Galatians 6

Sidamo

← Chapter 5 Jump to:

1Roduuwa'ya! Mannu aye so'rono loosiro, ki'ne ayyaanaamma ikkitinoonniri, so'ro assino mancho shaqqillunni dhaabbe. Ki'ne mittu mittunku kayinni, so'rote giddora e'inannikki gede agadhe.

2Ki'ne ki'neneewa kaa'lantine, mimmiti'ne qarra beeqqe! Hakkunni garinni Kiristoosi Seera wonshitinanni.

3Woluwiinni woyyannori nookkiha, «Wole manna ani rooreemmo» yee hedannohu, umosi doganno.

4Mittu mittunku umisi looso fonqole lao! Assino coyi dancha ikkiro, isonoo wolu manni ledo taashsha agure, umisi ku'lannore afi'ranno.

5Mittu mittunku umisi duha duqqa hasiissannosi.

6Maganu qaale rosanno manchi rosiisaanchisi ledo dancha coye beeqqanno.

7Umo'ne dogginoonte. Mannu wixi'rinoha mixxanno daafira, Magano arrassa didandinanni.

8Maalasi hagiirsiisate wixi'rannohu, maalisinni reyo mixxanno. Ayyaana hagiirsiisara wixi'rannohu kayinni, Ayyaanunni hegere heeshsho mixxanno.

9Dancha looso loosa cee'minoonke. Hexxo mudha hoongummoro, yanna iillitanno woyite mixxineemmo.

10Coyi injiinkero, manna baalaho, roorsine amma'nino mannira dancha coye assino.

11Anga'yanni kee'madda fidallanni borreessoommota tenne borro la'e!

12Gobbayidi manninatinni danchuulle labbara hasidhannori barcintinanni gede giddeessitanno'ne. Hatto assitannohuno, Kiristoosi sutamanni kainohunni qarru iillannonsakki gede heddeeti.

13Barcintinara hasidhannohu, insa ki'ne barcimanni su'ma adhitara yiteeti ikkinnina, barcintino insa nafa Seera diguuttino.

14Alame ane reyinohu gede assite agurtinohu, anino alame reyitinohu gede asse aguroommohu, Mootichinke Yesuusi Kiristoosi masiqali ka'a wole adawarsha dihasi'reemmo.

15Kiristoosi Yesuusinni haaro kalaqama ikkate ikkinnina, barcima woy barcima hooga kaa'litannori dino.

16Tenne hedo garinni heedhannoriranna Maganu manna ikkitinorira baalaho keerunna maaro iillitonsa.

17Yesuusi yeenna gawajjinoonnieta leellishshanno bassuwa aana'ya noo daafira, kunni ka'a ayino qarrisoonke"e.

18Roduuwa'ya! Mootichinke Yesuusi Kiristoosi elto ki'ne ledo heedho! Hamii'ni.

← Chapter 5 Jump to: