Revelation 4

Sidamo

← Chapter 3 Jump to: Chapter 5 →

1Hakkunni gedensaanni kune gordoho fa'namino waalcho afummo. Umo macciishshummo huuro xurumbunnite gedeeti, «Amo kawa fuli! Kunni ka'ira ikkara noo coye leellisheemmohena» yitue.

2Hakkawoyintenni Qullaawu Ayyaani aana'ya hee'reenna, kune iima gordoho mittu ofolle nooha ayirrado barcima afummo.

3Ayirradu barcimi aana ofollinohu, dana duumunna haanju dilqi gede xawannoho. Ayirrado barcima, wara'a yite xabbanno magani-seemo doyissite no.

4Ayirrado barcima 24 wole ayirradda barcimma doyissite no. Tenne barcimmara, waajjo uddano uddidhinorinna umoho culku ba'latto wodhitinori 24 geerri ofolte no.

5Ayirradu barcimiwiinni belequ, banqonna gugatto fultu. Ayirradu barcimi albaanni lamalu caabbichi buwanni no; hakkuri lamala Maganu ayyaannaati.

6Ayirradu barcimi albaanni, co'o yee xalalinohu hincilaallotenni seekkinoonni baara lawannorichi no. Mereeroho ayirrado barcima doyissite albaanninna badheenni batinye illuwa noonsari shoolu kalaqami no.

7Umi kalaqami doobbiicho lawanno. Layinkihu booto lawanno. Sayikkihu alba manna lawanno. Shoolkihu buuwanni noo allamurcho lawanno.

8Shoolunku kalaqami mittu mittunku lee qoolla afidhino; qoolu giddoyidi nafa gatikkinni illuwa wo'mitinoho. Hashshano barrano fooliishshidhukkinni, «Qullaawu, qullaawu, qullaawu; Hee'rinohu, noohunna daannohu, Wo'manka Dandaannohu Mootichu Maganu» yite faarsitanno.

9Kuri kalaqami ayirradu barcimira ofollinohuranna hegere geeshsha hee'rannohura ayirrinye, guweenyanna galata uyitu yannara,

10lemiina shoolunku geerri ayirradu barcimira ofollinohura albaanni kumbuulte hegere geeshsha hee'rannoha guwissu; ba'lattuwansano ayirradu barcimi albaanni worte,

11«Mootichankenna Maganonke! Baalanka kalaqoottona, kalaqamanno gede assoottohunna, heeshsho oottohu ateetina, atera ayirrinyu, guweenyunna wolqa ikkitohe!» yitanno.

← Chapter 3 Jump to: Chapter 5 →