Joshua 17

Sidamo

← Chapter 16 Jump to: Chapter 18 →

1Yordaanoosi Wayira galchimaanni noo baatto beenke Yooseefihu bayiru beetti Minaase ilamara uyini. Minaasehu bayiru beetti Geleaadi anni Makiiri bagadaanchoho. Kunnira, Yordaanoosi Wayira soojjaatoonni noore Geleaadinna Baasaani isira uyini.

2Yordaanoosira galchimaanni noo baatto gattinorira Minaase ilamara uyini. Insano Abieezeri, Heleqi, Asirieeli, Sekeemi, Hefeerinna Shemidai yinannireeti. Yooseefi beetti Minaase sirchi labballu kore ikkitanna, insano mine mineho umo ikkitinoreeti.

3Selofihaadi Hefeeriho; Hefeeri Geleaadiho; Geleaadi Makiiriho; Makiiri Minaaseho; Selofihaadira kayinni, seenne ikkinnina labballi ooso dinosi. Seennisi Mahila, Noa, Hogila, Milkanna Tiritsa yinannireeti.

4Seennuno, qeesichu Aliaazaariwa, Newe beetti Iyyaasuwanna albisootunniwa mare, «Labballu ayiddinke gede, ninkerano iqqa uyinankera Kaaliiqi Muse hajajino» yii. Kunnira, Kaaliiqi hajajino garinni insarano labballu ayiddinsa ledo iqqa uyininsa.

5Minaasera Yordaanoosi Wayira soojjaatoonni noori Geleaadinna Baasaani aana lende 10 qeecha uyinoonnihu kunniraati.

6Hatto ikkinohu, meentu fiixinsarano labballu gede iqqa uyinoonninsahuraati. Geleaadi baattono gattinorira Minaase sirchira aamantu.

7Minaase iqqi Aseerinni kae, Sekeemira soojjaatoonni nootewa Mikimetaati katami geeshsha iillanno. Dannuno wodiidira sae, Ayini-Tafuha manna giddo amadanno.

8Tafuha gaangaawira noo baatto Minaasera aamantu. Dannu aana noohu shiimu Tafuha katami kayinni, Efireemi sirchi iqqaati.

9Dannu hakkiinni kae, Qaana Xashshi geeshsha iillanno; xashshoho wodiidoonni noo katamma Minaase gashshooti qoqqowi giddoonni higge sa'annota ikkiturono, Efireemi iqqaati. Minaase danni aliyye ragaanni Qaana Xashshoho aane Mediteraaniyu Baarira gawa'lino.

10Kunninni kainohunni, lamunkunnihu galchimiidi danni Mediteraaniyu Baara ikkeenna, Efireemi wodiidoonni, Minaasera aliyyeenni hee'ranno gede assini. Aseeri aliyye galchimira, Yisaakoori qole aliyye soojjaato hee'ri.

11Yisaakoorinna Aseeri gashshooti qoqqowi giddo qaccete noota Doori, Indoori, Tainaaki, Megidonna gaangaawinsara noore shiimmaadda katamma lede Beeti-Shanna Yubileaami yinanni gaangaawira nooti shiimmaadda katammano Minaase iqqa ikkitu.

12Ikkollana, Minaase manni hatte katammara hee'ranno manna shorre hunate dandiinokki daafira, Kana"aanootu hakkiicho heedhu.

13Israeelootu wolqa lexxitu yannara kayinni, Kana"aanoota wolqate looso loossanno gede giddeessitinonsata ikkinnina, hakkiichinni gudisse dishorritinonsa.

14Yooseefi ga're Iyyaasu, «Kaaliiqi maassi'rinonke daafira kiironke bati'rate. Iqqinke mitto qeecha calla ikkihu mayiraatiyya?» yite xa'mitu.

15Iyyaasu daware, «Kiiro'ne kageeshshi geeshsha batidheenna gaaraame Efireemi baatto ajjino'neha ikkiro, Ferizootunna Refootu heedhanno baatto martine dubbo do'le» yiinsa.

16Insano, «Gaaraame baatto ninkera di"ikkitannonke. Hakkuyi aanano, Iyiziraeeli lagichira Beeti-Shaaniranna gaangaawinsara noori shiimmaadda katammaranna xawu gobbara heedhanno Kana"aanootira haammata siwiilu faradi gaare noonsa» yitu.

17Iyyaasu Efireemiranna Yordaanoosira galchimaanni heedhannorira Minaase ga'rera, «Ki'ne addanka kiiro batinyeho; wolqatennino jawaattinoonnireeti. Mitto saino qeechi hee'ra'nera hasiisanno.

18Kunnira, gaaraame gobba ki'nera ikkitanno; dubbono ikkiro doltine qaccetenni qaccete geeshsha umi'ne iqqa assidhe. Kana"aanootaho ayi gedeno siwiilu faradi gaare heedhunsaronna jawaatoota ikkituro nafa, fushshitine shorra dandiitinanni» yiinsa.

← Chapter 16 Jump to: Chapter 18 →