Galatians 5

Sidamo

← Chapter 4 Jump to: Chapter 6 →

1Wolaphine hee'neemmo gede Kiristoosi borojjimmatenni fushshinonke. Kunnira, kaajjitine uurre! Galagaltine borojjimmate qambari giddora e'inoonte.

2Kuneeti, ani Phaawuloosi yeemmo'neti: Barcima hasidhinanniha ikkiro, Kiristoosi mittoreno diledanno'ne.

3«Barcima gatissanno» yee barcimanno manni baalu, Seera baalanka wonsha hasiissannosita seekke kuleemmosi.

4Seerunni keeraa'mitine gattinara hasidhinanniri Kiristoosiwiinni murantinanni; Maganu eltorano gobbaanni gattinanni.

5Ninke kayinni, Maganu Ayyaani amma'nate widoonni qole keeraanchimmate hexxo agadhineemmo gede assannonke.

6Kiristoosi Yesuusinni hee'niro, barcima woy barcima hooga mittoreno dikaa'litanno. Hasiissannoti baxillunni leeltanno amma'na callate.

7Techo geeshsha dancha gede doddinanni keeshshitinoonni; konne mereero halaaleho hajajantinannikki gede ayi hooli'ne?

8Togoo amaale, woshshino'ne Maganiwiinni difultinote.

9Kunino, «Shiimu gamaanchi lowo abbicho hoqisanno» yinanni gedeeti.

10Ikkollana, wole hedo giddora e'inannikki gede Mootichunni hawaqi'reemmo. Gara hawisanno'nehu hee'riro, Maganuwiinni qorichasi adhanno.

11Roduuwa'ya! Ani xaa geeshsha, «Barcima hasiissanno» yaanni kuleemmo'neha ikkoommero, digimboonnie. Hatto yoommoha ikkoommero, Kiristoosi sutama mannaho guficho di"ikkitanno.

12Ki'ne gara hawissanno'neri, barcima calla ikkikkinni, hasidhuro mureeyye ikkito.

13Roduuwa'ya! Ki'ne borojjimmatenni fultinara woshshantinoonni. Ikkollana borojjimmatenni fula'ne mimmiti'nera baxillunni soqqantinannita ikkito ikkinnina, maalu yorto wonshitinannita ikkitoonke.

14Mayira yitiniro, Seeru baalunku, «Manna umikki gede assite baxi!» yitannotenni mitte hajajonni qunqumaminoho.

15Ki'ne mimmiti'ne ledo itantinanniha ikkiro kayinni, mimmito'ne adhitine ba'inannikki gede agadhe!

16Kunnira ani yeemmo'neti, Ayyaanu garinni heedhe! Maalu yorto horonta wonshitinoonte!

17Maalu Ayyaanu hedannore dibaxanno; Ayyaanu qole maalu hedannore dibaxanno; lamunku mimmitu ledo giwantanno. Kunnira hasidhinoonnire assa didandiitinanni.

18Ayyaanu massagi'nero kayinni, Seeru anga digattinanni.

19Maalu loosi egennammoho; hakkuno: Foorrete, battete, saalimale heeshshooti,

20kaphu maganna magansi'rate, baarigaarrete, ginyishamate, hinaasate, hanqate, umo baxate, gosoomate, babbaxxate,

21dhiibbete, manna shaate, dimbate, sirbatenna woluno kore lawannoho. Balaxe kulummo'nente gede xaano lede yeemmo'nena, hattoo coye assitannori Maganu gashshoote diragidhanno.

22Ayyaanu laalo kayinni baxilleho, hagiirreho, keereho, cincate, shooshanqete, danchummate, ammanamate,

23joongilleho, meessanaa qee'late; togoore giwanno seeri dino.

24Kiristoosi Yesuusire ikkitinori maalansa yortonsa ledo suttino.

25Ayyaanunni hee'neemmore ikkinummo geeshsha, Ayyaanu massagannanke hee'no!

26Mimmitonke gibbote kakkayinsanni woy ku'u ko'onne hinaansanni mulla haafa adawadhinoonke.

← Chapter 4 Jump to: Chapter 6 →