Acts 9

Sidamo

← Chapter 8 Jump to: Chapter 10 →

1Hatte yannara Saawuli Mootichu rosaano shaara adawadhanni qeesootu qariwa ha'ri.

2Mootichu doogo hadhannore meyaa labbaaha amade usure Yerusaalame abbara, borro borreesse Demaasiqote noohura xaadu minira aannosi gede qeesootu roorricha xa'mi'ri.

3Ha'ranni Demaasiqo iillara rahe hee'reenna doogote aana hedeweelcho gordunni bilicci yaanno xawaabbi gaangaawasi doyissi.

4Hatte yannara uulla uwe hee're, «Saawuli, Saawuli, mayira xiiwattoe?» yitanno huuro macciishshi.

5Saawulino, «Mooticha'ya, ati ayeti?» yii. Isino, «Xiiwattoehu ani Yesuusaati.

6Xa ka'e katama ha'ri; assattore hakko kullannihena» yiisi.

7Saawuli ledo ha'ranni noo manni yaannore hawe sammi yee uurre no; insa huuro macciishshitinota ikkinnina coyi'rannoha diaffino.

8Saawulino uwinowiinni kai; la"ara hedanno woyite illesi mittoreno diaffanno. Kunnira mannu anga amade massage Demaasiqo haa're ha'risi.

9Sase barra wo'ma mittoreno laikkinni, waa waasa yiikkinni keeshshi.

10Hatte yannara Demaasiqote Hanaaniya yinannihu mittu rosaanchi no. Mootichu iso ajuujatenni, «Hanaaniya!» yee woshshisi. Isino, «Mooticha'ya kune noommo» yii.

11Mootichu qole, «Suwashsho yinanni doogo higge ha'ri. Hakkiicho Yihuda yinanni manchi mine Saawuli yinanniha Xersesi mancho xa'misiisi; isi xa huuccatto assi'ranni no» yiisi.

12Saawulino illesi fa'nitanno gede Hanaaniya daye anga aanaho worannasi ajuujatenni afi.

13Hanaaniya kayinni, «Mooticha'ya! Hakku manchi Yerusaalamete heedhanno ammanano aana lowoha busha qarra iillishinota lowo manniwiinni macciishshoommo.

14Kawiichono ate su'ma woshshitannore baala usurara qeesootu roorrootiwiinni roorre adhino» yii.

15Mootichuno Hanaaniyara, «Isi su'ma'ya dagate, moottoollatenna Israeelete mannira egensiisanno gede doodhoommo uduunnichootinna isiwa ha'ri.

16Isi ane daafira yee lowo qarra adhannota egensiiseemmosi» yii.

17Kunnira Hanaaniya hakkiichira mare isi noo minira ei. Angasino Saawuli aana wore, «Rodoo'ya Saawuli! Kawa dagganni heedheenna doogote aana leellihe Mootichi Yesuusi, galagalte la"a dandaatto gedenna Qullaawu Ayyaani wo'mannohe gede ane atewa soyinoe» yii.

18Hakkawoyintenni omolcho lawannorichi illesi aaninni uweenna ille fa'niteenna la"a dandii; gotti yee kae uurri.

19Sagaleno ite dhaabbati. Shiima barra Demaasiqote heedhanno rosaanowa taxxi yii.

20Keeshshikkinni Saawuli Demaasiqote, «Yesuusi Maganu Beettooti» yaanni xaadu mine rosiisi.

21Macciishshituri baalu, «Kuni manchi Yerusaalamete konne su'ma woshshannoha baala qarrisannoha di"ikkino? Kawiira dayinohuno insa amade usure qeesootu roorrootiwa massara di"ikkino?» yitanni dhagge assidhu.

22Saawulino lowo geeshsha jawaati; Yesuusi Buuramino Moote ikkinota kulanni, Demaasiqote heedhanno Ayihude haadhe coyidhannore hoogganno gede assi.

23Lowo barri gedensaanni Ayihudootu Saawuli shitara ma'litu.

24Isi kayinni gantino gano afi'ri. Insano iso shitara hashshanna barra faro baalate agarte no.

25Umisi rosaano kayinni Saawuli hashsha gimboolaho worte kinchu huxxi xullo giddoonni qolte dirrissu.

26Saawuli Yerusaalame mari woyite, wole rosaano ledo mitteenni hee'rara hasi'ri. Insa kayinni Kiristoosa amma'ninoti halaale lawa hooggeennansa baalunku waajjitu.

27Barnabaasi kayinni Saawuli soqqamaasinenniwa abbe doogote aana Mootichu leellinosinna hasaawisinosi gara Demaasiqoteno Yesuusi su'mini jawaate rosiisinota kulinsa.

28Kunnira Saawuli insa ledo Yerusaalamete ha'rami. Mootichu su'minni jawaate rosiisi.

29Giriikete afiinni coyidhanno Ayihudooti ledo coyi'ramanni yekkeerami. Insa kayinni shitasira ma'litino.

30Roduuwu konne coye macciishshite, iso Qiisaariya haadhe hadhu. Hakkiinnino Xersesi ha'ranno gede assitu.

31Yihudaho, Galiilahonna Samaariyaho noo beetekiristaane keere afidhe hagiidhitu. Magano waajjatenninna Qullaawu Ayyaaninni jawaatte hala'litu.

32Pheexiroosi gobba baala tuqanni Liida heedhanno ammanaanowa mari.

33Hakkiicho sette diro wo'ma daallasaho goxe hee'rannoha Eniya yinanniha laanshaawa mancho afi.

34Pheexiroosi, «Eniya! Yesuusi Kiristoosi hursannohe; gotti yite daallasakki biddi assi'ri!» yiisi. Isino hakkawoyintenni kai.

35Liidanna Sarooni hee'ranno manni baalu iso lae Magano ammani.

36Iyophe Xabita yinanniti mitte ammanaancho no. Su'mise tiro Giriikete afiinni Dorqaati; hatto yaano bulaate yaate. Ise wo'manka woyite dancha looso loossanni buxane kaa'litanno.

37Hatte yannara ise dhiwante reyitu. Reeshshase hayishshine minu aana minnoonni mini iima fushshine worroonni.

38Liida Iyophera mule noo daafira Iyophe heedhanno rosaano Pheexiroosi Liida noota macciishshite, «Eeggate keeshshittokkinni rakke amonke!» yite lame manna fushshite sokku.

39Pheexiroosino kae soqqame dayino manni ledo ha'ri. Hakkiira iilli yannara minu aana minnoonni mini iimira fushshitusi. Galte shii'rino meenti baalu reeshsha doyisse wi'lanni, Dorqa lubbotenni noo yannara uddidhanno uddanna leellishanni no.

40Pheexiroosi kayinni baalanka gobbara fushshe guluphe huuccatto assi'ri. Reeshshu widira wirri yee lae, «Xabita! gotti yii!» yii. Iseno ille fa'niteennase Pheexiroosi la'u. Gotti yiteno ofoltu.

41Pheexiroosino angasinni amade gotti asse uurrisise. Galte shii'rino meentonna wole ammanaano woshshe lubbotenni noo beetto albansaanni uurrisi.

42Kuni coyi Iyophe baala tuqi; lowo mannino Mooticha amma'ni.

43Pheexiroosi, mittu goga duuganno manchi Simiooni ledo Iyophe lowo barra keeshshi.

← Chapter 8 Jump to: Chapter 10 →