Acts 21

Sidamo

← Chapter 20 Jump to: Chapter 22 →

1Insawiinni baxxinummohu gedensaanni, yowolote ofolline Qosi yinanni giddicho marrummo. Layinki soodo Ruudi yinanni giddicho iillinummo. Hakkiinni Phaaxira yinanni katama ha'nummo.

2Hakkiinni Finqe hadhanno yowolo afi'ne sa'ne ha'nummo.

3Qophiroosi giddicho gura qolle agurre Sooriyu gobba Xiroosi Baari qacce marrummo. Hakka marroommohu, yowolote hogophinoommo uduunne dirrisi'nammora yineeti.

4Hakkiicho ammanaasine hasi'ne afi'ne insawa lamala barra keeshshinummo. Insano Qullaawu Ayyaani kaa'leennansa Phaawuloosi Yerusaalame ha'rannokki gede kultusi.

5Ledonsa keeshshineemmo yanna gundummohu gedensaanni, ka'ne ha'nummo. Baalunku meentinsanna oosonsa ledo katamu qacce geeshsha geegiissitunke. Baaru qaccera guluphine huucci'nummo.

6Keerunni yinummonsahu gedensaanni ninke yowolo e'neenna insa mininsara higgu.

7Xiroosinni ka'ne Phexelemayi iillinummo; hakkiicho ammanaasinete ledo xaande mimmito keere haa'nummohu gedensaanni, insa ledo mitto barra honsummo.

8Layinki soodo hakkiinni ka'ne Qiisaariya marrummo. Hakko Dancha Duduwo dudubbanno soqqamaasine lamalu giddonni mittichu Filiphoosiwa marre minesi keeshshinummo.

9Isira, himana coyi'rannori mine assi'rinokkiri shoolu seenni noosi.

10Lowo barra hakko keeshshine hee'neenna mittu Agaboosi yinanni himanaanchi Yihudunni kae dayi.

11Kuni himanaanchi ninkewa shiqqi yee, Phaawuloosi hiito haa're angasinna lekkasi usudhe, «Qullaawu Ayyaani, ‹Tenne hiito anna Yerusaalamete Ayihudooti togo assite usurte dagate sayisse uyitanno› yaanno» yee coyi'ri.

12Konne coye macciishshine hakko noo manni ledo, Phaawuloosi Yerusaalame ha'rannokki gede huuccinummo.

13Phaawuloosi kayinni, «Wi'litinanni wodana mayira daaqissinannie? Ani Mootichu daafira Yerusaalamete usurama calla ikkikkinni reyote nafa qixxaawe noommo» yiinsa.

14Seejjonke adha giwita, «Maganu yiinohu ikko» yine agurrummo.

15Hakko shiima barra keeshshinummohu gedensaanni, Yerusaalame ha'nummo.

16Qiisaariyunniti gama ammanaasine ledonke hadhe, fooliishshi'neemmo gede haadhe Minaasooni minira massitunke. Minaasooni Qophiroosi gobbara balaxe Magano ammanino manchooti.

17Yerusaalame marre iillinummota, hakko noo ammanaasine hagiirrunni haadhunke.

18Layinki barra Phaawuloosi ninke ledo Yaiqoobi minira mari. Beetekiristaanete cimeeyyeno hakko no.

19Phaawuloosi baalanka keere haa'rihu gedensaanni, Maganu isi widoonni qole dagate mereero assino coye hasaawinsa.

20Insano konne coye macciishshite Magano galattu. Phaawuloosino, «Rodoonke, meu kuminni kiirranniti ammantino Ayihude Muse Seerira laalaattanni no.

21‹Isi ooso'ne barcimshiishshinoonte; albi seerano agadhitinoonte› yee rosiisanno yitannota afootto?

22Dayottota affukkinni digattannona, xa ma assa woyyitanno?

23Kunnira ninke kulleemmohe gede ikki; ninke giddo xano afidhinori shoolu manni no.

