Galatians 4

Sidamo

← Chapter 3 Jump to: Chapter 5 →

1Xa ani yeemmotino tenneeti; ragi'rannohu qaaqqimmatenni noo yannara, jajju baalu anna ikkirono, borojjicho dirooranno.

2Annisi hedino yanna dagga geeshsha awuuttannorinna towatannori anga keeshshanno.

3Ninkeno hakko garinni qaaqqimmatenni hee'noommo waro, tenne gobba seerira borojje ikkine galloommo.

4Ikkollana, yinoonni yanna iillituta, Maganu Beettosi tenne gobba soyino. Isino, meyati ilteenna Seeru garinni lophino.

5Hatto ikkinohu, Seeru anga galtinore wodeenna, ninkeno Maganu ooso ikkineemmo gedeeti.

6Ooso ikkinoommo daafira Maganu, «Annaanna» yine woshshi'neemmoha Beettisi Ayyaana wodaninke giddora soyino.

7Kunnira, kunni ka'ira Maganu oosooti ikkinnina borojje di"ikkitinoonni. Oososi ikkitiniro, Maganu oososira qixxeessinore baala ragisiisanno'ne.

8Kunnira albaanni Magano affinikkinni, maganna ikkitinokkirira borojje ikkitine heedhinoonni.

9Xa Magano affini woyitenna, hakkiinnino roore, Maganu egenni'ne yannara, wolqiweelonna tidhitinokki golfawa higa mayira baxxini? Galagaltine hakkurira borojje ikka hasidhini?

10Barruwanna aganna, wogganna dirra seekkitine ayirrissinanni.

11Ki'ne daafira mulla haafa daafuroommoha laweennae yaadoommo.

12Roduuwa'ya! Ani ki'ne lawummonte gede, ki'neno ane labbinara huucci'reemmo'ne. Ki'ne ane aana mitte saono diassitinoonni.

13Dhiwame ki'newa hee'ra'ya, umo Dancha Duduwo kulammo'nera doogo ikkitinoeta affinoonni.

14Dhibbi'ya qarrisannoha ikkirono, dicee'mitinoonnie; didiqattinoonnie. Maganu sokkaasinchi gede assitine haadhinoonnie. Kiristoosi Yesuusi gede assitine adhitinoonnie.

15Kunni albaanni noo'ne hagiirri baalu hiikka higi? Dandiitinoommero, noo'nere baala woy ille'ne nafa fushshitine aate marartinannikkire ikkitinoonnita farci'reemmo.

16Ani xa ki'nera halaale kuloommo'ne daafira diina ikkummo'ne?

17Wolu manni ki'ne daafira lowo geeshsha xissiisi'ranno. Ikkollana, tenne heddannohu didanchummateeti. Ki'ne anewiinni badde insa ledo mitto ikkitinanni gede hasidheeti.

18Wodanunni hendanni hedo dancha ikkituro, ani ledo'ne noommo yannara calla ikkikkinni, xeerti're noommo yannarano diinaggaawa danchate.

19Ooso'ya! Kiristoosi wodani'ne giddo leella geeshsha, xaano ki'ne daafira game amadde nooe.

20Ki'ne daafira lowo geeshsha yaadoommohura, ledo'ne hee'roommoro hedoommo coye kuleemmo'nehu baino.

21Hanni kulle"e; Muse Seeri anga galtinara hasidhinanniri, Seeru mayaannoro dimacciishshitinanni?

22Abirihaamira lame ooso noosita, mittu borojjicho iltinoha, mittu qole galtesi iltinoha ikkinota borreessinoonni.

23Borojjicho iltinohu, ronsoonni garinni calla ilamino.

24Kuri lamenti meenti lamu gondoori lawishshaati. Siina Ilaali gondoori lawishshi Aggaaraati; ise ooso borojjimmate ilantinote.

25Aggaara oosose ledo borojjimmate giddo noo daafira, Arabete gobbara noohu Siina Ilaali lawishshaati. Qolteno xa noo Yerusaalame labbanno.

26Gordoho noo Yerusaalame kayinni borojjimmate giddo dinoote; ise amankeeti.

27Maganu qaali giddo, «Ati iloottakki gaana hagiidhi! Ati gamaa'mite egennoottakkiti, qoonqokki naggi assite ilillisi. Galte afidhinotenni roore, galte afidhinokki mancho lowo ooso iltino» yine borreessinoonni.

28Roduuwa'ya! Ki'neno Yisihaaqi gede hexxote oosooti.

29Ikkollana, hatte yannara ronsoonni garinni calla ilaminohu Maganu Ayyaani wolqanni ilamino beetto qarrisino. Techono hakku coyi ikkanni no.

30Maganu qaali kayinni mayaanno? Maganu qaali, «Borojjicho iltinohu minaama iltino beetti ledo ragi'rannokki daafira, borojjicho mancho beettise ledo mininni fushshite ha'risi» yaanno.

31Kunnira roduuwa'ya! Ninke galtete oosooti ikkinnina, borojjichote ooso di"ikkinoommo.

← Chapter 3 Jump to: Chapter 5 →