayisse tenne gosa gashshitanni dayottoha ikkoottota afoommohura, gargarooshshu coye ate albaanni coyi'rate kaayyo afi'ra'yara lowo geeshsha hagiidhoommo.

11Magansi'rate Yerusaalame ha'rummonku tonaa lamu barrinni sainokkita atinni buuxa dandaatto.

12Qullaawa Mineno ikko xaadu mine woy katamaho mannu ledo coyi'ramanna woy canco kayisanna diaffinoe.

13Xa ane bushiishansara mitte tajeno shiqishshe diaffanno.

14Ikkollana insa, ‹So'rote› yitanno doogo aana hee're, annuwanke Magano magansi'reemmo; Seerunna himanaanote borro giddo borreessinoonnire baala ammaneemmo.

15Anino insante gede Maganu cubbaataammanna keeraano reyotenni kayisanno hexxo afi'roommoho.

16Kunnira mannunna Maganu albaanni wo'manka woyite dancha hedo heedhannoe gede jaateemmo.

17«Yerusaalametenni fule keeshshoommohu, xa kune roduuwaho kaa'lo ikkanno woxenna Maganoho uyinanni fushshaate haa're dayommo.

18Qullaawa Mine affinoehu konne coye assannaati. Hatte yannara keeraa'mate woga wo'me noommo. Ane ledono mannu dino; anino canco dikayisoommo.

19Issiyu gobbanni daggino Ayihudooti kayinni hakkiicho no. Ane aana ku'litannore afidhuro, dagge ate albaanni ku'lito.

20Songote albaanni uurrummo woyiteno sayisoommori hee'riro kuni manni coyi'ro.

21Mereeronsa uurre qoonqo'ya naggi asse, ‹Reyitinori ka'anno yoommo daafira techo kuneeti yoote albi'nera shiqoommo› yee coyi'roommota agurranna, woliri assoommori dino» yii.

22Filikisi kayinni Mootichu doogo seekke afinoha ikkinohura, «Olantote hajajaanchi Lusiyoosi dayiro duuchanta assineemmona, xa mini'nera hadhe!» yiinsa.

23Filikisi xibbu olanto hajajaancho woshshe, «Phaawuloosi lowo geeshsha qarrissootisina, kayinni seekkite agari! Jaallasi mitore abbitusiro hooltooti» yii.

24Shiimu barri gedensaanni Filikisi Ayihuditte galtesi Dirusiila ledo kae dayi; Phaawuloosi woshshiishe Yesuusa Kiristoosa ammanate daafira kulannasi macciishshi.

25Phaawuloosi keeraanchimmannire, umo qee'linannirenna dagganno yoore kulanna macciishshe waajji. Kunnira, «Xa ikkinona ha'ri; injiiero wole woyite woshsheemmohe» yii.

26Filikisi, Phaawuloosi woxe itisara hasi'rino. Kunni daafira wo'ma woyite Phaawuloosi woshshe hasaawisanno.

27Lamu diri gedensaanni Phorqiyoosi Fisxoosi yinannihu Filikisi darga amadi. Filikisi Ayihudoota hagiirsiisara yee Phaawuloosi usuru mine keeshshiishi.

← Chapter 23 Jump to: Chapter 25 →