Joshua 23

Sidamo

← Chapter 22 Jump to: Chapter 24 →

1Lowo yanna gedensaanni, Kaaliiqi Israeeloota gaangaawinsara noo diinnawiinni fooliishshiishe keere uyinsa. Hatte yannara Iyyaasu lowo geeshsha geedhe no.

2Kunnira, isi Israeele baala, geerra, albisoota, daanyootanna olu hajajaano woshshe gamba asse, «Kuneeti ani lowo geeshsha geedhoommo.

3Magani'ne Kaaliiqi ki'ne kaa'late tenne gosa aana assinore baala affinoonni; Magani'ne Kaaliiqi ki'ne daafira gaaramino.

4Kune ani gudoommo daga baatto baalante ledo Yordaanoosinni kayise, galchimaanni Mediteraaniyu Baari geeshsha nootanna gattinota baala iqqa asse oommo'ne.

5Magani'ne Kaaliiqi insa albi'nenni xooqqanno gede assanno; ki'ne alba higgine qaaffini deerrinni, insa fushshe hunanno. Magani'ne Kaaliiqi uyino'ne hexxo garinni baattonsa ragidhinanni.

6Kunnira, Muse borreessinohura Seeru Maxaafira noo hajajo baala seekkitine jawaattine agadhe. Hajajotewiinni ka'anna kawa higginoonte.

7Hakkunni gedensaanni, giddo'ne noo daga ledo horonta namoontinoonte; magannansa su'mano woshshitinoonte. Su'minsanni xaartinoonte; insara soqqantinoonte; kumbuultinoontensa.

8Hakkawarinni xaa geeshsha assitinoonninte gede Magani'ne Kaaliiqira ammanantine heedhe.

9Ki'ne alba higgine qaaffini deerrinni, jajjabbanna jawaata daga Kaaliiqi fushshe shorrino'ne; techo geeshsha ittisa'nera dandiinohu mittuno dino.

10Magani'ne Kaaliiqi uyino'ne hexxo garinni ki'ne daafira gaaramanno'nehura, ki'nehu mittichu, insaha mitto kume shorra dandaanno.

11Kunnira, Magano'ne Kaaliiqa seekkitine baxa hasiissanno'ne.

12Ki'ne ammananitinannikkirenna giddo'ne noo daga ledo adhamatenni karsantinanniha ikkiro kayinni,

13ki'ne alba higgine qaaffini deerrinni, Magani'ne Kaaliiqi tenne daga albi'nenni fushshe shorrannokkita affe. Roorenka insa ki'nera woshshaadonna ubbinanni bale gede ikkitanno'ne; badhe'nera harfaame liche, ille'nera qasanno uta ikkitanno'ne. Magani'ne Kaaliiqi uyino'ne baatto danchate aaninni mittuno gattinikkinni fultine ba'ina geeshsha tini baala bao amaddanno'ne.

14«Kuneeti ani mannu aalo ikkeemmo yanna iillitinoe. Magani'ne Kaaliiqi uyino'ne hexxo garinni assino'neha dancha coye baalanka ki'ne mittu mittunku godowi'nenni seekkitine egentinoonni; isi uyino'ne hexxo giddonni mitteno gattukkinni baalanti wo'mitanno.

15Ikkollana, isi mitte mittenta hexxo wonshino'nente gede, gara gibbinanni yannara aana'ne qoricha dirrisanno.

16Magani'ne Kaaliiqi agadhitinara uyino'ne gondooro diigginironna wole magannara soqqantinanni magansidhininsaro, hanqisinni qorichishanno'ne. Isi uyino'netera dancha baattora ki'ne giddonni mittu nafa dihee'ranno» yiinsa.

← Chapter 22 Jump to: Chapter 24 →