Galatians 2

Sidamo

← Chapter 1 Jump to: Chapter 3 →

1Tonaa shoolu diri gedensaanni galagale Barinabaasi ledo Yerusaalame ha'roommo; ha'rummo woyite Tiitono anga haa're ha'roommo.

2Ha'roommohuno Maganu leellishinoe garinniiti. Kunni albaanni loosoommohunna xaahu mullare ikke gatannokki gede, dagate kuloommoha Dancha Duduwo albisootahono addinni egensiisoommo.

3Ane ledo noohu Tiito Giriikicha ikkiro nafa barcimanno gede diqarrinsoonnisi.

4Ikkollana luuxxe giddonkera e'inori kaphaano roduuwi barcimara hasidhino. Kuni manni luuxe e"e giddonketa shooqe Kiristoosi Yesuusinni afi'noommo wolapho hune, Ayihudete Seerira borojje assankeraati.

5Ninke kayinni Danchu Duduwi ki'ne giddo kaajje hee'ranno gede hasi'noommo daafira, insa hedo bashshino diassinoommo.

6Maganu mannu alba lae golamannoha ikkinokki daafira, insanaa albisootu gede assite kiirtannori daafira haja dinoe. Kuni manni ani kuleemmo sokka aana ledinori dino.

7Ikkirono, Pheexiroosi Dancha Duduwo Ayihudootaho lallawinte gede, Maganu aneno dagate Dancha Duduwo kulammora worinoeta affu.

8Pheexiroosi Ayihudete soqqamaasincho assinte gede, Maganu aneno dagate soqqamaasincho assinoe.

9Qara ikkitinori Yaiqoobi, Pheexiroosinna Yohaannisi Maganu tenne addi soqqansho uyinoeta buuxxe, sumuu yaansa egensiisate anenna Barinabaasi qiniiticho angansanni amaddu. Ninkeno dagate giddora ha'neemmo gedenna insa qolte Ayihudenniwa hadhanno gede sumuu yinummo.

10Giddo noo buxane hambeemmokki gede seekkite dhaantinonke; hakku ani wo'manka woyite diinaggaawe asseemmo coyeti.

11Ikkollana, Pheexiroosi Antsookiya dayi yannara, leeltino so'ro assino daafira, mannu albaanni borooroommosi.

12Yaiqoobi soyinohu mitu mitu manni Antsookiya iillara albaanni, Pheexiroosi ammante noo daga ledo sagale itanni no. Hakku manni dayita kayinni, «Dagatewiinni fulte ammantinori barcima hasiissannonsa» yitanno gaamo waajje insa ledo ita aguri.

13Gamu Ayihudete roduuwi Pheexiroosi gede ikkite insanaa bokkeessitu. Barinabaasi nafa gatikkinni insante gede busha Pheexiroosi so'ro hoode ha'rino.

14Insa ikkito Danchu Duduwi halaali ledo xaado afidhinokkita afummo yannara Pheexiroosi, «Ati Ayihudicha ikkite heedhenni, Ayihudete budinni ikkikkinni dagate budinni hee'rootto. Daga kayinni Ayihudete budi garinni heedhara mayira qarrisattonsa?» yee mannu baalu albaanni borooroommo.

15Ninke halaalenko ilamanke Ayihudete, «Cubbaataamma Dagaati» yinannire di"ikkinoommo.

16Ikkollana, mannu keeraa'mannohu Yesuusa Kiristoosa amma'natenni ikkinnina, Muse Seera wonshatenni ikkinokkita anfoommo. Ninkeno Seera agadhine ikkikkinni, Kiristoosa amma'nine keeraa'minammora Kiristoosa Yesuusa amma'ninoommo. Ayino Seera agadhatenni dikeeraa'manno.

17Kiristoosi ledo karsamatenni keeraa'ma hasi'nummoro, ninke uminke cubbaataamma ikkine leellinummoro, cubbo loonseemmo gede assinonkehu Kiristoosiitini? Dee'ni, horonta dihattooti.

18Diigoommoha galagalche gatamareemmoha ikkiro, ani umi'ya Seera hunoommoha ikkeemmo yaate.

19Ani Maganoho hee'rate yeenna Seeru umisi shiinoe.

20Ani Kiristoosi ledo dawete aana sutame noommo; kunni ka'a ani dihee'reemmona ane giddo Kiristoosi hee'ranno. Xa hee'reemmo heeshsho baxannoehanna ane daafira lubbosi sayise uyinoha Maganu Beetto amma'natenni afi'roommote.

21Maganu elto mullare asse diagureemmo; keeraanchimma Seera agadhatenni afi'nanniha ikkoommero, Kiristoosi beebballa reyino yaate!

← Chapter 1 Jump to: Chapter 3 →