Joshua 14

Sidamo

← Chapter 13 Jump to: Chapter 15 →

1Kawiinni aante noo dhagge Yordaanoosi Wayira galchimaanni noota Kana"aani baatto Israeelete mannira assine beenkoonni gara kultannote. Mannaho baatto beekkinori, Qeesichu Aliaazaari, Newe beetti Iyyaasunna Israeelete sooreeyyeeti.

2Kaaliiqi Musera uyino hajajo garinni, Yordaanoosi Wayira galchimaanni noo gashshoote baala 9 ga'reranna mitte ga're daratira hixunni beenkoonni.

3Yordaanoosi Wayira soojjaatoonni noo baatto kayinni, Muse 2 ga'reranna mitte ga're daratira balaxe beehinonsa. Yooseefi ilama Minaasenna Efireemi yine lamewa beenkoonni. Muse Leewaawootaho baattote beehacho di"iillishinonsa. Ikkollana, konne darga heedhanno katammanna saada hosiisidhanno baatto adhitino.

5Israeelete manni, Kaaliiqi Musera uyino hajajo garinni baatto beeqqi.

6Mitto barra Yihudi ga're ikkinohu gamu manni, Galgalaho noohuwa Iyyaasuwa kae dayi. Insa giddonni mittu Qeneezichu Yoofooni beetti Kaaleebi, «Qaadesi Berne hee'noommo yannara, Kaaliiqi soqqamaanchisi Muse widoonni aterenna anere coyi'rinore afootto.

7Kaaliiqi soqqamaanchi Muse tenne baatto gara buuxate Qaadesi Bernenni soyie waro ani, 40 diri wedellichaati. Isirano halaalaancho taje haa're abboommosi.

8Ane ledo hadhinori kayinni, shashishshe manninke wodana daaqissino. Ani kayinni, Kaaliiqi Magani'yara ammanamatenni hajajamoommosi.

9Konne assa'yanni kainohunni, ‹Lekkakkinni kadootto baatto ateranna sirchikkira geedote iqqa ikkitanno› yee Muse xaarinoe.

10Kunnira, Kaaliiqi Musera konne qaale coyi'rinkunni, kuneeti 45 diri saino. Hatti yannara Israeelootu halallitte gobbara raataabbanni no. Kaaliiqi uyinoe hexxo garinni, lubbotenni wore, xaa geeshsha iillishinoe. Hanni lai! Xa kune ani 85 diri manchooti.

11Ikkollana, xaano nooe jawaante Muse soyie wari gedeete. Kunnira, xaano gaaramateno ikko, wolere assate jawaata wolqa nooe.

12Kunnira, hakko barra Kaaliiqi uyinoe hexxo garinni, tenne gaaraame gobba anera ragisiisinoe. Ninke hatte yannara Enaaqootaho yinanni haxiriggoota, jajjabba qiinshoonni katamma giddo heedhannore ikkitinota coyi'ranke baala atino afootto. Xaano ikkiro, Kaaliiqi kaa'lannoe daafira coyi'rino garinni fushshe shorrammora dandeemmo» yii.

13Iyyaasuno, Yoofooni beetto Kaaleebi maassi'risi. Kebirooni katamano iqqa asse uyisi.

14Qeneezichu Yoofooni beetti Kaaleebi, Israeelete Maganira Kaaliiqira ammanamatenni hajajaminohura, Kebirooni xaa geeshsha isi ilama iqqaati.

15Kunni albaanni, Kebirooni Arbai su'minni woshshinanni. Kuni Arbai Enaaqoota baala roorino manchooti. Hakkunni gedensaanni, olu uurreenna baatto fooliishshidhu.

← Chapter 13 Jump to: Chapter 15 →