Ephesians 5

Sotho 1951 (BIBELE)

← Chapter 4 Jump to: Chapter 6 →

1Ke gona bang baetši ba Modimo bjalo ka bana ba ba rategago.

2Le tšee ka tsela ya lerato, bjalo ka Kriste ge yena a le ratile, a ikgafa ka baka la lena, a itira seloba le sedimo sa go kgahla Modimo.

3Ge e le bootswa, le ditšhila ka moka, le megabaru, tše bjalo le go bolelwa di se ke tša bolelwa mo go lena; ke sona se se swanetšego bakgethwa.

4Le tša dihlong di se ke tša ba gona, le dipolelo tša bošilo, le metlae e sa lokago. A go atiše go kwala tebogo.

5Le fele le tseba gore e ka ba seotswa, le ge e le wa ditšhila, goba wa megabaru -- gobane wa megabaru o direla medimo e šele -- bohle bao ga ba na kabelo mmušong wa Kriste le wa Modimo.

6Le se ke la forwa ke motho ka dipolelo tša lefela; gobane ke tše bjalo bana ba go se dumele ba ikobelago kgalefo ya Modimo ka tšona.

7Ke gona le se ke la gwerana le ba bjalo.

8Gobane kgale le be le le leswiswi; bjale gomme le seetša Moreneng. Swarang tsela boka bana ba seetša.

9Gobane seenywa sa seetša se mo bothakgeng ka moka le go lokeng le therešong.

10Lekang go hlatha se se kgahlago Morena.

11Le se ke la gwerana le ba mediro ya leswiswi ye e sa tšweletšego dienywa tša selo; sa lena a e be go e sola.

12Gobane tše ba di dirago kutamong, le go di bolela go leša dihlong.

13Gomme tšeo ka moka ge di solwa, di bonegelwa ke seetša; gobane ka moka tše di bonegelwago di tšwela seetšeng.

14Go bolelwa tšona ge go thwe: Phakgama Morobadi, o tsoge bahung; mme Kriste o tlo go ediša.

15Ke gona phakgamelang go swara tsela ka go itota; le se etše mašilo, le etše bahlale.

16Le thakanele sebaka se botse; gobane mehla yeno ke e mebe.

17Lesang ge go ba mašilo; sa lena e be go hlatha se Modimo a se ratago.

18Le se ke la boiwa ke sedila; ke mo go tšwago bohlola. Sa lena e be go tlala Moya,

19le fele le boledišana ka dipsalme le ka difela le ka dikopelo tša Moya; le opelele Morena le mminele ka dipelong tša lena.

20Ka mehla le leboge Modimo Tata wešo ka Leina la Mong a rena Jesu Kriste ka baka la tšohle.

21Le be ba go ipoetša ka go godišana le le ba go boifa Modimo.

22Lena basadi, le be ba ba kwago banna ba lena, bjalo ka ge le ekwa Morena.

23Gobane monna ke hlogo ya mosadi, bjalo ka ge Kriste e le yena hlogo ya phuthego, e le yena Mophološi wa mmele wa gagwe.

24Bjalo ka ge phuthego e ekwa Kriste, le basadi ba kwe banna ba bona dilong ka moka.

25Lena banna, ratang basadi ba lena, bjalo ka ge Kriste a ratile phuthego, a ikgafa ka baka la yona,

26a e dira e kgethwa, a e hlatswa ka tlhatso ya meetse a nago le lentšu,

27Gore a ipolele phuthego e nago le letago, e se nago senyalo le lengalatsepa le tše bjalo, phuthegokgethwa e se nago bosodi.

28Gomme banna a ba tsebe ge go ba swanetše ge ba rata basadi ba bona, ka mokgwa wo ba ratago mebele ya bona ka wona. Ge monna a rata mosadi wa gagwe ke gona ge a ithata.

29Ga go motho e a kilego a hloya mmele wa gagwe; se motho a se dirago ke go o fepa le go o babalela; le Kriste o dira phuthego ka mokgwa woo.

30Gobane re ditho tša mmele wa gagwe, re ba nama ya gagwe, re ba mašapo a gagwe.

31Ka baka leo motho o tlo tlogela tatagwe le mmagwe, a gomarela mosadi wa gagwe, gomme ka babedi ba tlo ba nama e tee.

32Sephiri se ke se segolo; ge ke se bolela ke ra Kriste le phuthego.

33Ke fetša ka go re: Mang le mang a rate mosadi wa gagwe ka mokgwa wo a ithatago ka wona; gore mosadi yena a boife monna.

← Chapter 4 Jump to: Chapter 6 →