Revelation 19

Sidamo

← Chapter 18 Jump to: Chapter 20 →

1Hakkunni gedensaanni, gordunni lowo mannite gedeeta, «Halleeluya! Gato, ayirrinyunna wolqa Maganinkete.

2Yoosi halaalaanchotenna taalote; foorresenni baatto batteessitinota, foortannota bati'ra Baabilooni qorichishino. Soqqamaanosi mundeera rabbisino» yitannota lowo huuro macciishshummo.

3Qolteno, «Halleeluya! Giddosenni wiliile hegere geeshsha gordo higge tunnuuqqanno» yite naggi yitino qoonqonni raartu.

4Lemiina shoolu geerrinna shoolu kalaqami ayirradu barcimisi aana ofolle noo Magani albaanni gombisante, «Hamii'ni! Halleeluya!» yitanni magansidhu.

5Hakkunni gedensaanni, «Iso waajjitinanniri soqqamaanosi baalu, jajjabbunna shiimmaaddu, Maganonke galatte!» yitanno huuro ayirradu barcimiwiinni fultu.

6Xaano lowo manni huuro labbannota, shooshshanno wayi luulinna banqote beleqi gedee gugatto, «Halleeluya! Wo'manka Dandaannohu Mootichinke Maganu moohino!

7Ge'rechu jili iillinohuranna, adhanno seemo qixxaabbino daafira, amme hagiidhinona, tashshino yoonkena. Isirano ayirrinye uyino.

8Iserano bilicci yitannotanna xurtinokkita shaalado uddano, uddidhanno gede uyinise» yitanna macciishshummo. (Shaalado uddano, qullaawu manniha keeraanchimmate looso leellishshanno.)

9Hakkunni gedensaanni sokkaasinchu, «‹Ge'rechu jili hurbaatira woshshantinori ba'raadhinoreeti› yite borreessi!» yiie. Lede, «Tini halaalaancho Maganu sokkaati» yiie.

10Ani sokkaasincho magansi'rammora lekkasira woroonni kumbuulummo. Isi kayinni, «Qorophi togo ikkitooti! Anino atenna Yesuusi uyino halaale amaddinori roduuwikki ledo soqqamaanchootina, Magano magansi'ri! Yesuusi xawisino halaali, himanaano jawaachishannoho» yiie.

11Hakkunni gedensaanni gordu fa'name hee'reenna, waajjo farashsho afummo. Gulufe nooha, «Ammanaminohonna Halaalaanchoho» yinanni. Isi taalo yoo yaanno; taalotenni olamanno.

12Illesi giirate buwano labbanno; umisi aana haammata mootete worraaqqa no. Iso agurranna wolu mittuno afa dandaannokki su'mi aanasi borreessame no.

13Isi mundeete giddo cuu'noonni uddano uddi're no; su'masi, «Maganu Qaaleeti» yinanni.

14Waajjuulle farado guluffinori, waajjonna xuru nookkita shaalado uddanna uddidhinori, gordu olanto hoodesi hadhanni no.

15Gosa ganannoti iibbitino bise afiisinni fultanno; isi siwiilu siqqonni gashshannonsa. Wo'manka Dandaanno Maganiha kaajjado hanqo leellishannoha, woyinete xajje huuncinanni koofficho kadanno.

16Uddanosinna giwoodisi aana, «Mootoollate Mootenna Mootoollete Mootichi» yinanni su'mi borreessame no.

17Hakkunni gedensaanni arrishshote aana uurrinoha mitto sokkaasincho afummo. Isino iima buubbanno ceara, «Rooru Magani jiliwa amme, gamba yiiyye!

18Mootoollate maala, gaadaannuwate maala, jawaata olanto maala, faradunna faradaasinete maala, mootoollenna borojje, jajjabbanna shiimmaadda yinikkinni mannu baalu maala daggine itte!» yee naggi yitino qoonqonni lallawi.

19Moyichu, baattote aani mootoollanna olantonsa, waajjo farashsho gulufe noohunna olantosi ledo olantara gamba yite noore afummo.

20Ikkollana moyichu amadami; isi albaanni malaatta loosanni noohu kaphaanchu himanaanchino amadami. Isi moyichu malaati noonsarenna isi misile magansidhanni noore malaatta loosanni so'risiisanni no. Insa lamenka ruqanunnihura giirate baarira lubbotenni heedheennanni tungi.

21Gattinore qolle, waajjo farashsho gulufe noohu afiinni fultanno bisenni shini; maalansano cea baala itte duubbu.

← Chapter 18 Jump to: Chapter 20 →