Ephesians 1

Sotho 1951 (BIBELE)

Jump to: Chapter 2 →

1Paulo Moapostola wa Jesu Kriste ka mo Modimo a ratilego, ke ngwalela bakgethwa ba motseng wa Efeso, ba ba dumetšego Jesu Kriste.

2Kgaugelo a e le tlele le khutšo ye e tšwago go Modimo Tata wešo le go Morena Jesu Kriste.

3A go tumišwe Modimo Tatago Mong wa rena Jesu Kriste, e a re šegoafaditšego ka ditšhegofatšo tšohle tša Moya ka tša magodimong ka Kriste,

4ka mo a re kgethilego ka yena Kriste mola lefase le sešo la thewa, gore re be ba bakgethwa, ba ba se nago bosodi pele ga gagwe.

5Ka lerato o re hlaoletše go ba bana ba gagwe ka Jesu Kriste, a ikgahletše go rata fao,

6gore go retwe letago la kgaugelo ya gagwe, ye a re gaugetšego ka yona ka yena Morategi,

7yo re bonego ka yena topollo ka madi a gagwe, yona tebalelo ya dikarogo ka lehumo la kgaugelo ya gagwe,

8ye a re humišitšego ka yona ka bohlale ka moka le ka tlhaologanyo ka moka,

9Ka go re tsebiša sephiri sa thato ya gagwe. Ke tšona tše a bego a di rata, a dula a di beile pelong ya gagwe,

10gore a tšweletše phethego ya mabaka, gore dilo tšohle tša legodimong le tša lefaseng a di hlatlaganye gore di bušwe ke yena Kriste,

11yena yo re lego bahlaolelwa go ja bohwa ka yena ka go ithatela ga yena Modiratšohle, Mophethamorero wa thato ya gagwe

12gore ka yena go tumišwe letago la gagwe, ka rena re bego re holofetše go tla ga Kriste,

13yo le lena le mo dumetšego le kwele lentšu la therešo, yona Ebangedi ya go phološwa ga lena, la swaiwa ka Moya o mokgethwa, wo le bego le o holofedišitšwe,

14wo e lego yona peeletšo ya bohwa ya go re rena setšhaba sa gagwe re tlo lopollwa, gwa tlo retwa letago la gagwe.

15Ke gona le nna, ge ke kwele ka mo le dumelago Morena Jesu, le ka mo le ratago bakgethwa ka moka,

16ga ke kgaotše go le lebogela, ge ke le gopola dithapelong tša ka,

17gore yena Modimo wa Mong wa rena Jesu Kriste, yena Raletago, a le fe Moya wa bohlale le wa go le utollela tsebo ya go mo tseba;

18a le fe mahlo a pelo e edišitšwego, gore le tsebe kholofelo ya bao a ba biditšego, le tsebe lehumo la letago la bohwa bja ba gagwe, la ba bakgethwa,

19le tsebe bogologolo bja maatla a gagwe a a dirago mo go rena ba re dumelago.

20Ke ona maatla ao a tšweleditšego tiro ye a e kgonnego, maatla ao a bonetšego ge a tsoša Kriste bahung, a mo dudiša ka letsogong le letona la gagwe kua magodimong,

21a mo phagamiša godimo ga babuši bohle le ba maatla bohle le maina ohle a kago bolwa, e sego a lebakeng leno fela, le a lebakeng le le tlogo tla.

22Gomme dilo tšohle o di beile ka tlase ga maoto a gagwe, a mmea a ba hlogo ya phuthego tšohle dilong tšohle.

23Phuthego ya ba mmele wa gagwe mo go tlalago yena Motlalatšohle go bohle.

Jump to: Chapter 2 →