Galatians 3

Sidamo

← Chapter 2 Jump to: Chapter 4 →

1Ki'ne hawanya Galatiyu manna! Tenne so'ro giddora e'inanni gede wodana amadino'neri maati? Yesuusi Kiristoosi dawete aana sutama alba'neenni leeltanni noo'ne.

2Mitto coye calla kultinaera hasi'reemmo; Qullaawa Ayyaana adhitinoonnihu Seera agadhitineetinso kulloonni'neha Dancha Duduwo amma'natenniiti?

3Hada ki'ne kageeshshi geeshsha hawanyootahoni? Maganu Ayyaaninni hanaffine umi'ne wolqanni guddinanni?

4Ammanate heeshshohu daafuri'ne baalu mulla beebba gati yaate? Dee'ni, mulla digatino.

5Maganu Ayyaanasi aanno'nehunna ki'ne giddo maalale loosannohu, agadhitinoonnihuraatinso kulloonniha Dancha Duduwo amma'nitineennaati?

6Hanni Abirihaami qaagge; Maganu qaali, «Abirihaami Magano amma'ni; amma'nasino keeraanchimmate kiirantusi» yaanno.

7Amma'nitinori baalu Abirihaami ooso ikkitinota egenne!

8Maganu qaali, Maganu daga amma'nansanni keereensannota balaxe afino. Abirihaamirano, «Daga baala atewidoonni higge maassantanno» yee Dancha Duduwo balaxe kulino.

9Kunnira, amma'nitinori ammanate manchi Abirihaami ledo mitteenni maassantanno.

10«Seeru maxaafi giddo noo hajajo baala wonshannokkihu duuchu rumaminoha ikko» yine borreessinoonni. Kunnira, Seera agadhatenni keeraa'mara hasi'rannohu baalu rumote giddo no.

11«Keeraanchu kayinni amma'natenni heeshsho afi'ranno» yine borreessinoonni daafira, Seera wonshatenni ayino Maganu albaanni keeraa'mannokkiti egennantinote.

12Seeru amma'nate aana xintaminoha di"ikkino. Maganu qaali, «Seera guute agadhannohu gatanno» yaanno.

13Maganu qaali, «Haqqu aana sutame reyinohu baalu rumammoho» yiinonte gede, Kiristoosi ninkera yee rumaminoha ikke, Seeru rumo giddonni wodinonke.

14Kuni ikkinohu, Maganu Abirihaamira uyino maasso Kiristoosi Yesuusi widoonni dagate iillitanno gedeetinna Maganu aara coyi'rinoha Qullaawa Ayyaana amma'natenni adhineemmo gedeeti.

15Roduuwa'ya! Hanni konne coye mannu hee'ranno heeshsho ledo xaadissine la'e. Mannu gondooro eihu gedensaanni, ayino ledara woy xeisara didandaanno.

16Abirihaami sirchisira hexxo uyinoonnita afe, Maganu qaali lowo mannira coyi'noonnihu gede asse, «Sirchuwakkira» diyaanno. Mitto calla kullannihu gede, «Sirchikkira» yaanno. Hatto yinoonnihu Kiristoosaati.

17Xa ani yeemmoti, 430 diri gedensaanni uyinoonni Seeri, Maganu egenne eino gondooro diiganna hexxote qaale huna didandaanno.

18Maganu afansha Seera agadhatenni afi'nanniha ikkoommero, Maganu aanno hexxo agadha dihasiissanno. Maganu kayinni Abirihaamira afansha uyinohu hexxote qaali widoonniiti.

19Seera uyinoonnihu mayiraati? Seera lendoonnihu Abirihaamira hexxotenni uyinoonni sirchi daa geeshsha cubbu hiittoohoro egensiisateeti. Seera, mittu mereeri manchinni sokkaasinete widoonni qolle uyinoonni.

20Mereeri manchi lameho ikkinnina mittoho dihasiisanno. Maganu kayinni mittoho.

21Seeru Maganu uyino hexxo ledo xaada giwannoni? Heeshsho Seeru widoonni afi'nanniha ikkoommero, keeraanchimmano Seeru widoonni afi'nanni.

22Ikkollana, Maganu qaali yaannonte gede, mannu baalu cubboho hirame cubbu usuranya ikkino. Yesuusa Kiristoosa amma'natenni afi'nanni hexxono amma'nitinorira calla uyinanni.

23Tini dagganno amma'na leelta geeshsha, Muse Seeri cufe usuranya asse keeshshiishinonke.

24Kunni garinni amma'natenni keeraa'mineemmo gede, Kiristoosiwa iillinammo geeshsha Seeru kaajjado awuuto ikke keeshshinonke.

25Xa amma'na daggino daafira, kunni ka'a Seeru awuuto di"ikkannonke.

26Amma'nate widoonni ki'ne baalunku Kiristoosi Yesuusinni Maganu oosooti.

27Kiristoosi ledo mitto ikkate cuuantinoonniri baalu, Kiristoosi uddidhinoonni.

28Ki'ne baalunku Kiristoosi Yesuusinni mitto ikkitinoonnihura, Ayihudete woy Giriikete, borojjichoho woy biiloho, labbaaho woy meyate yinanniri dino.

29Ki'ne Kiristoosinni heedhiniro, Abirihaami sirchooti; hexxote qaali garinnino ragidhinannireeti.

← Chapter 2 Jump to: Chapter 4 →