24Konne manna anga haadhe hadhe, atino insa ledo atenee keereensi'ri. Umo meexxitanno gede Qullaawu Minira uyinanni fushshaateno uyinsa. Hatto assittoro, he'minoonnihe heme baala kapho ikkitinotanna atino Seeraho guuta ikkoottota baalunku afanno.

25Dagate giddonni ammantinorira kayinni, ‹Kaphu magannara shiqinshoonni sagale ittinoonte; mundeeno agginoonte; qalxante reyitino saada maala ittinoonte; foortinoonte!› yitanno sokka borreessine sonkoommonsa» yitu.

26Layinki soodo Phaawuloosi isonoo mannu ledo keereensi'ri. Hakkunni gedensaanni, keeraa'mate barri goofannohunna mittu mittunku daafira uyinanni fushshaate mamoote shiqinshanniro egensiisate Qullaawu Minira ei.

27Lamalki barri goofara rahe hee'reenna, Issiyunni daggino Ayihudooti Phaawuloosi Qullaawa Mine affe manna gamba assidhe amaddu.

28«Israeele kaa'lenke! Mannankenna seeranke, qole konne dargano mishanni gobba baalate noo manna rosiisanno manchi konneeti. Hatti ikka hooggeennasi xa kune daga Qullaawu Minira eesse konne qullaawa darga batteessanni no» yitanni cancitu.

29Hatto yitinohuno, kunni albaanni Efesooni ilaminoha Xirofimoosi yinanni mancho isi ledo katamu giddo affino daafira, Phaawuloosi iso haa're Qullaawu Minira eessinoha laweennansaati.

30Katamu gudisame cancami; baalunku doddanni dagge Phaawuloosi goshooshshe Qullaawu Mininni gobbara fushshite, hakkawoyintenni Qullaawa Mine cuffe agurtu.

31Amadduri Phaawuloosi shaate hasidhe heedheenna, «Yerusaalamete Katami cancamanni no» yinanni sokka Roomu olanto hajajaanchiwa iillitu.

32Hakkawoyintenni olantote hajajaanchi xibbuu roorrootanna gaaddo anga adhe rahe mannu noowa mari. Amaddurino olantote hajajaanchonna gaaddo affuti, Phaawuloosi gante ka'e facci assite agurtu.

33Olantote hajajaanchi shiqqi yee Phaawuloosi amade lame cagaagenni usurranni gede hajaji. Hakkunni gedensaanni ewelummasinna loososi kulanno gede xa'mi.

34Gamba yiino manni mittu mitte yiiro, wolu wole yaanni canci. Olantote hajajaanchi cancunni kainohunni halaalu hiikkonneetiro bade afa hooge, Phaawuloosi haadhe olantote qacha massitanno gede hajaji.

35Phaawuloosi fullanni dirimiwa iillita, fulino manni giirame iso gawajjara yoreenna, olanto dukke fushshitusi.

36Kuni manni, «Shine hunnona» yaanni faanansa ha'ri.

37Olanto qachinsa giddora eessa rakkuta, Phaawuloosi olantote hajajaancho, «Mitto coye ku'leemmona macciishshattoe?» yee xa'mi. Olantote hajajaanchino, «Giriikete afoo egennoottoni?

38Muli yannara gibbo kayisse shoole kume addifuloota anga adhite halallitte gobba baittohu Gibitsete manchi ate di"ikkootto?» yii.

39Phaawuloosino, «Ani Kiliqiyaho egennamino katamira Xerseesi ilamoommo. Qoleno ani Ayihudichaho; ballo maganyetena kunni mannira coyi'reemmona agarie» yii.

40«Maahoyyena coyi'ri» yiisita, Phaawuloosi dirimu aanira fule, manna macciishshanno gede asse, Ibiraawootu afiinni,

← Chapter 20 Jump to: Chapter 22 →